Day 48 - 產後檢查

狐媽媽今日要返健康院做產後檢查，一早起身餵完狐 BB 食頭餐奶就洗衫，之後等狐 99 上到黎就出發去健康院！

去到健康院首先度高磅重同量血壓，姑娘話狐媽媽好 fit！做完哂檢查之後就等再見姑娘同醫生！

見姑娘主要都係問番一啲病歷同埋產後身理同心理問題，之後講吓避孕方法就再等見醫生做檢查！雖然今日唔係太多人，但係等見醫生都等左 30 分鐘！

入到房就上床俾醫生檢查乳房同子宮，醫生話一切正常無問題！雖然健康院醫生咁講，但係因為無得照超聲波，唔知個肌瘤情況點，所以要再去私家做多次檢查！

做完產後檢查走左去千色店行吓買玩具俾狐 BB 玩！狐媽媽買左個 pooh pooh 床上吊飾，又買左 3 個鈴鈴分別放係床仔，highchair 同埋車仔俾狐 BB 玩！

今日係譚美生日，係度祝譚美生日快樂，青春常駐，日日都咁靚咁開心！

Day 8 - Day 14

又話咁快過多 1 個禮拜，繼續努力湊狐 BB！

10 月 9 日 (Day 8)

今日再一次同狐 BB 返健康院，黃退哂但係磅數得 2.8kg，唔太理想，又要過多 2 個禮拜返健康院再磅，不過就唔使見醫生，只係需要見姑娘；下晝同事愛美麗同阿 Be 黎探狐 BB，仲買咗個好靚嘅相架送俾狐 BB添，好多謝佢地陪咗狐媽媽成日，可惜狐 BB 掛住瞓，無好好招呼 2 位靚姐姐；另外狐舅婆都黎咗睇狐 BB，仲買咗張吉蒂被仔俾狐 BB；狐姨媽同狐婆婆亦都黎咗，狐姨媽又買咗衫仔俾狐 BB

10 月 10 日 (Day 9)

今日輪到狐太婆同埋一班狐姨婆黎探狐 BB，敏姨婆仲帶咗揹帶黎俾狐 BB

10 月 11-12 日 (Day 10 & 11)

 

呢 2 日繼續努力照顧狐 BB，開始漸上軌道；11 號係狐 BB 契媽娜娜生日，祝契媽生日快樂，身體健康

10 月 13 日 (Day 12)

 

狐 BB

今日 12 朝喇，輪到狐媽媽第 1 次幫狐 BB 剪指甲，一樣好成功；見住狐 BB 1 日 1 日咁大，真係好開心

 

10 月 14-15 日 (Day 13 & 14)

Day 1 - Day 7

話咁快狐 BB 就 1 個禮拜大，回想呢個禮拜同狐爸爸一齊照顧狐 BB 嘅點滴，辛苦但係值得！

10 月 2-3 日 (Day 1 & 2)

呢2 日住院期間，主要都係休息同學習點照顧狐 BB，不過狐 BB 係 1 隻爛瞓豬，不停咁瞓，可以成日唔食奶都唔嘈，真係服咗佢；而呢 2 日亦都有好多親朋戚友黎探狐媽媽同狐 BB，多謝哂大家；另外狐 BB 第 1 次打針，打咗卡介苗同乙型肝炎第 1 針，打嘅時候狐 BB 喊咗幾聲，之後抱番就即收聲，都算乖

10 月 4 日 (Day 3)

狐 BB 返屋企第 1 日，除咗休息之後，所有時間都係餵奶同繼續學習點照顧狐 BB，狐爸爸仲第 1 次幫狐 BB 沖涼添；狐 BB 原來都幾鍾意沖涼，成個過程都無喊過仲好精靈添

 

10 月 5 日 (Day 4)

 

第 1 次同狐 BB 去健康院做檢查，因為收咗水狐 BB 輕咗，重大約 2.73kg，其他一切正常，只係有小小黃，所以過 2 日要再返健康院跟進

10 月 6 日 (Day 5)

狐 BB 開始定時食奶，不過都係瞓嘅多

 

10 月 7 日 (Day 6)

 

