新玩具 - 象印麵包機 (BB-HAQ10)

由狐 BB 食固體食物開始，佢就超鍾意食麵包，眼見狐 99 日日都要買定麵包俾狐 BB 食，又見好多 1010 媽媽自家整麵包，同狐爸爸商量完後，決定買 1 部麵包機！

經過狐爸爸一輪資料搜集後，狐爸爸屬意 2 大牌子嘅麵包機，1 個係 Panasonic ，另 1 個係象印！

先講 Panasonic ，佢喺香港本身無得賣，如果係就要喺台灣訂返黎；由於係台版，所以要另配 1 隻啱香港用嘅火牛！亦都由於佢係台版，香港係無得保養，如果需要配零件，又係要喺台灣訂返黎；但係佢勝在多功能，可以做到好多唔同包種，同埋有好多麵包書都係以佢黎做藍本！

至於象印，佢勝在夠”的色”，啱哂狐家呢啲無乜地方嘅小家庭，同埋佢有保養，要維修或者訂配件都可以喺香港搞掂，但係佢價錢就偏貴同埋無乜 function！

經過一番考慮，最終決定買象印，話哂有乜事都可以搵到香港代理搞！

熱烈歡迎象印麵包機，狐 BB 以後有新鮮麵包食喇！

2011 年海洋公園之旅

狐爸爸公司請去海洋公園，所以同狐 99 帶埋狐 BB 去佢人生第 1 次嘅海洋公園之旅！

1 歲評估兼結婚 4 週年（絲婚）紀念 @ Onion Kitchen

今日係狐爸爸同狐媽媽結婚 4 週年紀念日，亦都係狐 BB 第 1 年一齊慶祝；今日嘅慶祝活動非常特別，就係一家 3 口齊齊打針”慶祝”！

一早狐爸爸同狐媽媽先去打流感針，之後帶狐 BB 去健康院打 1 歲針兼做評估！去到健康院都係先磅重，狐 BB 而家有 7.6kg，身高有 74cm，之後就等見姑娘！姑娘先望望生長線，佢話狐 BB 唔夠重，由尾二嗰條生長線跌到落最尾嗰條生長線到，姑娘話要加多餐固體食物；之後問咗一啲問題如狐 BB 識行同講嘢未，識唔識指嘢等等；跟住做咗 2 個 test，第 1 個係姑娘俾 1 粒小紙碎要狐 BB 左右手都用兩隻手指攞然後再俾狐媽媽或姑娘，第 2 個係俾咗粒積木狐 BB 叫佢放落個碗仔到；狐 BB 2 個 test 都做到，仲識將個碗俾番姑娘添！

見完姑娘就等打針，狐 BB 可能知道要打針，一除褲就喊咗出黎，結果當然係打兩針兩針都喊哂喇，要氹好耐再買包包俾佢食先無事！

因為今日係結婚紀念日，所以一家打哂針之後就出街食飯！今次揀咗 1 間喺大圍嘅餐廳 Onion Kitchen！

可能時間尚早，去到居然 1 枱客人都無；狐爸爸叫咗西冷扒，而狐媽媽就叫咗大蝦意粉，仲 order 咗 6 隻生蠔，yummy！

呢間餐廳啲食物唔錯，特別係生蠔，下次有機會再去食過！

生蠔，正

紅白酒，ok 好味

西冷扒

大蝦意粉

甜品 - 焦糖燉蛋，好好食

狐 BB 被取錄了 @ 呂郭碧鳳

上星期六同狐 BB 去完呂郭碧鳳 interview，老師話下個禮拜（即呢個禮拜）會收到通知收唔收！

 

狐媽媽見狐 BB in 得麻麻地諗住無機會，點知尋日放工返到屋企見信箱有信，以為係另 1 間叫狐 BB 去 interview，點知拆開原來係呂郭碧鳳寄黎嘅通知書話收狐 BB 讀下午班，真係估唔到又驚喜！

雖然唔係第 1 意願，但都決定先交留位費，之後睇吓會唔會再有第 2 間較為近嘅會叫狐 BB 去 interview 同收佢；點都好，而家都叫做有學校收，都叫放吓心頭大石，唔使驚狐 BB 無書讀；呢份可以話係狐 BB 13 個月好好嘅生日禮物！

狐 BB 人生第 1 個 interview

狐 BB 今日完成咗佢人生第 1 個 interview，可惜 in 得唔好，唯有當吸收經驗，希望再有機會interview 嗰陣可以做得更好！

講番個 interview ，其實係狐 BB N 班嘅 interview；今朝一早就同狐 BB 出發去呂郭碧鳳 interview！

去到學校，一班老師笑面迎人喺門口迎接，問 in 邊級然後就指導去邊度等；沿路見佢放咗好多唔同類型嘅玩具俾小朋友玩；校舍都算大，係舊咗少少！行到盡頭，又有老師黎迎接；狐媽媽交咗見面證就同狐 BB 坐喺度玩玩具；坐咗一陣老師叫名然後同埋另外 3 個小朋友一齊入課室 interview！

其實都唔算 interview，主要都係老師同家長傾吓計，小朋友就玩玩具；都係一啲切餸玩具，車仔咁，老師叫狐 BB 切玩具俾佢睇，點知呢個囡用手搣開啲玩具；再叫佢放入微波爐或者俾狐媽媽，佢又掉咗去，仲要扭計要離開張椅，結果乜都唔肯做！

