狐家姐 K3 親子旅行 @ 大埔海濱公園

今日係狐家姐幼稚園生涯最後 1 次學校旅行，狐爸爸仲專情請假同狐家姐一齊去添！

今次旅行既地點係大埔海濱公園，一早 8:45 喺學校對開廣場集合，之後派發泡泡棒同環保袋，之後就分批乘坐旅遊巴士出發！

大約 30 分鐘車程到就到達大埔海濱公園；落車之後老師簡單介紹咗公園有啲乜嘢後就自由活動！狐媽媽之前約好咗其他同學媽媽一齊開大食會，所以去到集合地點就開始準備野餐！今次野餐非常之豐富，有沙律，有雞翼，有茶葉蛋，有三文治，有蛋糕仔，有菠蘿腸仔，有啫喱糖等！

大家食完嘢之後就到 K3 玩集體遊戲既時間，總共玩咗 4 個遊戲，第 1 個係家長同小朋友互相傳波波棒；第 2 個遊戲係家長攞住塊布，小朋友扮蟲仔喺下面穿過；第 3 個係小朋友玩陸上飄，家長攞高塊布，小朋友就喺塊布上面走過；最後 1 個係彩虹啫喱，家長攞住 1 塊彩虹布，利用空氣整成啫喱形狀，小朋友就負責走上去坐！

玩完集體遊戲之後就影班合照，之後就自由活動！海濱公園其實仲有好多設施，有蝴蝶園，昆蟲區，回歸紀念塔，兒童遊樂場等等；但因為狐家姐想去探太婆，所以狐家就唔跟校車返學校，同老師交代之後就出發去探太婆！

狐家姐 K3 親子旅行就咁完結咗，出年就係小一旅行喇！

小一自行派位註冊 @ 胡素貞

今日係小一自行派位註冊既日子，狐媽媽諗住帶狐家姐去參觀佢未來 6 年將會入讀既小學，所以等狐家姐放學之後下晝先去註冊。

狐媽媽帶住狐家姐，先喺門口既派位結果影番張相留念，之後就同狐家姐上 1 樓校務處註冊；成個註冊過程 5 分金鐘搞掂，先俾張黃色派位表佢地對，之後填番少少資料，等佢地再寄信黎咁就完成！

狐家姐初時好開心，之後入到學校個人變得好緊張，佢話間學校好大間好驚，狐媽媽同狐家姐講因為有好多學生，所以間學校好大同埋因為上緊堂所以學校無人；之後狐家姐見到有班學生上緊體育堂佢又好開心咁睇住上堂！

狐媽媽只希望狐家姐喺呢間學校讀得開心快樂！

小一自行派位結果公佈

今日係全港小一自行派位結果公佈既日子，狐家今年係其中一份子，超級緊張；因為如果狐家姐有幸入到呢轉派位，就唔使參加大抽獎，狐妹妺亦都可以唔使擔心， 3 年後入讀埋同 1 間小學。

狐家申請間學校原先話今朝一早學校門口公佈結果，另下晝會網上公佈；點知學校原來零晨 12 點已經喺網上面公佈咗，咁啱狐媽媽零晨兩點幾醒咗，就去望下電話，同學媽媽們已通知出咗結果，即上學校網址睇！

網上公佈既係顯示申請表上的號碼，狐媽媽金晴火眼咁逐個號碼睇，終於喺最後一頁見到狐家姐個號碼；狐媽媽唔係好相信，再望多幾次，號碼真係相同，即係今次自行派位學校收咗狐家姐；狐媽媽真係好開心，即刻叫醒狐爸爸話佢知呢個喜訊，仲即刻攞張副本申請表再對多次，結果無變，學校收咗狐家姐，狐爸爸同狐媽媽開心到今朝 5 點幾先瞓番！

