無聊睇樓日

近期馬鞍山有個新盤開售，狐太同狐老公見今日無乜嘢做，於是學人走去睇示範單位！

當去到尖東站沿路行上去地面嘅時候，已經遇到有人＂攔途截劫＂；上到地面嗰陣，不停有人走埋黎問係咪睇樓，但係都仲可以避過佢地！當行到擺示範單位嘅商場附近，啲人開始失控，佢地一見到有人走埋商場附近就即刻全部蜂擁而上，係咁不停圍攻狐老公同狐太，狐太仲俾啲人迫到坐咗落地下幾次添！結果狐老公同狐太抵唔住佢地嘅＂熱情＂，即刻調頭走，但都俾佢地追收嘢追咗幾條街！

原本打算打道回府，但係既然一場出到黎，於是打俾相熟嘅 agent，咁啱佢都約咗客出黎睇示範單位，所以決定等個 agent 到黎帶狐老公同狐太入去參觀！

Agent 好快到咗，佢即刻先將 1 份樓盤資料俾狐老公攞住（用意係話俾行家知呢個客已經有 agent 架喇），之後就入去睇示範單位，沿路經過返頭先俾人＂圍＂嘅地方都仲有啲驚；入到去，都仲算人山人海，啲示範單位都幾 ok ，可惜價錢 out budget 咗好多，所以睇完示範單位，聽完個 agent 講解之後，攞咗啲單張就走人，足足都搞咗成 2 個幾鐘！ 

今次嘅＂戰利品＂

經過今次魯莽睇樓之後，狐老公話下次如果再有睇新樓嘅機會，唔理三七二十一，先攞咗其中 1 個 agent 嘅咭片先，咁樣就唔怕再俾人＂圍＂！

今日買咗隻 Winning Eleven 2009 送俾狐老公，原本諗住當驚喜，點知狐老公好快估到，而且仲俾佢發覺到狐太買嘅係水貨，唔係行貨，仲要 check 到買貴咗成百蚊添，驚喜不足，唔開心有餘！

貴嘢水貨 - Winning Eleven 2009

我的美麗日記面膜

呢期又挑起咗保養塊臉條癮，始終年紀大，點都要保養吓，繼早前喺彩豐行大肆購物之後，加上同事愛美麗話佢啲朋友推介 1 隻台灣面膜幾好用，知道喺萬記有得賣，所以就心思思買黎試吓！

呢隻面膜叫做＂我的美麗日記＂，佢有成 1x 隻唔同味唔同＂分唇＂，咁啱萬記呢期做緊 promo ，1 盒 10 片都係 $58，真係好想買黎試吓，但係愛美麗話原來佢仲有 1 隻禮盒裝，1 盒有 24 片，有成 6，7隻味，都只係 $125，計番上黎俾買 1 盒 10 片抵，但係可惜呢個禮盒裝唔係間間萬記都有得賣，於是狐太周圍去搵呢個禮盒裝！

喺搵呢個禮盒裝期間，竟然俾狐太見到佢仲有另 1 set 盒裝，呢 set 盒裝分為保水同美白系列，一盒有 7 片，7 片都係唔同味，價錢都只係 $39 ，再計仲抵過禮盒裝，狐太抵受唔住咁平既誘惑，買咗 1 盒保水同 1 盒美白，total 有 14 片用，都只係 $78 咋，抵呀，唔知好唔好用呢，今晚要試吓隻蘆薈先，唔知 good 唔 good 呢？

