小型 Housewarming

見啲嘢都執得七七八八，所以今日專情借車車狐爹地媽咪，狐家姐同狐阿哥入黎參觀狐家新居！

狐媽咪同狐家姐非常鍾意間新居，又夠光猛，又夠開揚，參觀完之後仲同狐 62 狐 99 加狐婆婆一齊去飲茶添；狐婆婆都好鍾意狐家新居，特別係啲地磚添！見到佢地咁滿意，真係好開心呀，果然無買錯呢度！

告別”中轉屋”

今日係交番”中轉屋”俾業主嘅日子，狐老公同狐太一早上去做清潔，順便懷念吓呢間住咗 3 個月嘅屋！

其實間屋唔係話太差，不過狐老公唔係好住得慣，可能同隔離單位或者對面樓距離太近，好似無哂私隱咁，而且個廚房同廁所實在太舊喇，再住落去真係未必頂得住！

即將離開，懷緬吓呢間”中轉屋”先！

呢到係 2 間眼鏡房

 

呢個冷氣機好古董架喇，差唔多成 20 年，不過佢係壞架，開唔到

呢度係廳，漏水架，而且個街外景係咪距離好近呢

呢度係所謂飯廳同大門

呢個就係廚房喇，又係成 20 年架喇，業主除咗換咗個煤氣爐之外，其餘全部無郁過，個櫃門都爆哂皮喇，仲要無煮食爐添，所以除咗掉垃圾之外，係無踏足過個廚房架

呢個就係廁所，又係有 20 年架喇，可能因為無抽氣扇嘅關係，個廁所啲氣味散唔到

打掃完”中轉屋”之後返番新屋，因為訂咗部電視今日送黎；部電視係狐爹地狐媽咪，狐家姐狐阿哥同狐細妹夾份送嘅入伙禮物！


新電視

到咗夜晚，正式將”中轉屋”條鎖匙轉交番俾業主，正式告別”中轉屋”生活 ！

新屋購物 ＋ 執屋

狐老公今日要返學做 project，狐太先攞咗啲棉被去清洗，之後狐老公去返學，狐太就 1 個人行街街！

狐太先去買鞋架，之後就去咗買新玩具俾兩位小公主；行完街就返屋企繼續執屋大行動，間屋好亂，睇黎黎緊嗰 3 日都有排執喇，要加油努力先得，如果唔係唔見得人呀！

今日買嘅鞋架

正式搬屋

今日狐家同林同學一齊正式搬屋喇！一早起身食早餐，跟住過新屋執好啲嘢，等 99 拜埋四角，等埋狐老公老友熊仔架貨車，就出發去接威威，join 埋林同學同榮總，就開始搬屋工程喇！

3 位壯男將所有傢俬分幾次運送過新屋地下，之後再分幾次上樓，而狐太就負責運送 2 位小公主；可能因為太多人同太嘈嘅關係，加上佢地見到個貓袋，心知應該有啲嘢，所以佢地好驚，唔肯入袋，狐太同佢地搏鬥咗好耐都搞佢地唔掂，最終要狐老公幫手先可以安全運送佢地過新屋！

喺幾位壯男努力下，終於喺大約 2:00 到搬好哂所有傢俬，之後就出發去食飯，再陪林同學去買電視櫃，可惜最終買唔到電視櫃，只係買到啲濕星嘢，狐太仲幫 2 位小公主添置咗張新床仔，但係因為個鞋櫃要送黎，所以狐老公先車大家去林同學屋企幫佢搬嘢先，之後再車狐太返屋企等鞋櫃，而狐老公就繼續去幫林同學搬屋！

個鞋櫃大約 4:00 到黎到，同床一樣喇，質地一般，裝工亦都唔係話太好，兩位師傅好搞笑，要狐太自己放番啲層板入去，而唔係佢地幫狐太，不過算喇，反正狐太都要做清潔！

呢個就係個鞋櫃喇！

之後到 6:00 幾，輪到個衣樓送黎，今次呢個師傅比起之前嗰 3 個 good 好多，佢見個櫃啲門有啲斜，佢好有心機幫狐太整，不過因為”先天不足”，所以佢搞咗好耐都仲係斜，唯有放棄，之後再約埋林同學食飯再返去繼續搞清潔！