今朝一早送咗狐家姐返學，狐媽媽再次去到學校確認；學校將申請表上既號碼連埋姓名貼咗出黎，狐媽媽見到狐家姐個名出現喺公佈板上，再次確認狐家姐今次自行派位得到學位！

狐家姐有幸喺今次 2 萬幾自行派位得到學位真係好好彩，狐媽媽希望派唔到既朋友／同學仔喺大抽獎中入到心水學校，加油！

結婚 8 週年（青銅婚）紀念

今日係狐爸爸同狐媽媽結婚 8 週年既日子，話咁快又過咗 8 年，狐媽媽希望同狐爸爸仲有好多個 8 年，狐爸爸，週年快樂！

狐家姐筆下＂我們這一家＂

頭先食完飯，狐家姐同狐妹妹兩個要求想畫畫，於是狐爸爸就攞咗紙筆俾佢地畫！

狐妹妹未諗到有乜主題可以畫，所以都只係隨便亂畫；至於狐家姐就畫咗＂我們這一家’！

畫中既狐媽媽著裙同高踭鞋；狐爸爸身形瘦削；狐家姐自己化身 Elsa；狐妹妹當然化身做 Anna ！

狐媽媽問狐家姐點解筆下既狐爸爸咁瘦，狐媽媽咁大件頭；狐家姐答狐媽媽因為狐爸爸減咗肥，所以咁瘦！細路仔唔會講大話，言下之意係咪話狐媽媽仲好肥，需要去減減磅？睇黎狐媽媽要努力下先得，要喺狐家姐筆下做 1 個瘦媽媽！

1024 長洲遊

狐媽媽早排同同事傾開計，話無帶過兩位狐小姐去過離島；有見及此，今日即刻安排先去長洲行一轉，狐爺爺同狐嫲嫲都一齊參與！

兩位狐小姐學完畫畫就即刻坐巴士去中環 5 號碼頭，咁啱有班高速船就開，即買飛上船；坐咗大約 45 分鐘就到達長洲！

落咗船先喺碼頭附近 1 間海鮮檔醫肚，狐家一行 6 人叫咗個 2 人餐（包括煎三文魚扒，炒時菜，炸蝦同爆龍蝦）外加 1 碗蟹肉湯麵，盛惠 5 百幾蚊；食飽咗就向張保仔洞出發！

 

醫肚中

沿路都係吹吓海風，欣賞吓風景；

 

小型碼頭

 

 

張保仔洞標誌

 

之後行咗一段小山路就去到海邊既張保仔洞；可能呢期電視做緊張保仔，今日超多人去探張保仔洞，因為太多人加上山洞入口好細好窄，所以狐家無入去洞入面探險，只係到此一遊就算！

落番山之後就先休息一陣，嘆一嘆冰凍既能得利雪條就向東灘出發！沿路試食咗長洲出名既大魚蛋，什果同檸檬沙冰；食埋大大粒芒果糯米滋同榴槤糯米滋就到達東灘！

 

冰凍能得利雪條

 

長洲出名大大粒魚蛋

 

 

大大粒芒果糯米滋

兩位狐小姐喺沙灘玩得好開心；玩咗一陣狐家就坐船返中環打道回府！

兩位狐小姐今日玩得好開心，下次可以安排吓帶佢地去摸蜆！

試冬季校服

踏入咗秋季，又係時候要幫兩位狐小姐試冬季校服喇！

首先幫狐家姐試咗先，之前恤衫同校褸都買咗 L 碼，所以仲可以著埋今年；但校裙同紅色外套都只係 M 碼，狐家姐又高咗好多，所以呢兩樣要買過！至於運動衫，而家試著長度啱啱好，但怕過多 1，2 個月會唔啱（仲要著多半年），所以都決定買過 XL 碼！

狐家姐試完，當然輪到狐妹妹；基本上狐妹妹著得到狐家姐先前既校服，唯一係件紅色冷外套會有機會唔啱著，因為狐妹妹而家著咗上身係 fit 既！不過狐爸爸話都只係著多半年，所以決定狐妹妹唔需要買任何冬季校服！

