第 3 次私家產檢 @ 13W2D

今日又係產檢嘅時候喇，又可以見到狐 BB 喇，不過今朝狐媽媽見頭暈呀，所以留喺屋企休息！

休息咗一個上晝終於好少少喇，下晝去見醫生，今日主要係照吓超聲波，睇吓狐 BB 而家個生長情況！

狐 BB 今日身長有 6.48cm ，醫生仲周圍照吓，又照吓佢個頭仔，狐 BB 又擰轉咗個頭；跟住又舉起隻手仔，醫生仲照埋佢隻腳板仔添，好可愛；狐 BB 今日一切正常！

狐媽媽要 21 號政府產檢先可以再見到狐 BB 喇，加油呀，繼續快高長大呀！

狐 BB 週數：13W2D
狐 BB 身長：6.48cm

 

頭仔

 

腳板仔

 

 

2 隻手

 

心跳

《全方位認識胎兒成長及需要》講座 @ 12W5D + DUO 陳奕迅 2010 演唱會

今日先同狐老公去咗聽 BK 舉辦嘅講座，今次舉行講座嘅地點係喺會展，由 1 位營養師同 1 位婦科醫生主持！

講座舉行咗 2 個半鐘，主要都係講孕婦要注意嘅飲食，要吸收嘅營養等等，之後就講吓懷孕初，中，後期同生產嗰時要注意嘅嘢等等；聽完都多咗認識又有禮品攞，真 good！

 

今日收到嘅禮品，有尿片，紗巾，媽媽奶粉，兒童牙膏，護髮素同牙刷

聽完講座，夜晚狐老公過咗紅磡去聽狐太一直都好期待好想去嘅＂醫神＂演唱會！原本 2 年幾前已經有機會聽架喇，不過因為嗰時太接近婚期，所以嗰次就無緣去欣賞喇！

今次有得去聽真係好開心，但係之前有報導話＂醫神＂患咗感冒，把聲都沙哂，表現有啲失準，希望無影響到今日既表演喇！

準時 8:00 幾去到，演唱會喺 9:00 正式開始，全場都好興奮，＂醫神＂換咗 4，5 套衫，唱自己嘅歌又有唱其他歌手嘅歌，仲自彈結他添呀；雖然佢把聲都仲未係最好，有走音同埋有啲高音位去唔到，但係狐太覺得呢個演唱會真係好好睇；而且今日仲係 at17 嘅 Ellen 生日，二汶仲扮工作人員為 Ellen 送上生日蛋糕添，之後＂醫神＂仲帶領全場萬幾位觀眾一齊為 Ellen 唱生日歌添，場面真係好壯觀呀！

至於狐 BB 成晚都好靜靜咁聽＂醫神＂嘅歌，唔通佢覺得係催眠曲，所以狐媽媽可以好舒服咁睇成晚演唱會，睇黎狐 BB 對音樂無乜興趣！

公佈 + 第 1 次健康院產檢 + Oscar @ 12W3D

今日有消息要向大家宣布，就係狐太有咗 3 個月喇，忍咗咁耐，終於可以大大聲聲話俾大家知；其實對狐太黎講幾時講都無乜所謂，不過因為老人家話要過咗 3 個月先好講，如果唔係 BB 會小氣，所以等到而家先同大家講！

狐 BB 今日已經 12W3D 大喇，暫時一切安好，狐 BB 對狐媽媽好好，呢 3 個月以黎無真真正正嘔過，胃頂同多胃氣固然有喇，真係多謝狐 BB 咁愛錫狐媽媽 ，狐媽媽都錫哂你／妳；狐媽媽而家只望你／妳繼續快高長大，期待 10 月見到真正嘅你／妳！

另外今日去埋健康院做產檢同照埋 oscar 添！

 