新衣櫃

今日正式入住新屋，感覺好開心好舒服，間屋比起之前闊落咗，無咁擠迫，真係好鍾意呢度！是晚搞到 3:00 幾先上床休息，攰到屎！  

喺搬屋期間發生咗件關於小虎妹同妹妹嘅事；記得對上一次搬去”中轉屋”嗰陣，2 位小公主受到少少驚嚇，頭嗰幾晚不停咁喺度叫，而且不停咁圍住床邊轉，搞到狐老公同狐太無覺好瞓！

經過咗上次嘅教訓，今次決定一早運送佢地過新屋，喺狐要佢地入袋嗰陣，可能太暴力，搞到小虎妹好驚，佢個身發出一陣好強烈嘅氣味，初時狐太都無為意，諗住去到新屋安頓好哂再安撫吓佢地會無事！

點知喺狐太同狐老公清潔緊嘅時候，狐太聽到一陣”呼呼”聲，於是周圍望吓睇吓啲聲喺邊度發出黎，原來啲聲係由小虎妹發出，佢啱啱對住妹妹”張牙舞爪”！  

狐老公同狐太懷疑佢地因為轉咗新環境，無哂佢地之前舊有嘅氣味，要霸地盤，再加上受到驚嚇，所以佢 2 個變咗互相對峙，1 個地盤喺廳，1 個地盤喺房，唔知要搞幾耐佢地先會回復番之前咁樣呢！

搬屋預演

今日一早起身食完早餐就開始搬運紙箱嘅工程喇，狐老公借咗 1 架手推車用黎運紙箱（後黎加入咗 1 架大鐵車），足足運咗 5 轉先運哂所有紙箱同濕星嘢過新屋到，而家只係淨番啲大件傢俬等朋友幫手搬；之後狐老公同狐太出咗去午飯，再去買吓新屋用嘅嘢，之後又返新屋，因為裝窗簾嘅師傅到咗！裝咗大半個鐘到就裝好哂，啲窗簾都幾 ok，清清地，唔錯！

大房窗簾，條木棍係用黎掛衫架

細房窗簾，一樣有棍掛衫

廳窗簾

師傅整好哂窗簾，狐老公同狐太同狐 62 狐 99 出去 tea 一 tea，之後再返上黎清潔同埋等油壓床送黎！

張床真係等得耐，等到 11:30 先送黎；唔知係咪個師傅趕住收工，質料麻麻唔再講，裝工都唔係話太好，不過見佢平就算，裝好咗之後個師傅教狐太點用油壓床！等個師傅走咗，狐太就開始清潔張床，點知喺呢個時候，俾狐太見到床板其中 1 盞燈爛咗，但係又無師傅個電話，而且都成 12:00 幾，唯有等聽日打去直銷問問；跟住執埋少少嘢就打道回府休息，聽日有排搬呀！  

喺打道回府途中，狐老公同狐太見到有個後生仔喺草叢之中狂奔，當時狐太仲以為佢 high 咗嘢所以喺條街到亂走；當個後生仔走過咗 2 個草叢之後，狐老公同狐太見到佢後面有一大班”實Q”　追緊佢，仲叫佢唔好走添，原來呢個後生仔係賊仔，唔怪得佢唔理三七二十一走入草叢喇，不過好似最終俾佢走甩咗！

清潔行動第 3 回

今日放咗工，又再上新屋搞清潔喇，應該清潔埋呢次就可以入去住！

狐太先返屋企換好衫，再執好少少，先拉 1 個喼過去，嘩，原來條路都真係幾遠，唔知到聽日運箱會唔會好辛苦呢？

上到去，當然第一時間吸塵拖地同抹窗，之後用埋狐老公送俾狐太嘅史奴比標籤機 print label ，幫啲燈掣加名咁就搞掂喇！

探訪小甘妹 ＋ 史奴比標籤機

今日約咗林同學同迪迪仔一齊去探訪小甘妹！

去到嘅時候咁啱係小甘妹”食飯”時間，大家一路同偉哥爸爸傾計，一路等小甘妹食飽飽之後同佢見面！

大約 7:45 到，小甘妹終於食飽飽，大家齊齊拉大隊去育嬰室見小甘妹；小甘妹好得意，出世 3 日已經超多頭髮，佢間唔中睜開眼望吓嘢，跟住又合番眼繼續瞓佢嘅覺覺豬，真係好可愛，好想快啲有機會抱吓佢，同佢玩！再次恭喜偉哥同甘妹！