狐妹妹著埋件好長既校褸真係超搞笑，仲唔捨得除添！

交 K1 報名表 @ 呂郭碧鳳

上星期幫狐妹妹交完合一堂 K1 報名表之後，今日輪到呂郭碧鳳！

同狐爸爸送咗兩位小姐去學畫畫之後，就坐車上去交表；上到去，因為無報名聽講座，所以喺校務處交完表同報名費之後，攞埋面見証就可以走人！

終於幫狐妹妹交哂表（雖然只係報咗兩間學校），希望合一堂可以收狐妹妹喇！

狐妹妹學游水 @ 泳天

踏入 10 月，狐妹妹正式開始學游水！

狐媽媽上個月幫狐妹妹報咗泳天既學前游泳班，呢個學前班係適合 2 歲半至 3 歲既小朋友；時間可以揀朝早既  9:00 或者黃昏既 6:00 ，1 堂游 30 分鐘；為咗可以更好利用啲時間，狐媽媽幫狐妹妹揀咗星期日既朝早 9:00（同一時間因為狐家姐要升去 5 至 15 歲既兒童班，所以狐媽媽都幫狐家姐調埋游水時間）！

今日一早起身就幫狐妹妹換好哂泳衣同保暖衣，狐妹妹已經好興奮好期待；狐媽媽執好哂行裝，就同狐妹妹出發去學游水！

雖然話係學前游泳班，但係完全唔需要家長陪埋小朋友落水，佢地大約係 1 個 Miss 或者阿 Sir 對 2 至 3 個小朋友！至於啲家長就坐哂喺看台上面睇小朋友游！

以狐媽媽既觀察，狐妹妹完全唔喊同唔驚水（因為狐妹妹之前已經有好幾次落水既經驗），狐妹妹仲好享受游水既過程添；狐媽媽亦都見到 Miss 開始教狐妹妹用腳踢水，睇黎狐妹妹應該好快追到狐家姐既進度！

游完水問狐妹妹好唔好玩，狐妹妹話好好玩呢！狐爸爸仲買咗新既游泳鏡俾兩位狐小姐添！

狐家姐 2015 年 4 月至 9 月畫集 (2)

繼續狐家姐 4 月至 9 月既作品：

傘

西瓜

昆蟲

馬

怪物？

迷你兵團

甲蟲

雪寶 Olaf

熊仔

叮噹

馬仔

金魚

花

狐家姐 2015 年 4 月至 9 月畫集 (1)

狐家姐 4 月至 9 月既作品：

鳥

花

海豚

蟹

雨天

太陽花

兔仔

人

蝴蝶

蝸牛

狐妹妹 2015 年 9 月畫集

狐家姐有畫集，狐妹妹當然都有喇：

警察

中秋

狐家姐 2015 年 9 月新畫集

轉咗新學畫畫地方，繼續狐家姐 9 月畫集：

警察

中秋

狐妹妹 2015 年 9 月勞作集

狐家姐有勞作集，狐妹妹當然都有！

狐妹妹整既貓仔燈籠

狐家姐 2015 年 9 月勞作集

轉咗新地方，每個月畫班會有 1 堂係做勞作；因為 9 月臨近中秋，所以今次既勞作係燈籠！

狐家姐整既兔仔燈籠

試新畫班 @ 奇彩創作室

之前狐家姐一直喺屋企樓下商場既 1 間琴行入面學畫畫，狐妹妹大約 7 月中到開始同狐家姐一齊學，兩位狐小姐都學得 ok；點知無耐畫班 Miss 唔教，琴行搵新 Miss 黎頂替之前嗰個，由嗰時開始狐妹妹就話唔想學畫畫，從狐家姐口中得知狐妹妹被 Miss 話，因為狐妹妹唔聽 Miss 指令！

