狐家姐 2014 年 12 月畫集

狐家姐 12 月既作品：

雪人

聖誕樹

聖誕老人

鴨

長頸鹿

狐家姐學彈琴 @ 第 3 本琴書

狐家姐由上一兩堂開始學合手彈琴，由於疏於練習，狐家姐都未係好掌握到合手彈歌仔，老師有見及此，佢提議狐家姐可以買 1 本比較簡單教合手彈歌仔既書，所以狐媽媽就買咗呢本 "Step by Step" 既琴書，希望狐家姐好快可以掌握到合手彈歌！

2014 年聖誕禮物

截至今日，兩位狐小姐各自已收到 3 份聖誕禮物喇！

第 1 份當然係狐爸爸同狐媽媽送既 Peppa pig classroom set 喇！第 2 份係狐媽媽老細 JW 送既書， 1 本係 Peppa pig 時鐘書，1 本係聖誕老人書！第 3 份係謙爸同謙媽送既 Minnie 手錶同 Minnie 背包，狐妹妹大愛 Minnie 背包，攬到實一實，鍾意到不得了；多謝 JW 同謙爸謙媽送既聖誕禮物！

狐家姐學游水 ＠ 第 1 次考核結果

月頭狐家姐泳班進行咗考核，今日出咗進度考核表喇！

考核表有 8 樣嘢做評核，做哂 8 樣就可以升 level 2！今次考核主要係考 3 樣嘢，第 1 樣係基本打腿同手部動作，第 2 樣係水中呼氣，第 3 樣係打腿動作同換氣之間既配合；狐家姐 3 樣都做到，叻叻，要繼續加油！

1206 冒險樂園之旅

今日見無嘢做，同兩位狐小姐食完早午餐，約埋謙爸媽一齊出發去冒險樂園玩！

今次係去黃埔冒險樂園，買好哂套票同代幣就出發去冒險！

套票主要係用黎玩大型機動遊戲如跳樓機，大型波波池，火車，海盜船等等，狐家姐先挑戰咗跳樓機；狐家姐係第 1 次玩呢啲機動遊戲，玩時好緊張同有啲驚，玩完又話好好玩；之後就去玩波波池；而狐媽媽就同狐妹妹去坐火車之後再加入玩波波池！

狐妹妹都幾大膽，自己一口氣爬上最高嗰層波波池然後玩滑梯落返黎，一啲都唔驚仲笑哂咁；之後仲有玩碰碰車同海盜船添；玩完遊戲換咗幾包糖就離開，之後約埋兔兔一家一齊食飯，兩位狐小姐今日玩得好開心！

狐家姐學游水 @ 第 1 次泳班考核

今日係狐家姐泳班考核，其實都唔係真係正式考試，只要做到教練要求既嘢就可以！

以狐媽媽觀察，狐家姐應該可以達到教練既要求，狐媽媽相信狐家姐好快可以學識游水！

親子黏土 (1)

今日又同兩位狐小姐整黏土，今次主題係生果籃！

狐媽媽先整咗一個大籃用黎放水果，之後就開始整生果！今日先整咗 4 種水果，分別有橙，蘋果，提子同埋士多啤梨，遲啲再加其他生果落去放滿去！

狐家姐 K2 親子旅行 @ 大棠荔枝山莊

今日係狐家姐學校親子旅行既日子，今年既旅行地點係大棠荔枝山莊！

8:45 喺學校對出空地集合，之後就坐車出發去大棠荔枝山莊！

大棠荔枝山莊都 ok 空曠，一入到去就有兒童樂園（即滑梯，繩網）；狐家姐好大膽，佢居然敢玩繩網，仲不停咁上上落落添，一啲膽怯都無！

玩完兒童樂園，就轉入去小動物園區，動物園區有駝島，山羊，兔仔可以餵嘢食；仲有撈金魚同埋小型車場，狐家姐樣樣都玩齊！

之後諗住去馬場睇馬仔，但沿路經過彈床區同整沙樽區，狐家姐選擇咗玩彈床同沙樽；玩完呢個兩個就食午餐（狐媽媽準備咗熟雞蛋同吞拿魚三文治），再去大草地玩集體遊戲同影班相，跟住就自由時間！

大約 3:00 到，大家就回程返學校解散，狐家姐今日玩得好開心，喺車到瞓到好冧！

親子黏土

今年暑假時狐家姐上咗暑期黏土班，見佢好鍾意黏土，好想買返屋企同佢一齊玩！

近排夜晚多咗時間對住佢地，狐媽媽就決定搜索一下有無黏土；狐媽媽喺拍賣見到有 2 套套裝都幾好；1 套係太空黏土（即係輕黏土），完成品只需要風乾 3 日就變硬；另 1 套係軟陶土（即係類近泥膠），完成品要用焗爐焗熱先會變硬，但未焗前都可以不停改變還原！

前者就比較啱狐家姐同狐妹妹玩；後者就一日未焗都可以改變還原，兩套都唔錯，所以狐媽媽就兩套都買哂同佢地一齊親子一下！

今日先開黏土先，狐媽媽同狐家姐狐妹妹整咗兩個蛋糕同兩個人仔！佢地玩得好開心，果然無買錯！

狐妹妹交留位費 @ 呂郭碧鳳

之前狐妹妹收到呂郭碧鳳既收生信，佢定咗 11 月 25 至 28 或 12 月 1 至 4 要去交留位費；雖然係平日，但因為決定咗狐妹妹都係返呢間學校，所以狐媽媽今日請咗半日假專情幫狐妹妹去交留位費！

放工坐車去到學校，去校務處交低留位費就搞掂，校務主任話大約 4, 5 月到會有信寄黎關於自動轉帳交學費同埋買校服；因為之前狐家姐有校服，書包，生日袋，所以只係到時填好自動轉帳表格就搞掂喇！

安樂哂，希望狐妹妹同狐家姐一樣，鍾意呢間學校同開心返學！

2014 年聖誕影集 - 德福廣場

又到聖誕月，各個商場已經準備咗好多聖誕佈置；今日無特別嘢做，狐家一家決定去德福廣場行逛順便影吓今年既聖誕佈置！

今年德福既聖誕佈置係幾米既＂地下鐵＂，狐家姐同狐妹妹見到有好多 30 呎既幾米公仔超興奮，狐媽媽幫佢地影咗好多相添！開始要帶佢地去四圍去影聖誕燈飾喇！

狐妹妹進入戒片狀態

狐妹妹進入 20 個月到既時候，間唔中都有帶佢入廁所叫佢試吓坐廁所 vv！

可能因為有狐家姐既關係，狐妹妹由初初有啲驚坐廁所到而家成日同狐家姐爭去廁所，而且發覺狐妹妹大部份時間去廁所都有 vv ；狐媽媽見到咁，就決定開始幫狐妹妹戒片！

狐媽媽最先每 15 分鐘帶狐妹妹去一次廁所，基本上狐妹妹都有 vv；之後就開始隔 30 分鐘再帶狐妹妹去，都係次次有；之後就決定每隔 1 個鐘去 1 次，基本上已經可以去到；狐妹妹間唔中都會自己講＂我要便便（其實係 vv ）＂！

狐妹妹而家日頭時間都係著底褲仔，係瞓晏覺同出街就著學習褲！希望狐妹妹快啲可以自行講去 vv 同便便，咁就可以進入戒片第 2 階段喇！

減肥進度 (4)

又過多 1 個禮拜，今個禮拜無乜進展，磅數維持不變，可能因為狐媽媽食番多咗嘢，要控制吓先得！

咁就做咗 1 個 gym 喇，希望可以喺旅行前減到多少少磅數喇！

Polar M400

雖則之前買咗 NB chest strap 同 watch，但係佢地仲未有 app 支援 android（得 IOS）！

有見及此，狐爸爸又另外買咗 Polar M400 watch 加 chest strap 俾狐媽媽（當然狐爸爸自己都有份），雖然 Polar 都未支援到 android ，但佢好快會有（會出得俾 NB 快），而且佢應該勁過 NB！

