產前運動班 @ 22W4D

今日又返威記上第 2 堂產前運動！

原本 4:00 開始上，點知狐媽媽又遲到，好彩物理治療師都俾上！其實今日主要都係教做一啲好簡單同埋舒緩痛症嘅運動！

治療師先教腳部運動，呢個運動可以舒緩抽筋同水腫，都係將腳板向上，向下，向外同向內咁郁動！

之後就教舒緩腰部嘅運動，治療師話好多媽媽都會因為想突顯個肚而自自然然咁將個肚向前，咁樣條腰骨就會向前拗；呢個運動就係要啲媽媽將條腰壓埋低，等佢無拗前得咁利害，咁樣就可以減少腰痛！

另外 1 個舒緩腰部嘅運動就係媽媽半跪喺度，腰部保持直，之後慢慢曲起條腰再放鬆！

之後就教產前呼吸方法，有 3 種程度，由淺，中，深，初初無乜陣痛嗰陣就用淺度呼吸，即係空氣吸入到個肚到；當開始有小小陣痛嗰陣就轉用中度呼吸，空氣吸入到肺部；到陣痛好密嗰陣，就用深度呼吸喇，即係即吸即呼！

講完產前運動，治療師就示範咗幾個產後運動，2 堂嘅運動班咁就上完喇！等狐媽媽努力做吓呢啲運動，舒緩吓啲痛楚問題先得！