給狐 BB 買禮物 (1)

見今日無嘢做，加上知道吉吉島有 BB 展，雖然喺現階段唔知有乜嘢要買或者買啲乜嘢好，但係狐老公同狐太都決定去行一轉，睇吓啲嘢平唔平同埋可以買到啲乜！

去到吉吉島，果然超多媽媽呀，於是四周圍睇吓，啲嘢果然幾平喎，8 折完再有 95 折；雖然價錢真係好抵，但係啲大件嘢如果而家買的話，真係唔知放喺邊好；掙扎咗好耐，結果都只係去睇啲消毒奶煲同埋啲奶樽！

狐老公同狐太見到 Philips 嗰隻要 $5xx ，但係如果買任何牌子嘅奶樽，加 $3xx 就可以換到其他牌子嘅奶煲，例如 Nuk，Care 等等！

狐老公見 Nuk 都算大牌子，又見佢話喺德國製造，所以就決定買佢！買完奶煲，當然係要買奶樽同埋清潔劑喇；既然個煲係 Nuk，所以狐太決定奶樽同清潔液都買番 Nuk（超無聊，鍾意用 1 set 嘢）！

行行吓，竟然見到 Nuk 有另 1 set 套裝，有奶煲同 4 個奶樽（3 大 1 小），價錢當然俾齋煲貴喇，要 $6xx ，但係見佢有埋奶樽，唔使四圍搵，所以狐老公同狐太決定買呢 set 套裝，另外再配多個細嘅玻璃奶樽（原本想配埋個大嘅，但係佢地賣哂，唯有去其他分店到搵）！

買完呢 set 套裝，見到咁多人真係無乜意欲再去睇其他嘢，所以決定埋單走人；喺俾錢途中，撞到 Don Don 兩公婆加阿囡黎買嘢，真係好耐無見阿囡喇，佢而家超得意呀，不過就好似瘦咗啲啲，傾咗一陣，等佢地買埋嘢就一齊離開！

今日就買住咁多先，等遲啲先再買過喇！

今日嘅收穫

第 1 次私家產檢 @ 6W2D

今日算係第 1 次私家嘅正式產檢，呢個醫生係朋友介紹架，佢都係睇緊佢，所以狐太決定去俾呢個醫生望一望！

去到診所登記咗，等一陣都好快見到醫生，大約同醫生講咗個情況，佢就叫狐太上床照一照，佢先幫狐太照個肌瘤，都係嗰句，有啲大，不過位置唔會影響到狐 BB，醫生話可以唔使理佢；跟住到左邊卵巢，醫生話係 1 個水囊，佢話係由於懷孕 hormones 所影響，醫生話好快會消失，唔需要擔心；聽到醫生咁講真係放心哂！之後又到照狐 BB 時間，但係只睇到胎囊，狐 BB 仲係一小點，所以暫時都未俾到預產期，又要等下次先可以見到狐 BB 喇，希望佢快高長大喇，期待下次聽到佢心跳！

呢個醫生都幾好，雖然佢講嘢可能有啲串，但係至少佢俾到好強嘅信心，總之佢話一就一，二就二，絶對唔會有第 3 樣嘢，所以狐太決定之後嘅產檢都搵呢個醫生（而且佢啲診金又平啲呢，呢個係 main point）！

醫生俾嘅小冊子

呢個係胎囊

白色呢點就係狐 BB 喇

政府登記 + 覆診兼產檢 @ 5W1D

今日真係超級忙碌呀，因為一早狐太同狐老公去咗威記做新症登記，下晝約咗醫生做覆診，睇吓個子宮肌瘤嘅情況，順便可以望一望吓狐 BB！

狐老公同狐太一早 9:00 去到威記排隊交 form，之後就等，點知一等就等咗 2 個鐘，又餓又無聊，最後到姑娘叫名都只係俾個期下次幾時產檢，咁就登記完可以走喇，咁就無咗 1 個上晝嘅時間！

之後狐老公同狐太 join 埋狐 62 同狐 99 飲茶，再返屋企休息一陣狐太自己一個就出發去銅鑼灣覆診！

去到診所同姑娘講黎覆診兼有狐 BB 想 check 吓，等咗一陣就見醫生，醫生當然先恭喜狐太，跟手就上床照，因為根據日子計算，狐太而家都只係大約 5W 到，基本上應該無乜嘢睇到，所以醫生幫狐太用陰超做檢查！

首先望一望個子宮肌瘤，當然佢梗係大咗喇，而家有成 4.xcm，但都無法，佢係會跟住狐 BB 一齊大；之後就當然係望狐 BB 喇，因為都仲係好細，所以都只係見到胎囊，知道佢位置正確個心都放心啲，醫生仲嘗試放大俾我望一望入面嗰點狐 BB，都望到，仲隱約見到佢個小小嘅心臟跳緊，醫生仲好搞笑問番我轉頭頭先嗰個係咪狐 BB 心跳！

照完狐 BB，醫生順便幫狐太 check 一 check 2 邊卵巢，佢先照右邊，無問題；到左邊嗰陣，見佢無出聲又照咗好耐，心入面驚一驚，唔係又有其他問題呀，點知真係，醫生話見到左邊個形狀有啲奇怪，但係佢又唔係好肯定係乜嘢，聽到個心即刻沉一沉而且又好擔心！醫生見到狐太咁嘅樣，佢就建議狐太可以即刻 book 另 1 位婦科醫生再做檢查（因為佢自己放假，仲要放到農曆年之後先返，咁耐，狐太真係忍唔到，實擔心屎），之後再返去佢嗰度覆診，唉，真係估唔到又要擔心多一樣嘢！

覆診完後再同狐老公商量，狐太決定搵過另 1 位婦產科醫生跟進，仲約咗下星期三即睇添，狐真係唔想成個農曆年都提心吊膽呀，希望下個星期見嘅醫生可以俾到信心同專業意見狐太喇！