2013 年最後 1 件新玩具 - Rasonic 焗爐

狐媽媽嘅整嘢食團隊加入咗新成員，佢就係 Rasonic 焗爐喇！

其實之前係有 1 個焗爐用開，但狐媽媽覺得佢個爐溫唔夠平均，經過連日黎不停咁睇唔同款，再同狐爸爸商議後，最後喺星期六買咗個擁有金色外殼嘅 Rasonic 焗爐，但要星期二先可以送到貨，所以佢就成為咗 2013 年狐媽女媽最後 1 件新玩具！

歡迎哂，希望狐媽媽好快可以同 Rasonic 焗爐做到好朋友！

2013 年回顧

今日係 2013 年最後 1 日，聽日就踏入新嘅 1 年，等狐媽媽黎個回顧先！

1 月

狐家姐返咗 N 班半年，終於都開開心心咁返學，而且仲開始坐校車添，狐家姐要加油！

2 月

仲有 1 個月狐妹妹就出世，而工人姐姐亦都到咗埗，希望有姐姐幫手可以減輕狐嫲嫲嘅工作！

3 月

狐妹妹喺狐爸爸同狐媽媽拍拖 9 週年嘅日子黎到屋企，希望兩位狐小姐可以相親相愛！

4 月

狐妹妹滿月喇，可惜狐家姐情緒唔係好穩定，見到唔對路，坐完月即陪狐家姐散心，希望狐家姐唔好覺得狐妹妹嘅黎到係同佢搶嘢！

5 月

放完產假又要返工喇，希望狐嫲嫲可以搞得掂兩位狐小姐！

6 月

狐妹妹出世百日，幫佢搞咗百日宴，多謝大家賞面出席！

7 月

狐家姐 N 班畢業喇，黎緊 9 月會去新學校讀 K1 ，希望佢鍾意新學校同讀得開開心心！

8 月

今年生日，買咗有史以黎最貴嘅禮物俾自己，要做慳妹喇！

9 月

狐家姐 K1 生活正式開始，希望佢喺新學校讀得開心；同時，狐妹妹 6 個月大喇，要健健康康呀！

10 月

狐家姐 3 歲喇，無乜大型慶祝活動，只係搵朋友整咗個狐家姐至愛嘅 Noddy 蛋糕，要乖乖唔好再扭計喇，要錫狐妹妹呀！另外狐媽媽轉咗新工作，希望一切順利！

11 月

同狐爸爸結婚 6 週年紀念，要繼續相愛好多好多個 6 年！

12 月

聖誕月兼生病月，狐媽媽同兩位狐小姐不停病，希望來年一家大細身體健康！

新嘅一年希望工作順順利利，加多啲人工，個個身體健康，兩位狐小姐讀書開心快樂，希望狐媽媽心目中好多願望都可以一一達成，Happy New Year！

2013 年聖誕假期回顧

話咁快又過咗個聖誕假期，今年都無乜去到任何地方，可能湊住兩個，加上狐妹妹仲細喇，可能出年會出動多啲！

12 月 24 日

平安夜呢日放半晝，返到屋企兩位狐小姐瞓緊晏覺，等佢地醒咗就出咗新城市同狐姨姨狐姨丈食飯，食完飯原本想睇燈飾，但太多人，只得狐姨姨同狐姨丈帶狐家姐睇燈飾，睇完就返屋企！

12 月 25 日

聖誕正日，約咗陳李姚氏開扒地，交換吓禮物（小朋友們），之後又出吓新城市行一陣就返屋企！

12 月 26 日

Boxing day 帶兩位狐小姐去參加媽媽會喺某大屋苑會所搞嘅聖誕扒地，可惜狐妹妹中途瞓咗覺，唯有提早走喺馬鞍山行咗陣又再出新城市！

12 月 27 日

狐媽媽同狐爸爸攞咗假陪兩位狐小姐，原本打算同佢地去睇恐龍，點知去到科學館狐家姐話驚唔肯入去，結果去咗隔離歷史博物館消磨時間，臨走時狐媽媽同狐嫲嫲同狐家姐影咗張懷舊相添！

今年嘅聖誕就咁好悠閒過咗，出年等狐妹妹會行會走，一定同佢地去多啲地方玩！

毒曲奇 - 朱古力杏仁片牛油曲奇（附食譜）

之前跟包友整咗 1 次毒曲奇派哂俾同事食同埋俾狐家姐清哂，狐爸爸未試過 1 塊，今日佢特別要求狐媽媽再整俾佢食，又再整多次睇吓佢欣唔欣賞！

食譜：

牛油　　　　　120 克
全蛋　　　　　1 隻
砂糖　　　　　75 克（原食譜用糖粉 90 克）
低筋麵粉　　　220 克
泡打粉　　　　4 克
可可粉　　　　10 克

