7 月之星生日飯 @ 煌府

今日約咗陳李氏食飯，慶祝 7 月之星兔兔生日！

今日去咗煌府食飯，真係唔該哂兔兔訂位！原本兔兔訂咗 7:00，狐媽媽因為多嘢做，結果要陳李氏等到 8:30 先有得食，真係唔好意思！

今次叫咗啲小菜，有片皮鴨，蝦，雞，金銀蛋莧菜，帶子玉環甫，好味，兔兔仲預先訂咗 3 個椰皇燕窩燉鮮奶，超級好味，今餐食得好飽，喺度預祝兔兔生日快樂，心想事成！

《初生嬰兒照顧手冊及產後怎 Keep Fit》講座 @ 26W1D

之前收到美贊臣嘅短訊關於佢地將有講座舉行，當時報咗名參加，今日就係舉行講座嘅日子！

講座嘅地點極近公司，行去都只係 10 分鐘到！可惜呢期太多嘢做，好多時都夜收工，去到講座地點佢已經開始咗！

今日嘅講座內容主要係講照顧初生嬰兒同埋產後 keep fit；頭 1 部份由醫生講解，其實狐媽媽主要都係想聽呢 part，但係遲到，去到坐低咗都只係聽到小部份，而且佢都係得啲圖片；之後就到營養師講產後 keep fit，因為實在太攰，所以放棄咗呢 part 無聽！

走嘅時候仲撞到好耐無見嘅 Wing 神，原來 Pui Yee 都喺度聽呢個講座，同 Wing 神吹咗陣水就坐車返屋企！

今日嘅講座紀念品係 1 個奶粉袋加 1 罐奶粉同 1 條口水肩

 

今日係毛毛生日，喺度祝佢生日快樂，身體健康，心想事成！

朱 BB 出咗世喇！

朱仔兩夫婦嘅囝囝今日出咗世喇，真係恭喜哂，亦都要恭喜朱仔，因為今日除咗係佢阿囝嘅生日之外，亦都係佢自己嘅生日，真係可喜可賀呀！喺度祝 2 位朱生生日快樂，身體健康，朱 BB 快高長大，聽教聽話！

第 4 次政府產檢 + 政府超聲波 @ 25W4D

今日又返威記產檢喇！點解又返威記？今日主要係照超聲波，呢個期係上次見醫生嗰陣俾嘅！

今日 9:30 去到威記，又去 4 號窗交低覆診紙，跟住又去磅重同量血壓，血壓正常，但係重量就好似有啲嚇人，狐媽媽今日上磅竟然俾 2 日前重咗 2 磅，1 日重 1 磅好似嚴重咗，要食番少啲先得！

磅完重量完血壓之後等叫名照超聲波，今日係由助產士負責照，同星期三嗰日見嗰位係同 1 個人，佢都認到狐媽媽；佢先問咗資料然後就上床照超聲波！

其實今次照超聲波主要係睇睇子宮肌瘤嘅情況，不過助產士都有照埋狐 BB；狐 BB 頭圍，肚圍同腿骨都啱週數，腿骨有 4.37cm！狐 BB 今日都算幾活躍，口仔不停郁，2 隻手仔又放上頭到，腳仔又不停咁踢！之後助產士就開始照個子宮肌瘤，唔知係咪狐 BB 大咗遮住咗個肌瘤，助產士搵咗好耐都搵唔到！之後助產士決定用陰超再照多次，睇吓搵唔搵到個肌瘤；結果都係搵唔到；而家都只可以當佢情況穩定，唔會影響到狐 BB ！

照完超聲波，又出去等叫名見醫生！醫生首先講番上次照結構嘅報告，大致上無問題；佢見到今日都係照唔到個肌瘤，都係當佢情況穩定，所以暫時都唔使再安排照超聲波，等 36W 先照多次睇吓狐 BB 嘅情況再決定順產定開刀，另外亦都要等 36W 先決定有無需要俾個入院催生期！

狐媽媽之後問咗醫生 1，2 個關於睡姿問題，醫生話只要自己舒服就可以，唔需要特別向左瞓！另外尋日發現右腳腳掌水腫，之後休息咗一陣就消咗腫，所以今日問一問醫生，醫生話水腫係正常，仲話之後會連小腿都會腫，叫狐媽媽唔需要太擔心，醫生亦都叫狐媽媽游多啲水！最後醫生叫狐媽媽跟番助產士俾嘅期 21 號再返去覆診！今日成個產檢 11:45 完成！

