泰開心之旅 Day 6 完結篇

今日係旅程最後 1 日，大家一早 check out ，之後再喺酒店食埋早餐就啟程出發返曼谷！

今次回程比去程嗰陣時好，可能因為熟咗路，所以只係用咗 5 個鐘到就返到曼谷機場！見仲有時間，大家決定先喺機場附近嘅小市集食午餐同行吓，狐老公仲買咗包泰咖啡，聽講話好好味喎！

呢包就係泰咖啡喇

食完午餐就去 check in，見仲有時間，迪迪仔介紹大家食個超好味嘅芒果糯米飯，果然無介紹錯！

真係超好味嘅糯米飯

之後入咗禁區，狐太同狐老公再買 donut 同咖啡上機食，就係咁，今次泰開心之旅就正式完結，唔知幾時再有機會一大班人一齊去旅行呢！

咖啡

朱古力 donut

今次坐嘅侏儒機

幾萬呎高空上

今趟旅程最後 1 張合照

泰開心之旅 Day 5

今日係成個旅程尾二嗰日，大家決定自由活動，狐太一直都好想試吓做 Spa ，決定今日做；娜娜就因為發燒，所以留喺房休息；至於男仕們就去咗日光浴！

今次 Spa 狐太揀咗 1 個成 4 個半鐘嘅療程，足足有 5 樣嘢做，有磨砂喇，按摩喇，深層清潔喇，敷 mask 喇，仲有就係牛奶浴添！

呢間就係酒店入面嘅 Spa

Spa 名

環境好舒服

先黎凍茶加熱毛布

枱面有 4 支香薰油任揀

狐太揀嘅套餐，睇吓有幾多嘢做

狐太由 2:30 開始做到 6:00，超舒服呀，做完 Spa 仲有靚靚生果盤嘆，仲有夕陽欣賞添，正！之後返上房做埋個牛奶浴，正到爆！

好味鮮甜嘅生果

好靚嘅夕陽

狐太嘅牛奶浴，一半牛奶一半水，正，側邊仲有好多香薰點綴添

做完 Spa，係時候食晚飯，今日決定試酒店嘅其中 1 間餐廳，係食意大利菜，好味！

食完飯，大家落咗沙灘行咗一陣欣賞吓明亮嘅月光同滿天星星，之後就各自返房休息喇，因為聽日一早就要出車返曼谷再啟程返香港，Day 5 完結！

泰開心之旅 Day 4

今朝一早喺酒店食完早餐，大家就準備出發去 4 島遊兼浮潛喇！

一行人坐 local tour 公司嘅車出發往碼頭，再坐船向 4 島出發！今日天氣非常之 good 呀，陽光唔太猛烈，落水啱哂！ 

出發中，睇吓，喺香港好難見到嘅藍天白雲

之後，船家就向大家派發浮潛用具，狐太人生第 1 次嘅浮潛正式開始！

狐太嘅浮潛用具

經過大約半個鐘船程，終於到達第 1 個島，浮潛活動開始！四周海水真係好清，而且仲有好多唔同種類嘅魚游黎游去，海底仲有大量超大海膽添呀，要好小心以防俾佢地吉親！

同狐老公攝於水中

海水幾清，見到哂啲魚架

玩完第 1 個島，上返船出發去第 2 個島，其間船家為大家安排咗簡單而美味嘅午餐！之後幾個島同第 1 個島一樣，海水好清，好多魚，珊瑚礁，而每次上水船家都為大家預備咗小食，有生果，蕃薯，仲有魷魚添！

玩哂 4 個島就出發回程喇，呢個船家真係幾唔錯，除咗食物之外，佢仲安排咗少少餘興節目，就係玩魔術！呢次 local tour 真係好抵又好 good 呀！

大約 5:00 幾返到酒店，梳洗完之後，就出發去 White Sand 食晚餐！經過一輪選擇，大家揀咗 1 間類似大排檔嘅舖頭，雖然呢間舖頭無乜裝修，但係食物就非常之 good ；食飽飽之後見到街邊有 pancake 賣，又買咗 1 個黎 share ，個 pancake 又係好好食，yummy！食飽飽，再行咗一陣沙灘就坐車返酒店休息喇，Day 4 結束！

今日嘅晚餐加飯後甜品

泰開心之旅 Day 3

今日又一早起身，先食早餐，今次食泰式粉麵，之後見到街邊有蛋飯，好似好好味，所以買埋當午餐，因為今日要出車由曼谷出發去象島！

大家嘅泰式早餐

大家租咗架 12 人棍波車，由狐老公負責駕駛，迪迪仔同林同學就負責睇導航同俾指示狐老公！9:00，大家正式由曼谷出發，曼谷真係好塞車，塞咗好耐先離開到市中心去公路，可惜唔係好熟路，結果差啲去咗芭提雅，好彩發覺得早，即刻返轉頭，不過已經嘥咗 30 分鐘時間！

結果經過咗 6 個鐘時間，經過咗好多中途站，經過咗車同人一齊坐船，經過咗好多九曲十三彎嘅山路同斜坡，終於喺 4:00 幾到達象島酒店！

12 人 van 棍波車

狐老公負責駕駛

迪迪仔同林同學負責導航

大伙嘅午餐，蛋飯，好味

坐船出發去象島

人同車同一架船

象島碼頭

去到酒店，辦好哂 check-in 手續，即時上房放低行李，換番條短褲人字拖出動！喺出動前，大家先為聽日安排行程，就係 local tour 4 島遊加浮潛！大家 join 咗艘大船，盛惠 700 THB @ ，包午餐，價錢都可接受！

