Housewarming @ 毛毛家

毛毛又搬咗新屋，比之前嘅再大啲，係狐家夢寐以求嘅 3 房大單位，狐家當然又要去參觀吓示範單位喇！

一早同狐家姐報暑假班，之後就同狐爺爺狐嫲嫲飲茶，然後就出發去毛毛新屋！

由 ST 去 TKO 都好快，半個鐘就到！毛毛住嘅屋苑好大，好多設備；毛毛住得越黎越高，今次住到 55 樓！

上到去，休息咗一陣就開始參觀示範單位，毛毛新屋有 3 間房，2 個廁所，有個大露台，仲有間儲物室，簡直係狐媽媽夢想中嘅屋！

參觀完就開始今日另一活動，同毛毛一齊整腸仔包！Lo 仔同狐家姐見到又要參與埋一份；造好哂型之後，因為發酵需時，毛毛提議落會所玩！

會所都幾大，有小朋友區同 BB 區，仲有圖書區添；玩咗 1 個鐘到，大隊就上番毛毛屋企準備將麵包入爐！

兩盤包共焗咗 30 分鐘就出爐，一出爐個個都爭住食，超軟綿綿，好快就清哂一盤！食完麵包，Lo 仔同狐家姐玩咗一陣 Lego 就完結咗今日嘅 housewarming！

多謝毛毛同 Lo 嘅款待，下次再玩過！

Housewarming @ 愛美麗家

約咗好耐兼改咗好多次期，終於鐵定咗今日去愛美麗同銘銘新居 housewarming！

狐家大約 5 點到去到愛美麗新居，間隔四正光猛！見花花未黎到，兩姊妹又醫完肚，就同狐家姐喺有限資源下整曲奇餅；仲請愛美麗教狐家姐彈琴添！

隔咗無耐花花同肥仔都到咗，大家就安排叫晚餐同睇 RM，咁就過咗 1 個愉快嘅晚上，期待下次再聚，同埋希望下次兩位小姐唔好再咁百厭嚇親人！

探訪姚大少

今日約咗陳氏一齊去探姚大少！

1:00 去到姚宅，姚大少覺覺豬；姚大少真係超多頭髮，瞓覺嗰陣成日整豬咀，超搞笑！

祝姚大少快高長大，好多哥哥姐姐等緊同你玩！

姚小朋友出世喇！

恭喜哂譚美同埋姚生，姚小朋友尋晚平安出咗世喇，係 1 個重 8 磅 3 嘅肥仔！

自從狐妹妹過咗 6 個月之後，好似好耐無見過手抱 BB，希望可以快啲見到呢位重磅小朋友，狐家祝姚小朋友快高長大，聽教聽話！

探訪哈林仔

上星期探完謙謙仔，今日輪到去探哈林仔喇！

大約 3:00 幾上到大 Ka 媽媽到，咁啱哈林仔食飽飽換完片片瞓緊覺覺豬，就同夏雨爸爸同大 Ka 媽媽吹水，期間哈林仔醒咗一陣，耍完一大輪拳之後又瞓過，真係好搞笑！

交換完一輪心得之後，5:00 到就走人出新城市行街，喺度再次祝哈林仔快高長大，聽教聽話！

探訪謙謙仔

今日約埋李姚氏同車厘一齊去探謙謙仔！

上到去正值謙謙仔“食飯”時間，可能都只係啱啱過咗 12 朝，所以謙謙仔都係以瞓覺為主，一路食一路瞓；而且如果佢瞓著咗，就算好多人喺度傾計佢都可以唔醒，勁！

謙謙仔勁似大明，連手指腳指長長呢樣都似大明，喺度再次祝謙謙仔快高長大，聽教聽話！

哈林仔出咗世喇！

繼謙謙仔之後，今日輪到哈林仔出世喇！哈林仔係 1 個重 7 磅嘅 BB 仔，祝哈林仔快高長大，狐姨姨遲啲黎探你！

謙謙仔出咗世喇！

大明同 Vicky 嘅結晶品謙謙仔終於出世喇，恭喜哂！

阿囝有成 6 磅 11 安士，喺度祝謙謙仔快高長大，聽教聽話，期待與謙謙仔見面！

朱 BB 出咗世喇！

朱仔兩夫婦嘅囝囝今日出咗世喇，真係恭喜哂，亦都要恭喜朱仔，因為今日除咗係佢阿囝嘅生日之外，亦都係佢自己嘅生日，真係可喜可賀呀！喺度祝 2 位朱生生日快樂，身體健康，朱 BB 快高長大，聽教聽話！