狐媽媽要努力加油！

狐家姐 2014 年 11 月畫集

狐家姐 11 月既作品：

鳥

企鵝

金魚

牛

狐家姐遲黎既生日禮物

今日狐家姐收到 1 份遲黎既生日禮物，禮物係由狐姨媽送既，係狐家姐同狐妹妹至愛既 Peppa Pig ，仲要係 1 間 Playhouse 添；另外仲有 Peppa Pig 1 家 4 口既公仔添！

狐家姐見到份禮物真係開心到，仲要即刻拆出黎玩添，連狐妹妹都開心埋一份，真係多謝咁姨媽！

NB Heart Rate Chest Strap 及 NB Watch EX915

狐爸爸見狐媽媽咁勤力做運動，但又記錄唔到啲數據，所以就買咗條 heart rate chest strap 俾狐媽媽！

只要做運動時戴住條 heart rate chest strap ，就可以根據心跳出埋其他數據，咁就可以正確咁記錄；再加埋隻 NB watch，狐媽媽要再加油努力，務求達到目標！

狐妹妹再被取錄

今日打開信箱見到有狐妹妹既信，都知道應該係學校寄黎！

果然係呂郭碧鳳寄黎既取錄信，佢地收咗狐妹妹讀 N 班；而家要決定究竟讀榮光既上晝班定呂郭碧鳳下晝班！

減肥進度 (3)

因為膝頭持續痛咗 2 個禮拜，同事建議下去見見 personal trainer！

今日個 personal trainer 用 1 個電子機器黎 check 狐媽媽身體脂肪，肌肉，水份比例；發覺狐媽媽原來只係輕咗 3 磅，即仲係 128 磅；而且脂肪比例超哂標；肌肉同水份都唔夠！

Trainer 教咗狐媽媽幾個動作加強下半身肌肉，同埋叫狐媽媽戒一戒飯，咁樣先可以改善身體；等狐媽媽再努力，務求要達成目標（減 10 磅），fighting！

香港鐵路博物館

之前一直話想去鐵路博物館，但遲遲都無去，今日終於決定帶兩位狐小姐去！

去到大埔，沿住路牌行，上咗樓梯已經到咗鐵路博物館；一眼望埋去見有個大埔車站，前面係火車路軌，仲有 1 架舊式火車喺度俾人影相！

兩位狐小姐一見到就衝埋去路軌到，仲坐喺度勁玩石仔；玩咗一陣就捉住兩位狐小姐同舊式火車影相，再去參觀埋舊式客運火車同展覽館，咁就過咗開心既一日！

減肥進度 (2)

經過咗兩個星期既努力，狐媽媽減多兩磅，而家係 126 磅，距離目標（減 10 磅）又邁進一小步！

雖則有少少減磅，但陪隨而黎就係兩邊膝頭超痛，唔知係咪狐媽媽操得過咗位定姿勢唔啱呢，而家要暫時縮短時間，又或者改而徑步，希望兩邊膝頭唔使受咁多力，快啲唔痛就好喇！

Day 4 至 6 酒店 @ 2015 年新加坡之旅

之前定咗行程 Day 4 至 Day 6 會去聖淘沙，如果住 Carlton City 車費都幾貴，所以決定住聖淘沙嗰邊既酒店！

經過一輪資料搜集，俾狐媽媽搵到 1 間喺聖淘沙中心，又近環球影城，價錢又唔太貴既酒店，就係 Movenpick Heritage Hotel Sentosa！

同謙爸謙媽商量完，今日決定喺呢間酒店既 offiical website 到訂房，又搞掂埋 Day 4 & 5 晚住既地方喇！

Movenpick Heritage Hotel Sentosa

至於 Day 6 晚，大家決定住 Carlton City Hotel Singapore，呢個會搵 Blog 友介紹既 Jason book（Jason FB），酒店方面終於 book 好哂喇！

Carlton City Hotel Singapore

另外仲 book 埋 1 架大車由機場接大夥去 Legoland Malaysia Hotel，之後再由 Legoland 去聖淘沙，來回大約係 SGD180！

至於各類門票，可能都係搵 Jason 買埋，去到再交收，大部份嘢都搞掂，而家就等時間，快啲去到 2015 年喇！

結婚 7 週年（銅婚）紀念

今日係狐爸爸同狐媽媽結婚 7 週年既日子，話咁快就過咗 7 年喇，狐媽媽希望同狐爸爸加埋狐家姐狐妹妹開開心心，齊齊整整過生活！

狐爸爸今日要參加公司活動，所以狐爸爸同狐媽媽尋日已經出街食飯慶祝吓！

狐爸爸，7 週年快樂！

修改行程 @ 2015 年新加坡之旅

同謙爸同謙媽商量完一輪之後，而家決定行程有少少改動！

Day 1 唔去 Night Safari，改直接去新山嗰邊，連住 2 晚 Legoland；所以而家變咗可以 book 咗 Legoland hotel 先！

對比過其他，發覺 through Legoland official website 訂酒店價錢唔差幾遠，而且仲有個 2-days combo tickets promo，所以即訂！

Legoland Malaysia Hotel

狐媽媽原本想揀 Kingdom Themed，但見謙爸揀 Pirate Themed，加上得 Pirate Themed 有 connecting rooms，所以狐媽媽最終都轉 book 埋 Pirate Themed；啱啱 book 好咗 hotel，搞掂一樣；係差 Day 4-6 既酒店未 book，要快啲定好行程再決定住邊！

狐妹妹人生第 2 個 interview

狐妹妹今日去佢人生第 2 個 interview，interview 既學校係狐家姐以前讀 N 班既呂郭碧鳳；原本仲有另 1 間要見，不過狐爸爸同狐媽媽決定放棄嗰間！

面見時間係 12:40 ，去到坐一陣就叫名；入到課室，老師就問狐妹妹叫乜嘢名，好好彩狐妹妹都叫識講自己個名（雖然唔係好清，上星期狐妹妹都仲要跟狐媽媽口水尾講）；之後老師師叫佢玩食嘢玩具，請狐媽媽食，請老師食；跟住又玩疊疊遊戲；狐妹妹大致上都做到哂！

老師同狐媽媽講學校今年只係會開下晝班 N 班，而結果會喺 24 號通知，希望狐妹妹呢間都成功！

狐妹妹被取錄了

上星期狐妹妹去完佢人生第 1 個 interview 之後，今日打開信箱見到有信俾狐妹妹，大約都估到應該係學校寄黎！

打開信，估唔到狐妹妹同狐家姐一樣，見完第 1 間學校就收咗佢，狐妹妹仲要係上晝班添！信入面話要 12 號之前去交留位費，但狐妹妹聽日先去見狐家姐舊校，所以狐爸爸同狐媽媽決定先去交留位費，等見埋聽日先再決定讀邊間，狐妹妹加油！

行程預算 @ 2015 年新加坡之旅

好在有謙媽，佢地已經有幾次同謙去旅行既經驗，佢地已有一個好完善既預算表！

正當狐媽媽想整既時候，謙媽已經電郵咗俾狐媽媽；狐媽媽只需改動少少，狐家既預算已經出咗黎，真係唔該哂謙媽！

編排行程 @ 2015 年新加坡之旅

訂完機票，其實應該訂酒店先，但因為狐家同謙家都未過新加坡，所以決定唔到訂邊間酒店，要先安排咗行程先可以決定訂邊間酒店！

經過狐媽媽同謙媽一輪搜集資料，再同謙爸同狐爸爸商量後，終於整理咗 1 個行程表出黎：

Day 1 : Night Safari 夜間動物園
Day 2 & Day 3 : Legoland Theme Park + Water Park 樂高樂園 + 水上樂園
Day 4 : 斜坡滑車 + 空中吊椅，Flyer 摩天輪 (6:00 後)
Day 5 : USS 環球影城

如果行程無變，應該好快 book 埋酒店！

預訂機票 @ 2015 年新加坡之旅

尋日謙媽 whatsapp 咗啲資料俾我，見到 Meethk 有 CX 平機票去新加坡 (HK$840)，出發日期截止 2015 年 5 月 27 日！

見到咁抵，狐媽媽就 fwd 啲資料俾狐爸爸睇問下意見！狐爸爸今朝早話可以去，即刻同謙媽講可以訂機票！

因為啲機票真係好平，所以好多狐媽媽同謙媽諗定既日子都俾人 book 哂啲位，得番啲零晨去既機位同晨咁早返既機位！

再同狐爸爸同謙媽商量，決定揀貴少少既機位 (HK$1,540)，因為多啲時間選擇；決定咗就即預訂咗出年既 4 月 7 至 12 日既機位；遲啲就訂酒店同度行程，期待 4 月快啲黎！

