準備迎接 BB 第 1 擊 - 洗 BB 衫

話咁快已經 30W5D，距離見到狐 BB 唔夠 10W，開始要為迎接狐 BB 而做準備喇！

第 1 樣要做嘅當然係洗衫喇！好難得等到今日有啲陽光，即幫狐 BB 洗第 1 機衫，今日主要係洗和尚袍，估唔到都有成 2x 件，掛到成間房都係，真誇張！

要陸陸續續開始洗嘢喇，時間好似過得好快咁！

 

第 1 批衫

《嬰兒成長發展與開心食物的認識》講座 @ 30W3D

今日又去聽講座，由美贊臣主辦，講座嘅地點係浸會大學！

個講座 8:00 開始，原本以為去浸大聽都 ok，點知完全錯哂，首先搭車唔再講，坐地鐵去，10 架車都仲未上到，仲要俾人（係阿公阿婆）迫／推撞！

去到又一城，無位食嘢，結果去咗食炸雞；食完再喺又一城行過去浸大，諗住好近，點知遠到屎，好彩舉行地點係喺舊校舍嗰邊，以為好快到喇，點知原來要行超多樓梯，辛苦到爆；去到會場，廁所又要行好遠／落 1 層，簡直攞咗狐媽媽條命，返到埋位攰到屎咗，搞到無乜心機聽，結果聽完頭嗰部份就決定走人！

諗住填完問卷交返又有禮物收，點知個工作人員收完張問卷就走咗去，無嘢講又無禮物，唔通提早走唔俾禮物？至衰無問，如果有問，應該都會有禮物，搞到狐 BB 少咗罐奶粉食，仲要搞到個人攰到爆，蝕！

仁安產前講座第 3 堂《生產過程的認識》@ 30W1D

今日係上仁安產前講座第 3 堂，今堂主要係講生產過程同止痛方法，頭 1 部份係由婦產科醫生講解，個醫生講得幾有趣；第 2 部份就由麻醉科醫生講解！

今日又有禮物收喇，今次係 Cordlife，同生寶一樣，填完佢地份問卷就有 1 件和尚袍送！

 

今日嘅 notes 同 Cordlife 送嘅和尚袍

應毛毛要求，今日影咗狐媽媽大肚以黎第 1 張相，希望唔好嚇親大家

 

肥爆

第 5 次政府產檢 + 第 6 次私家產檢 @ 29W2D

今日又到咗產檢嘅日子，政府同私家都安排咗同 1 日！

今朝一早 9:15 先返威記檢查，又係先放低覆診紙，之後磅重量血壓驗小便！唔知係咪今日打風加落雨，好似無乜人黎產檢咁，只係坐咗一陣就叫名去見助產士喇！

助產士核對完資料，就上床量肚同聽心跳，助產士話狐 BB 頭仔喺上面，腳喺下面；而且仲游黎游去唔肯停，搞到助產士要搵咗一陣先搵到佢心跳，仲問狐媽媽狐 BB 係咪成日都係咁踢黎踢去！

之後到發問時間，今次多嘢問喇！首先係重量，呢期重得超快又食多咗嘢，驚會過重，所以問問助產士；助產士睇番咁耐以黎嘅記錄，佢話狐媽媽到而家為止都係重咗 8kg，符合標準，唔需要太擔心！

另外上個禮拜又頭暈要休息，普通科醫生話狐媽媽血壓低；助產士話大肚婆係咁，都唔需要擔心！

跟住喺月頭其中 1 日返緊工嗰陣，突然間腰位好深處慢慢滲啲痛出黎，一路伸延落到大脾位，痛到郁唔到兼標哂冷汗，要深呼吸好耐先慢慢消失無事；早 2 日夜晚瞓瞓吓覺又係咁痛，一樣痛到郁唔到兼出冷汗，仲要唔使相隔 5 分鐘痛 2 次；問咗助產士，佢話可能因為狐 BB 而家重咗，壓住啲神經或者韌帶所以導致痛！

仲有關於宮縮，星期一嗰日已經有宮縮，成個肚硬哂又拉得好行，平時如果係咁只要坐低休息一陣就會無事，點知嗰日成日都無放鬆過，係第 2 日先叫鬆番少少；助產士話只要唔係有規律，無見紅穿水都無乜大問題；助產士見狐媽媽好擔心，就話安排等陣見醫生，佢俾咗 2 個禮拜後嘅覆診紙就出番去等見醫生！

