減肥進度 (6) - Tanita 脂肪磅 (BC-750)

為咗更有效去減肥，狐爸爸提議去買個脂肪磅！

做咗少少資料搜集之後，狐爸爸睇中咗 Tanita 既 BC-750！

呢個型號既磅體積細（大約 2 kg 重），橂式亦都俾其他型號多（有 7 種模式），仲有 1 個女仕減肥模式！雖然佢記憶容量得 2 個（即係只可以記錄 2 個人既資料，其他型號可以記憶 5 個），但都夠狐爸爸同狐媽媽用！

所以狐爸爸就決定喺淘寶淘返黎，價錢計埋運費 $400 有找，抵呀，要繼續加油呀！

2013 年生日禮物

話咁快又一年喇，又就快到狐媽媽生日！今日收到狐爸爸送嘅生日禮物！

呢份生日禮物係 1 支定焦鏡頭！狐爸爸知道狐媽媽部相機個對焦唔係幾得，於是就買咗呢支定焦鏡俾我，而且呢支鏡俾原裝嗰支輕好多，咁樣狐媽媽就可以日日都袋住部相機返工喇，多謝狐爸爸！

新玩具 - Note II LTE

熱烈歡迎狐媽媽嘅新玩具 - Note II LTE！

前排見出咗 Note II LTE，見佢俾 Note 細啲又長啲，個樣幾好咁，有少少心動想去換，但係佢淨機價要成 $6xxx，似乎有啲貴，所以都未係好大動力去換！

近排發覺唔知係台嘅問題定機嘅問題，慢咗好多，而且見 4G 開始普及化；狐爸爸有見於此，讚成狐媽媽換 Note II LTE；經過一番資料搜集，原來狐媽媽只可以喺台齋買機而唔可以買機上台（即唔可以再加 contract）；但係就可以以 9 折客戶優惠買機，計番上黎都算 ok ，而且仲會 trade 埋部舊機，變相再抵啲，咁吸引當然要換喇！

經過咗 1 個禮拜嘅等待，部機終於到手喇；真係睇得舒服又流暢，狐爸爸見狐媽媽玩得咁開心，都有一刻心動想換，但係狐爸爸等緊部新 Nexus ，所以都只係得閒攞狐媽媽部機玩止吓癮算喇！

喺度再次熱烈歡迎 Note II LTE！

新玩具 - Note II LTE

呢個電話套喺未攞到機前已經心急買定

2012 年生日禮物

狐爸爸見狐媽媽開始對部 G12 有微言，所以決定送 1 部新相機俾狐媽媽做生日禮物！

原本好想要 Sony NEX-7，但佢單 kit 都要成萬蚊，成萬蚊不如攞番部單反出黎玩，或者 upgrade 而家部單反！

見佢前排出咗部 F3，好似幾好咁，有狐媽媽至愛嘅 180 度扭芒，但係狐媽媽嫌佢略為膠咗啲；狐爸爸問狐媽媽會唔會考慮 5N，5N 雖然舊款少少，但都好吸引，個樣又無咁膠之餘呢期又平咗，最終都係買咗 5N 返屋企，又係時候望一望本 manual 跟住影相喇，狐家姐係我首個目標！

給 BB 買禮物 (6)

狐 BB 又有好多新嘢喇，因為呢個禮拜有幾日都約咗大 Ka 媽媽一齊行街買嘢！

星期一早收工，身痕喺屋企附近商場行，見到啲襪仔咁得意，忍唔住買咗好多，呢度全部都係狐 BB 嘅，另外買咗啲俾大 Ka 媽媽個 BB ！

 

幾多襪仔

星期三同大 Ka 媽媽落咗花園街行街，大家都對件甲蟲衫好有興趣，但係佢係短袖，所以大 Ka 媽媽買咗細碼，狐媽媽就買大碼；至於件士多啤啤，一見好鍾意，可以襯埋之前買嘅士多啤啤襪！

 

件蜜蜂衫係咪好得意呢

星期四去咗一田行，見到佢有套 Pooh Pooh 床圍都只係 $399，即拉埋狐爸爸一齊去買，另外就買咗 2 包 Minimoto 綿花球同埋訂咗 1 箱 Minimoto 濕紙巾；亦都幫大 Ka 媽媽訂咗 1 箱 Minimoto 濕紙巾同埋買咗 Nuk 奶樽清潔液！

 

 

呢套就係 Pooh Pooh 床圍用品喇

 

另外仲有 2 包綿花球

 

1 箱 Minimoto 濕紙巾

星期五下晝返威記照完結構，夜晚又拉狐爸爸去一田，買咗 Arau 洗衣液，；另外見大 Ka 媽媽買咗 1 張 Minimoto 隔尿墊，於是又跟風買 1 張！

 