做法：

牛油室溫放軟，加入砂糖打至淡黃色；加入全蛋拌勻；分幾次加入低粉、泡打粉同可可粉；再加入杏仁片；放入正方形模入面整成正方形條；放入冰格雪 2 個鐘；攞出黎切片；預熱焗爐 150 度，先焗 10-15 分鐘，然後再反焗 30-45 分鐘，反轉再焗多 30-45 分鐘完成！

狐媽媽只係焗咗 15-20 分鐘，都唔知道原來要反焗，但觀乎狐爸爸同狐家姐 1 塊 1 塊咁食都應該 ok ，下次試吓焗耐啲，睇吓係咪真係再香口啲！

又搬家了！

因為 yahoo blog 要關閉，要周圍搵地方搬 blog，雖然 yahoo 有介紹兩個網站，但覺得唔好用，最後決定揀呢度搬，又當係新一年新開始（遲吓整理番舊嗰啲），希望可以 keep 住繼續寫，等兩位狐小姐大咗可以睇番！

自己坐 + 攞奶樽

喺狐妹妹 5 個月大嘅今日，終於可以自己坐唔需要扶住！

雖然只係坐咗大約 1 分鐘，未撐得起坐直個身，但已經好叻叻喇！

另外，原來狐妹妹都已經識得自己攞住奶樽飲奶喇，狐妹妹好快會出現好多第 1 次，勁期待！

2013 年生日禮物

話咁快又一年喇，又就快到狐媽媽生日！今日收到狐爸爸送嘅生日禮物！

呢份生日禮物係 1 支定焦鏡頭！狐爸爸知道狐媽媽部相機個對焦唔係幾得，於是就買咗呢支定焦鏡俾我，而且呢支鏡俾原裝嗰支輕好多，咁樣狐媽媽就可以日日都袋住部相機返工喇，多謝狐爸爸！

學識轉身

早一兩日狐妹妹差一步就轉到身，嗰頭講完，尋日放工返到屋企，狐嫲嫲話狐妹妹已經識轉身，要開始睇實佢以防發生意外！

今朝早，狐妹妹又喺 BB 床到自己反咗身，狐爸爸仲親眼見証住添！狐媽媽見返工前有小小親子時間，就將狐妹妹放喺大床到等佢轉身，狐妹妹初時都無反應，後尾都嘗試轉身；頭一兩次轉得唔係好順暢，但反開，佢就玩到樂此不疲，不停咁轉身再轉身；佢反得咁順暢，睇黎無覺好瞓，要好好睇實佢先得！

狐家姐 K1 學生相 @ 合一堂

合一堂要喺 7 月 5 日前交 12 張著校裙嘅學生相，今日同咗狐家姐去影相！
 

記得狐家姐之前影呂郭碧鳳學生相時苦口苦面，可能真係大個囡喇，今次識得笑喇，影出黎好靚女，狐媽媽好鍾意呢輯學生相呀！

綠茶香蕉奶麵包（快速 mode）@ P 仔（附食譄）

今日又整麵包，今次整綠茶香蕉奶麵包

Noddy 卡通 DVD 及故事圖書套裝

好耐之前有優惠以 $199 買 1 套 Noddy DVD，見咁抵就買咗；點知成套都係歌，仲要每 1 首歌好明顥係重複駁長，完全唔值 $199 呢個價錢！

狐爸爸一直都想掉咗呢套嘢買過一套係故事形式嘅；最近狐爸爸喺拍賣見到有1 套二手 Noddy 套裝，入面有 8 隻卡通 DVD 同 8 本故事圖書，正係狐爸爸想要嘅嘢！

蜜糖提子麵包（吐司 mode）@ P 仔（附食譜）

停咗幾日無整包，今日又整等聽朝可以出爐有得食，今次整蜜糖提子麵包！

i-angel Four Season Hip Seat + Carrier (Irene)

今日係狐妹妹 3 個月大嘅日子，狐爸爸同狐媽媽買咗禮物俾狐妹妹，就係 i-angel Hip Seat + Carrier！

其實之前已想買，見到又有 3 月媽媽提起，同狐爸爸商量完決定買 1 條！

狐家姐嗰時已有 1 條 ergobaby，但夏天用大人同 BB 都會好熱；而且佢個承托力唔係幾好，搞到條腰好辛苦！見媽媽們話呢個係四季都啱用，加上有 hip seat 可以俾 BB 坐喺度，咁樣可以減輕番個重量，所以決定買黎試吓！