王二少出世喇！

今朝早皇帝問狐太點解咁晏都未見 Don Don 返工，平時都好早就返到公司；經佢一問，狐太即打電話俾 Don Don，原來佢身在醫院呀！

佢由尋晚開始見紅呀，所以要即入院，因為見紅就即係代表 BB 有機會喺未來 1 至 2 日內出世！

知道 BB 將會出世，狐太都不便再同 Don Don 傾咁耐；點知食完 lunch 之後，Miss Chan Chan 已經話 Don Don 生咗喇！真係估唔到咁快呀，果然生第 2 胎係快啲！

因為阿囝俾預產期早咗差唔多 3 個禮拜出黎（原先預產期係 16 號），所以出世時磅數只係差唔多 6 磅，都叫 ok 喇，可以之後慢慢追返，身體健康就可以喇！

喺度再次恭喜 Don Don 同琦哥，祝阿囝健健康康，肥肥白白！

探訪劉小 B

今日去咗探訪陳仔同佢囡囡，原本約咗老易一齊去，但係因為收工趕唔切 meet 佢，而且佢又約咗人，所以佢先去探陳仔，狐太同狐老公一齊上去！

因為係政府醫院，探訪每次只限 2 個人！入到去，見到陳仔面色同精神都唔錯（因為佢之前有少少發燒），囡囡就瞓咗喺側邊嘅 bb 箱，囡囡瞓覺個樣好似陳仔，見到佢真係好可愛，不過由於佢太細個，狐太有啲擔心會整親佢，所以今次無抱佢，留番等佢大個少少先抱佢玩，期待中 ！  

識咗陳仔 1x 年，見住佢拍拖，結婚，到而家佢囡囡出世，時間真係過得好快，今日真係好戥佢高興，喺度祝囡囡健健康康，快快樂樂咁成長！

劉小 B 出世喇！

恭喜哂劉佬佬同陳仔，佢地囡囡今日出咗世喇，係 1 個重 6 磅幾嘅 bb，真係可喜可賀，喺度祝囡囡快高長大，聽教聽話，好期待星期四見吓囡囡 ！

探訪小甘妹 ＋ 史奴比標籤機

今日約咗林同學同迪迪仔一齊去探訪小甘妹！

去到嘅時候咁啱係小甘妹”食飯”時間，大家一路同偉哥爸爸傾計，一路等小甘妹食飽飽之後同佢見面！

大約 7:45 到，小甘妹終於食飽飽，大家齊齊拉大隊去育嬰室見小甘妹；小甘妹好得意，出世 3 日已經超多頭髮，佢間唔中睜開眼望吓嘢，跟住又合番眼繼續瞓佢嘅覺覺豬，真係好可愛，好想快啲有機會抱吓佢，同佢玩！再次恭喜偉哥同甘妹！

另外因為新屋嗰度有 2 個 3 位同 4 位嘅電掣，狐太成日都亂開，分唔到邊個掣打邊個掣，狐老公提議不如買部標籤機，print 啲 label 出黎貼上去，咁樣狐太就唔會亂開！

經過咗一輪資料搜集，狐老公見到 Brother 有史奴比標籤機賣，除咗機身有史奴比同 Woodstock 之外，print 出黎嘅 label 都有佢地做底，而且仲可以加埋佢地做框添，好鬼靚架；狐老公知狐太一向都鍾意史奴比，所以就買咗呢部標籤機送俾狐太，多謝哂狐老公！

小甘妹出世 ＋ 清潔行動第 2 回

恭喜偉哥同甘妹，囡囡喺尋日健健康康出咗世喇，真係好消息呀，喺度祝小甘妹快高長大，聽教聽話，大個咗好似媽媽咁靚女！

講番新屋，今日又再上去搞清潔；經過咗星期日嘅清洗，今日好好多，無星期日咁辛苦，今次主要都係要吸塵，拖地同抹窗，但係都搞咗成兩個鐘，廚房同廁所都只係係咁二洗吓咋，聽日可能會有櫃送黎，睇黎聽日又要再上去做清潔女工喇！

齊齊做業主

踏入 2009 年，身邊都陸續有唔同嘅喜慶事發生，最開心當然係狐太榮升做業主喇，咁大個女第 1 次做業主呀，勁期待！

繼狐家做咗業主之後，林同學亦都搖身一變成為業主，真係可喜可賀，佢仲喺 2 號嗰日收齊所有鎖匙，可以開始為佢自己嘅新天地扮靚靚喇！

今日，亦都知道另 1 位朋友將會加入業主之列，佢就係毛毛喇，佢仲要買咗狐太嘅目標添呀，而家只係差簽名咋，大筆一揮之後，要熱烈歡迎毛毛成為業主，恭喜恭喜 ，希望今年會陸陸續續收到其他好消息喇！