而家機票係 HK$1,540 再加埋稅 HK$673 大人，HK$553 小童，大約每人 HK$2,200 到，叫 ok 喇！

減肥進度 (1)

經過咗 4 日既努力，狐媽媽感覺自己個人好似輕身咗少少，但腰間既米芝連依然健在，暫時既磅數係 128 磅！

狐媽媽要再努力啲同忍口，目標係減 10 磅！

狐家姐 2014 年 10 月畫集

狐家姐 10 月既作品：

蜜蜂

蝴蝶

貓

龜

1026 BBQ 聚會

今日約咗陳李姚氏 3 家一齊去 BBQ，地點係泥涌！

今朝一早同狐家姐學完琴，等埋狐爸爸洗牙，狐家就出發匯合陳李姚氏！

今日真係好齊人，4 家大小朋友都到齊，好耐無試過喇！今日天氣唔錯，唔熱；小朋友玩得好開心；大家仲黎咗張大合照添！

兩位狐小姐一返到屋企洗完白白就好早上床瞓覺，期待下一次聚會！

狐妹妹第 3 張証件相

黎緊呢佪星期會開始幫狐妹妹報名 N 班同理 interview，所以上星期帶狐妹妹去剪頭髮，今日就帶狐妹妹去影多次相！

狐妹妹剪完頭髮特別醒神，仲好容易引到佢笑添，今次張相好滿意，希望狐妹妹面試成功！

減肥計劃

狐媽媽之前雄心壯志話要減肥，仲買定鄭多燕諗住跳，點知結果都係中途放棄咗！

但狐媽媽最近真係肥咗好多，連狐爸爸都忍唔住出咗多次＂口頭警告＂！

咁啱狐媽媽見到有個同事近排突然瘦咗好多，細問之下原來同事最近參加咗 gym，差唔多日日 lunch 時間就去做；經過咗個幾月努力，減咗成 1x 磅！狐媽媽聽到真係好想好似同事咁減到磅！

幾經掙扎，狐媽媽今日簽咗 1 年 gym，星期一開始實行狐媽媽既減肥大計，目標係減 10 磅，狐媽媽加油，fighting！

UGBang + 彊屍面膜

天氣開始轉涼，又係時候買吓新護膚品；最近大熱既彊屍面膜，狐媽媽已經想試好耐，今日終於被狐媽媽羅致旗下！

另外見愛美麗讚 UGBang 都唔錯，所以又招攬埋佢既 eye mask 同 mask ，仲有 toner 同 cream；狐媽媽又要努力敷吓面膜先！

電影夜：The Judge

狐爸爸同狐媽媽今日參加咗狐媽媽公司搞既員工電影夜，地點係金鐘 AMC！

今次睇既戲係由 Ironman Robert Downey Jr. 主演既 The Judge，故事係講 Robert Downey 既爸爸被控謀殺，Robert Downey 成為佢自己爸爸既辯護律師；套戲都幾好睇，幾感人，good！

狐家姐學游水 @ 泳天

其實之前已經想俾狐家姐學游水，試過 1 堂同庭庭一齊學游；可能因為係阿 Sir 嘅關係，狐家姐唔係幾鍾意，結果無再學！

早排謙媽問狐媽一唔一齊學游水，見喺屋企隔離間中學游，又有暖水池，又同謙一齊學，狐家姐一定會學，所以就幫佢報咗名！

今日係第 1 堂游水，狐家姐同謙由 Miss 帶入泳池熱身，而狐媽媽就同謙爸謙媽喺上面看台坐睇住佢地游！

狐家姐睇落唔驚水而且游得 ok 開心，Miss 仲教佢地踢水添，希望狐家姐好快學識游水喇！

2014 年迪士尼之旅 @ 狐家姐 4 歲生日

國慶日係狐家姐 4 歲生日，狐爸爸同狐媽媽為狐家姐安排迪士尼兩日一夜生日之旅！

狐媽媽之前已經預訂咗迪士尼酒店嘅夢幻客房，呢隻客房全迪士尼酒店得 26 間，備有 1 張超大床，而且大部份都望海景！

酒店 check-in 時間係 3:00 ，所以狐家大約 4:00 去到 check-in，跟手買埋 2 日園票同埋早餐優惠券，之後就上房放低行李；上到房，門口已見貼咗 Micky 貼紙，開門入去，間房真係好正好大，景觀望海，窗上面貼咗大大個 Micky 同 Minnie；床頭有小仙子標誌，兩位狐小姐簡直開心到爆！

執拾好行裝，狐家就向迪士尼出發；入到園已見到有 1 條人龍，知道應該有人物可以影相，狐媽媽就同兩位狐小姐排隊，原來條隊係同 Magic Mickey 影相；影完 Micky ，買咗少少嘢食就繼續行；狐爸爸同狐媽媽決定今日主力係同迪士尼人物影相，之後去睇今日正式開始嘅光影匯，再睇煙花！

去到影相區，狐家先後同 Minnie, Donald Duck, 高飛同 Pluto 影相，之後就去河景餐廳食晚飯；食完飯就向小鎮大街出發準備欣賞光影匯！光影匯好精彩，有好多花車巡遊；睇完光影匯，狐家就向睡公主城堡出發，準備欣賞煙花！煙花同樣精彩，兩位狐小姐睇到眼定定同不時大叫！

睇完煙花，狐家返番酒店洗白白然後覺覺豬，準備聽日再戰迪士尼！

第 2 日一早起身，先去華特餐廳食個半自助早餐，之後就去迪士尼碼頭行咗一陣；行完就返酒店洗白白，執拾好行裝就 check-out 再入園！

今日入園主要係玩，狐家先去玩巴斯光年；之後就去咗小小世界坐船仔；休息咗一陣，再轉戰小熊維尼；然後去睇 Micky 3D 劇；再之後遇到 Chip and Dale ，同佢地影完相就離開樂園轉戰東涌嘆雪糕就結束咗 2 日 1 日嘅奇妙之旅喇！

狐家姐同狐妹妹玩得非常之開心，狐爸爸同狐媽媽都好滿足，期待有機會再去！

狐家姐學彈琴 @ 第 2 本琴書

話咁快狐家姐就學咗 3 個月琴，今日終於學完第 1 本喇，教琴老師話可以買定第 2 本準備彈更多歌仔！

狐家姐知道有得買新書超開心，仲好期待老師教佢彈新書歌仔！

狐媽媽希望狐家姐真心喜歡彈琴，彈得開心！

狐家姐 2014 年 9 月畫集

狐家姐 9 月既作品：

中秋節

金魚

鳥

927 蒲台島南丫生態之旅

今日狐媽媽同狐爸爸參加咗由狐爸爸公司舉辦嘅蒲台島南丫生態之旅！

狐爸爸同狐媽媽一早出發去尖咀鐘樓集合，之後就坐船出發去蒲台島！大約坐咗個半鐘到就到達香港最南邊嘅蒲台島！落船買咗支薏米檸檬解渴，之後就出發行上燈塔影團體相。行咗個半鐘就返番碼頭上船去南丫島食海鮮午餐！

午餐有蝦，魚，龍蝦，鮑魚，扇貝等，飯後仲有支榴槤雪條食；食完就出發去南丫島漁民文化村參觀同玩無勾釣魚，之後就坐番個半鐘返番去鐘樓解散！

今日天清氣朗，期待下次再參加呢類活動！

狐家姐農曆 4 歲生日

話咁快今日原來係狐家姐農曆 4 歲生日，狐媽媽原本都唔記得，係喺 FB 見到 1001 媽媽 post 咗切蛋糕相先記起！

於是狐媽媽放工即買個小型蛋糕返去同狐家姐慶祝，仲送上狐爸爸同狐媽媽嘅利是添，希望狐家姐生生性性，乖巧啲，好好照顧狐妹妹就 ok 喇！

健康院檢查兼打歲半針

話咁快狐妹妹就歲半喇，又係時候返健康院檢查加打針喇！

約咗 11:00 去打針，做咗登記等叫名磅重，狐妹妹大約有 20 磅，同狐家姐只係差 10 磅咋，睇黎要幫狐家姐增吓磅先！

磅完重就見姑娘，姑娘俾咗啲積木叫狐妹妹疊高高，成功 pass；之後俾把梳仔叫狐妹妹梳頭，都 pass；再問吓講嘢方面，都 pass ；之後就等叫名打針！狐妹妹叻叻，打兩針完全無喊過，之後攞埋藥就返屋企休息喇！