狐媽媽重量：59.3kg
狐 BB 週數：25W4D

第 3 次政府產檢 @ 25W2D

今日又係返威記產檢嘅日子，準時 9:15 去到威記，去 4 號窗交低覆診紙，再做埋例行嘅量血壓，磅重同驗小便，又坐喺度等叫名見助產士！

今日見另 1 位助產士，先核對咗資料，之後就上床量一量個肚同聽心跳，一切都符合週數！之後助產士問狐媽媽有無乜嘢唔舒服或者係有無乜嘢特別問題想問；上次見私家嘅時候醫生叫狐媽媽問一問點解威記會安排我啲產檢咁密；助產士話因為狐媽媽有個子宮肌瘤，所以會俾一般孕婦睇得密啲！

之後再問威記有無得安排參觀產房同有關陪產問題！助產士話威記係無安排參觀產房，但係佢話狐媽媽可以自己去 7F 嗰度望吓瞭解吓！至於陪產問題，助產士話到生嗰陣只要同姑娘講聲，如果產房許可係無問題，不過只限於順產！

之後都係問下有關肚痛同腰痛嘅問題，助產士話只要唔係有規律嘅肚痛同埋唔係痛到行唔到企唔到，咁就無乜大問題，唔係作早產！至於腰痛，唔知係咪啱啱嗰個星期六去咗浸水，呢期無咗腰痛問題；助產士就話狐媽媽可以 keep 住繼續去游水，對減輕腰痛好有幫助！

至於重量方面，助產士話狐媽媽暫時 ok，只要 keep 住唔好重得太過份就無問題！

問完問題，助產士就幫狐媽媽再約 4 星期之後覆診；今日雖然無得見狐 BB，但星期五就可以見到喇！今日成個產檢 10:30 就完成喇！臨走時助產士提狐媽媽星期五問一問醫生攞定個催生日期！

狐媽媽重量：58.4kg
狐 BB 週數：25W2D

2010 年父親節

今日係父親節，祝天下爸爸開開心心！今日嘅節目就係約埋 Miss Chan Chan 一家去探王二少喇！

大約 2:45 去到 Don Don 屋企，王二少啱啱食飽飽瞓緊覺，望咗王二少一陣就同大小姐同 Miss Chan Chan 囡囡玩；王二少似足爸爸，皮膚黑黑，而家大約係 3.3kg，都算 ok 喇！

因為今日係父親節，Miss Chan Chan 專情買咗個車車蛋糕上黎同幾位父親慶祝，狐老公暫時都只係半個爸爸，所以今次呢個蛋糕由琦哥同王大小姐，Miss Chan Chan 老公同囡囡一齊切，再大家一齊分享！

食完蛋糕，王二少啱啱醒咗，Miss Chan Chan 就即場示範俾狐媽媽呢個無知媽媽睇點幫 bb 沖涼，餵奶同掃風！真係多謝哂 Miss Chan Chan 嘅示範，狐媽媽真係學到唔少嘢，希望到時狐 BB 唔會俾狐媽媽整親或者嚇親喇！

之後 Miss Chan Chan 一家先走，再同 Don Don 吹咗陣水就返狐婆婆到同狐公公慶祝父親節！

新 Sofa 上場

狐家屋企張 sofa 大大話話都跟咗狐家 6 年有多，見到佢開始承受唔到狐爸爸同狐媽媽嘅重量，加上成日都俾兩位公主＂襲擊＂，為免佢再＂受苦＂，狐家決定俾佢提早＂退休＂，只係留低兩位＂小卒＂！

之前跟大 Ka 媽媽去買新屋傢俬，咁啱見到有張 sofa 好啱狐家，佢又係布質料，又係兩座位，仲要有得兩邊彈出黎，而且價錢仲好啱心水！基於呢啲原因，狐家決定＂聘請＂佢返黎＂坐鎮＂！

今日係呢張新 sofa 第 1 日上任，真係覺得好舒服，舒服到連狐媽媽之前啲腰骨痛都無埋，再加上有兩位＂小卒＂幫手，簡直係正爆！狐爸爸同狐媽媽為免佢一樣遭受兩位公主＂襲擊＂，決定為佢加件＂衫＂！件＂衫＂原本打算訂造，但係因為好難幫新 sofa ＂度身＂，而且佢亦都俾上任 sofa ＂肥大＂，所以買咗件 king size 嘅＂斗篷＂俾佢護身，希望佢可以＂安心＂喺狐家＂工作＂喇！

 

新 sofa

 

掀開咗＂斗篷＂之後嘅樣

 

彈咗其中一邊出黎之後嘅樣

給 BB 買禮物 (9)

今日狐媽媽又買嘢俾狐 BB 喇！

狐媽媽放工經過屋企附近商場，見到有 1 檔賣衫仔嘅，狐媽媽忍唔住走埋去睇，一睇又出咗事；狐媽媽買咗 3 件衫仔俾狐 BB，呢 3 件好靚，但係就有啲貴，平均都成 $70 1 件，睇黎狐媽媽下次都係去返花園街或者深水埗買衫好啲！

 

