2012 年最後 1 日

今日係 2012 年最後 1 日，係最後呢日發生咗 1 件小事，就係狐媽媽同狐一齊喺樓梯跌低咗！

事綠狐家姐一早食完早奶，如常帶狐家姐過狐嫲嫲到；點知一落到樓下，狐家姐因為有痰咳到嘔奶，仲嘔到狐爸爸成身都係；結果狐爸爸要返上樓換衫，而狐媽媽就喺樓下幫狐家姐清潔！

清潔完之後，見狐爸爸仲未落黎，諗住同狐家姐先行去狐嫲嫲到；其實都係自己衰，有 lift 唔搭走去行樓梯；又一手抱狐家姐，一手抽幾袋嘢，結果行咗1 段樓梯，到第 2 段尾嗰時睇唔到最尾嗰級樓梯，就咁同狐家姐一齊跌咗喺地！好彩狐家姐當時用手同 pat pat 落地，無整損；而狐媽媽就左邊手踭落地，個肚無撞到；有 2 位好心住客經過，即刻扶狐媽媽同狐家姐起身，仲問有無事；真係不幸中之大幸，如果有乜事真係唔知點算！

後黎狐爸爸同狐嫲嫲知道咗，鬧到狐媽媽死死吓，下次真係唔敢喇！

是日放半晝，入咗荃灣接狐爸爸收工兼幫狐家姐換批新奶樽；另外買埋狐妹妹用嘅奶樽，走佬袋用品，托腹帶，仲代狐爺爺買咗聖誕禮物俾大小姐添！

第 6 次私家產檢 @ 29W

改咗幾次期，今日終於可以見狐妹妹！

 

今日人唔多，上到去好快量血壓同磅重，之後等一陣入房見醫生；狐媽媽問番下體充哂血腫哂嘅問題，醫生話可能係下體靜脈曲張，要檢查下先知！上到床都係先照狐妹妹，佢今日頭仔向咗下，重量 ok ；照樣嗰陣佢口郁郁咁，之後就用雙手遮面；照完狐妹妹，醫生幫狐媽媽檢查下體，佢話兩邊陰唇有啲腫，如靜脈曲張應該唔會兩邊一樣腫，可能係發炎，抽咗啲分泌物去化驗，再約 6 星期覆診！

狐媽媽重量：64.5kg

狐妹妹週數：29W

狐妹妹重量：1.4kg

2012 年聖誕假期回顧

話咁快又過咗個聖誕喇，呢個假期無乜活動，因為 1 家大細都唔舒服！

12 月 21 日

今日係冬至，原本約咗私家產檢見吓狐妹妹，點知姑娘打黎話改期到星期一平安夜，結果同狐爸爸偷懶去行咗陣街先返狐 99 到食飯；返到去見到狐家姐個樣好攰好眼瞓，原來狐家姐下晝已經叫唔舒服，食完飯即走；落街無耐狐家姐就開始嘔，返到屋企飲多幾啖水就狂嘔，飲完奶又狂嘔，結果要帶狐家姐去仁安睇急症！另外收到愛美麗送嘅聖誕禮物，多謝哂！

12 月 22 日

是日在家休息，狐家姐要限水先唔嘔，但就開始肚痾，流鼻水同咳！

12 月 23 日

今日一早狐家姐又肚痾，但精神返哂，飲水都無再嘔；夜晚返咗狐婆婆家做冬，有蛋糕食又收到姨媽送嘅聖誕禮物，多謝哂姨媽！

12 月 24 日

今日係平安夜，返咗半晝工又諗住去產檢，點知醫生去咗執仔，改期到星期五，偷雞去行街跟住返屋企湊傷風咳加少少肚痾嘅狐家姐！

12 月 25 日

今日係聖誕節，朝早同狐家姐去馬鞍山影 Miffy；夜晚去咗狐叔叔狐嬸嬸到打邊爐，收到狐叔叔狐嬸嬸送嘅聖誕禮物，多謝哂；狐家姐繼續肚痾，而狐媽媽就開始喉嚨痛加腰痛！

12 月 26 日

今日係 boxing day，約咗契媽佢地開扒地，但見狐家姐未好番而狐媽媽又周身骨痛，決定唔帶狐家姐去；今日收到契媽同甘妹送嘅聖誕禮物，多謝哂！

總括咁多日，都係與病魔一齊，希望病魔快啲走，2013 年 1 家要健健康康！

2012 年呂郭碧鳳聖誕扒地 @ 沙田鄉議局大樓

今日係狐家姐學校舉行聖誕扒地嘅日子，地點係沙田鄉議局大樓；放工即飛車返屋企會合狐爸爸同狐家姐再一齊出發去鄉議局！

去到交低狐家姐俾老師就入場坐低，先黎唱詩歌；再有牧師魔術表演傳道；跟住抽奬；居然抽到其中 1 份，之後就到學生表演！

狐家嗰班係尾二表演，其實都只係喺台上唱兩首歌；未表演前仲同狐爸爸估狐家姐喺台上會有乜反應，結果係．．．全程呆企，睇黎狐家姐唔係好識 enjoy 台上表演！

表演完，攞埋大會禮物就返屋企，希望狐家姐出年會識 enjoy 呢啲表演！

1303 媽媽會 Pre-Christmas Party @ 珀麗灣

今日參加咗 1303 媽媽會嘅 Pre-Christmas Party，舉行地點係珀麗灣天色會所！

珀麗灣之前同陳李氏去過，嗰時仲有船坐；今次再去，已經無船坐，只得巴士可以入到去，佢啲巴士成 20 分鐘先一班車，仲要超多人，真係好唔方便！

去到珀麗灣，去到集合地點點名攞 label ，大家就一齊行去會所準備開扒地！

呢度會所都幾大，有個小型泳池，仲可以燒嘢食；室內又有麻雀同卡拉 ok 房，容納 50 個家庭都唔太迫！扒地一開始先食嘢，之後就到抽奬同交換禮物環節；今日抽奬運返咗黎，先抽到 sponsor 禮物，再抽到大會禮物，仲有 1 大袋 sponsor 禮物，多謝哂同辛苦哂一班義工媽媽，期待下一次聚會！