909 澳門遊

狐家姐 K2 開學日 + Countryyard Marriott High-tea

狐家姐 2014 年 8 月畫集

狐家姐 8 月既作品：

生果籃

加菲貓

人

龜

海馬

再多位新成員 @ 狐媽花園

今日又位狐媽個花園添置多位新成員，佢叫金雀俐，見佢幾得意，唔知會唔會伸好多爪出黎呢！但喺同一時間，早排加入無耐既家樂花就捱唔住死咗！

新成員 @ 狐媽花園

狐媽花園經過咗個幾月嘅變化，其間舊嘅粉紅色家樂花死咗，換咗玫紅色家樂花！

今日又有 2 位新成員加入，就係太陽花同搖錢樹！太陽花啲葉仔會由綠色變做紅色同埋會開一啲小花；搖錢樹就有少少似仙人掌咁，會開一啲小葉！

遲吓狐媽花園仲有 2 位新成員會加入，1 位係冷水花，1 位係水竹草，期待中！

狐家姐 2014 年 7 月畫集

狐家姐 7 月既作品：

樹熊

鹿／馬

史路比

米奇

Lego 深淵 - Lego Creative Building Cube (10681)

之前見狐家姐同謙玩 Lego ，狐媽媽見到狐家姐玩得好開心，就好想買番 1 盒俾狐家姐（其實係滿足狐媽媽既虛榮心）！

咁啱狐媽媽其中 1 位老細亨利去 Legoland 玩，於是狐媽媽搭單請亨利幫買 1 盒 Creative Building Cube （結果亨利當手信送俾狐媽媽）；點解狐媽媽會揀呢個？因為佢無特定主題，可以俾狐家姐自由發揮鍾意砌乜都可以！

狐媽媽鍾意滿足咗自己既虛榮心擁有 1 盒 Lego ，希望狐家姐鍾意玩！

2014 年暑期班正式開始

由今日起，狐家姐嘅暑期班正式開始！

狐媽媽幫狐家姐報咗幾個唔同嘅暑期班，包括星期二上黏土班，星期四上幼兒敲擊樂班同幼兒普通話故事班，仲有星期五上嘅甜品班！

希望狐家姐鍾意呢啲暑期班喇！

狐家姐 2014 年 6 月畫集

狐家姐開始學晝晝，等狐媽媽幫狐家姐紀錄吓啲作品先：

叮噹

父親節

維尼

壞蛋奬門人

　　　



狐家姐學畫畫

以前見狐家姐話鍾意畫畫，所以狐媽媽就幫狐家姐報咗 1 間琴行嘅畫班，今日第 1 日開始畫班！

呢個畫班大約 1 個鐘，狐媽媽放低狐家姐喺琴行就走咗，1 個鐘後再返去接狐家姐！

狐家姐真係好鍾意畫畫，佢話好開心添，希望狐家繼續開心畫落去！

狐家姐學彈琴

由今日開始，狐媽媽同狐家姐一齊上親子鋼琴班！

狐家姐之前對芭蕾舞完全無興趣，狐媽媽就試吓幫狐家姐報學鋼琴；今日係第 1 堂，鋼琴 miss 都好 nice，佢好有耐心咁教狐家姐；狐媽媽喺側邊陪住狐家姐，見佢都 ok 鍾意，希望佢會彈得開心！

牛奶麵包（吐司 mode）@ P 仔（附食譜）

原本想整吓麵包俾兩姊妹食，點知狐妹妹瞓瞓吓覺突然喪喊，完全唔知佢想要乜，結果搞咗半個鐘有多佢先喺攞住支奶狐爸爸抱住嘅情況下瞓番，唯有放哂啲料落麵包機等佢自己做！

今次只係整牛奶麵包

食譜：

高筋麵粉　　　300 克
牛奶　　　　　170 克
鹽　　　　　　3 克
砂糖　　　　　38 克
牛油　　　　　37 克
酵母　　　　　3 克

用咗 mode 3 整，出黎都 ok 高，密度都細，狐家姐見到新鮮出爐包，即攞 1 塊食；狐妹妹都唔執輸，齊齊食！

Housewarming @ 毛毛家

毛毛又搬咗新屋，比之前嘅再大啲，係狐家夢寐以求嘅 3 房大單位，狐家當然又要去參觀吓示範單位喇！

一早同狐家姐報暑假班，之後就同狐爺爺狐嫲嫲飲茶，然後就出發去毛毛新屋！

由 ST 去 TKO 都好快，半個鐘就到！毛毛住嘅屋苑好大，好多設備；毛毛住得越黎越高，今次住到 55 樓！

上到去，休息咗一陣就開始參觀示範單位，毛毛新屋有 3 間房，2 個廁所，有個大露台，仲有間儲物室，簡直係狐媽媽夢想中嘅屋！

參觀完就開始今日另一活動，同毛毛一齊整腸仔包！Lo 仔同狐家姐見到又要參與埋一份；造好哂型之後，因為發酵需時，毛毛提議落會所玩！

會所都幾大，有小朋友區同 BB 區，仲有圖書區添；玩咗 1 個鐘到，大隊就上番毛毛屋企準備將麵包入爐！

兩盤包共焗咗 30 分鐘就出爐，一出爐個個都爭住食，超軟綿綿，好快就清哂一盤！食完麵包，Lo 仔同狐家姐玩咗一陣 Lego 就完結咗今日嘅 housewarming！

多謝毛毛同 Lo 嘅款待，下次再玩過！

睇骨科

由有狐家姐開始，狐媽媽間唔中就會坐骨神經痛；狐媽媽見又唔係痛到好嚴重，所以一直都無理佢！

直至最近，有日狐媽媽同狐家姐一齊整餅，狐媽媽彎咗腰成個下晝，就係咁出咗事，第二日狐媽媽無輪行，企或坐坐骨神經都痛，連攞個 box file 都痛；同事們提議狐媽媽去做物理治療，但首先要搵個普通科醫生睇左先，然後等佢寫轉介信去做物理治療！

狐媽媽當日放工就走咗去睇普通科醫生；同醫生講完之後醫生問狐媽媽想點，狐媽媽當然想儘快去做物理治療；但醫生話咁樣係跳咗步驟，於是佢寫咗封轉介信俾狐媽媽去睇骨科！

狐媽媽覺得奇怪，點解坐骨神經痛會轉介去骨科；再問番同事，同事解釋醫生係擔心啲骨有事，所以會先轉介去骨科，再轉介去做物理治療！狐媽媽明白哂就即 search 公司網絡嘅骨科醫生；狐媽媽揀咗香港骨科中心嘅醫生，約定咗今日去睇！

今日收工去到骨科中心做完登記，等咗一陣就入去見醫生；醫生聽完狐媽媽講病情，就上床做檢查；醫生按狐媽媽盤骨位有啲痛，即安排狐媽媽去照 X-ray！照完好快就出咗報告，醫生話狐媽媽生咗兩個小朋友加上無好好保養條腰骨，最尾嗰節骨退化咗，但問題唔大，做番多啲運動同好好保養就無問題，仲寫咗轉介信俾狐媽媽去做物理治療！

狐媽媽見骨科中心都有物理治療，於是就 book 埋佢地嘅治療師，慳咗狐媽媽再搵其他物理治療師嘅時間，仲約定咗 23 號做第 1 次物理治療，希望物理治療減輕狐媽媽嘅坐骨神經痛！