另外因為新屋嗰度有 2 個 3 位同 4 位嘅電掣，狐太成日都亂開，分唔到邊個掣打邊個掣，狐老公提議不如買部標籤機，print 啲 label 出黎貼上去，咁樣狐太就唔會亂開！

經過咗一輪資料搜集，狐老公見到 Brother 有史奴比標籤機賣，除咗機身有史奴比同 Woodstock 之外，print 出黎嘅 label 都有佢地做底，而且仲可以加埋佢地做框添，好鬼靚架；狐老公知狐太一向都鍾意史奴比，所以就買咗呢部標籤機送俾狐太，多謝哂狐老公！

小甘妹出世 ＋ 清潔行動第 2 回

恭喜偉哥同甘妹，囡囡喺尋日健健康康出咗世喇，真係好消息呀，喺度祝小甘妹快高長大，聽教聽話，大個咗好似媽媽咁靚女！

講番新屋，今日又再上去搞清潔；經過咗星期日嘅清洗，今日好好多，無星期日咁辛苦，今次主要都係要吸塵，拖地同抹窗，但係都搞咗成兩個鐘，廚房同廁所都只係係咁二洗吓咋，聽日可能會有櫃送黎，睇黎聽日又要再上去做清潔女工喇！

完工喇！

今日間屋嘅裝修工程終於完成喇 ！  

師傅們大約下晝上到黎跟番之前有問題嘅牆身，裝番買錯咗嘅電掣板，換大門鎖膽，裝防盜鏈，之後等狐太驗貨，總括黎講尚算滿意，係唯一門口舊雲石有兩道裂痕，應該要換過，而家只差傢俬送黎就可以住喇，好開心呀！

去片俾大家睇吓間屋而家個樣喇！

清潔行動第 1 回

見間屋都差唔多搞掂，所以決定今日先黎第 1 次清潔行動！

一早 10:00 食完早餐就上去開工，狐老公先換咗個抽氣扇，跟住換過大房盞燈同換啲新燈膽，而狐太就匿埋咗喺廚房做清潔女工，先將個雪櫃移咗出黎大清洗，之後就輪到廚櫃，”星”盆，牆身，抽氣扇，抽油煙機，洗衣機；至於狐老公就負責清洗 2 間房，加全屋玻璃窗；下晝狐老公仲搵埋威威一齊黎洗冷氣機，好彩上手都只係用過 1 部，另外 2 部完全無開過，非常之乾淨！

就係咁洗吓抹吓，就足足搞咗 12 個鐘，朝 10:00 晚 10:00，連午餐都無食過；只係去食咗個宵夜，返到屋企都差唔多成 12:00 ，即上床覺覺豬，只要等埋師傅聽日上黎執埋啲手尾就大功告成喇！期待 ing！

裝修進度 @ 第 26 日，裝燈

今日約咗裝燈師傅黎裝燈呀，原本約咗 21 號架，但係問過裝修師傅話而家都可以裝，所以約早咗今日裝！

師傅大約 1:00 到黎到，一黎到先問想裝咗邊盞先就即開工，佢先裝咗客廳嗰盞”蓮花”燈先，之後到 2 邊走廊，最後就到飯廳，裝完 4 盞燈大約個幾 2 個鐘到，好快搞掂！

 

客廳嘅”蓮花”燈，老公超鍾意

 

飯廳嘅”鼓”燈

 

走廊”水紋”燈

 

走廊星星月亮燈

同埋加映番無換嘅房燈


細房燈


大房燈

裝完燈，狐老公先過狐 99 到幫佢整啲嘢，之後又出發去旺角，因為上次買錯咗 1 個掣板，要去換過，同埋要買燈膽同廚房光管仔；另外仲買咗 1 個唔使用手拉嘅抽氣扇，買埋啲清潔用具，聽日就開始實行清潔大行動！