3 件新衫仔，可以留返狐叔叔結婚嗰陣著

給 BB 買禮物 (8)

狐姨媽啱啱去完台灣旅行返黎，又買咗手信俾狐 BB 喇，睇吓狐姨媽幾錫妳，今日返狐婆婆到食飯順便攞手信！

狐姨媽今次買咗 1 頂帽仔，2 條口水肩，1 件和尚袍同 1 包紗巾，真係多謝哂狐姨媽！

 

狐 BB 嘅手信

狐姨媽唔止淨係買咗手信俾狐 BB，狐爸爸同狐媽媽都有份，有 1 支葡萄梅酒，1 樽蜜糖，1 樽狐媽媽好鍾意食嘅柚子同埋 2 支 lip balm，多謝狐姨媽！

 

狐爸爸同狐媽媽嘅手信

第 5 次私家產檢 + 給 BB 買禮物 (7) @ 22W5D

等咗 5 個禮拜，今日又係見狐 BB 嘅時候！今次為咗遷就狐爸爸可以見 BB，所以轉咗去荃灣覆診！

荃灣覆診有少少麻煩，打去 book 咗時間都要嗰朝早再打去診所攞籌；咁啱大 Ka 媽媽又係今日覆診，所以一早打咗成 10 分鐘電話幫自己同大 Ka 媽媽攞籌，下晝先再去診所！

既然出開荃灣，大 Ka 媽媽又想去買埋架車仔，所以又約理一齊去 shopping！今日主要都係買啲濕星嘢多，狐媽媽就買埋個 Nuk 嘅大玻璃樽，洗奶樽液，買咗張尿墊，幾條汗巾，安撫奶咀（雖然唔知用唔用，買咗先），1 包有大中細嘅紗巾，儲奶袋，Nuk 濕紙巾，Nuk 乳墊，產婦套裝，BB 指甲拑套裝，儲物袋等等；至於大 Ka 媽媽就買咗洗奶樽液，汗巾，安撫奶咀，儲奶袋，Nuk 清潔綿，Nuk 乳墊，吸鼻器，BB 指甲拑套裝；至於車仔，因為又無貸關係，所以又買唔到！

 

 

 

今日嘅戰利品

買完嘢，因為大 Ka 媽媽有嘢做，所以大家就分道揚鑣，狐媽媽先放低啲戰利品喺狐爸爸公司，之後食個 tea ，等埋狐爸爸收工就去覆診喇！

去到診所，登記完等尖沙咀嗰邊 fax 番啲資料過黎，跟住就叫名去磅重同量血壓！

等咗一陣就入去見醫生喇！今日一樣都係照吓狐 BB 頭仔，肚仔，背脊骨，大腿骨，手仔同腳仔，當然再次肯定咗狐 BB 係 1 個可愛公主喇；另外醫生仲俾埋狐 BB 嘅 4D 樣我地睇添，狐爸爸話狐 BB 個樣似我呀，係似我咁＂鼓起泡腮＂呀，好似嬲咗成村人咁呀，狐 BB 妳樣似好喇，要做個開心 BB 呀！

狐 BB 週數：22W5D
狐 BB 重量：509g

 

 

頭

 

肚仔

 

大腿骨，今日有 3.89cm 喇

 

背脊骨

 

手仔

 

腳板，不過睇得唔好清

樣唔 post 出黎喇，等到佢出黎大家自然會見到佢架喇！狐 BB 要繼續快高長大呀，25 號再見喇！

產前運動班 @ 22W4D

今日又返威記上第 2 堂產前運動！

原本 4:00 開始上，點知狐媽媽又遲到，好彩物理治療師都俾上！其實今日主要都係教做一啲好簡單同埋舒緩痛症嘅運動！

治療師先教腳部運動，呢個運動可以舒緩抽筋同水腫，都係將腳板向上，向下，向外同向內咁郁動！

之後就教舒緩腰部嘅運動，治療師話好多媽媽都會因為想突顯個肚而自自然然咁將個肚向前，咁樣條腰骨就會向前拗；呢個運動就係要啲媽媽將條腰壓埋低，等佢無拗前得咁利害，咁樣就可以減少腰痛！

另外 1 個舒緩腰部嘅運動就係媽媽半跪喺度，腰部保持直，之後慢慢曲起條腰再放鬆！

之後就教產前呼吸方法，有 3 種程度，由淺，中，深，初初無乜陣痛嗰陣就用淺度呼吸，即係空氣吸入到個肚到；當開始有小小陣痛嗰陣就轉用中度呼吸，空氣吸入到肺部；到陣痛好密嗰陣，就用深度呼吸喇，即係即吸即呼！

講完產前運動，治療師就示範咗幾個產後運動，2 堂嘅運動班咁就上完喇！等狐媽媽努力做吓呢啲運動，舒緩吓啲痛楚問題先得！