一早 8:15 去到瀝源健康院，reception 未開工，要到 8:30 嬸嬸先安排媽媽們去排隊攞籌兼填 form！

填完 form 之後就等叫名度高磅重！之後驗小便！驗完又係等叫名見姑娘問病歷，之後再等見醫生！

今次見醫生主要都係 check 吓有無乜嘢問題，檢查吓個肚，又係咁二用 1 個小儀器聽一聽心跳；檢查完之後就抽血，跟手聽 1 個半個鐘嘅講座，成個產檢 11:30 結束！

因為 oscar 約咗 2:30 ，所以先返屋企休息吓兼醫肚，跟手約埋狐 99 一齊去威院做 oscar！狐媽媽同狐 99 2:15 去到威記，坐咗一陣就叫名先去抽血，之後再等叫名見醫生照 oscar！

狐 BB 今日超乖，醫生一放個超聲波上去，就見到佢瞓緊覺，醫生即叫唔好出聲，以免嘈醒狐 BB ！醫生好快手咁度哂身長，頸皮厚度等等，跟住又睇埋鼻骨，背脊骨，又數埋啲手指同腳指；一做完哂，狐 BB 即刻醒咗又喺度玩彈彈跳同玩倒立，真頑皮！狐媽媽當然有問性別喇，暫時唔開估住喇，不過都係嗰句，囝囡都無所謂，只要佢健健康康，開開心心就好喇！

醫生亦都有幫狐媽媽照埋個肌瘤，而家大約 4-5.xcm ，醫生話個 size 都有啲大，如果佢 keep 住繼續大而又唔移動位置，有機會會令到我胎位前置，咁樣就可能要開刀生喇，不過一切都要再觀望先知，希望到生時唔使開刀就好喇！

因為狐 BB 實在太乖喇，所以比預期嘅時間早完成，3:30 就可以走喇，但係個 report 要 5:15 先有，所以又返屋企休息；到咗 4:45 ，姑娘已經打黎話個 report 有喇，即返威記，結果狐 BB 好叻，無論係唐氏，第 13 條染色體同第 18 條染色體都係低風險，又過 1 關喇，要繼續 keep 住叻叻呀，下星期再見喇！

狐媽媽重量：55.5kg
狐 BB 週數：12W3D
狐 BB 身長：6.83cm

 

放大咗嘅狐 BB

 

大特寫

 

呢啲係今朝去健康院嘅時候各大品牌嘅入會禮物

政府超聲波 @ 11W4D

今日第 1 次去威記做檢查，主要係照超聲波！

原本約咗 1:45，但係狐媽媽最終成 3:30 先到，好彩姑娘無話咋，交咗覆診紙就坐低等叫名入去見助產士照超聲波！

今次叫好好彩，只係等咗大約 30 分鐘到就叫名，助產士先問咗一啲基本資料，之後就上床照超聲波！

助產士一放個儀器落個肚度，就問咗有無特別嘢，狐媽媽話有個子宮肌瘤，佢話個肌瘤都幾大吓，助產士度一度個肌瘤，而家大約係 5.xcm！

照完肌瘤，當然輪到照狐 BB 喇，助產士話狐 BB 而家有 11W4D 大，大約係 4cm 到，啱週數啱 size，暫時屬於中碼 bb ！

當助產士照緊嘅時候，狐 BB 喺度不停咁玩彈彈跳，超搞笑！助產士想度狐 BB 個頭，點知狐 BB 舉起咗隻手仔，點都唔肯放番落黎，仲要好搞笑突然擰轉個頭，用個後腦仔對住個 mon，真係俾佢笑屎；好唔容易助產士先度到個頭仔，之後仲俾我聽埋心跳添，又數數 2 隻手仔同腳仔，不過狐 BB 實在太頑皮，助產士都要投降唔再照，如果唔係，可能可以問埋係頑皮囝定頑皮囡！

狐媽媽今次好失策呀，助產士姐姐幫影咗好多相架，但係狐媽媽竟然一張都無問到黎留念呀，唔知有無機會要番呢，下次問吓先！狐 BB 下星期要乖乖地喇，因為要照 oscar 架，記得俾醫生照完先好自己玩呀！