裝修進度 @ 第 25 日

一聽到師傅話清場中，放工即衝返去新屋到睇！師傅真係好多嘢都清咗，只係淨番少量嘅嘢喺度，油已經完成哂！

大房

飯廳

客廳

走廊

啲掣板同門頂都裝好咗

部份掣板（啲油油得麻麻，要再麻煩師傅執）

大房門頂

細房門頂

浴室門頂

浴室架同掛架都整好咗

浴室架，掛架唔記得影

房 2 盞燈都裝好咗，師傅只要再執執啲油就 ok 喇；狐太仲發現到有 surprise 添呀，師傅幫狐太喺大房門後面裝咗塊鏡呀 ！

"surprise" 鏡

睇見間屋就黎完成，真係好開心呀，應該星期六日可以開始搞清潔喇，yeah ！

裝修進度 @ 第 24 日

因為師傅趕完工俾狐家，所以今日又再上新屋喇！

上到去見到師傅起哂啲電掣板，牆亦都油咗兩層，而且全屋水龍頭同個座廁都換好咗；見到個座廁覺得好搞笑，因為第一眼望埋去，覺得個廁所好細，細到好似小朋友座廁咁，但係望真其實係正常 size，唔知係咪因為個形狀問題呢，原裝嗰個比較闊大啲，而家呢個就 slim 啲，所以有個錯覺覺得個廁所細咗；師傅應該聽日會裝埋啲電掣，裝番兩盞房燈，執埋其他手尾，咁就大致完工，可以清埋場添呀，哈哈，好期待，好快可以做”清潔女工”喇 ！

油咗 2 層之後間屋個樣，廳用咗淺綠色；至於 2 間房，用咗淺紫色，效果幾 ok

廁所洗手盆龍頭

浴缸花灑

浴缸龍頭

廚房龍頭

”小朋友”座廁

 

同埋加映番大門門頂同埋廚房門頂

大門門頂

廚房門頂

3 月之星生日飯 @ 小曼谷

今個月係姚生同李奧生日，為咗同 2 位壽星仔慶祝，狐家同陳氏，兔兔同譚美揀咗今日去小曼谷同佢地慶祝！

今日呢餐勁豐富，大家叫咗好多餸，有冬陰功（略帶酸而唔係辣），泰式拼盆，咖喱炒蜆（啲蜆好大隻，味道唔錯），生菜包（呢個勁辣，我食咗兩啖食唔到），出名嘅蒜蓉包，蝦膏海鮮炒飯（好味但係勁鹹），香芒蟹膏／柳炒飯，炭燒豬頸肉（好味），馬拉盞炒通菜，雜錦串燒，好好味，食到好滿足！

喺度再次祝姚生舊曆（今日係正日）生日快樂，預祝姚生新曆同李奧生日快樂！

裝修進度 @ 第 23 日

今日又上去新屋到巡喇，師傅終於拆咗啲電掣板落黎喇，但係拆漏咗 2 個 ，要叫師父聽日拆埋去；另外走廊嗰 2 盞燈師傅無拆到，所以狐太再提提求師傅幫拆咗去！  

至於幅有問題嘅牆，師傅已經跟進緊，而家應該等啲英泥乾，跟住就會線灰，線完再油油，睇黎就好似問題不大！

另外師傅清走咗窗上面啲貼紙，當堂覺得個窗又大又清又靚 ；另外師傅亦裝咗大門門頂同埋換咗廚房個門頂，唔錯，唔錯，亦都執咗啲細微地方，師傅仲話會黎緊星期五或六會裝埋個廁所同啲水龍頭，希望師傅再開行個 turbo，快啲搞掂間屋喇！

裝修進度 @ 第 22 日

今日又上咗新屋到巡一巡，終於見到師父做咗少少嘢喇，就係啲牆油咗第 1 層，原本見到間屋油咗油好開心，點知一入到大房，嘩，一大”忽”灰，好似滲水咁，好醜樣 ！狐老公覺得有啲奇怪，間屋無理由會滲水／漏水，而且嗰幅牆嘅另一面係細房，又唔係廁所，無理由會咁架！  

狐老公見到幅牆咁，佢即刻不停咁”叩”幅牆，發覺有啲地方啲聲唔同，狐太即刻打俾師傅，師傅後黎覆番我，話幅牆本身唔係滲水／漏水，而係本身個底做得唔好，當油油師傅油牆嗰陣發覺有問題，所以佢幫我地剷牆再批泥再線再油油！