健康院檢查 @ 14 個月

狐妹妹喺 1 歲檢查嗰時由於唔可以用兩隻手指攞起物品，健康院姑娘要求狐妹妹 14 個大再返健康院 1 次，今日就係返健康院嘅日子！

一早送咗狐家姐返學，之後就同狐爸爸出咗新城市 hea 行；之後返去入狐家姐放學；食完午飯，狐家姐過狐嫲嫲到瞓覺，而狐爸爸狐媽媽就同狐妹妹出發去健康院！

去到其實只係見姑娘跟住就測試吓手指，狐妹妹今次完全無問題，見完姑娘，約埋歲半針就走得！同狐爸爸食埋個 tea 就返去接狐家姐返屋企！

2014 年海洋公園之旅

買咗至少半年嘅海洋公園飛，終於決定今日去！

原本見天陰陰想取消，但因為 15 號到期，最後都係如期照去！執拾好行裝，約好咗狐嫲嫲就向海洋公園出發！

大約 11:30 去到海洋公園，幫狐嫲嫲同狐家姐買飛就入園喇，因為狐叔叔同狐嬸嬸已經等咗好耐！

會合咗狐叔叔同狐嬸嬸，就向威威劇場出發睇表演；睇完表演，就去坐狐家姐至愛嘅纜車；狐妹妹係第 1 次正式坐纜車，同狐家姐一樣，唔驚，仲好開心添！

上到山上，因為已經係午飯時間，揀咗纜車站隔離嘅灣景餐廳醫肚；食飽飽就去睇水母同埋海豚，之後再坐番纜車落山返屋企休息！

藍莓鬆餅（附食譜）

趁狐家姊妹瞓咗晏覺，就整吓鬆餅俾佢地食，食譜參考自家製曲奇小蛋糕一書嘅提子鬆餅！

食譜：

牛油　　　　　30 克
砂糖　　　　　45 克（原食譜 50 克）
低筋麵粉　　　60 克
泡打粉　　　　2 克
全蛋　　　　　2 隻
牛奶　　　　　10 克
藍莓乾　　　　適量（原食譜話 20 克，狐媽媽覺得唔夠，所以自行加多啲）

做法：

先將低粉同泡打粉過籂備用；牛油室溫放軟同糖打勻；分兩次加入蛋再打勻；再加入牛奶打勻；分兩次加入粉類拌勻；最後加入藍莓乾；放入入爐紙杯；預熱焗爐 180 度；焗 20 分鐘即成！

焗完 20 分鐘之後，狐媽媽見蛋糕面好似仲有啲濕，所以再入爐焗多 20 分鐘；味道 ok，係啲藍莓沉哂落底；兩姊妹食完想再 encore！

狐家姐 K1 親子運動日 @ 邱金元中學

今日係狐家姐學校舉行親子運動日嘅日子，舉行嘅地點係邱金元中學室內禮堂，狐爸爸同狐媽媽當然要出席喇！

一早同狐家姐狐妹妹食早餐，之後就向中學出發！

去到中學見仲未開始，狐家姐就同一班同學仔喺度追逐，等咗一陣就入禮堂排隊準備開始運動；今次狐爸爸負責睇住狐妹妹，而狐媽媽就同狐家姐一齊做運動！

其實呢個親子運動主要都係一路唱歌仔，一路郁動吓啲手手腳腳；另外都有幾個遊戲需要家長同小朋友一齊合作玩，好似係運巨型筆喇，運波波等等，狐家姐喺玩遊戲嗰時玩得好開心！

運動日大約個半鐘就完結，之後再同兩位小姐喺平台公園放電就返屋企食飯沖涼休息喇！

狐媽花園

轉咗新工作之後，位置比之前闊落，而且新工呢度都鼓勵員工種植；加上 YL 將佢啲小盆栽俾咗狐媽，成就狐媽花園嘅出現！

初初只係得 1 盆蘆薈（已死），1 盆紫蘿蘭（已死），1 盆鐵樹（已死），2 盆葉（已死）同 1 盆仙人掌；慢慢開始增加 6 盆細紫蘿蘭（2 粉紅，2 紫同 2 玫紅）同 1 盆家樂花（橙）；最近又再加多 3 盆細紫蘿蘭（分別係 1 紫白同 2 紫），3 盆中紫蘿蘭（1 紫，1 粉白），1 盆白掌，1 盆家樂花（粉紅），1 盆鳳梨花，1 盆小白菜同埋 1 盆地球芒！

狐媽最近發現到有隻盆唔錯，可以自動淋水，非常之方便又唔怕啲花無哂水唔知道，詳情可以參考 GS Planter；啲盆勁啱狐媽，而且又有好多顏色，所以狐媽正逐步幫花園裏嘅花換盆，而且仲有隻＂天使熊＂守護佢地，希望佢地＂快樂＂咁生長！

501 勞動沙灘遊

今日係勞動節，當然要＂勞動＂一下！

中午先同狐公公狐婆婆飲茶，之後狐爸爸提議去沙灘行吓；狐家姐當然舉腳贊成喇，因為佢恨去沙灘好耐！

今次去聖士提反沙灘，去到人都唔算太多；搵咗個地方坐低，就幫兩位小姐除鞋除襪捲起褲腳，就出發去感受吓沙灘嘅沙同海水！

狐家姐見到有咁多沙勁開心，不停玩，又同狐爸爸走去淺水地方玩水；狐妹妹當然都好興奮，一放佢落啲沙到就開心大叫，落水又開心大叫，狐媽媽仲教狐妹妹彎腰試吓接觸湧埋黎嘅水添！

玩到咁上下，見太陽伯伯開始準備放工，加上大風咗，就同兩位小姐去沖洗然後打道回府；兩個玩到唔捨得走，下次要早啲黎同埋買啲沙灘玩具俾佢地玩！

鴛鴦 BB 餅乾

見到 Carol 老師整咗款啱 1 歲小朋友食嘅寶寶香香餅乾，好似幾啱狐妹妹，於是跟住一齊整！

做法跟 Carol 老師一樣，只係狐媽媽自己改咗變成鴛鴦餅；狐家姐好鍾意食，細細塊啱哂佢；狐妹妹都想食，不過得 6 隻牙仔嘅狐妹妹咬唔到，可能要等出多幾隻牙先食到！

久違了嘅白麵包（吐司 mode）@ P 仔（附食譜）

有一排無整麵包，怕啲粉放得太耐，今日就開機整麵包；原本狐媽媽係想整提子包，但實在太耐無用部麵包機，無按到自動加入提子嗰掣，結果變咗白麵包！

食譜：

高筋麵粉　　　250 克
鹽　　　　　　2 克
砂糖　　　　　30 克
室溫水　　　　150 克（應天氣溫度調整）
無鹽牛油　　　30 克
酵母　　　　　3 克

因為無時間造型，所以將材料放哂入機等佢整方包，估唔到出黎都幾高大！

427 港島遊玩日

今日一早又約咗大明 1 家食早餐（因為幫大明搶購咗紅米做交收），食完早餐，例牌上大明屋企玩！

見大明話同謙謙坐電車，狐家姐又話要一齊去，於是等小朋友開完餐就出發去港島坐電車！

大夥先坐巴士過北角，然後喺北角電車總站上車；謙謙仔同狐家姐勁開心，沿途不停咁講嘢；見仲有少少時間，大夥決定喺金鐘落車，向香港公園進發！

原來呢度嘅兒童遊樂場有個沙池，狐家姐見到沙池勁開心，佢仲有個挖沙機俾小朋友玩；至於狐妹妹，都有落一落沙池印吓腳印仔；大約玩咗 1 個鐘，見天黑就坐車返入馬鞍山食飯，咁就過咗開心又可以幫小朋友放電嘅 1 日！