佢總共有 7 隻色，每隻色都有淨色同有花花款，狐媽媽見花花款幾靚，原本揀咗橙色，但見好似無乜人用，最終改番 common 嘅湖水藍色！可能真係多人用，所以由原本下星期一先有貨變為今日就收到喇，希望狐妹妹鍾意用喇！

合一堂好消息

Yeah，等咗咁耐，終於知道結果喇！

頭先收到合一堂電話，老師話上晝班有位，問狐媽媽會唔會幫狐家姐轉上晝班，當然轉喇！

實在太好喇，終於等到喇，咁樣時間上就可以鬆動啲，good！

粒粒芝士麵包（吐司 mode）@ P 仔（附食譜）

前排買咗高溶點芝士同 Parmesan 芝士，今日終於決定整芝士麵包！

香蕉奶麵包（快速 mode）@ P 仔（附食譜）

之前見沙律媽整香蕉奶麵包

新生註冊 @ 合一堂

今日狐爸爸同狐家姐去咗合一堂註冊！

今次主要係交上學期書簿費同買校服；狐家姐真係好瘦，狐爸爸話佢著細碼校服都仲有鬆；風褸仲大件，因為無哂細碼變咗要咗中碼！

1 個鐘就完成哂註冊手續，遲啲就會知究竟狐家姐讀上晝班定下晝班，希望狐家姐會鍾意呢間學校喇！

蜂蜜綠茶麵包（吐司 mode）@ P 仔（附食譜）

尋晚又整麵包等今朝出爐，今次整番蜂蜜綠茶麵包 ！

香橙麵包（吐司 mode）@ P 仔（附食譜）

今日又整麵包，今次試整香橙麵包！

Day 70 - 打四合一及肺炎第 1 針 + 忌廉排包及朱古力忌廉麵包 @ P 仔（附食譜）

狐妹妹今日 70 日大，係時候要打兩個月針，即係四合一同肺炎第 1 針！

約咗 15:30 去健康院打針，點知點幾去到健康院未開門，等到 14:00 開門，姑娘又話約咗 15:30 無得改早，最多 15:30 嗰批俾第 1 個打先，結果一等都係等到 16:xx 先有得打！

狐妹妹好叻女，兩支針都係拮嗰吓喊，之後好快瞓番；觀察咗一陣再加止咗血，約埋四個月針期，就同工人姐姐同狐妹妹返屋企！

狐妹妹身高：56cm

狐妹妹頭圍：37.3cm

狐妹妹體重：5.18kg

 

返到屋企又係時候整包，見上次個綠茶忌廉包幾好食，今日又整忌廉包，今次係忌廉排包同朱古力忌廉包！

綠茶忌廉麵包（吐司 mode）@ P 仔（附食譜）

見上次整燶咗嘅忌廉包幾好食，今次整綠茶忌廉包！

拍拖 9 週年禮物 - 狐妹妹出世

今日係狐爸爸同狐媽媽拍拖 9 週年紀念日，狐媽媽送咗 1 份好好嘅禮物俾狐爸爸，就係狐妹妹喇！

等狐媽媽回顧吓狐妹妹出世嘅過程先：

3 月 5 日 上晝 10:00

送咗狐家姐返學返屋企休息，坐坐吓覺得下面有少少濕；去廁所望望，見紅，即打俾狐嫲嫲同狐爸爸準備入院

中午 12:00

狐爸爸同狐媽媽食埋個午餐，慢慢踱步過威爾斯辦入院手續

下晝 3:00 - 夜晚 8:00

終於有床位，依然見少紅，無痛無穿水，食得瞓得，同狐爸爸講應該聽日會俾姑娘＂遣返＂

夜晚 8:00 - 9:00

狐爸爸黎陪狐媽媽食晚飯，之後仲同其中 1 位 3 月媽媽相認兼傾計；傾完計又係時候去廁所，今次見到有舊大組織出咗黎，知道狐妹妹應該震晨或聽朝早會出黎，即同狐爸爸講唔使出院同埋預除時俾姑娘 call 返黎醫院陪產

夜晚 9:00 - 零晨 1:00

嗰頭舊組織出咗黎，呢頭即黎料開始陣痛；因為有過狐家姐嘅經驗，狐媽媽叫自己唔好亂用力，要忍住

3 月 6 日零晨 1:00 - 3:00

開始好密咁痛，叫咗姑娘檢查，只係開始 2-3 度，唔俾落產房；但狐媽媽真係忍唔到，結果姑娘屈服送咗狐媽媽落產房

零晨 3:00 - 5:30

狐媽媽因為未開夠度數同埋未穿水，所以繼續喺產房痛住等；狐媽媽開始進入迷糊狀態，但都不停叫自己叫忍住唔好亂用力；姑娘見到狐媽媽咁，喺狐媽媽同意下打咗支無痛針，但支針無乜效，狐媽媽繼續痛