都唔知叫好彩定唔好彩，好彩在師傅而家發現到呢個問題，即刻處理番，唔使等到搬咗入去住落咗先發覺有問題，到時都唔知點搞好！唔好彩在而家幅牆咁，嗰個位又要由頭再做過，咁究竟師父可唔可以如期起到貨呢？如果起唔到貨，咁又要等到幾時呢，希望師傅快快脆脆搞掂就好喇！

新屋購物 @ 旺角（配件續篇）

今日又為咗新屋再戰旺角喇，今次嘅目標係 Clipsal 掣板加門頂！

其實上次已經搵到 1 間買 Clipsal 掣板好平嘅地方，所以今日一出車站就直衝過去，問清楚 E3000 凝白系列嘅價錢之後就落 order 喇；普遍大部份都平，唯獨個 32A 稍為貴少少，不過拉上補下都叫平，所以就照要埋個 32A！買完掣板，狐老公諗住配埋啲燈膽，所以又問埋價錢，配咗 11 個燈膽，講緊埋單都唔使 $2000，抵呀！

買完掣板，跟住去買門頂；其實都無乜特別心水，只係聽師傅講買磁石嗰啲，總共買咗 5 個，1 個大門門頂無磁石；1 個廚房加兩間房，磁石連門頂；同埋 1 個廁所門頂，埋單又有 9 折，哈哈，又好抵！另外我地兩買咗 2 條掛鈎，又有得平，哈哈，話咁快，今日嘅 target 就好輕易完成咗喇！


Clipsal 掣板

門頂

掛鈎

之後攞住啲戰利品上新屋，可能呢排天氣麻麻，進度好似無乜進展咁，仲停留喺”線灰”階段，希望下個禮拜可以上到油喇！

今日仲約咗整窗簾嘅師傅上黎度尺，唔使 15 分鐘已經度完喇，等佢再報埋價，最快 1 個禮拜就起到貨喇，good！

今日係陳氏結婚 1 週年，祝佢地日日都咁恩愛 1 週年快樂 ！

拍拖 5 週年紀念 @ Le Fauchon

今日係狐太同狐老公拍拖 5 週年紀念，因為要返工嘅關係，所以只可以安排夜晚食餐飯當慶祝！前排同事帶咗狐太去公司附近 1 間叫 Le Fauchon 嘅法國餐廳到食 lunch，狐太覺得嗰度啲食物唔錯，而且佢有露天座位，好似幾有情調咁，於是狐太就 book 咗嗰間餐廳作為今日晚飯嘅地點！

原本訂咗露天位，不過天公不造美，成個禮拜都陰天加間唔中有毛毛雨，所以狐太改咗室內位，室內環境其實都幾 ok！

一坐低，waiter 就攞咗 menu 黎，佢有啲 2 人餐，亦都可以自己組合 1 個 set，有頭盤，有湯，main course 同埋餐茶，不過狐太同狐老公都唔太肚餓，所以就揀咗自己組合嘅 set dinner 喇！

開餐前，先黎上麵包配牛油，佢啲牛油好特別，唔係一般慣常見嘅黃色牛油，而係綠色架，但係又唔係好有牛油味，又唔太油，搽落麵包到都幾好味！ 

前菜 － 牛油搽麵包

食完麵包就黎頭盤，狐太叫咗田螺焗薯蓉，而狐老公就叫咗煙三文魚配雜菜沙律，個薯蓉非常之好味，沙律都唔錯！

田螺焗薯蓉

煙三文魚配雜菜沙律

食完頭盤，當然輪到餐湯，狐太同狐老公都叫咗龍蝦湯，唔知係咪法國人食得比較濃味，個湯好濃，但都 ok！

龍蝦湯

終於輪到 main course 喇，狐太叫咗 1 個大蝦 Risotto，而狐老公就叫咗西冷牛扒，個 Risotto 又係好濃味但唔差，隻大蝦好好味；狐老公嘅西冷牛扒就好 good ，特別係啲 sauce！

西冷牛扒

大蝦 Risotto

食埋 main course，飲埋餐茶，呢餐紀念餐就完滿結束，滿足 ！  

裝修進度 @ 第 15 日

今日又上咗新屋到，睇吓師傅去到乜嘢進度！

今日好似無乜特別嘢做到，啲牆繼續線緊灰，係上咗廚櫃門板，效果唔錯，玩”黑白配”！

白色廚櫃

黑色廚櫃

呢個透明門櫃無整到