5x 位媽媽黎個大合照

大會安排嘅其中 1 個聖誕蛋糕



交換禮物

請咗工人姐姐 + 聖誕大出血

今日好忙碌呀，因為好多要搞！

第 1 站係先幫狐家姐去合一堂交留位費，辦完手續先知原來今日有講座聽，但趕住出去睇工人姐姐，所以無聽講座就走咗！

 

第 2 站去灣仔睇工人姐姐，去到 agent 到遲咗好多，大部份姐姐都賣哂，好彩最後都揀到兩個啱心水嘅！經過一輪掙扎，最終請咗個單身，樣貌都唔錯嘅工人姐姐，希望無揀錯喇！

第 3 站原本係工展會，點知狐婆婆見狐家姐無份出黎就取消咗，變咗去新城市放血！

今次真係大出血，狐媽媽買咗個新銀包，另加錢換購咗 2 個証件套；而狐爸爸就買咗返工鞋；今個聖誕要慳啲使！

今日嘅收穫

2012 年 BCC 聖誕扒地 @ Gaia

又到咗一年一度公司舉行聖誕扒地嘅日子，今次舉行扒地嘅地點係上環 Grand Millennium Plaza 嘅 Gaia！

扒地大約 8:00 開始！先黎前菜麵包加餅乾同沙律，跟住玩咗個小遊戲疊骰仔，由 UC 勝出！之後食煎鵝肝同蟹肉貝殼意粉，又玩咗 1 個小遊戲，今次波哥贏咗；食完頭盤，當然到咗大家最期待嘅環節，大抽奬；今年無乜抽奬運，抽唔到 10 大，但都有安慰奬 ipod shuffle 1 部；之後就食 main course 煎魚，跟住就係大家吹水兼食甜品時間！

我同愛美麗大約 11:30 走，仲見到啱啱黎到嘅 Y Lam 添，希望下年抽到 10 大喇！

大抽奬禮品

公司老細們扮聖誕老人

舉行扒地嘅餐廳

餐廳外面嘅聖誕火車同聖

前菜 - 麵包加餅乾

 

頭盤 - 煎鵝肝同蟹肉貝殼意粉


 

主菜 - 魚

抽唔到十大，但有安慰奬 ipod shuffle 1 部

甜品

收到合一堂 Offer

上個月同狐家姐見完屋企附近嘅合一堂，狐家姐當日表現都唔錯，都應該好大機會收佢讀 K 班！

月頭嗰陣知道狐家姐 N 班幾個同學仔都有去 in 合一堂，仲收咗佢地上晝班兼交埋留位費，但狐家姐一直都收唔到通知；打過去學校問，學校又話佢地仲寄緊信，而且無論收唔收都一定有信通知；等到頸都長，今日終於收到信喇！

收到時都諗實係唔得架喇，點知佢地收狐家姐上晝班後補；都好，如果最終都入唔到上晝班，都仲有下晝班，最緊要係佢收狐家姐，唔使再坐車上上落落咁辛苦喇！

新玩具 - Note II LTE

熱烈歡迎狐媽媽嘅新玩具 - Note II LTE！

前排見出咗 Note II LTE，見佢俾 Note 細啲又長啲，個樣幾好咁，有少少心動想去換，但係佢淨機價要成 $6xxx，似乎有啲貴，所以都未係好大動力去換！

近排發覺唔知係台嘅問題定機嘅問題，慢咗好多，而且見 4G 開始普及化；狐爸爸有見於此，讚成狐媽媽換 Note II LTE；經過一番資料搜集，原來狐媽媽只可以喺台齋買機而唔可以買機上台（即唔可以再加 contract）；但係就可以以 9 折客戶優惠買機，計番上黎都算 ok ，而且仲會 trade 埋部舊機，變相再抵啲，咁吸引當然要換喇！

經過咗 1 個禮拜嘅等待，部機終於到手喇；真係睇得舒服又流暢，狐爸爸見狐媽媽玩得咁開心，都有一刻心動想換，但係狐爸爸等緊部新 Nexus ，所以都只係得閒攞狐媽媽部機玩止吓癮算喇！

喺度再次熱烈歡迎 Note II LTE！

新玩具 - Note II LTE

呢個電話套喺未攞到機前已經心急買定

和尚背心

呢件作品鈎咗好耐喇，由原本諗住用黎送禮變成咗俾狐妹妺 ，終於喺今日完成咗喇！

呢件背心原本好簡單可以好快完成，但係狐媽媽鈎咗幾個月，經過多次反覆鈎拆先完成；由原本用鈕扣做番綁繩，效果都幾靚，期待狐妹妺著佢上身！



終於完成咗俾狐妹妺嘅和尚背心

第 3 次健康院產檢 @ 24W4D

過咗 6 個禮拜，今日又返健康院產檢，去到都係驗小便然後磅重量血壓等見姑娘！

今次磅數有增長，姑娘都話 ok！另外問咗姑娘有關下體充血脹痛，姑娘話正常，佢話因為俾 BB 壓住所以會咁樣，休息多啲無問題！

因為冬至約咗私家，1 月中返威記，所以姑娘約咗 2 月頭先見順便做埋 B 鏈！

狐媽媽重量：62.3kg

狐妹妺週數：24W4D

靚靚鈕扣

快將完成嘅背心想用扣鈕形式，於是四圍物色靚靚又可愛嘅鈕扣！

今日 lunch 同牛奶妹講起，佢話佢有 1 包喺吉吉島買嘅鈕扣，睇吓啱唔啱；係 1 包有 3 隻顏色嘅花花鈕扣，好靚，牛奶妹見狐媽媽咁鍾意就送咗俾狐媽媽！

後黎同女皇講起鈕扣，雲迪聽到佢話佢都有 2 包購自吉吉島嘅鈕扣；原來係好可愛嘅蛋糕加糖同蝴蝶結，又係超靚，結果雲迪又係送咗俾狐媽媽，真係多謝哂牛奶妹同雲迪，等狐媽媽快啲諗吓呢啲咁可愛嘅鈕扣可以用喺邊度先！