酒店職員帶緊大家上房

酒店一部份

酒店牌

酒店夜景
狐老公同狐太間房

報完名，係時候食晚餐，原本諗住過 White Sand，但係因為啲路實在太黑喇，1 支街燈都無，駕駛實在有啲危險，所以最終決定喺酒店附近食算喇！

係搵食嘅期間，大家都諗住再去按摩，但係因為酒店附近唔係太多按摩店，而且當然唔及曼谷咁大規模，只係見到有 1 間算係最大間，傾好咗價錢，就決定食完飯去試！

喺仲未決定到食乜嘅期間，有單小意外發生咗，當時大家企哂喺路邊商量食乜，點知背後傳黎刹車聲加慘叫聲，原來有架開得好快嘅電單車撞親 1 隻狗，聽到隻狗叫得咁慘，都知道隻狗凶多吉少；因為呢單小意外，大家心情即大受影響，都替隻狗狗傷心；最終大夥都好倉促決定喺按摩店隔離間露天餐廳食飯！

大家點咗冬蔭功湯，咖喱，大蝦，青口，沙律，炒粉

今次又食到好飽，之後就齊齊去按摩，初時以為間舖頭夠大夥 7 個人，點知佢成間店都係得 6 張床，狐太同娜娜當然係 1 人 1 張床喇，咁即係話 5 個大男人要一齊瞓 4 張床，原本大夥決定唔按，但係最終都跟番上面嘅安排按摩，難為哂 5 個大男人；按摩完就返酒店休息，準備聽日浮潛 4 島，Day 3 完結！

今日係迪迪仔生日，酒店送咗個小型蛋糕俾佢，所以大家就為迪迪仔開左個小型扒地，喺度祝迪迪仔生日快樂，快啲生個小迪迪！

泰開心之旅 Day 2

今朝一早先去酒店隔離間 NaRaYa 血併，之後狐老公提議去食德國餐，所以大家即向德國餐廳出發！

搜索中

終於到達

大約行咗 15 分鐘終於到達餐廳，一坐低即 order 嘢食，大家叫咗 1 個 2 人餐，1 個 2-3 人餐同 1 份 salmon 扒！嗰 2 份 2-3 人餐超大份，足夠 6 個人食有餘！喺食嘅期間，餐廳老闆經過，佢係 1 個德國人，同大家吹咗一陣水，好 nice！

男仕們一坐低即叫啤酒

狐太嘅蘋果汁

Cheers

餐前包，呢個包鹹鹹地，幾好味

大家嘅早加午餐，2 人餐（上），2-3 人餐（中），salmon 扒（下）

開餐前黎個大合照

食飽飽，大家就坐的士出發去玩 kart 車！Kart 車分咗 2 隻，1 隻係 160 cc ，另 1 隻係 270 cc ！大家先試玩 160 cc ，狐太當然係包尾嗰個喇；之後男仕們再玩多幾轉 160 cc ，而狐太當然係負責拍攝喇！

Kart 場

5 位仁兄比賽中

玩完 kart 車，再向 Suan-Lum Night Bazaar 出發，可惜無乜收穫；之後大家又向林真香出發，再去 Big C 食埋個晚飯就返酒店喇，因為要迎接娜娜嘅到達，Day 2 完結！ 

狐太嘅晚餐

今日嘅收穫

泰開心之旅 Day 1

今朝一早 8:00 喺機場集合，收齊 passport 之後，先去 counter 寄行李攞機票，再齊齊食早餐，之後大約 10:05 入閘，10:45 準備向曼谷出發！

各團友先黎個獨照

團友 1 號 - 迪迪仔

團友 2 號 - 狐老公

團友 3 號 - 林同學

團友 4 號 - 狐太

團友 5 號 - 榮總

團友 6 號 - 昌昌

仲有團友 7 號  - 娜娜，佢要去象島先 join 到大夥

今次坐嘅 flight no. 同起飛時間

大約喺曼谷時間 12:45 到達，之後搞埋出境，攞番啲行李，再搵埋要坐嘅巴士站，上到巴士已經係 2:30！

機場巴士站

巴士票

今次要坐嘅巴士 - AE3

經過一輪塞車，終於去到酒店 check-in ，嗰時已經係 4:05，所以大家即放低所有行李，出發去覓食（因為機上無水無食物供應，大家只係食咗早餐，之後無食過任何嘢）！

今次住嘅酒店，隔離就係 BTS Phrom Phong 站，超方便

大家由 BTS Phrom Phong 站坐到 Siam 站去食水門雞，啲雞完全無骨，而且都幾滑，狐太一口氣食咗 5 件；另外個湯又係好好味，加埋個雞油飯，唔錯唔錯！

清湯

水門雞同埋唔知乜嘢

雞油飯，呢個好味

食飽飽，大家就去 Big C 唱錢，再去 Central World 做個 Thai massage 加去 NaRaYa 血併，之後就向 Suan-Lum Night Bazaar 出發！

Night market

去到 Suan-Lum，又係時候食嘢，大家先去醫肚，之後再出發行 night market，行完 night market 就坐的士返酒店休息，Day 1 完結！

宵夜

今日嘅收穫

泰開心之旅 @ 倒數 3 日

仲有 3 日，同林同學佢地 7 人嘅  泰開心之旅就起程喇 ！

好期待今次旅程，因為第 1 次咁大班朋友一齊去旅行，因為第 1 次做 Spa，因為第 1 次去旅行自駕遊，仲要係棍波，由狐老公駕駛，仲要駕至少 4 個鐘以上，由曼谷去象島，狐太相信今次旅程會好難忘同埋應該會有好多趣事發生，勁期待！