 
我的美麗日記面膜

 
美白系列，有黑珍珠、玫瑰、清酒、紅酒、珍珠、蘋果同 strawberry yogurt

 
保水系列，有蘆薈、納豆、冰沁、紅酒、玫瑰、Q10 同 strawberry yogurt

P.S. 用咗蘆薈，感覺都幾 ok ，而且好快吸收哂面膜啲精華（可能係狐太塊面太乾），下次要試用 strawberry yogurt！

一田購物感謝日

呢排係一田購物感謝日 ，見今日無乜特別嘢做，所以就同狐老公去咗一田湊熱鬧！  

去到一田，當然係人山人海喇，原本想去 supermarket 到行，不過實在太多人，而且今次去一田嘅主要目的係要買 1 個高速煲／真空煲，所以就轉戰家品部！

估唔到家品部都超多人，不過佢啲價錢確實好吸引；首先見到老虎牌有個真空煲 $1000 大元有找，仲要再送保溫壼添，超抵呀，之後又見到魔師都做緊減價，雖然價錢係較老虎牌貴，但係因為佢較為出名，最後決定買魔師真空煲！

狐老公買咗 1 個 4.5 公升嘅真空煲，佢送多 1 個 3 公升嘅內膽煲，另外再送多 1 支魔師牌＂砂粉＂，另外佢仲可以加多 $88 換購 1 個萬用鍋，原本見屋企太多煲無諗住換萬用鍋，但係諗深一層佢話哂都係魔師牌，如果唔係因為感謝日，呢個萬用鍋應該價錢唔平，而且見佢有個架專用黎烚蛋同埋有個煮麵嘅籂，所以最後都換購埋佢，加埋都唔使 $1500 ！

魔師真空煲

真空煲加萬用鍋

真空煲實物

真空煲加額外送嘅 3 公升內膽煲

3 公升內膽煲

換購嘅萬用鍋

幾多＂分唇＂，果然係萬用鍋呀

呢支就係送嘅魔師牌＂砂粉＂

買完真空煲，由於太多人，加上個煲都有一定重量，所以狐太同狐老公就打道回府！返到屋企，即刻開個真空煲黎煲湯，今次先黎試花旗蔘螺片瘦肉湯，先煲滾所有材料，之後就放入真空煲煲 3 個鐘，3 個鐘後再攞番出黎再整番熱，加鹽就飲得喇，啲湯都 ok 好味呀，而且都好方便，有咗呢個煲，以後就可以有所謂嘅＂老火湯＂飲喇！

製作湯水中

另外今日係兔兔同李奧結婚 1 週年紀念呀，喺度祝佢地日日都開開心心，快快樂樂 ！

522 C9 聚會

今日約咗一班 C9 出黎飯聚，今日都好齊人，係除咗大 Ka 未能出席之外！

今次去咗由毛毛提議嘅羽壽司食飯 ，因為佢海膽同帶子壽司都做緊 $8 一碟，而且狐太又有九折會員咭，所以就決定同 C9 們去食喇！  

由於有 6 個人咁多，佢地又無乜幾多張大枱，所以等咗成個鐘有多先有位，搞到大家大汗疊細汗 ！  

因為等位等得太耐，大家已經好肚餓，所以到有位嗰陣，一坐低就即刻 order 6 客帶子同 6 客海膽壽司，之後先再 order 其他嘢！

6 客帶子壽司

6 客海膽壽司

三文魚，燒三文魚同腐皮壽司

6 個 C9 一路傾一路食，嘻嘻哈哈咁就食完餐飯，見時間尚早，天使就提議去 Sogo 行一轉，因為由今日開始係 Sogo 嘅感謝週，實有好多減價貨品 ，基於呢個理由，所以 6 個 C9 都一致贊成天使呢個提議，轉戰 Sogo ！  

去到 Sogo ，果然人山人海呀，大家行咗幾層都無收穫，毛毛就提議不如轉戰 B2 supermarket，6 個 C9 即刻拉大隊攻落去！落到 supermarket ，果然有收穫，大家先後買咗啲鮮椰青汁，之後 Sze ，三嫂同天使又買咗幾條台灣蛋糕，狐太同毛毛就買咗大大盒嘅士多啤梨，大家都有不錯嘅收穫！