洗衣液同隔尿墊

星期六原本又約咗大 Ka 媽媽去買嘢，見天陰陰唔想無出街，大 Ka 媽媽就幫狐媽媽買咗幾包紗巾，唔該哂大 Ka 媽媽！

 

大 Ka 媽媽幫買嘅紗巾

狐 BB 今個禮拜收穫真係超豐富呀，不過狐媽媽啲錢就倒水咁倒喇，又要節制吓先得！

另外狐老公公司呢個禮拜開放日，有啲特別版產品推出，今期其中 1 樣就係波鞋喇！

呢款波鞋係由 BMW Mini Cooper 同 Tiger 牌聯手推出，款式有啲似 NB 嘅波鞋，顏色有 4 隻，有銀色，藍色，米黃加綠，同白加黃；狐老公見到個款幾靚，又有 Mini Cooper 個章，價錢都唔太貴，所以就買咗 2 對藍色，對鞋都 ok 舒服，多謝哂狐老公！

 
新波鞋

 
波鞋嘅牌子 - Tiger

 
鞋踭後面有 Mini Cooper 個章架

 
而鞋帶個頭都有 Mini 字樣

早黎嘅聖誕禮物

早排同愛美麗去咗 Zara 睇衫，俾狐太見到有條圍巾好靚，不過狐太麻麻地鍾意圍嘢喺條頸到，而且價錢對狐太黎講有啲貴，結果喺愛美麗極力阻止之下，狐太當然無買到呢條圍巾喇！

今日返到公司見到枱面有個 Zara 袋，原來係 Y Lam 同愛美麗送俾狐太嘅聖誕禮物，係狐太喺 Zara 見到好鍾意嗰條，因為佢地見狐太病咗，所以決定提早買黎送俾狐太，等狐太可以圍住條頸，無咁易冷親，真係多謝哂 Y Lam 同愛美麗，狐太好鍾意呢份禮物，一定會戴住佢架！

 
今年第 1 份聖誕禮物

加入單反家庭

一直以黎，狐太對自己影嘅相有啲要求；狐老公有見及此，就建議狐太試吓用單鏡反光相機；加上狐老公自己有啲心郁想換過 1 部高級少少嘅單反機（Canon 40D），所以順理成章，狐老公部舊嘅單反機 Canon 400D 就成為狐太嘅新玩具！

狐太嘅新玩具 - Canon 400D

狐老公嘅新玩具 - Canon 40D

Osim iPamper

而家按摩唔需要再假手於人喇，可以自己黎喇，因為狐老公買咗個 Osim iPamper 返黎！

好早之前狐太已經有膊頭痛嘅問題，一直都要狐老公幫狐太做按摩；自從狐老公轉咗做文職，都開始有呢個問題，變咗每晚大家都輪流做對方嘅按摩師！有見及此，加上近排 Osim 有 promo ，所以狐老公即買咗個 iPamper 返黎，只需要插電就可以自己幫自己按摩喇，超 good 呀！

呢個就係 iPamper 喇

其實狐老公買呢個原本係諗住俾驚喜狐太架，不過狐太好醒目咁估中咗，但係都要多謝狐老公！

探訪小甘妹 ＋ 史奴比標籤機

今日約咗林同學同迪迪仔一齊去探訪小甘妹！

去到嘅時候咁啱係小甘妹”食飯”時間，大家一路同偉哥爸爸傾計，一路等小甘妹食飽飽之後同佢見面！

大約 7:45 到，小甘妹終於食飽飽，大家齊齊拉大隊去育嬰室見小甘妹；小甘妹好得意，出世 3 日已經超多頭髮，佢間唔中睜開眼望吓嘢，跟住又合番眼繼續瞓佢嘅覺覺豬，真係好可愛，好想快啲有機會抱吓佢，同佢玩！再次恭喜偉哥同甘妹！

另外因為新屋嗰度有 2 個 3 位同 4 位嘅電掣，狐太成日都亂開，分唔到邊個掣打邊個掣，狐老公提議不如買部標籤機，print 啲 label 出黎貼上去，咁樣狐太就唔會亂開！

經過咗一輪資料搜集，狐老公見到 Brother 有史奴比標籤機賣，除咗機身有史奴比同 Woodstock 之外，print 出黎嘅 label 都有佢地做底，而且仲可以加埋佢地做框添，好鬼靚架；狐老公知狐太一向都鍾意史奴比，所以就買咗呢部標籤機送俾狐太，多謝哂狐老公！

狐老公嘅 pre-生日禮物

狐老公近黎成日話副眼鏡有問題，懷疑散光加深咗，睇啲光好似散開哂，今日終於頂唔住，話要去配 1 副新眼鏡！

放咗工之後，狐太就同狐老工去眼鏡舖，狐老公適合配戴一啲方形鏡框眼鏡，試咗差唔多有 10 副嘅情況下，狐老公揀咗 1 副框邊係紅色嘅方形眼鏡！揀完框，跟住入去房仔到驗眼！

