牛餐 @ 燒肉の牛太・本陣

今日落銅鑼灣買新酵母，順便食埋個飯先！搜索咗一輪，見到本陣有燒肉食，決定一試！

去到坐低睇 menu ，全部都係牛肉，雖則唔太好，不過薄燒狐媽媽都啱；狐爸爸叫咗牛脊肉，一口牛，豬頸肉，海鮮併盤，雜菇，3 色冷麵併盤，啲牛炭燒真係幾好食，希望有機會再食！

 

前菜雜菇

 

牛脊肉，少少韌

 

一口牛，呢個好食，正，貴嘢果然係唔同啲

 

海鮮併盤，大大隻虎蝦，又有帶子同魷魚圈

 

3 色冷麵併盤，好食

 

薄燒都幾好食

 

一口牛無貴嗰個咁好食

 

豬頸肉，好食

結婚 2 週年（布婚）紀念 @ 和田日本料理

今日係狐太同狐老公結婚 2 週年嘅日子，唔經唔覺咁就 2 年喇，當中發生咗好多事，有開心嘅，有唔開心嘅，都過咗去，狐太希望往後嘅日子同狐老公繼續開開心心，甜甜蜜蜜 ！  

今年同舊年一樣，因為係平日，狐老公又無假，所以只係去食餐飯慶祝，今次狐太揀咗北角粵海酒店嘅和田日本料理作為同狐老公慶祝 2 週年紀念日嘅飯堂！

狐太訂咗 8:00，早咗 15 分鐘到，不過和田唔俾狐太同狐老公入，要準時 8:00 先可以入，所以狐太同狐老公四圍行咗一陣準時 8:00 再返番去！

終於可以入去，和田地方唔係好大，位與位之間都唔係好濶落，狐太同狐老公被安排坐 2 人位，咁啱對正部電視，可以睇麗妃娘娘 ！之後開始點嘢食，和田嘅模式同上次去尖咀嗰間大吉一樣，都係寫紙仔 order 嘢食；狐太之前喺＂開飯＂到睇過佢啲食評，知道佢地啲刺身幾好，所以 order 咗刺身先！  

刺身總括黎講都幾新鮮，只係略為細件咗啲

之後再 order 芝麻八爪魚，份量亦都唔多，可接受喇

飲品方面，狐太知道熱嘅麥茶好好飲，所以 order 咗 1 杯，狐老公就叫咗 1 杯凍嘅，味道果然唔錯，好飲！

熱麥茶

凍麥茶

之後再 order 一連串嘅燒物，炸物同天婦羅，佢啲炸嘢就真係麻麻地，串燒方面，冬菇唔錯，幾好味；至於天婦羅，佢個香蕉天婦羅真係好好味，狐太同狐老公 encore 咗幾次添！

 

串燒 ok，冬菇我最 like

炸物真係麻麻，唔夠熱

天婦羅好食，特別係香蕉

呢個係鹽燒秋刀魚，可接受，係唔太夠味，鹹啲會好食啲

可能唔係太多選擇，所以係食到 9:00 幾到，食埋個雪糕就走人喇

綠茶味雪糕，ok 喇

總括黎講，呢度啲食物一般喇，選擇亦都唔太多，當係 1 次新嘗試喇，下次都係睇清楚先好訂位！

君日本料理

今日同狐老公去咗跑馬地君日本料理到食飯，美其名就話慶祝狐老公畢業，其實狐太同狐老公想豪食一餐 ！  

呢間日本料理去過幾次，當初係由同事＂藍小姐＂介紹去食，食過佢啲刺身覺得唔錯，咁啱今次又知道佢做緊個 buffet promo，所以決定訂位去食！

8:00 去到，原本打算食佢嗰個 buffet，但係最終都選擇咗由相熟嗰位師傅幫發板！

師傅先安排食刺身，食咗 3 款唔同嘅魚（已經唔記得係乜嘢魚喇），好味，再黎 1 個牛油果螺肉前菜，之後 1 個飛魚刺身，再黎就係螺肉，燒北寄貝，之後有鱆虹魚！

食完刺身，師傅整咗 1 個海膽壽司，跟住有鹽燒秋刀魚，燒魷魚，拖羅壽司，最後以 1 碗烏冬麵作為今日嘅結尾，滿足 ！

3 款魚刺身

牛油果螺肉前菜，幾特別，味道都唔錯架

飛魚刺身，好味

螺肉刺身

燒北寄貝刺身，又係好好味

再黎唔知乜嘢魚刺身

好肥美嘅鱆虹魚刺身，yummy

海膽壽司

鹽燒秋刀魚

燒魷魚

拖羅壽司

結尾嘅烏冬