狐 BB 條臍帶今朝甩咗，之後就返健康院，狐 BB 好叻，啲黃終於退咗，但係磅數唔夠，得 2.79kg，過多 2 日又要返健康院跟進；今日呢位醫生好好人，狐媽媽仲問咗醫生好多問題添

10 月 8 日 (Day 7)

狐 BB 1 個禮拜大喇，食奶時間開始定咗同埋食得多咗，希望繼續乖乖，食多啲奶快高長大；狐爸爸今日第 1 次幫狐 BB 剪指甲，好彩有大 Ka 媽媽教路，好成功

狐家國慶寶寶出世喇！

各方好友，狐 BB 趕得切做國慶寶寶，喺 1 號出咗世喇，成個過程真係超級難忘呀！

10 月 1 日零晨 4:30

瞓瞓吓覺發夢醒咗，覺得下面好濕，以為見紅；點知一起身就有水流出黎，原來穿咗水，即刻叫醒狐爸爸 call 白車準備入院

零晨 4:45

白車到咗，攞齊嘢出發去威記

零晨 5:30

辦好咗入院手續等上 7F；上到 7F 之後先俾姑娘檢查情況，之後換衫等醫生巡房

朝早 8:30

開始見紅，開咗 1 度，醫生話應該夜晚先生；如果夜晚生唔到，第 2 日就會催生，因為穿水超過 12 個鐘一定要生，唔可以再等

朝早 8:30 - 下晝 3:30

一直都只係流水加見紅，無陣痛，食得瞓得

下晝 3:30 - 5:30

開始有疑似陣痛，大約 3 - 7 分鐘 1 次，坐立不安，又瞓唔到，只可以坐喺床邊深呼吸

下晝 5:30 - 夜晚 7:30

開始進入迷糊狀態，分幾鐘痛 1 次，而且痛到講唔到嘢，又俾唔到反應人，只可以每次痛都不停咁扯住張被，但係都知道邊個親朋戚友黎過，亦都知道隔離床位太太好好人，不停咁鼓勵狐媽媽，又幫狐爸爸傳話；姑娘檢查完話只係開咗 2 度，仲有排捱

夜晚 7:30 - 10:00

繼續處於迷糊狀態，痛到癲咗，不停咁叫姑娘檢查開咗幾多度，姑娘話狐媽媽無去洗手間，
BB 又壓住膀胱，叫狐媽媽先去洗手間，咁樣會無咁痛，仲話去完會檢查，結果去完都仲要等一排先幫狐媽媽檢查；點知檢查完即可以落產房準備，原來已經開咗 5-6 度

夜晚 10:00 - 11:05

終於落到產房，不過由於未開夠度數，所以繼續等，助產士幫狐媽媽種豆（被種咗 3 粒豆）同俾笑氣聞；繼續處迷糊狀態；痛咗一陣真係忍唔住想去廁所，於是叫助產士，佢幫狐媽媽檢查完就即刻 set 好架步叫埋狐爸爸入黎就俾試生，結果用力咗 3，4 下重 2.795kg (5 磅 15 安士) 嘅狐 BB 就喺 11:05 出咗世，生完成個人當堂醒哂

夜晚 11:05 - 零晨 1:00

生完狐 BB 影埋全家福，狐爸爸就喺出面等，狐 BB 入箱，狐媽媽就等縫針；結果成 2 個鐘先搞掂哂同狐 BB 一齊上病房

成個過程真係好難忘，估唔到可以忍受到陣痛兼無喪叫，只係縫針嗰陣突然失控喪喊（因為實在太痛，痛過生嗰陣，覺得好慘好委屈），但係之後望住狐 BB 又覺得所有嘅痛都無所謂；狐 BB，狐媽媽只望妳聽教聽話，健康咁成長！

第 10 次政府產檢 @ 產假第 10 日

今日係產假第 10 日，又返威記做檢查！

今日產檢時間係 9:45，又一早去到磅重量血壓驗小便，之後等叫名見助產士！等咗一陣，終於叫名見助產士；一入到房，助產士問狐媽媽做乜今日黎，佢話狐媽媽上星期五先黎完，話今日唔會檢查，叫狐媽媽返屋企，狐媽媽當堂 O 咗咀！