如果唔見醫生，基本上 10:00 就可以走，但係為咗問問題，等咗半個鐘先叫我名！入到去醫生先望望記錄，之後就問邊度唔舒服；狐媽媽將頭先問助產士嘅嘢再問 1 次醫生，佢聽完之後先幫我檢查，聽心跳，之後又抬高狐媽媽對腳問邊度痛，跟住佢就再用 1 個好小型嘅機照狐 BB，順便睇埋個肌瘤，結果又係搵唔到個肌瘤，醫生話一係狐 BB 擋住咗，一係就佢縮咗／消失咗！

檢查好哂所有嘢，醫生就解答番啲問題；首先頭暈，佢話可能係狐媽媽啲動作太快，加上啲血去唔到，所以頭暈，佢叫狐媽媽啲動作要慢番啲；另外腰痛／盆骨痛，佢話因為狐 BB 而家大咗，壓住啲神經／韌帶，又或者係坐骨神經痛，而家都無嘢好做，只係話最好唔好仰臥瞓，仰臥瞓會壓住條腰，咁樣會仲痛！唯有等生完再睇吓情況先再作安排！

至於宮縮問題，同助產士一樣講法，只要唔係有規律，無見紅穿水就唔係作早產，無乜大問題，醫生仲話遲啲仲密啲添呀！之後醫生叫狐媽媽跟番助產士俾個期覆診就可以走得！

見埋醫生足足搞到 11:00 先走得，之後約埋狐 99 一齊飲茶；飲完茶返屋企休息，3:00 到再出去私家到覆診！

去到私家大約 4:00，今日都幾多人，驗完小便兼磅重量埋血壓都要坐成個鐘先有得見醫生！見到醫生，醫生問咗今日係幾多週，之後就去照狐 BB！醫生話狐 BB 一切都好好，好正常，頭圍就大咗 1 週到，肚同大腿骨就差啲，細咗大約幾日至 1 週！原本今日都可以見吓狐 BB 個樣，不過醫生話佢對腳遮住面仔，所以睇唔到，唯有等下次！醫生話狐 BB 今日頭上腳下，如果佢維持呢個姿勢不變，咁就要開刀喇，囡，要乖乖地呀，如果唔係狐媽媽要捱一刀架！

照完狐 BB，狐媽媽又問番今早問政府醫生啲問題，私家醫生話腰痛都無辦法，要等生完再睇情況；宮縮問題就只要唔係有規律，無見紅穿水，坐低／瞓喺度休息吓應該無乜大問題！   狐媽媽重量：61kg
狐 BB 週數：29W2D
狐 BB 重量：1381g（大約 3 磅）

 

頭圍，大咗 1 週

 

肚圍，細咗 1 週

 

背脊骨

 

大腿骨，細咗少少

 

手指

 

腳板

 

心跳

仁安產前講座第 2 堂《產前及產後飲食與營養》 @ 29W1D

今日又去仁安上第 2 堂產前講座，今次係講關於產前同產後飲食，仲有 BB 飲食等等！

今次主要係由營養師主講，其實啲資料係有用嘅，不過個營養師就講得麻麻地而且頭段拖得太慢，差啲唔可以喺個半鐘內完成！今日都有問卷要填，不過今堂就無禮物，下星期二再上！

 

今堂嘅 notes

仁安產前講座第 1 堂《產前護理》@ 28W1D

之前報咗仁安啲產前講座，今日上第 1 堂，係關於產前護理！

仁安好好，佢地講座 7:00 開始，但係 6:30 準備咗少少食物俾媽媽們醫肚！入去聽講座前先做番登記，之後就有份小禮物！

今日嘅講座分 2 部份，第 1 部份係由醫生講解產後修身美容等等；第 2 部份係由資深護士講解產前護理！其實個護士講得都 ok，不過可能之前聽得太多，而且而家又差唔多 6，7 個月，所以聽到有啲悶！

個講座大約個半鐘完成，完成之後填番佢地同生寶份問卷，又有禮物收！下星期二又再上喇！

 