狐 BB 週數：11W4D
狐 BB 身長：4cm

《認識分娩的過程及護理初生兒的秘法》講座 @ 10W6D

之前喺 BK 報咗個講座，係關於分娩過程同照護初生兒，雖然係早咗啲，但係聽吓都無妨！

講座喺 Poly 舉行，2:00 開始至到 4:00，成個講座分咗 2 部份，第 1 部份由婦科醫生講解分娩過程，成個過程都無乜特別，係啲片略為嘔心咗少少，睇到都有少少驚；第 2 部份係由註冊護士講解，主要都係講點同 BB 溝通同做 massage，護士姐姐講得都幾生動有趣！

成個講座 2 個鐘頭完結，每位參加嘅準父母仲有禮物收，就係 1 袋 Johnson 用品！聽完呢個講座都有啲用，希望到 BB 出世嘅時候用得著所學嘅嘢！

今日嘅講座禮品包

拍拖 6 週年紀念 @ 上野

今日係狐太同狐老公拍拖 6 週年紀念！因為今年有咗狐 BB，所以好多嘢都食唔到，而且狐老公今日仲要返工添，所以都只係等狐老公放工返到黎再出旺角行一陣，睇吓有乜嘢食！

女人街其實有好多嘢食，不過大部份都係日本嘢，狐太又唔可以食，最終揀咗 1 間食鐵板燒！狐老公同狐太揀咗 1 個 2 人餐，主要係食牛嘅！

狐老公揀咗吧枱坐，對正大廚，可以睇住佢整鐵板燒；頭盤先黎幾片三文魚刺身，見到真係流哂口水，狐老公批准狐太食 1 片，yummy！之後就食鮑魚；鮑魚有 2 食，1 隻鐵板燒，另 1 隻就食磯燒！2 隻都好好味，狐太好 like 鐵板燒，因為好香口！

之後食煎銀雪魚，嘩，好味，超肥美兼香口，之後有薄燒牛肉，狐太唔太好牛，但係呢個真係好味；之後仲有厚燒牛，炒飯（個飯就差啲，有蛋殼），炒雜菜，甜品！

呢餐都食得幾滿足，原本仲想行吓街，點知食完開始落雨，而且狐太又有啲攰，所以決定打道回府，出年嘅拍拖紀念日就會多咗狐 BB 同一齊慶祝喇！

第 2 次私家產檢 @ 9W2D

期待咗 2，3 個星期，終於到咗今日喇，今日又係做產檢嘅日子，又可以見到狐 BB 喇！

今日一去到診所先驗小便，因為無諗過有咁嘅需要，驗尿結果當然係唔理想喇，有少少蛋白尿！驗完尿，就量血壓同磅重，血壓正常，重量就應該重咗 1、2 磅，之後就等見醫生！
醫生先問有無乜嘢特別唔舒服，之後又上床見狐 BB 喇！

狐 BB 大約有 2.2cm 大，醫生話一切正常，跟住當然係最期待嘅一刻喇，就係聽心跳喇！醫生將心跳放大俾狐太聽，噗噗噗噗噗，聽到嗰一刻真係由個心到笑出黎，唔知點形容！

之後再問番醫生有關蛋白尿嘅問題，醫生話狐太而家尚算早期，只要血壓無大問題，暫時唔需要太擔心，佢話除非係去到懷孕後期，如果依然驗到有蛋白尿，再加上血壓高同埋有水腫，咁樣就要小心留意！

原本狐老公今日都一齊黎，點知臨走嗰陣有少少嘢做，結果狐老公就錯過咗呢次見狐 BB 同聽心跳嘅機會，真係可惜，希望狐老公下次有機會見到狐 BB 喇！狐 BB 加油，繼續快高長大，又要等多 2 個禮拜先見面喇！

狐 BB 週數：9W2D（呢個係跟威記記錄）

狐 BB 身長：2.2cm

白色嘢大舊咗，就係狐 BB 喇

狐 BB 心跳