可能個助產士見狐媽媽打咗個突加上語氣有啲唔好，跟住就話既然黎到就幫狐媽媽檢查埋今次！首先都係問有無乜嘢特別，狐媽媽俾上個禮拜輕咗，助產士叫狐媽媽留意番；之後就上床度肚摸肚！助產士話狐 BB 個頭已經落哂去，應該隨時生得，總之有見紅，穿水或者有陣痛就即入院；助產士話狐媽媽唔需要再返去檢查，等生就 ok 喇！

檢查完之後，狐媽媽去咗一田 BB 展行吓；狐媽媽行咗 1 圈見無特別嘢平，只係買咗 3 套帽仔連口水肩加手套就返歸喇！

狐媽媽重量：66.1kg
狐 BB 週數：39W2D

 

狐 BB 嘅

 

謙謙同哈林仔嘅

第 9 次政府產檢 + 烚奶樽 @ 產假第 5 日

今日係產假第 5 日，又返威記做產檢！

今日產檢時間係 11:45，可能因為接近中午，所以唔係太多人，好快都叫名入去見醫生！不過估唔到除咗叫名快，見醫生仲快，5 分鐘就摸完肚出返黎！

檢查完之後又返屋企繼續為狐 BB 準備定啲嘢，今日主要係烚奶樽，因為第 1 次用個奶煲，唔係好曉，好彩大 Ka 媽媽都係用同 1 款奶煲，佢教咗狐媽媽點用之後即開始洗奶樽同烚奶樽，大 Ka 媽媽仲教可以隔日就烚 1 次奶樽！

狐媽媽重量：66.6kg
狐 BB 週數：38W4D

BBQ @ 產假第 4 日

今日係放產假第 4 日，亦都係追月日，狐老公約埋一班同學去 BBQ！

原本見差唔多生唔想四圍走，但實在有啲悶，而且好耐無去 BBQ，所以最終都決定去！

大家中午先去飲茶，之後分頭去買嘢食再齊齊入西貢！唔知係咪今日天陰有雨，所以唔太多人，好快搵到位泊車同埋搵到爐！

今日小甘妹都有黎，無見一排，又大個囡咗，依然係咁可愛，仲行得好穩陣添！大家傾吓講吓，燒得好開心；不過狐媽媽個背無嘢靠，坐得耐好辛苦，腰酸背痛，所以燒到 9:30 就決定打道回府休息喇！

今日真係好開心，下次再 BBQ 應該會係狐 BB 出世之後喇！

準備代茶 @ 產假第 3 日

今日係產假第 3 日，之前見謙謙爸整咗啲代茶俾謙謙媽，見今日無嘢做，就走去整代茶！

其實代茶只係炒好啲米，等生完之後加其他材料一齊焗水黎飲！製作過程好簡單好快，唔使 30 分鐘已經搞掂喇！

食譜：

米　　　　　2 隻量杯（即大約 2 碗飯份量）

 

做法：

 

先將白鑊（即無鹽無油）燒紅，之後用中火將米炒至金黃色（大約 10 分鐘到），熄火放涼後用玻璃樽儲存，待生產後當水焗黎飲！

 

啱啱炒完嘅米，有少少燶

 

放涼之後放入玻璃樽留待產後飲用

今日係中秋節，喺度祝大家中秋節快樂，人月兩團圓，記得舊年仲同狐爸爸喺屋企樓下個公園影月亮，今年因為天陰陰影唔到，同埋因為多咗狐 BB 所以無得周圍去，出年就可以帶住狐 BB 去賞月喇，狐爸爸狐媽媽好期待同妳一齊賞月呀！

雜果杏仁豆腐（附食譜）@ 產假第 2 日

以前狐細妹成日整杏仁豆腐，好耐無食過加上呢期想食，於是自己去買材料整黎食！

食譜：


大菜絲　　　10 克
水　　　　　1 公升
鮮奶　　　　250 毫升
砂糖　　　　170 克（原本 200 克，唔想太甜，所以減少咗）
杏仁香油　　適量
雜果　　　　1 罐
砂糖　　　　適量
滾水　　　　1 碗