朝早 5:45 - 6:06

痛咗咁耐終於喺最後一刻穿咗水，同咗姑娘講即 set 架步，叫埋狐爸爸入黎就開始生；但狐媽媽因為之前用咗太多力去忍，結果試咗 4, 5 次先生到狐妹妹

上晝 6:06 - 8:00

生完狐妹妹，姑娘幫狐妹妹清潔乾淨就交俾狐媽媽放喺心口到取暖；因為狐媽媽今次無亂用力，所以唔使縫太多針；搞掂好哂就上病房

今次生狐妹妹都算快，狐媽媽完全唔使用笑氣都可以生到；係支無痛有少少後遺症搞到狐媽媽頭暈落唔到床；至於狐妹妹好叻叻，肯食肯瞓；希望狐家姐會鍾意呢位狐妹妹喇！

狐妹妹足月兼工人姐姐到埗

今日狐妹妹足 37W 喇，可以隨時準備出世，而且，工人姐姐亦都到埗喇！

今晚要去僱傭公司接工人姐姐返屋企，唔知道呢位工人姐姐 ok 唔 ok 呢？後生而且單身，佢聽唔聽話呢？希望係 1 個好姐姐喇！另狐妹妹會幾時出黎呢，好似未有動靜咁！

好多嘢諗同擔心，希望一切順利喇！

第 5 次健康院產檢 @ 36W4D

今日又係返健康做檢查加 check B 鏈！

蛇年團拜 @ 李家會所

今日係年初八，約咗陳翟林（新配搭）一齊去李家會所搞團拜，今次仲叫咗盤菜添呀！

The Big Four 大家利事世界巡迴演唱會 2013 @ 2013 年情人節

今日係情人節，狐爸爸同狐媽媽嘅節目係掉低狐家姐走咗去聽 Big Four 演唱會！

其實佢地 2 年幾前嘅演唱會已經想去聽架喇，但買唔到飛；今次終於買到，仲要係尾場添，超期待！

一如其他演唱會一樣，俾原定時間遲咗開場，佢地 4 個都係搞吓爛 gag ，再唱吓自己同對方啲歌，ok 喇，係有啲笑位同感動位；狐爸爸同狐媽媽無等 encore 就走咗喇，返到屋企都成 12 點，唔知又要等幾耐先有得再睇佢地嘅演唱會呢！

疑幻似真 @ 35-36W

踏入 35W，又撞啱農曆年，當然係要執吓屋兼行吓花市，唔算太操勞！

年初一，同往年一樣，都係去咗狐姑婆同狐太婆到拜年跟住返屋企，返到去都係洗吓嘢執吓嘢咁；點知零晨突然左邊坐骨神經痛，俾狐爸爸發現咗即上床休息，見無痛諗住打陣機再瞓；點知個肚開始有啲痛，同之前嘅痛法唔同，有啲似陣痛 feel ，仲越黎越痛而且密，心諗唔通真陣痛，狐妹妹想早啲出黎攞利是？！

嗰吓真係有啲擔心，始終未足月，想狐妹妹住耐少少先好出黎；原本想叫狐爸爸 call 白車入院，點知痛吓痛吓瞓著咗；好彩係假陣痛，但搞到狐爸爸超擔心，成晚無瞓過咁滯；第二日仲即刻拿拿聲整定炒米茶，以防狐妹妹提早出黎！

打後幾日個肚同坐骨神經都痛，結果俾人下咗命令唔准四圍去，唔准操勞，行幾步要休息；狐妹妹，乖乖地住到至少足月先好出黎，唔好咁早出黎玩呀！

王國會長

最近收到 BK 邀請擔任王國會長一職，擔粗粗提交資料應承咗！

過咗幾日收到佢地確認電郵，狐媽媽負責管理 2013 年 1-3 月媽媽會，主要都係管理吓啲發帖有無違規等等！好似好簡單，希望可以勝任，做好”呢份工”！

BK 為咗歡迎新任會長同答謝舊有會長，再加上農曆年就到，佢地送咗 BK 特製利是封 2 套；今日啱啱收到，有利是封係少少閃底，好靚；狐家姐一見到就搶住話要，既然狐家姐鍾意，就用黎封俾兩姊妹喇！