左手邊 2 包係雲迪送嘅，最右邊嗰包係牛奶妹送嘅

1303 沙田區媽媽 Gathering @ Onion Kitchen

今日係第 1 次參加 1303 沙田媽媽嘅 gathering，揀咗大圍嘅 Onion Kitchen！

今次有成 14 個媽媽出席，主要都係交流吓心得，一吹就吹咗 2 個幾鐘喇！好開心，期待下一次聚會！

Gathering 之後，狐媽媽就坐夏雨爸爸車落荃灣逛街買衫！

第 2 次結構性超聲波 @ 22W5D

同狐爸爸同狐姨媽商量之後，狐媽媽決定為狐妹妹做多次結構以策萬全！

一早 10:00 打去預約，好好彩醫生今日有期，即 book 3:30 落中環照！準時 3:30 落到中環，上到去做完登記，因為係照結構，所以無需驗尿，坐低等叫名就可以！

可能個醫生較出名，一坐就坐咗成個鐘先叫名見醫生，入到房瞓低又係繼續等；隔咗成 10 分鐘醫生先黎，佢問咗狐媽媽情況就開始幫狐妹妹照結構！

其實同政府嘅結構無乜大分別，都係睇大小腦，眼耳口鼻，心臟，腎，臍帶，手骨手指，腳骨腳指，背脊骨；醫生話狐妹妹生長狀況非常良好，而家有大約 1 磅多啲，完全正常；經醫生咁講，真係放下心頭大石，可以安心等 3 月見真正嘅佢喇！

狐妹妹，唔好再嚇狐爸爸狐媽媽喇，乖乖地住到 3 月出黎，狐爸爸狐媽媽同狐家姐都等緊妳架！

狐妹妹週數：22W5D

狐妹妹重量：572g

第 5 次私家產檢 @ 22W3D

原本無咁快再返私家到睇，但上星期做結構俾個助產士咁嚇一嚇，即刻 book 黎睇！

上到去做哂例行公事見醫生，同咗佢講咗個情況，佢話自己唔係專業做結構，齋聽數字同埋再照狐妹妹都覺得無問題，但都寫咗轉介信俾狐媽媽去睇另一個專做結構嘅醫生，如果有需要要 24W 前去做！

 

究竟應唔應該同狐妹妹做多次結構呢，狐媽媽應該點做好呢？

狐媽媽重量：61kg

狐妹妹週數：22W3D

狐妹妹重量：571g

提前慶祝結婚 5 週年（木婚）紀念 @ Onion Kitchen

聽日係結婚 5 週年紀念日，狐爸爸要開始不分晝夜嘅工作，無時間慶祝！有見及此，狐媽媽決定提前今日慶祝，其實都只係食餐好嘅；喺無諗到食乜嘅情況下，決定去番食堂 - Onion Kitchen！話咁快又過咗 1 年，狐家姐係第 2 年一齊慶祝，今年仲多咗狐妹妹添！

原本訂咗 7:30 樓上雅座，早咗成個鐘去到，可以坐番下面層！今次狐媽媽叫龍蝦意粉，狐爸爸就食三文魚扒意粉，仲有生蠔！同以往一樣好味，老板見狐家姐咁得意，送咗杯橙汁俾佢！

雖然無乜特別慶祝，但可以 1 家人食飯已經好滿足，狐爸爸，辛苦你賺錢養呢個壚，喺呢個星期入面，狐媽媽會努力照顧自己加兩位可愛嘅女兒，狐爸爸，5 週年快樂，我愛你！

龍蝦意粉

三文魚扒意粉

2012 年德國啤酒節

狐爸爸對德國嘢好有興趣，見舉行啤酒節就諗住去見識吓！

原本打算自費入去，好彩狐爸爸公司有份 sponsor 啤酒節，可以有機會免費去啤酒節！

今次啤酒節喺尖沙咀馬可孛羅酒店 6 樓露天廣場舉行，現場有 live band 表演，入場券包咗每人 1 隻紀念杯，亦都包咗 1 杯啤酒同 1 碟德國腸！德國嘢偏鹹，狐媽媽麻麻地，場內其實有其他嘢食，但係要自費，所以食完啲德國腸就算！

氣氛尚可，狐媽媽同狐爸爸食完嘢坐喺度無乜嘢做，所以好快咁就離開咗，都總算叫見識過啤酒節，狐媽媽諗德國本土嘅啤酒節會正好多！

啤酒節紀念杯

啤酒節 backdrop

Live bank 表演

包咗嘅 1 杯啤酒同德國腸

結構性超聲波 @ 21W5D

今日係做結構嘅日子，時間係 3:45，返咗上晝工就坐車返威記做檢查！

去到威記，交低覆診紙，坐咗一陣就叫名；今次照結構係由助產士負責，個助產士幾 nice ，佢問狐媽媽知唔知上次 oscar 個 result ，佢話狐妹妹頸皮厚度踩界，但驗血報告 1:3000 係低風險；聽到佢話踩界個心有啲離，再問佢踩界係乜嘢意思，佢就話報告係低風險，唔需要太擔心，佢今日都會再照頸皮，佢話今次度會準確啲；佢叫狐媽媽除鞋上床瞓低，跟住就開始照狐妹妹 ！

呢個狐妹妹 ，全程都係扒喺度，不過都可以照到，助產士好好，一路照一路講解俾狐媽媽知，照頭照腦，照眼珠，照鼻骨，嘴唇，頸皮佢話今次好靚，2.7x，心臟，心室心房齊，橫隔膜，腎，胃，脊骨，手指腳指，助產士話所有嘢都好好無問題！