做法：

先將大菜絲，糖同水用慢火煮溶 30 分鐘，之後再煮滾熄火；加入奶同杏仁香油拌勻，倒入容器放涼，再放入雪櫃雪至凝固！將適量糖（隨自己喜歡）溶入滾水中，待放涼放入雪櫃，食用時連雜果加入切粒杏仁豆腐中一齊食用！

整出黎味道唔太甜啱啱好，好味道！

 

好好味嘅雜果杏仁豆腐，狐老公話唔使加糖水都一樣好 good

另外更新咗狐 BB 嘅物品 list！

寶寶奶樽用品	數量	已買
NUK PP 奶樽 8 安士	3 個	OK
NUK 玻璃奶樽 8 安士	1 個	OK
NUK PP 奶樽 5 安士	1 個	OK
NUK 玻璃奶樽 5 安士	1 個	OK
消毒奶煲	1 個	OK
NUK 消毒清潔劑	2 包	OK x 5
奶樽鉗（細）	1 個	OK
奶樽鉗（大）	1 個	OK
NUK 清潔奶樽刷及奶咀刷	1 個	OK
奶粉格	1 個	OK
探熱針、耳溫計	1 個	OK
安撫奶咀		OK x 2
清潔及衛生品	數量	已買
毛巾、面巾	2 套	面巾 x 9，毛巾 x 4
紗巾	3 打	5-6 打
棉花棒（大、中、細）	1 套	細 x 2
棉花球	1 包	OK x 2
髮梳及較剪	1 套
指甲鉗或較剪	1 套	OK
吸鼻器	1 個	Sample 1 個
思詩樂乾綿		OK
思詩樂濕紙巾／NUK 濕紙巾		OK
BB 洗衣液		OK
面盆、浴盆	1 套	OK
洗頭水、沐浴露（施巴）	1 套	Sample 1 套
凡士林	1 支	OK
沐浴網	1 個	OK
浴巾		OK
家居及戶外用品	數量	已買
被、床圍、床笠、枕頭	2 套	OK
被夾	1 套	OK
枕頭（BB 車用）	2 個	OK
隔尿墊	2 張	OK
嬰兒床	1 張	OK
嬰兒手推車、雨蓬	1 套	OK
餐椅	1 張	OK
學便廁	1 個
圍欄	1 個
揹帶	1 條
儲奶袋 (200ml)	1 盒	OK
NUK 分類袋	2 盒	OK
產婦入院所需用品	數量	已買
浴巾、面巾	各 1 條
乳墊	1 盒	OK
初生嬰兒尿片 (Goon)	1 包	OK
初生嬰兒衣服（內衣、嬰兒袍、包被）		OK
棉花球	1 包	OK
口罩
媽媽袋		OK
NUK 濕紙巾 (Nipple)	1 盒	OK
產婦衛生巾	2 包	OK
網褲	4 條	OK
沖洗瓶（清洗傷口）= 盆仔	1 個	OK
拖鞋	1 對
牙刷、牙膏	1 套
保溫水壺、杯	各 1 個	OK
盒裝紙巾	1 盒	OK
睡衣 + 開胸外套	1 套	OK
廚房紙		OK
產後及哺乳用品	數量	已買
產婦衛生巾	4 包	OK
網褲或紙內褲	2 包	OK
乳墊	2 盒	OK
床墊	2 包	OK x 1
Olive Oil（防肚紋）	1 支	OK
哺乳胸圍	2 個	OK
吸奶器（手動或電動）	1 個	OK
乳頭保護罩	2 個	OK
收腹束腰褲	2 條
衣服用品	數量	已買
和尚袍（短）	6 件	OK
和尚袍（長）	4 件	OK
薄夾衣	2 件	OK
厚夾衣	2 件	OK
肚臍布	2 條
薄包被	2 張	OK
厚包被	2 張	OK
口水肩		大量
熱水壺	1 個	OK
手套		OK
腳套		OK
帽子		OK
襪子		OK
背心		OK x 1
汗巾		OK x 4
睡袋	1 個	OK