之後老師問狐 BB 講嘢未，狐媽媽話佢識叫爺爺嫲嫲，佢好奇怪狐 BB 識講疊字；跟住又問意願想返上午班，全日定下午班，成個 interview 就咁就完結咗！

綜合狐 BB 今日嘅表現應該都無乜機會收佢，希望下次再有機會 interview 嗰陣會表現得好啲喇，加油！

狐 BB 1 歲生日

今日係狐 BB 1 歲生日，

狐 BB 與庭庭及維維 Pre-1 歲生日會

為咗慶祝狐 BB  1 歲生日呢個大日子，狐媽媽聯同另外 2 位 1010 媽媽一齊舉行 1 個小型生日會！

狐 BB 農曆 1 歲生日

今日係狐 BB 農曆 1 歲生日，祝寶貝囡生日快樂，身體健康，乖乖食多啲奶，仲有唔好咁大脾氣！

真係唔敢相信話咁快就 1 年喇，1 年前嘅今日狐媽媽身處醫院生狐 BB；1 年後嘅今日，狐 BB 已經喺狐媽媽眼前對住狐媽媽笑，嗲，扭抱，講 BB 話！

呢 1 年時間過得真係好快，狐爸爸狐媽媽無乜所求，只求狐 BB 快樂健康咁成長，生日快樂！

1010 BB 半歲生日扒地

今日同狐 BB 參加咗 1010 半歲生日扒地，舉行地點係宇晴軒會所！

狐爸爸生日之星星朱古力牛油曲奇（附食譜）

自從有咗狐 BB 到狐 BB 出世，因為忙於照顧而封爐；見今日係狐爸爸生日，狐爸爸之前提過想再食狐媽媽整嘅曲奇，今日專情開爐整曲奇！

今次呢隻曲奇，又係參考 Miss Jubie 嘅食譜黎整，係有少少出錯，應該用低筋粉居然買咗高筋粉，不過味道都唔差，係放耐咗食落好乾身咁！

食譜：

牛油　　　　　　100 克
糖霜　　　　　　45 克（比原先少咗 10 克）
全蛋　　　　　　1 隻
低筋麵粉　　　　175 克（用錯咗用咗高筋，唔知係咪咁有影響）
雲呢拿油　　　　適量（我鍾意香啲，所以加咗好多）
鹽　　　　　　　1/8 茶匙（我就隨意落，無量到落咗幾多）
朱古力碎　　　　適量（我鍾意食朱古力，所以落咗好多）

做法：


先將麵粉同鹽過籂 3 次，牛油室溫放軟，加糖霜打至淡白色，之後加蛋用慢速打勻，加雲呢拿油，再分數次加入麵粉鹽，加入埋朱古力碎拌勻，之後放落星星模整出星星形狀，再用保鮮紙包好放入冰格雪 60 分鐘；預熱焗爐，以 180 度焗 20 分鐘即成！

原本想當生日禮物送俾狐爸爸，仲用咗個靚靚曲奇袋袋住，但係焗完好大陣曲奇味，狐爸爸放工返到黎好快就聞到，無哂驚喜！

Day 99 - 百日宴

仲差 1 日狐 BB 就夠 100 日大，今日為狐 BB 搞咗個百日宴！

狐 BB 今日係主角，當然要扮靚靚，著咗 Vicky 姨姨送嘅裙仔，再加埋新買嘅 Pooh Pooh 白色毛毛外套，狐 BB 真係好可愛！

今日真係好高興，因為好多親戚朋友都專情黎賀狐 BB，而且仲送咗好多祝福同禮物俾狐 BB！

囡，狐爸爸狐媽媽今日無特別送嘢俾妳，但係狐爸爸同狐媽媽會好俾心機咁照顧妳，希望妳健康快樂咁成長，狐爸爸狐媽媽好愛妳！

半歲大

時間真係過得好快呀，不知不覺狐 BB 今日半歲大喇；狐媽媽成日都覺得狐 BB 仲係初初出世咁，但係原來佢已經長大咗好多好多喇，同之前相比，真係有好大分別！

狐媽媽同狐爸爸無為狐 BB 準備任何嘢，只係為佢準備咗 1 份＂禮物＂，就係保障佢健康嘅 3 支針！

約咗 3:45 去健康院，去到又係先磅重，狐 BB 而家有 6.4kg，雖然係中細碼 B，但係只要佢跟番佢自己嘅生長線上就無問題喇！

磅完重就入房見姑娘，今日要做 3 個 test，分別係自己坐喺度，扶住企同埋雙手攞嘢；因為係最後 1 批 BB，所以姑娘叫狐媽媽先去藥房攞退燒藥再返黎，留低狐爸爸陪狐 BB 做 test；攞完藥返黎狐 BB 已經做完 test 準備去打針喇！

聽狐爸爸講番，狐 BB 原來坐喺硬嘅地方已經坐得好好，扶住企亦都唔錯，係雙手攞嘢嗰度唔係幾理想；因為狐 BB 八卦，喺準備開始 test 嘅時候咁啱有第 2 個姑娘入黎問嘢，結果打斷咗狐 BB，個衰妹掛住望人地唔專心做，結果當然唔理想喇，不過姑娘都話 ok pass！

之後到打針，狐媽媽整親隻手未好番，驚狐 BB 打針嗰時會爭扎再整傷，所以今次由狐爸爸負責抱住，狐媽媽負責分散狐 BB；狐 BB 可能開始知道痛，打第 1 針已經開始喊，第 2 同第 3 針當然喊到收唔到聲，用玩具引佢都起唔到作用，要慢慢氹番先收聲！

打完針原本打算買個蛋糕仔同狐 BB 慶祝，點知唔記得咗；狐爸爸狐媽媽無乜所求，只求狐 BB 健健康康，開開心心咁長大就滿足喇，生日快樂呀！