成個過程 5:30 完結；狐妹妹 ，妳要加油呀，狐媽媽只想妳平平安安健康正常咁生長！

狐妹妹週數：21W5D

第 4 次私家產檢 @ 20W

過咗 8 個禮拜，終於可以同狐小 B 見面喇！

原本約咗 7:50 ，點知姑娘問可唔可以早啲到，當然求之不得，即刻上診所，不過都要坐一陣先可以見狐小 B ！

今日狐小 B 20 週大喇，生長得唔錯，見到佢搲頭，又有同狐家姐一樣嘅豬咀，醫生講咗小 b 又係 1 位公主黎，都好，狐媽媽可以唔使再買衫，狐家姐實在太多衫未著過喇！

狐妹妹要繼續努力呀，又要過多 8 個禮拜先有得見喇！

狐媽媽重量：61kg

狐妹妹週數：20W

狐妹妺重量：355g

1010 BB 兩歲生日扒地

期待已久嘅兩歲生日會今日舉行喇，舉行地點係尖咀 YMCA！

狐家 2:00 鐘去到，原來已經入哂場；登記好攞咗啲 label 就搵番個位坐低！今次都係以 buffet 形式舉行；想對上次 1 歲生日會，今次啲食物反而一般，無乜選擇！

第 2 次健康院產檢 + 胎動 @ 18W4D

過咗 6 個禮拜，今日又返健康院產檢！

2:15 去到，先驗尿再磅重，然後等叫名見姑娘解釋番上次抽血嘅報告，可能狐家姐嗰時全程去威院檢查，估唔到健康院都咁多媽媽，好彩約咗個同期嘅媽媽相認，如果唔係肯定悶死！

成個過程大約兩個鐘完成，4:30 先走得人；一切正常，又約咗 6 個禮拜後再返去，狐小 B 繼續加油，月尾先有得見面喇！

狐媽媽重量：59.4kg

狐小 B 週數：18W4D

 

今日未去健康院前，狐媽媽成日都同狐爸爸講，呢個狐小 B 應該又係 1 名懶 B ，因為佢完全唔郁，就算郁，都超細力！

其實喺大約 10W 嗰陣佢係郁過 1 次勁嘅，可能係投訴狐媽媽屈住個肚壓住佢，之後佢都無乜點郁；好多時要瞓喺度好靜先知佢郁緊，於是成日搖個肚叫佢唔好咁懶郁多啲，狐小 B 當然無理佢個傻媽媽，繼續喺肚入面覺覺豬！

今日去完健康院產檢，開始發覺佢郁多咗；對比番狐家姐嗰時，都係差唔多時間開始郁得密咗同大力咗，不過狐小 B 相對地真係好細力好斯文，唔通．．．．．．不過都要等下個禮拜先知，係仔係女都無所謂，健康就 ok 喇，狐小 B ，繼續發力郁多啲，下個禮拜見！

公佈

又到公佈時候，狐小 B 已經 14W4D 大，點解咁遲先公佈係因為今日啱啱過咗 Oscar 兩個禮拜，無收到電話通知即係代表無事，所以揀今日黎公佈！

暫時一切安好，狐小 B 同狐家姐一樣咁乖，狐媽媽陀得唔算太辛苦，抵錫，希望狐小 B 繼續乖直到出世為止！

第 1 次健康院產檢 @ 13W

今日去馬鞍山健康院做第 1 次檢查，大約 8:40 去到等開門，之後就做登記！

登記完喺大堂等叫名度高磅重，同星期二重量差唔多，之後又出去等叫名見姑娘！見姑娘都係問番基本資料同講解吓，俾咗 4 個吉樽用黎抽血又等叫名見醫生！見醫生都係問吓有無乜嘢唔妥，跟住上床 check 胸同聽狐小 B 心跳，跟住又出番去等叫名抽血；抽完血就搞掂哂走得，咁樣都搞咗兩個幾鐘，6 個禮拜後繼續返健康院做檢查！

狐媽媽重量：58.8kg

狐小 B 週數：13W

Oscar @ 12W4D

今日係做 Oscar 嘅日子，時間係 1:30，狐媽媽大約 1:20 去到，登記處未開門，諗住去 4 號窗交低覆診紙，個姑娘答話未開工，但係見到狐媽媽個預約時間係 1:30 佢就收咗張紙然後去對面觀察室度高磅重！

搞掂之後坐低等叫名，無耐就叫入觀察室 A 室，原來而家多咗個位俾姑娘問資料；問完詳細資料又坐低等叫名，其間俾人叫咗去做份研究問卷，跟住就入房做 Oscar！

姑娘先對資料，啱週數，跟手上床度狐小 B 頸皮；呢個狐小 B，第一眼見佢就撩鼻／食手，姑娘話佢位置唔係幾好度唔到，於是用個儀器震吓個肚等佢改變吓位置，點知搞咗幾次都唔得，好辛苦先度到狐小 B 頸皮，跟住姑娘係咁二講吓呢個係狐小 B 個頭同心臟，跟住就話仲細好多嘢都睇唔清！

度完頸皮，姑娘話兩個禮拜無收到電話就代表無問題，跟住俾咗結構期就去抽血；去到抽血站，又對咗資料就開始抽血，狐媽媽好自然咁俾隻左手姑娘抽；咁啱有一個人抽緊血，佢同姑娘講好驚，姑娘同佢講叫佢放鬆，越緊張越痛，而且仲同佢講坐得喺度嘅全部都係最好手勢，點知呢個時候姑娘同狐媽媽講話抽唔到，佢打算幫狐媽媽抽手背，但手背會痛啲，狐媽媽就俾隻右手佢抽，唔使 1 分鐘就抽完，個姑娘話下次抽血應該第一時間攞隻右手出黎，咁就唔使捱多針！