今日嘅聚會就係大家一袋二袋之下結束咗，期待下次聚會！

517 BBQ

今日約咗陳李氏加車厘去 BBQ，唔知係咪因為今日天氣比較熱 ，所以當大家去到泥涌郊野公園嗰陣，竟然係大把爐選擇！

選定咗爐，就開始燒嘢食，今次兔兔介紹咗大家燒豆腐卜；狐太第 1 次燒，估唔到幾好味，燒完個皮脆卜卜，好似臭豆腐咁，加埋啲辣椒豉油，正，好味！  

燒完嘢食，大家就拉大隊過黎狐家度打牌打機，今次部 PS3 大派用場，因為大明細佬都有機，所以佢帶埋啲 game 同手掣過黎，所以男嘅就打機，女嘅就打牌，今次大贏家係車厘，而狐太就係大輸家，睇黎狐太要好好磨練一下牌技先得！

歌劇院蛋糕 Opera Cake（附食譜）

今日係經理嘅生日，所以狐太專情整咗個歌劇院蛋糕賀佢生日！ 

食譜：

A - 朱古力海綿蛋糕（6 吋方形模）

全蛋　　　　 4 隻
砂糖　　　　88 克
低筋麵粉　　87 克
可可粉　　　15 克
牛油　　　　50 克
乳化劑　　　 8 克

B - 咖啡牛油忌廉

牛油　　　150 克
糖霜　　　 50 克
咖啡粉　　 12 克
水　　　　  8 克

C - 軟心朱古力

黑朱古力　 130 克
淡忌廉　　 130 克

做法：


先整 A 部份，將低粉同可可粉過過籂 3 次，將蛋同糖打起至 cream 狀，加入乳化劑，再分幾次混入已過籂嘅低粉同可可粉，然後再加入已溶化嘅牛油，倒入模，放入預熱咗嘅焗爐，以 170 度焗 20 分鐘（頭 5 分鐘以上下火焗，之後 10 分鐘調至下火焗，最後 5 分鐘以上火焗面至金黃色），焗好之後趁熱將蛋糕倒扣放涼，橫切成 7 片（去頭去底）！

再整 B，咖啡粉以水開溶，牛油同糖霜打至軟身，加入咖啡水拌勻！

最後整埋 C，黑朱古加隔熱水座溶，將淡忌廉拌入攪勻！

整好咗 A 至 C 後，就開始合併埋一齊，先放第 1 塊海綿蛋糕於正方形模入面，塗上 1 層軟心朱古力，再放第 2 塊海綿蛋糕，塗上 1 層咖啡牛油忌廉，重複以上動作，最後放最後 1 層海綿蛋糕，塗上 1 層咖啡牛油忌廉抹平，再淋上 1 層朱古加醬，放入雪櫃凝固即成，之後可以隨自己喜好加入裝飾！

其實呢個蛋糕好簡單，但係狐太都整咗 3 次先成功；第 1 次失敗嘅原因係因為狐太貪方便，用咗中筋麵粉整個海綿蛋糕，再加上無完全打起哂啲蛋，個爐本身個溫度又高得滯，狐太又開咗上下火，加上時間又稍為耐咗少少，結果出黎係底、面同邊都硬到成塊石頭咁！

第 2 次失敗嘅原因又係無打起啲蛋，今次啲蛋直情好似無打過咁，泡還泡，水還水；但係今次個蛋糕軟身啲，因為今次加咗少少自發粉，但係個底、面同邊都係硬哂！

經過咗 2 次教訓，再參考其他整海綿蛋糕嘅食譜，第 3 次狐太先跟以上方法去做，今次個蛋糕算好成功，係個面未熟哂，應該最尾嗰 5 分鐘開上火焗一焗，咁就應該好 perfect 喇，不過都唔緊要，反正個面都起咗唔要！

今次只係切咗 5 片，去咗頭，得番 4 片，結果要將所有咖啡牛油忌廉一次過塗哂同一片到，搞到個蛋糕超級難食，但係大家都話個蛋糕好好味，真係俾面！

另外＂藍小姐＂都預備咗另 1 個朱古力 cake 俾經理，仲訂咗 1 個超大嘅花籃送俾經理添，喺度祝經理生日快樂，身體健康，環遊全世界 ！

經理，兩個蛋糕同大花籃