Housewarming @ 愛美麗家

約咗好耐兼改咗好多次期，終於鐵定咗今日去愛美麗同銘銘新居 housewarming！

狐家大約 5 點到去到愛美麗新居，間隔四正光猛！見花花未黎到，兩姊妹又醫完肚，就同狐家姐喺有限資源下整曲奇餅；仲請愛美麗教狐家姐彈琴添！

隔咗無耐花花同肥仔都到咗，大家就安排叫晚餐同睇 RM，咁就過咗 1 個愉快嘅晚上，期待下次再聚，同埋希望下次兩位小姐唔好再咁百厭嚇親人！

2014 年秘書節

話咁快又到一年一度嘅秘書節，估唔到今年會有驚喜！

舊年年尾轉咗新工，第 1 年喺新工作地方過秘書節，大家安排送咗 1 籃好靚嘅花籃俾狐媽媽！

呢籃花由幾盤小植物組成，中間有 1 隻熊啤啤，非常之靚；除咗花，仲有 cash coupon 添，真係多謝哂同事們悉心安排，兩位小姐一定好鍾意隻熊啤啤！

2014 年復活節假期回顧

一連 4 日嘅復活節假期話咁快就過咗，又黎回顧吓先！

4 月 17 日

復活節前夕，今日同狐太婆慶祝生日

4 月 18 日

今日一早同狐家姐去咗城門河跑步，之後約咗陳氏去佐敦谷野餐；夜晚上咗陳氏屋企食飯，大明仲送咗 1 盒木火車套裝俾狐家姐做兒童節禮物

4 月 19 日

休息日

4 月 20 日

一早又約咗陳氏食早餐，之後又上咗陳氏到玩咗一陣；夜晚約咗娜娜契媽食飯

4 月 21 日

狐爸爸同狐家姐去咗拜山，狐媽媽同狐妹妹留喺屋企，狐媽媽幫兩位小姐執衣櫃換季

唔知出年嘅復活假期可唔可以衝出香港呢？

週日行山記

之前應承咗狐家姐話同佢去行山，咁啱今日狐爸爸要同狐爺爺，狐嫲嫲同狐叔叔一齊上大陸，加上好天氣，就決定同狐家姐狐妹妹一齊去行山（當然工人姐姐都一齊去）！

最近嘅地方就係圓洲角公園喇；嗰度有條路可以上到山然後再落返黎，大約 1 個鐘可以完成！

兩姊妹一早食完奶，換好哂衫搽定防曬同蚊怕水就出發，狐妹妹第 1 次自己落地行路，勁興奮！今日天氣真係好好，有陽光但又唔太熱；沿路都係同狐家姐講吓大自然咁，好快就上到有日規嘅地方（接近山頂位置），之後就開始落番山！

成個過程 1 個鐘到完成，行完山就同兩姊妹去食早餐之後返屋企覺覺豬！

行山確實係 1 項幾好嘅活動，可以幫兩姊妹放好多電，覺豬都瞓得冧啲，下次有機會再同狐爸爸同兩姊妹行過！

搶購紅米 @ 2014 年米粉節

早排一直都想幫狐公公同狐婆婆換新電話，狐爸爸話紅米抵而且啱兩位老人家用，於是學人去官網搶購！

狐媽媽試咗 3 次搶購紅米都係失敗，好彩狐爸爸成功搶購到 1 部；狐公公試用咗紅米後大愛！

見狐公公用得咁開心，都想幫狐婆婆轉埋紅米；咁啱遇著米粉節，即管幫狐婆婆搶 1 部返黎！

經過咗一日 6 場大激戰，好開心可以幫狐婆婆同愛美麗搶到各 1 部紅米，仲買咗 3 個細尿袋（行動電源）同埋 1 個紅米套，目標達成！

綜合今日嘅賽果，最容易搶到應該係最早嗰兩場，下年米粉節要一早買多幾部先得！

驗眼日 @ 2014 年兒童節

今日係兒童節，亦都係狐爸爸生日，兒童節快樂，狐爸爸生日快樂！

之前見車厘帶咗車仔去驗眼，其實狐爸爸同狐媽媽都想帶狐家姐去驗（因為狐媽媽同狐婆婆天生有弱視，驚狐家姐都有）；問咗車厘攞咗驗眼資料就 book 咗今日去！

朝早送咗狐家姐返學就同狐爸爸嘆咗個悠閒早餐，之後就去咗宜家行咗一陣，再返去接狐家姐放學！兩位狐小姐食完午餐，就帶狐家姐去理大護眼中心驗眼！

去到填咗資料，坐一陣就有視光師同狐家姐驗色弱，第 1 關 pass！之後等叫名再見另 1 位視光師；第 2 關係 check 近遠視散光，狐家姐初時有啲緊張唔答人；後黎放鬆咗就好叻，大部份都答啱，視光師話狐家姐視力正常，第 2 關都 pass；最後 1 關就係放大瞳孔檢查眼底，先滴藥水，等 20 分鐘瞳孔放大之後就影相，第 3 關都 pass 埋！

成個檢查盛惠 $400，唔錯，成年人都可以驗，收費一樣；到狐妹妹時都要帶佢黎呢度檢查！

夜晚又係去番飯堂 Onion Kitchen 到食飯慶祝狐爸爸生日！

探訪姚大少

今日約咗陳氏一齊去探姚大少！

1:00 去到姚宅，姚大少覺覺豬；姚大少真係超多頭髮，瞓覺嗰陣成日整豬咀，超搞笑！

祝姚大少快高長大，好多哥哥姐姐等緊同你玩！

遊玩 @ 佐敦谷公園

今日同埋大明一家去咗佐敦谷公園玩！

狐家食完早餐就坐車去九龍灣會合大明一家，再坐車上佐敦谷公園！之前見好多朋友去玩，話地方好空曠，今日去到，果然超大地方，好適合三五知己齊齊去玩！

搵地方坐低，謙謙同狐家姐就急不及待走去玩；狐妹妹都唔執輸，一到步就瞓醒，即落地周圍行，勁開心！今次只係帶咗吹波槍同皮球黎玩，下次可以帶遙控車或風箏黎玩，仲可以野餐添！

1303 沙田區媽媽會 1 歲生日扒地

今日帶狐妹妹參加咗沙田區媽媽會搞嘅 1 歲生日扒地，舉行地點係銀湖天峰會所！

狐家大約 2:00 去到會所，大家將 BBs 放喺 playmat 到互相認識；大約 3:30 到就開始食到會；食完嘢就到遊戲時間，今次有爸爸們鬥快幫 BBs 換片；BBs 鬥頭圍同腳板長度；可惜狐妹妹瞓咗覺無參與其中！

玩完遊戲輪到大抽獎，狐妹妹好好彩咁抽中咗 1 份切切玩具！玩到大約 5:00 食埋蛋糕，今日嘅生日扒地就完結；辛苦哂義工爸爸同媽媽們，期待下一次聚會！

去完生日扒地，狐家約咗大明一家食晚飯；食完飯狐爸爸同狐家姐上咗大明屋企玩；而狐媽媽就同狐妹妹返屋企洗白白覺覺豬！

打 1 歲針兼做評估

每個 BB 過咗 1 歲都要打四合一加肺炎加強劑，狐妹妹都唔例外！

今日一早就帶狐妹妹去健康院打針，雖然狐妹妹有咳，但無發燒都可以照打！

去到交低針咭同紀錄簿，等叫名磅重！狐妹妹有 8.92 公斤！

磅完重等見姑娘，今次 1 歲檢查主要都係睇下進食問題，講嘢方面，手指靈活等等！

狐媽媽因為少咗幫狐妹妹練習手指，狐妹妹喺測試中未能用手指公同食指攞起星星餅，要見醫生同 14 個月要返黎健康院做多次測試！到見醫生時，醫生再俾萬字夾狐妹妹，狐妹妹今次又能夠用兩隻手指攞起萬字夾，醫生話應該只係少練習，問題不大，不過都建議 14 個月返黎多次！

見完醫生就等打針，狐妹妹原本無喊，但因為被狐媽媽按住郁唔到，同埋拮咗兩邊大脾仔，大喊咗一陣自動收聲，黎緊只要留意住有無發燒就無問題，狐媽媽又要特訓吓狐妹妹啲手指仔先得！

懷舊小食 - 紙包蛋糕（附食譜）

今日見到有包友整咗細個時成日食嘅紙包蛋糕，見好吸引，所以跟住一齊整！

食譜：

蛋白　　　　5 隻
蛋黃　　　　5 隻
糖　　　　　65 克
低筋麵粉　　85 克
粟粉　　　　10 克
牛油溶液　　55 克

做法：

先將牛油隔熱水座溶備用；蛋黃打勻備用；低粉同粟粉過籂備用；蛋白打起，分兩次加入糖然後打至企身；將蛋黃倒入企身蛋白慢慢拌勻；再加入粉類慢慢拌勻；最後加入牛油溶液慢慢拌勻倒入杯中；預熱焗爐 220 度；先焗 5 分鐘，見到個面有少少色就轉 180 度焗多 15 分鐘即成！