搞好哂大約係 3:00 ，同狐小 B 去食下午茶跟手返屋企休息，狐小 B 要努力，要順利過關！

狐媽媽重量：58.6kg

狐小 B 週數：12W4D

狐小 B 身長：大約 6.5cm

第 3 次私家產檢 @ 11W6D

等咗 4 個禮拜，終於又可以見狐小 B 喇，但係狐媽媽真大頭蝦，記錯咗時間，差啲無得見狐小 B ！

因為遲到，所以排到最後先有得見醫生，見醫生前都係驗小便，量血壓同磅重，狐媽媽居然 4 個禮拜無重過，有啲估唔到！

跟住就見醫生，問咗有無肚痛有無流血，跟住上床見狐小 B ；狐小 B 已經開始見到人形喇，仲見到佢對手喺度 fing 黎 fing 去，同狐家姐嗰時一樣，生長進度良好；至於性別，醫生話仲細，未睇得清；檢查完無問題，8 個禮拜先可以再見狐小 B 喇，要繼續乖乖成長！

狐媽媽重量：60kg

狐小 B 週數：11W6D

狐小 B 身長：4.78cm

2012 年生日禮物

狐爸爸見狐媽媽開始對部 G12 有微言，所以決定送 1 部新相機俾狐媽媽做生日禮物！

原本好想要 Sony NEX-7，但佢單 kit 都要成萬蚊，成萬蚊不如攞番部單反出黎玩，或者 upgrade 而家部單反！

見佢前排出咗部 F3，好似幾好咁，有狐媽媽至愛嘅 180 度扭芒，但係狐媽媽嫌佢略為膠咗啲；狐爸爸問狐媽媽會唔會考慮 5N，5N 雖然舊款少少，但都好吸引，個樣又無咁膠之餘呢期又平咗，最終都係買咗 5N 返屋企，又係時候望一望本 manual 跟住影相喇，狐家姐係我首個目標！

Tanita KD-192 GR 電子磅

狐媽媽整嘢嘅團隊又有新成員喇，呢個就係 KD-192 電子磅喇！

見過包友介紹呢個磅，真係覺得好靚好想買，但係因為狐爸爸之前買咗 1 個電子磅，一直都用緊又未壞，諗住唔買住；但係見毛毛買，又得狐爸爸首肯，終於買咗部綠色嘅！

等咗一排終於收到個磅喇，狐爸爸都話個磅好靚好 good，yeah ，可以磅小數點後 1 個位喇！

第 2 次私家產檢 @ 7W6D

今日又係見狐小 B 嘅日子，今次比喺上一次少咗好多人，所以等咗一陣就可以磅重同量血壓，狐爸爸亦都趕得切黎見狐小 B ！

入到去，醫生問有無乜嘢唔舒服，無就上床照狐小 B ！醫生問狐媽媽緊唔緊張，其實有狐家姐嘅經驗，照道理應該唔會緊張，但都係有！

醫生講完就放個儀器上黎，跟住就話照到喇，仲俾埋心跳狐爸爸同狐媽媽聽；醫生話而家穩定，可以 4 個禮拜後先返去見佢，狐小 B ，月尾見喇，加油呀！

狐媽媽重量：60kg

狐小 B 週數：7W6D

狐小 B 身長：1.13cm

第 1 次私家產檢 @ 5W6D

今日第 1 次去私家見狐小 B，主要係睇吓佢位置 ok 唔 ok ！

約咗 8:10 ，可能係星期五，診所超多人，驗完小便足足等咗 45 分鐘先見到醫生！

入到去，醫生第 1 句就話”終於得咗喇”，超搞笑（因為年頭見完佢做子宮肌瘤檢查）；之後上床照狐小 B！果然因為太細見唔到，只係見到胎囊同營養泡，醫生話位置好好，應該唔大問題，約咗兩個禮拜後再見，狐小 B，要快高長大呀！

狐媽媽重量：61kg

証實 @ 4W6D

幾經辛苦，俾醫生姑娘 reject 咗幾次，終於攞到証明喇！

經過幾次教訓，今次攞埋晨尿去 check，終於 check 到，而醫生都肯開証明信，即攞埋信去威記排隊登記埋！

 

登記完俾咗 oscar 同第 1 次產檢日期，打埋電話去健康院 book 就返工去喇！

 

狐 BB 升呢做家姐，以後改口叫狐家姐喇！

再一次驚喜 @ 1-4W

見狐 BB 都差唔多 2 歲大，又係時候開始 plan 生第 2 個小朋友！

原本諗住順期自然，結果都係要買紅綠 d 幫手；第 1 個月唔得，再試第 2 個月月，今次以為 ok 喇，點知成 day 25，26 先排卵，成個 cycle 37 日先黎 m，激死；試第 3 個月，開始有少少放棄心態，不過都 keep 住差唔多排卵期隔日開工！

Day 25 & 26

紅 d 控都無，當堂有啲 down down 地諗住等 m 到

Day 27

死心不息再 check 紅 d 居然有淺線，但都唔敢開心住，因為試過 m 前有淺線

Day 28 

紅 d 有加深到，可能有機，手多用埋曼仔 check ，第 2 條都好快出到黎，不過只係對照線嘅一半，都中架喇，有啲開心

Day 29

紅 d 已經有 70-80% 深，用埋綠 d ，都有淺控，再用埋 cb digital show 1-2 weeks，見到結果係咁，去診所攞 referral letter 跟住順便過威記登記；去到診所，醫生話 check 唔到有，狐媽媽又無攞哂啲證據俾佢睇，結果放低 3 舊水乜都無走人

Day 30

再 check 紅 d 去到 90% 深，綠 d 條線實色咗少少

Day 31-32

紅 d 已經去到 100% ，綠 d 都有 20-30%，去家計會 check ，家計會姑娘話都仲係早，叫遲多1 個禮拜先再去，又要等

Day 33

紅 d 繼續 100% ，綠 d 都 30-40%，再用多次曼仔棒 check ，今次已經同對照線一樣色喇，知係中咗，但都唔敢去醫生到，驚又話 check 唔到，唔知等到幾時先可以去 confirm 攞 referral letter 呢；掙扎咗大半日，最終都係決定再去家計會，狐媽媽仲專登買多支 cb digital 一齊驗；去到交低 form ，攞住個樽入廁所留尿，check 埋 cb ，已經 show 咗 2-3 weeks，之後等叫名見姑娘，見完姑娘再出大堂坐一陣又叫名去見另一個姑娘；入到房，個姑娘俾支棒狐媽媽睇，都有一半以上深，但姑娘話未算係真正 positive 所以唔會寫証明；佢俾個吉樽狐媽媽，叫狐媽媽下個禮拜留晨尿再黎驗過， O 咗咀，咁都唔算 positive ？咁點先算係？係咪去到一樣深先寫証明，白白又浪費咗啲錢