2 份禮物包括有本懷孕日記，1 件浴袍同埋啲 notes

讓座

由未有 BB 到而家有咗差唔多 6，7 個月，其實都預咗坐公共交通工具嗰陣未必會有人讓座；好似 Don Don 咁，個肚大到成個籮咁，唔使講都知佢係大肚婆，坐地鐵嗰陣居然可以無人讓座俾佢，何況狐媽媽呢啲個肚唔係好明顯嘅大肚婆！所以狐媽媽多數都會揀巴士坐，至少有位坐嘅機會俾地鐵高好多！

今日放工如常行去坐巴士，可能今日撞啱繁忙放工時間，啱啱上到車就無哂位坐；原本打算企就算，因為都只係 30 分鐘車程，應該頂得順無問題，好好彩有個女人見到狐媽媽又大住個肚，又攞住 2 袋嘢，佢好好心讓位俾狐媽媽坐，真係好感謝佢令到狐媽媽可以舒舒服服咁返到屋企，而佢自己就變咗企咗 30 分鐘！

其實當時架車係有一班後生仔（大約係 F.5 或者係 F.7），佢地見到狐媽媽嗰陣成班唔出聲，到呢位好心女人讓座嗰陣，佢地就扮無事無嘢繼續傾佢地嘅計，好似狐媽媽無上過車一樣；唉，點解而家啲年青人會咁樣，呢啲少少嘅社會觀念都無，雖然佢地感受唔到大肚嘅辛苦，但係他朝有一日，佢地老婆都會大肚，啲人唔讓座俾佢地老婆，佢地會點呢？狐媽媽一定要好好教導狐 BB，至少要有讓座俾有需要人仕嘅觀念先得！

給 BB 買禮物 (11)

今日原本係去私家做產檢嘅日子，去到診所先知醫生去咗＂執仔＂，如要見醫生就要去港安醫院，所以狐媽媽改 2 個星期後做產檢！

既然無得見醫生，購物狂媽媽決定落旺角為狐 BB 購物！狐媽媽先落咗花園街為買咗 4 條大浴巾，之後又去咗 BB care 到繼續購物！

狐媽媽今次係有目標而去架，一來佢有免費禮品，二來因為佢又做減價，思詩樂乾綿 $99／4 包，Goon 尿片又做緊 $340／4 包，另外仲有啲玩具都做緊減價！狐媽媽今次好叻，只係買咗 4 包思詩樂乾綿，1 個 pooh pooh 頭被夾同埋 1 個超可愛嘅 pooh pooh 搖鈴！狐媽媽原本想買 1 個 pooh pooh 床邊吊飾，又係電動，又有音樂，但係最終都無買到，都係再諗諗買唔買得過先！

 

今日嘅免費禮品

 

4 包思詩樂乾綿

 

Pooh pooh 頭被夾

 

Pooh pooh 搖鈴

 

4 條浴巾

今日係兔兔嘅生日，喺度祝佢生日快樂，心想事成，想嗰樣有嗰樣！

給 BB 買禮物 (10)

今日係回歸日，亦都係購物狂媽媽瘋狂買嘢嘅日子！

終於等到好天氣，同狐爸爸游完水之後就出深水埗行街！狐爸爸今次醒，佢行電腦商場，狐媽媽自己周圍行買嘢俾狐 BB！

今次主要都係想買啲長袍俾狐 BB，狐媽媽今日買咗差唔多 8，9 件薄長袍；另外又買咗 4，5 件厚長袍；跟住見到有睡袋，原本仲考慮買唔買，點知老闆娘話如果而家唔買，遲啲到 9 月佢地就會加價，好似今日買嘅獅子睡袋咁，而家買就 $13x，但係到咗 9 月就賣成 $200；聽到咁狐媽媽當然即買喇！之後又買咗張隔尿墊，買咗 1 set 帽仔連手腳套，狐 BB 今日收穫超級豐富呀！

 

睡袋，隔尿墊同衣架

 

大量薄長袍

 

厚長袍

 

帽仔，手腳套套裝

原本狐媽媽仲想買埋大嘅沖涼毛巾，但係落到花園街啲舖頭已經收哂舖，唯有搵日再去買喇！返屋企前仲買咗啲衣架仔俾狐 BB 用添，可以隨時開始洗衣物大行動喇！

老闆娘教狐媽媽話啲 BB 用品只需要用清水洗 1 次就 ok 喇，等 BB 出咗世之後先開始用 BB 專用洗衣液清洗衣物，同埋最緊要係唔好連埋大人衫一齊洗就無問題喇！