焗完好香紙包蛋糕味，食落真係同以前味一樣，軟熟好味，正，狐家兩姊妹都好鍾意食！

拍拖 10 週年紀念 ＋ 狐妹妹 1 歲生日

今日係同狐爸爸拍拖 10 週年嘅日子，亦都係狐妹妹 1 歲生日嘅日子！

話咁快就 1 年，仲記得 1 年前嗰朝少少見紅，通知狐爸爸同狐嫲嫲，中午就準備入院待產！

仲記得一直到夜晚 8 點幾都仲係少少見紅，仲同狐爸爸講好大機會俾人趕出院返屋企；點知同狐爸爸食完晚飯之後，就突然間有大舊組織出咗黎；即同狐爸爸講唔使出院，狐妹妹應該會零晨至朝早出黎！

果然舊組織出咗黎之後就開始陣痛，痛咗 3 個幾鐘都只係開咗 3-4 度，姑娘抵唔住狐媽媽嘅煩功，結果送咗狐媽媽落產房等！

狐媽媽一路痛一路叫自己忍住唔好用力，結果差唔多 5 點幾先穿水，但狐媽媽嗰一刻已經無力生；試咗成 5, 6 次狐妹妹先平安出世！

今日狐妹妹 1 歲大，狐爸爸同狐媽媽喺度祝狐妹妹快樂健康，同狐家姐要相親相愛，Happy Birthday 狐妹妹！

306 BB 生日扒地

狐妹妹呢個 306 BB 就快 1 歲生日，狐媽媽約埋其他 306 BB 媽媽一齊幫 306 BB 開咗個 1 歲生日會！

今次舉行生日會嘅地點係深水埗 Stage One，地方略為偏僻咗少少；上到去佢分咗兩間房，一間就係玩嘅地坊，有 2 個波波池同其他玩具；而另一間房就係食嘢嘅地方！

大家先開始食到會，食完到會就分組玩遊戲！第 1 個遊戲係小組 BB 鬥快食餅餅，結果狐妹妹呢組勝一出可以各自揀禮物；之後就玩爬行比賽，狐妹妹喺初賽勝出咗，可以參加總決賽；原本都大機會勝出，點知狐妹妹喺緊要關頭人有三急，結果輸咗；最後 1 個遊戲就係大家引自己組嘅 BBs 笑然後影相再放上去 FB 306 專頁，邊組引得最多 BBs 笑就為之贏；狐妹妹組 BBs 瞓哂覺，所以無參加到！

玩完遊戲就到攞 sponsor 禮物同影大合照；之後就到抽獎時間；今日玩得好開心，期待下一次 306 BB 聚會！

韓風熱潮

近排又再吹起韓風熱，個個都追睇韓劇＂來自星星的你＂！

狐媽媽當然唔執輸，開始追睇星星，狐媽媽用咗 3 日時間睇到第 7 集！雖然慢咗啲，因為狐媽媽啱啱追完一套喺三色高清台播緊嘅韓劇＂野王＂！

另外，近排唔同網站都出咗好多韓國護膚品嘅團購優惠，狐媽媽又心郁郁想試吓呢啲韓國牌子，而且聽講 ok 好用架，等狐媽媽買少少黎試再報告！

姚小朋友出世喇！

恭喜哂譚美同埋姚生，姚小朋友尋晚平安出咗世喇，係 1 個重 8 磅 3 嘅肥仔！

自從狐妹妹過咗 6 個月之後，好似好耐無見過手抱 BB，希望可以快啲見到呢位重磅小朋友，狐家祝姚小朋友快高長大，聽教聽話！

狐妹妹農曆 1 歲生日

今日係狐妹妹農曆 1 歲生日，咁就 1 年喇，時間過得真係快呀，好似覺得狐妹妹尋日先出世咁！

狐媽媽祝狐妹妹身體健康，聽教聽話，同狐家姐相親相愛，仲有唔好咁惡呀！

222 BK 蛇 B 生日扒地

之前喺 BK 識咗 1 班媽媽，大家嘅 BB 都係 2013 年 2-4 月出世，所以約理一齊開 1 歲生日會！

今日舉行嘅地點係港鐵會所，大約點幾去到場地，媽媽們大部份已經到咗，場地亦都佈置得7788，而且仲有場刊添！

之後就開始大食會，食完嘢當然係玩遊戲喇，有爬行比賽，換片比賽等；另外又有幾樣投票比賽，最具餅印，最可愛，最佳造型等等；遊戲之後當然唔少得大抽獎喇；仲有切蛋糕添！

今日玩得好開心，禮物好豐富，媽媽們又好有心，為生日嘅主角們準備小禮物，辛苦哂 Cat 媽，DD 等等一班搞手媽媽！

學識用飲管

仲有半個月就黎 1 歲嘅狐妹妹，終於學識咗用飲管飲嘢喇！

記憶之中狐家姐好似好早就學用飲管，相對狐妹妹就好似遲咗啲（可能無狐家姐嗰時咁有心機教佢用飲管）！今日諗住俾狐妹妹試吓用飲管，初初佢都唔係好識啜，試咗幾次，佢好快就學識咗點啜，仲飲得異常開心，見到狐妹妹又學識多樣嘢，真係開心！

2014 年農曆年假期回顧

今日係年十一，狐媽媽馬年第 1 日返工，開工大吉！

等狐媽媽黎個農曆年假期回顧先！

1 月 31 日

大年初一，因為兩位狐小姐病咗，狐爸爸又作病，狐媽媽只係跟狐嫲嫲去咗狐太婆屋企拜年食盤菜！

2 月 1 日

大年初二，去咗狐婆婆同狐嫲嫲屋企開年！

2 月 2 日

大年初三，狐爸爸今日開始要出 trip 去慕尼黑，20 號先返，黎緊 3 個星期狐媽媽夜晚要獨力照顧兩位狐小姐，希望頂得住！

2 月 3 日

年初四，今日只係去咗狐姑婆到拜年！

2 月 4 日

年初五，休息日！

2 月 5 日

年初六，今日帶咗狐家姐返公司拜年湊熱鬧，狐家姐收穫豐富！

2 月 6 日

年初七，人日，亦都係狐妹妹 11 個月大嘅日子；今日帶咗兩位狐小姐去哈林家拜年；無見好耐，哈林大咗好多，哈林妹都開始識行 lu！

2 月 7-8 日

年初八同九，又係休息日！

2 月 9 日

年初十，兩位狐小姐同狐嫲嫲一齊行新城市食飯！

2 月 10 日

年十一，狐媽媽開工大吉，狐家姐返學大吉！

咁就捱過咗個農曆年，仲有 10 日狐爸爸就回歸喇，快啲喇，狐媽媽就黎頂唔住喇！

人生第 1 步

又一次引證要同差唔多年紀嘅 BB 或小朋友玩先會學嘢快！

自從年初七帶狐妹妹去見哈林妹之後，狐妹妹今日終於踏出咗佢人生嘅第 1 步喇！

哈林妹原本同狐妹妹差唔多大，但因為喺肚入面唔吸收要早出世，結果哈林妹比狐妹妹大咗半個月，哈林妹都係呢幾日先開始放手自己行幾步！

狐妹妹見完哈林妹之後，佢已經試咗幾次自己企喺度，其實佢可以扶住嘢打橫行；今日試吓叫佢自己行過黎狐媽媽度，佢真係行咗 1 步；雖然係 1 小步，但狐媽媽相信狐妹妹好快會識行，追追逐逐嘅日子又來臨喇！

蛇年最後 1 日

今日係蛇年最後 1 日，即係年三十，狐媽媽喺度同大家拜個早年，祝大家馬年龍馬精神，馬到功成！

狐媽媽呢個新年都會幾忙碌吓，忙碌於照顧兩位狐小姐；因為兩位狐小姐輪流發燒，早幾日狐家姐開始燒，今日終於叫退番少少（啱啱到臨界線），點知發覺輪到狐妹妹起燒，真係一波未平一波又起；再加上狐爸爸年初三開始要出 trip，20 號先返到黎，狐媽媽要自己 1 個湊兩個，希望搞得掂喇，兩位狐小姐快啲好番喇！