Day 34
紅 d 已經深過對照，去到 110%，綠 d 都深咗，有 40-50%，但因為尋晚嘅經歷，狐媽媽決定等星期五先再去攞証明，希望今次順利

Day 35
今日紅 d 再深咗，120%，綠 d 都去到 60-70%，忍埋今日，聽朝一早去驗，驗到就可以過威記排期喇，一定要順利

Panasonic 麵包機 (SD-BMS104-N) + P 仔第 1 機 - 黑白芝麻蜜糖麵包（吐司 mode）

用咗象印一排，始終都覺得唔夠 function；同狐爸爸商量之後，決定放棄象印加入 Panasonic 行列！

好多謝包友幫手代訂同安排運送，今日終於收到部日版 P 仔喇，真係好靚仔呀，狐媽媽一定會努力做好麵包出黎架！

先整第 1 機包 - 黑白芝麻蜜糖麵包！

放好哂酵母以外嘅材料，放酵母入酵母格，揀 program 1 吐司 mode，包皮色標準，開始！

狐媽媽真係 1 個傻婆，見部機搓完停咗，個時間又無跳，以為佢唔行；打開個蓋望一望，啲酵母即刻跌哂落去，原來狐媽媽無攞走電磁嗰塊膠片，所以個時間無郁；好彩呢一開都無乜大影響，個包出黎幾 ok ，只係濕咗啲，可能因為金像粉受水，下次要減多啲水再試！

狐爸爸話個包好軟同好香芝麻味，食落仲食到蜜糖味添，good 呀

蜜糖葵花籽麵包（基本）@ 象印（附食譜）

整到高大包真係好開心，今日決定再接再厲，所以決定整蜜糖葵花籽包！

用番整蜜糖綠茶包個份量，減番 5 克蜜糖，依然高大，食到好香蜜糖味，又有葵花籽咬口，都唔錯！

 

食譜：

高筋麵粉　　　　260 克

蜜糖　　　　　　40 克

鹽　　　　　　　3 克

牛油　　　　　　15 克

酵母　　　　　　3 克

水　　　　　　　150 克
葵花籽粒　　　　適量

做法：

先將水同蜜糖拌勻，再加入鹽同牛油，之後落粉同酵母，放入麵包機模，用 regular mode；喺嗶嗶聲時加入葵花籽，等到大約完成前 8 分鐘熄機攞個麵包出黎，甩模放涼可以切！

又一高大包


切開之後

蜜糖綠茶麵包（基本）@ 象印（附食譜）+ 陳枝記麵包刀及造形墊

見狐爸爸可以整到頂機頂包，狐媽媽又要挑戰頂機頂，今次整蜜糖綠茶包！

食譜：

高筋麵粉　　　　260 克

蜜糖　　　　　　45 克

鹽　　　　　　　3 克

牛油　　　　　　15 克

酵母　　　　　　3 克

水　　　　　　　150 克
綠茶粉　　　　　4-5 克

做法：

先將水同蜜糖拌勻，再加入鹽同牛油，之後落粉同酵母，再將做麵包材料放入麵包機模，用 regular mode；等到大約完成前 8 分鐘熄機攞個麵包出黎，甩模放涼可以切！

狐媽媽見上次個包唔夠蜜糖味，所以加多 10 克蜜糖，好味；但都只有淡淡綠茶味，可以再加多啲；今次個包都做到頂機頂，真係好開心！


剛出爐高大包


切開之後，淡淡綠茶色

狐爸爸喺狐媽媽整包嘅時候，帶咗兩位新團友返黎，就係傳說中嘅神刀陳枝記麵包刀同造形墊。

神刀果然係神刀呀，一睇就知佢出身名門，靚仔到呀，仲切得好順添！

張造形墊又係好 good ，以後唔使再浪費牛油紙喇！


陳枝記嘅神刀


造形墊

蜜糖麵包（基本） @ 象印（附食譜）

狐爸爸見狐媽媽整包整得咁開心，狐爸爸又整埋一份，今次整蜜糖包！

根據之前咁多次經驗，狐爸爸改良咗啲份量，竟然可以做到頂機頂嘅效果，咁耐以黎係第一次咋，狐爸爸好叻！

食譜：

高筋麵粉　　　　250 克
蜜糖　　　　　　35 克
鹽　　　　　　　3 克
牛油　　　　　　12 克
酵母　　　　　　3 克
水　　　　　　　150 克

做法：

先將水同蜜糖拌勻，再加入鹽同牛油，之後落粉同酵母，放入麵包機用 regular mode；等到大約完成前 8 分鐘熄機攞個麵包出黎，甩模放涼可以切！

個包係有史以黎最高大，而且好軟熟，不過蜜糖味唔夠，下次可以加多啲蜜糖！

發酵嗰陣已經頂上機頂

出爐後，有史以黎最高



切開之後

大理石麵包（基本）@ 象印（附食譜）

之前試整咗幾次大理石麵包都唔成功，決定今次再挑戰！

之前幾次都係參考天然酵母麵包都唔成功，今次決定轉參考另 1 本書嘅大理石麵包，同埋試量 1 量杯有幾多粉，原來 1 量杯有 130 克粉，所以今次決定用 260 克粉黎做麵包！