第 4 次健康院產檢 @ 34W4D

距離上次去健康院檢查有成 10 個禮拜，今日終於返去檢查！

去到健康院已經 15:xx ，好多媽媽已經做哂基本嘢坐喺度等見醫生／姑娘！可能晏，所以好快已有得驗小便磅重同量血壓！

坐咗一陣，好快就見姑娘，報告一切正常；再檢查埋肚圍，狐妹妹個頭啱啱去到盤骨位，所以呢排盤骨開始痛；姑娘叫忍埋呢兩三個禮拜就會解脫，如痛就儘量休息吓，唔好行太多！

因為仲差幾個禮拜就生，所以約咗兩個禮拜後再返健康院順便做 B 鏈檢查，大約 17:00 完成走人！

狐媽媽重量：66.2kg

狐妹妹週數：34W4D

第 7 次私家產檢 @ 34W

原本約咗年廿九（即 8 號去私家），但醫生嗰日唔得，所以改咗今日去！

上到去又係做例行嘢，跟住入房見醫生，上次抽咗泌去驗原來係驗 B 鏈，無問題；呢期開始有啲 m 痛 feel 係子宮收縮，醫生話會開藥俾狐媽媽有需要時食，叫狐媽媽捱多兩個禮拜到 36W 就由佢痛，因為已經叫足月可以出世！

今日狐妹妹全程都扒喺到，照唔到樣；磅數唔算太重，正常輕啲啲喇，醫生仲問狐媽媽係咪食少咗嘢；狐媽媽估計狐妹妹出世應同狐家姐差唔多重；無特別約咗 4 個禮拜後再見醫生，唔知到時生咗未呢？

狐媽媽重量：66.6kg

狐妹妹週數：34W

狐妹妹重量：2.37kg

另外狐家姐今日第 1 次坐校車返學，希望狐家姐鍾意坐，狐家姐加油！

有”盈餘” @ 33W4D

差唔多 34W，係時候要諗定狐妹妹嗰名喇！

狐婆婆前排睇得電視太多，話鍾意個”柔／悠”字，但係狐爸爸唔太鍾意；後黎諗住用個”珺／君”字，但又狐爸爸覺得好似好硬咁！

狐媽媽突然間諗起個”瑜”字，都幾好聽呀，加埋狐家姐個名，”瀅”同”瑜”，有盈餘，好聽又有意頭，狐爸爸都覺得唔錯，不過都要問問 4 大長老意見先；哈哈，唔知狐妹妹鍾唔鍾意呢個名呢！

煲薑醋 @ 33W2D

已經踏入 33W，加上狐嫲嫲唔舒服，所以今日開始煲定薑醋，仲搵咗狐姑婆黎幫手添！

狐家姐 N 班家長日 @ 呂郭碧鳳

今日係狐家姐學校家長日，約見時間係 13:00！

訂甜醋 @ 32W3D

可能因為第 2 胎關係，再加上要照顧狐家姐，狐嫲嫲想今次早少少開始整薑醋！

今次同上次一樣，都係訂八珍；今日打去幫狐嫲嫲訂定咗 10 斤甜醋同 1 斤黑糯米醋，星期三送貨，辛苦哂狐嫲嫲喇！

2013 年海洋公園之旅

繼狐家姐喺 1 歲去完海洋公園，今日又再次踏足海洋公園；今次係同狐公公，狐姨媽同狐舅父去！

第 3 次政府產檢 @ 31W3D

上兩次返威記係做 Oscar 同照結構，今次返去係見姑娘同醫生！

約咗 9:15，諗住有覆診預約紙就可以去 4 號窗交低等叫名，點知佢當係新症，要去 1 號窗排隊登記！

鮮奶燉冰糖木瓜雪耳（附食譜）

之前狐婆婆俾咗兩個木瓜同雪耳狐媽媽，今日就試整鮮奶燉冰糖木瓜雪耳滋補吓！

 

食譜：

 

木瓜　　　2 個

鮮奶　　　2 盒

雪耳　　　2 朵

冰糖　　　適量

朱古力凍餅（附食譜）

真係好耐無整過蛋糕，原本打算整木槺布甸俾狐家姐食，但無買煉奶；見老細蘇珊生日，於是決定用現有材料整個蛋糕賀佢生日！

搵咗好耐，終於搵到呢個朱古力凍餅係可以喺有限材料之中做到！

 

食譜：

 

A - Oreo 餅底

Oreo 餅　　　　　　150 克
牛油（溶液）　　　  40 克

B - 朱古力饀

朱古力粒　　　　　 200 克
砂糖　　　　　　　 65 克

做法：

 

先做 A，牛油座溶，Oreo 餅壓碎，混入牛油溶液，餅模加入牛油紙，將餅碎倒入再壓成餅，放入冰格雪凍