驗完眼，視光師話眼鏡嘅度數無問題，問題出喺散光度數同埋聚焦到，視光師話狐老公其實散光唔深，但係而家戴緊副眼鏡竟然每邊加深至少 65 度，唔怪得狐老公話副鏡有問題喇；另外 1 個問題就係聚焦，視光師話而家個鏡聚焦係兩邊，所以將啲景物拉開咗同埋無咁清晰；如果將個聚焦放番中間，狐老公睇嘢就會好清楚，但係外觀上就無咁好睇，因為個鏡片會變咗中間薄但係兩邊會好厚，呢個當然無問題喇，最緊要睇嘢清楚！

解釋哂所有問題之後而鏡框又選定咗，最後一步當然係揀鏡片喇，個視光師 suggest 用 1.6 （唔知乜嘢意思）以上嘅鏡片，原因係因為狐老公近視比較深， 1.6 嘅鏡片較合適；成副鏡最後盛惠 $2300 大元！

狐老公覺得副鏡好貴，有少少肉赤，狐太都覺得係貴咗少少，但係只要戴得個人舒服，貴少少都無問題，所以狐太決定當呢副鏡係狐老公嘅 pre-生日禮物，希望狐老公鍾意 ！  

視光師仲教咗狐老公同狐太點樣為之正確嘅除 con 方法，因為狐老公做運動嗰陣會戴 con，每次做完運動除 con 都除到發忟憎，因為隻 con ”啜”得好實好難除；視光師叫狐老公試範一次點除 con，個視光師話狐老公個方法唔啱，會好容易傷到眼角膜，正確方法應該係將手指放喺眼球下面嘅位置，當要除 con 嗰陣，眼球向上望，咁樣隻 con 就會好容易除到出黎架喇！

玫瑰金水晶麻雀 ＋ 洗邋遢好幫手

因為申請按揭嘅關係，狐家喺”渣兜”銀行嗰度要開戶口；星期六嗰日去咗申請，喺填 form 期間，俾狐太見到有個 promo ，話如果選用佢地 2 種或以上特選服務，就可以得到 1 副玫瑰金水晶麻雀，或者係以抽奬形式得到，狐太仲同狐老公講，狐家都係用咗佢地 2 種服務，咁咪即係可以攞到嗰副麻雀囉，可以放喺屋企坐鎮！

於是狐太即係問個 customer service ，初時以為已經可以攞到副麻雀，點知原來唔係，點都係要抽奬先可以攞到，仲要係要申請埋佢地個尊貴服務先有機會參加抽奬；狐太再問佢個尊貴服務有啲乜嘢特別同埋有乜 criteria ，佢答狐太話個尊貴服務有最低金額，但係因為佢地會計埋 mortgage ，喺唔會被扣錢嘅大前題下，狐家當然即刻申請埋喇，睇吓係咪咁好彩可以抽中副麻雀，點知真係抽中咗，個”實蕉”哥哥仲話狐家係第 2 個抽中副麻雀嘅人添呀！

因為好心急見副麻雀嘅真身，所以尋日放工去咗換，大家細心欣賞喇！

副麻雀係用木盒裝住架，好似好 high class 咁

打開喇，個樣都唔錯，睇唔睇得出係玫瑰金水晶呀

黎個大特寫先

各方好友，玫瑰金水晶麻雀會喺 3 月尾 4 月到出黎見大家，如果想一睹佢嘅風采，記得話俾狐太知喇，不過呢狐家係無麻雀枱架！

另外仲有 2 日就到年廿八，又係洗邋遢嘅時候，每年呢個時候，狐媽咪都會買定啲碌柚葉俾狐太煲水沖涼，沖走哂 1 年嘅霉氣，而家嫁咗人，呢啲咁細微嘅就梗係自己做喇，不過而家住緊＂中轉屋＂，唔想搞咁多嘢！

咁啱呢幾日喺車厘個 blog 到見到有樣好幫手，專為狐家呢啲現代懶人而設，佢就係碌柚葉沐浴露喇！

哈哈，呢支沐浴露真係好搞笑，佢真係寫住由天然碌柚葉精華造架！

 
下面仲寫明話”每天除霉氣行好運”，真係好好笑

 
佢仲要認真到後面有埋年廿八洗邋遢嘅典故添呀！

 
突然間發覺現代人真係好勁好聰明，咁嘅一樣物件都俾佢諗到，真係抵佢發達，而且對懶人黎講真係一大恩物，仲可以洗足 1 年 365 日，希望佢可以幫狐家除哂牛年嘅所有霉氣！

呢支沐浴露喺萬記到買架，佢除咗做緊特價之外，仲額外有 1 張 $5 coupon，即係折上折喇，都叫抵；真係多謝車厘介紹！