食譜：

A - 麵包部份

高筋麵粉　　　　260 克

砂糖　　　　　　25 克

鹽　　　　　　　3 克

牛油　　　　　　15 克

酵母　　　　　　3 克

水　　　　　　　150 克

B - 大理石部份

可可粉　　　　　6 克
水　　　　　　　10 克

做法：

先將 B 拌勻，再將 A 放入麵包機模，用 pasta mode 先搓 8 分鐘，跟住 reset 部機去番 regular mode 再搓，去到差唔多第 1 次發酵前（即大約 3:07）熄機（作用係偷取多 5 分鐘時間，我熄咗 2 次機共偷咗 10 分鐘時間），將麵團攞出黎 2 份，其中 1 份同大理石材料拌勻，包入另外嗰份麵團到，之後放番入模再放人機再開機等佢進行第 1 次發酵及其餘程序；之後等到大約完成前 8 分鐘熄機攞個麵包出黎，甩模放涼可以切！

終於成功整到大理石麵包，個紋仲好靚添！ 

剛出爐



切開之後，個紋好靚

Kyocera 陶瓷刀

之前見 BK 高手話用陶瓷刀切麵包好 good，又見車厘都買咗把陶瓷刀仲勁讚，見佢地講到咁好，咁啱呢期萬記有陶瓷刀換，即刻搵狐 99 幫手儲印花！

喺狐 99 一班 C9 朋友幫助之下，好快儲夠 20 個可以以 $269 會員價換購陶瓷刀加削皮器！

換咗返黎狐爸爸即試切，真係好 good ，啲麵包終於唔使再一忽忽喇！

萬記換嘅陶瓷刀

朱古力麵包（基本）@ 象印

原本打算再挑戰大理石麵包，點知過早放番落部機到，結果佢幫我打均哂啲朱古力，變咗朱古力包；其實狐媽媽仲加咗朱古力粒，但係好早就溶哂！

今次用番上次整白麵包個份量黎整朱古力麵包，加多 6 克可可粉，做出黎都好好食好軟熟，有少少朱古力香，如果啲朱古力粒唔係溶哂就仲正，下次要整到有朱古力粒先！

剛出爐朱古力麵包

切開之後

牛奶麵包（基本） @ 象印（附食譜）

繼白麵包之後，今次試整牛奶麵包，其實呢個包試整過幾次，但係次次都失敗！

之後見 BK 高手 post 咗佢個牛奶麵包食譜出黎，同埋見之前試少奶係失敗，今次決定用多奶睇吓得唔得！

其實見佢搓團嗰陣好濕，所以不停咁加粉，但係都仲係好濕，諗住再加嗰陣，佢就跳咗去發酵，只可以睇住 1 舊好濕嘅麵團發酵！

見佢咁濕，都估多數唔得，所以之後都無再望佢，到第 3 次發酵嗰陣諗住望一望，居然升到好高喎，真係估唔到佢會 ok 喎，於是就等佢焗再出爐！個包出黎同之前白麵包一樣咁高，一樣咁軟熟，仲好大陣牛奶味添，好食！

食譜：

高筋麵粉　    　　250 克

砂糖　　　   　　 26 克

鹽　　　　　 　   3 克

牛油　　　　 　   24 克

酵母   　　　　　 3 克

牛奶　　  　　　  180 克

做法：

先將牛油放室溫軟化，加牛奶入麵包機模，再加高筋麵粉，之後鹽同砂糖放 2 角，於高筋麵粉中間再放酵母，set 咗 regular mode 同 regular crust control 放入麵包機等佢搓，開機過咗 23 分鐘放牛油於側邊，之後等部機繼續行；等到大約完成前 8 分鐘熄機攞個麵包出黎，甩模放涼可以切！

狐爸爸話個包好香牛奶味，食落就覺得有煉奶味同埋甜咗少少；同事愛美麗就話食落似蛋糕，不過狐媽媽都好滿意呢個牛奶包架喇！

 

焗咗出黎之後，都係大約 14-15 厘米高

 

切開 1 片片之後，好香牛奶味

引用：跟機說明書

白麵包（基本） @ 象印（附食譜）

見整咁多次都失敗，今次真係決定還原基本步，由白麵包開始再黎過，首先係買包新酵母 ，上次買錯咗紅燕（係用黎整咸包如法國包），今次買番金燕（咸甜包都可以），跟番 BK 高手們教路，先放液體後放粉同糖鹽，今次終於成功喇，個包有成 14-15 厘米高呀，而且仲好軟熟好彈添呀，狐爸爸都話正，多謝各方高手教路呀；唔知係咪想高啲要再減水呢？

食譜：

 

高筋麵粉　　　　250 克

砂糖　　　　　　21 克

鹽　　　　　　　2.5 克

牛油　　　　　　12 克

酵母　　　　　　3 克

水　　　　　　　167 克

做法：

 

先將牛油放室溫軟化，加水入麵包機模，再加高筋麵粉，之後鹽同砂糖放 2 角，於高筋麵粉中間再放酵母，set 咗 regular mode 同 regular crust control 放入麵包機等佢搓，開機過咗 23 分鐘放牛油於側邊，之後等部機繼續行；等到大約完成前 8 分鐘熄機攞個麵包出黎，甩模放涼可以切！

個包好軟熟皮又唔硬，如果可以再高大啲就好喇！

出黎嘅樣，唔知點解 1 邊高 1 邊低，可能發酵得唔夠平均

 

 

切開 1 片片之後，真係好軟熟

引用：跟機說明書

牛餐 @ 燒肉の牛太・本陣

今日落銅鑼灣買新酵母，順便食埋個飯先！搜索咗一輪，見到本陣有燒肉食，決定一試！

去到坐低睇 menu ，全部都係牛肉，雖則唔太好，不過薄燒狐媽媽都啱；狐爸爸叫咗牛脊肉，一口牛，豬頸肉，海鮮併盤，雜菇，3 色冷麵併盤，啲牛炭燒真係幾好食，希望有機會再食！

 

前菜雜菇

 

牛脊肉，少少韌

 

一口牛，呢個好食，正，貴嘢果然係唔同啲

 