狐媽媽只想來年一家身體健康，開開心心！

預備 N 班大作戰

話咁快狐妹妹就黎 1 歲喇，又係時候要開始幫佢報 N 班喇！

其實已經諗住俾狐妹妹讀番狐家姐之前嗰間學校，因為校服書包樣樣有齊；打過去學校問，佢地話今年 9 月先開始接受 2013 年出世嘅小朋友報名！

雖然都大機會讀得番間學校，保障起見都係幫狐妹妹報埋其他學校作後備；估唔到咁快又要開始進入不停填表，等待收通知信嘅階段喇！

第 1 份農曆年禮物

今日同兩位狐小姐返狐婆婆到團年，估唔到會有禮物收；原來係狐姨丈嘅媽媽親手織咗 2 條蝴蝶頸巾俾兩位狐小姐，1 條紅色，1 條粉紅色，好靚，真係多謝哂狐姨丈嘅媽媽！

見到 2 條蝴蝶頸巾，睇黎狐媽媽又要做番織女，織嘢俾兩位狐小姐，如果唔係，啲工具又生锈架喇！

特區護照同身份証

其實由舊年已經話幫兩位狐小姐申請特區護照同身份証，但係狐媽媽一直都懶懶行無做到！

上個月終於的起心肝幫佢地申請；填好哂表寄咗諗住實無問題，點知彈番轉頭；原因係証件相唔啱規格同埋副署人漏咗少少資料無填到；要同兩位狐小姐影番正式嘅証件相同搵番副署人補番資料再交多次；今次終於搞掂喇，收到信可以去入境處攞護照同身份証喇！

今日狐媽媽見有時間就同佢地一齊去入境處攞護照同身份証！可能近農曆年嘅關係，超多人攞証，排咗成個鐘先攞到；兩位狐小姐終於有証件喇，黎緊等狐爸爸出完 trip 返黎就可以安排同兩位狐小姐衝出香港喇，期待中！

SD card 瓜柴

張 SD card 係狐媽媽上年換 Note II 嗰陣狐爸爸買俾狐媽媽，一直用都相安無事，而狐媽媽只係間唔中先 backup card 入面嘅嘢！

尋日心血來潮諗住開啲相黎睇吓，點知一打開 photo 個 folder，好多都變咗灰色無嘢，再 click 入去，話 "file not found"；心知不妙，即刻 boot 機再開，點知佢居然彈咗 "SD card damaged" 嘅 icon 出黎，shit，再試 boot 機再開，如事者試咗 4，5 次，結果都係一樣 "SD card damaged"，咁啲相咪無哂？！狐媽媽至少影咗成 5 千幾張相架，即刻話俾狐爸爸知，佢叫狐媽媽攞番張 card 出黎，返屋企再用電腦試吓開唔開到！

今日試吓喺公司開，load load 吓彈咗 "file is corrupted or unreadable" ，啲相咪真係無哂？！狐爸爸話俾佢今晚喺屋企再試吓救唔救到，希望救到喇，呢個故事教訓狐媽媽下次真係要定期做 backup！

蝴蝶酥（附食譜）

多謝包友分享教整蝴蝶酥嘅做法！

食譜：

急凍酥皮　　　　1 塊

砂糖　　　　　　適量

牛油　　　　　　少量

做法：

將酥皮解凍回軟；枱面灑上適量砂糖；然後放上酥皮按一按；塗上少量牛油溶液；再灑上砂糖掃勻；上下兩邊開始向中間各對摺兩次，然後對摺；用保鮮紙包好放番入雪櫃雪 20 分鐘；雪完攞番出黎切件；切口向上；整成 "Y" 型放喺牛油度；預熱焗爐 180 度；焗 20 分鐘至金黃色；反轉再焗大約 10 分鐘同樣至金黃色；放涼即成！

今次加多咗糖就好好味，但係火都係控制得麻麻，焗得燶咗少少，要再努加吓！

童心世界

話說尋日三色台有 1 個節目係講南極，其中有 1 部份係講企鵝！

當時狐媽媽同狐妹妹喺房瞓緊覺，而狐爸爸就同狐家姐一齊睇呢個節目；正當狐媽媽差唔多瞓著嗰陣，狐媽媽聽到狐家姐突然爆喊，而狐爸爸就不停安慰佢，過咗一陣狐家姐先平靜番；狐媽媽當時無出廳睇發生乜嘢事，估應該係狐家姐睇到小企鵝死咗所以喊！

今日狐家出街坐車嗰陣，狐爸爸講番尋晚嘅事，狐爸爸叫狐媽媽估下狐家姐點解會喊，狐媽媽問狐家姐係咪因為見到小企鵝死咗所以喊；狐爸爸話唔係，狐家姐喊嘅原因係因為企鵝爸爸媽媽見小企鵝開始長大，係時候要小企鵝獨立生活，所以佢地離開咗小企鵝；狐家姐睇到呢幕就話爸爸媽媽唔見咗，唔要小企鵝，佢驚狐爸爸同狐媽媽會好似企鵝爸爸媽媽咁唔要佢，所以喊咗出黎！

當狐爸爸問狐家姐嗰陣時，狐家姐因為諗番起個情景又再喊，要狐爸爸不停安慰先平靜番；真係傻囡豬，狐爸爸同狐媽媽點會唔要妳呢，狐爸爸同狐媽媽一定會留喺妳同狐妹妹身邊直到永遠架！

第 1 次告病假

自從狐家姐 9 月開始返 K1，雖然間唔中都有病，但都可以返到學校，從來無試過告病假！

不過今日終於要開齋喇，因為狐家姐尋日開始食乜嘔乜，仲要加埋肚痾（印象中狐家姐第 2 次係咁喇），所以要幫佢告假再帶佢睇醫生！

狐媽媽知道妳好辛苦，要乖乖食藥同休息多啲，咁樣就會快啲好架喇！

朱古力粒阿華田餅乾（附食譜）

應狐家姐要求，今日整咗阿華田餅乾！

食譜：

牛油　　　　　　70 克

砂糖　　　　　　克

鹽　　　　　　　0.5 克

低筋麵粉　　　　克

蛋黃　　　　　　1 個

阿華田液　　　　8 克

入爐朱古力粒　　50 克

做法：

牛油室溫放軟；加入砂糖同鹽拌勻；再加入阿華田液同蛋黃打勻；低粉過籂，加入牛油團拌勻；加入埋朱古力粒再拌勻；整型後放入冰格雪 2 個鐘；預熱焗爐 180 度，焗 10 分鐘搞掂（如果偏厚就要焗耐少少）！

味道唔錯，食落有淡淡嘅阿華田味，狐家姐大愛！

朱古力蛋糕仔

今日又再整蛋糕仔，今次整朱古力味！ 今次火力同時間控制得好好，好成功，不過狐媽媽覺得個蛋糕仔偏甜，下次可以減 10 克糖都應該無問題！

食譜可以睇番呢度！

2014 年第 1 件製作 - 香蕉蛋糕仔（附食譜）

既然有新成員加入，當然係第一時間試一試佢，第 1 件製作就係蛋糕仔喇！

食譜：

A - 蛋黃糊

無鹽牛油　　　80 克
砂糖　　　　　7 克
蛋黃　　　　　2 隻

B - 蛋白糊

蛋白　　　　　2 隻
砂糖　　　　　40 克
鹽　　　　　　少量

C - 粉

低筋麵粉　　　65 克
泡打粉　　　　4 克
香蕉香油　　　適量

做法：

先將低粉同泡打粉過籂 3 次備用 (C)；跟住整蛋黃糊，牛油室溫放軟，加入砂糖打至淡黃色，加入蛋黃打至滑身備用 (A)；將蛋白打至出現細泡，分 3 次加入糖同鹽打至企身 (B) ；將 A 分幾次加入 B 打勻，再分幾次加入 C 再拌勻，加入埋適量香蕉香油再拌勻；倒入唧袋，唧入模中至 7 成滿；預熱焗爐 180 度，焗 15 分鐘完成！

今次狐媽媽無睇到火，所以焗完出黎有少少燶同硬，下次要睇住火先得！