海鮮併盤，大大隻虎蝦，又有帶子同魷魚圈

 

3 色冷麵併盤，好食

 

薄燒都幾好食

 

一口牛無貴嗰個咁好食

 

豬頸肉，好食

提子麵包 @ 象印（失敗作）

近排不停睇 BK 討論象印，見人地啲包好高大威猛兼好軟熟，點解狐媽媽整嗰啲唔得，於是決定由零開始再試，今次先試提子包！

諗住睇完以為自己記得啲高人講過乜嘢，點知就衰咗，份量已經錯咗，粉又落少咗（200 克，其實應該要大約 250 克），水就多得滯，因為說明書個食譜話落 2/3 杯水（其實粉同水比例要係 3:2 ），酵母又好似好多咁（見有啲高人話落少啲酵母反而個包會高大啲），結果個包當然都係發唔起，得 12 厘米 ，1 個矮冬瓜多，但個包相對軟熟個皮又唔硬，唔知係咪因為多酵母關係，又要搵日再試過！

 唔知點解上面有個大洞，可能發得唔好

引用：跟機說明書

狐 BB 新寵 - B Duck

狐 BB 一向都好鍾意動物，貓係第 1 位，第 2 位係熊，特別鍾意鬆弛熊同 pooh pooh，熊貓都會有反應，第 3 位係鴨，見到啲沖涼鴨又係會大叫，第 4 位係狗，以上 4 種動物有 3 款狐 BB 都有公仔，係鴨仔無，見狐 BB 咁鍾意鴨仔，狐爸爸決定買隻鴨仔送俾佢！

星期六同狐爸爸去咗銅鑼灣行街，咁啱見到有 B Duck，狐爸爸睇中咗 1 款電話座，但價錢要成 $138，都有啲貴；記起吉吉島有 B Duck 賣，決定今日去吉吉島行！

吉吉島有 B Duck 專櫃，狐爸爸同狐媽媽有 2 隻特別鍾意，1 隻係普通公仔，不過隻色唔係黃色，可能因為少少卷毛關係，價錢係 $16x；另 1 隻就係黃色，而且佢仲揹住 1 個斜袋，好返學 feel，仲可以用黎袋糖添，不過佢就貴啲，要成 $18x ！

經過一輪商量再加問埋狐 BB  自己意見，狐爸爸買咗隻普通版，俾錢嗰陣狐 BB 已經攬住唔放；返到屋企即拆袋俾狐 BB 攬住周圍走同瞓覺！

新寵 - B Duck

粟米吞拿魚麵包 @ 象印（失敗作）

今日又整麵包，見之前整黎整去都係方包，又見好多 1010 媽媽整咗好多款色嘅包，於是又跟風整個粟米吞拿魚麵包！

今次同上次整大理石麵包一樣，先用部麵包機搓麵團，之後就攞出黎分成 4 份，放佢醒備 7-8 分鐘；預備粟米吞拿魚饀，包入去，再放入以 180 度預熱咗嘅焗爐入面焗 20 分鐘搞掂！

唔知係咪鬆弛同發酵得唔夠，個包唔係好起，焗完出黎成個扁哂，不過都幾好食，狐 BB 好 like，下次再試，希望佢發酵得好啲！

 

4 個包好扁
 

 

切開，好食但發唔起，可能因為發少咗 1 次

引用：天然酵母麵包，在家輕鬆做

蜂蜜綠荼麵包 @ 象印（失敗作）

今日打算整蜂蜜綠茶麵包架，但係出黎個包完全無綠茶味同顏色，只得蜂蜜味！

呢個包又係先將材料放入麵包機做麵團，之後再攞出黎搓，再放入預熱咗 220 度嘅焗爐到焗 20 分鐘搞掂！

今次呢個感覺好濕，唔知係咪先將材料放入機再喺側邊倒入水／奶嘅關係呢；因為之前係先放水／奶，再喺上面加入粉同其他材料；定係因為水份太多所以整個包都好濕呢？雖然係濕，但係味道幾好，如果有埋綠茶味會好正，要買過啲綠茶粉再試整先！

 一啲綠茶色同味都無

引用：天然酵母麵包，在家輕鬆做

大理石麵包 @ 象印（失敗作）

之前買咗好多本麵包書，見今日放假，於是試跟書整，今次先試整大理石麵包！

因為之前用麵包機食譜整啲包個皮好硬，狐媽媽今次跟書整，希望出黎會好食啲！

量好哂材料放入機到做麵團，另外再開定朱古力水，做完麵團將佢分成 2 份麵團，其中 1 份麵團加入朱古力水搓，之後包入無朱古力嘅麵團到再搓，之後放入預熱咗 220 度嘅焗爐焗 20 分鐘搞掂！

呢個大理石麵包超好味，個皮又唔硬，如果個大理石再整得靚啲仲好，不過都好似唔係好高大，下次再試！

剛出爐

切開之後，個大理石紋好似唔係好出咁

引用：天然酵母麵包，在家輕鬆做

新生註冊 @ 呂郭碧鳳

今日係呂郭碧鳳新生註冊嘅日子，註冊時間係下晝 1:00 到 3 :30 ，狐媽媽同狐 99 帶狐 BB 去註冊！

大約 1:30 上到去，門口已有老師負責接待同講解要辦啲乜嘢手續！狐媽媽先去校務處交書簿雜費同買書包，之後就入去禮堂買校服！

原來 N 班只係需要著運動衫褲，所以只需要買運動衫褲加 1 件外套就可以喇！因為怕狐 BB 到時整污穢啲衫，洗咗又乾唔切，所以最終買咗 2 套運動衫褲同 1 件外套！

買完當然要即場試吓啱唔啱身，如果唔啱換套大啲；狐 BB 真係太瘦喇，買最細碼都好鬆身，睇黎到開學嗰陣都唔會唔啱，可以啱著呢 1 年！

交好哂錢買埋校服，成個新生註冊就完成，期待 10 月開學！

狐 BB 嘅校服同書包