狐媽媽原意係想兩位狐小姐畫得開心，有見狐妹妹因唔聽指令而被 Miss 話，加上琴行地方細但學生數目多，狐媽媽就決定幫兩位狐小姐另覓新地方學畫畫！

之前聽悠媽提過咗屋企對面既鏡廠有 1，2 間學畫畫幾好，其中 1 間係奇彩創作室！

狐媽媽決定走去視察吓環境同問細節！狐媽媽見到佢個課程表同一時間有 2 班唔同歲數既畫班，原來因為奇彩入面有 3 至 4 張長枱，每張枱就係唔同歲數既畫班，而且每張枱會有 1 位老師負責；至於學費方面，奇彩係逐月收既；狐媽媽見到佢環境唔錯，時間地點都啱心水，於是決定俾兩位狐小姐黎試堂！

狐媽媽見兩位狐小姐啱啱開始好似唔係好習慣新環境，仲諗其中 1  個應該會喊或扭計；點知去接放學時兩位狐小姐攞住自己整既燈籠好開心咁走出黎，狐媽媽就放心，仲問兩位狐小姐如之後轉過黎呢邊學畫畫好唔好，兩個都答好，狐媽媽就決定呢度，仲即刻交埋餘下 9 月既課堂錢添！

小一選校

話咁快狐家姐就快完成 K2 生涯；踏入 9 月就會係 K3，意味著要開始為狐家姐揀小學！

狐媽媽同狐爸爸揀小學好簡單，一定唔會跨區（因為覺得跨區讀書湊佢既大人同小朋友都辛苦）；就算要跨，都只會係跨入馬鞍山區！

其實狐媽媽一直無諗過原來揀小學需要諗咁多嘢，一直以黎都只係懶懶行，殺到理身先再算；又或者只要報到心水學校就可以；但原來事實唔係咁樣，狐媽媽而家先閞始知道現實係咁競爭激烈；幫狐家姐揀小學係一件頭痛既事！

整個小學選校過程分 3 個階段，第 1 階段係自行分配學位，學校會有大約一半學位用於呢個階段；呢個階段主要係俾世襲同計分高分既小朋友揀學校；世襲即可能父母係學校一分子，或者有家姐阿哥讀緊嗰間小學；入到心水學校機會好大；計分亦都係，有以上兩項既分數都會高啲，再加上如有宗教信仰，再加分；狐家以上兩項都無，有既都只係首名子女既分數；所以第 1 階段入到心水小學既機會都幾微！

第 1 階段無學校收到，就要進入第 2 階段；第 2 階段係統一派位！統一派位係由電腦安排號碼，之後就根據小一選校表既選擇黎派位！選校表分甲，乙兩部份，甲部可以揀全港既官立或資助小學；乙部就可以揀番自己所屬地區校網既官立或資助小學！

狐爸爸同狐媽媽唔想狐家姐跨區返學，所以一定係揀返自己所屬地區校網；但因為狐家所屬地區校網小學唔多，競爭好激烈；除咗講好運之外，要好好諗點樣將學校排位，希望一擊即中！

如果第 2 階段派位出黎強差人意，就要去第 3 階段，自行叩門心儀學校爭取面試機會；但因為競爭太激烈，閒閒地 1 間小學都有起碼, 200 幾 300 人叩門，諗起都覺得恐怖！

狐媽媽希望狐家姐可以派到心水小學，佢又讀得開心，又唔使擔心狐妹妹讀書問題，睇黎要認認真真同狐爸爸商量一下對策先得！

2015 年母親節禮物

又到咗一年一度既母親節，每年呢啲時候學校都會教小朋友整小手工黎送俾媽媽們，狐家姐學校都唔另外！

今日放工返到屋企，狐家姐就話有嘢送俾狐媽媽，原來係 1 張心心咭，狐家姐仲喺咭上面畫咗狐媽媽個樣（雖然係唔似樣），加上狐家姐既 1 句＂媽咪，母親節快樂＂同 1 個吻，甜哂！

除咗狐家姐，當然唔少得狐妹妹；狐妹妹雖然未係好知乜嘢係母親節，但佢居然識得同狐媽媽講＂I Love You Mummy"，忡要講咗 2 次添；狐媽媽真係好驚訝呢句會出自狐妹妹口中（可能成日睇電視學返黎）；狐媽媽好開心，多謝兩位狐小姐既＂禮物＂！

2015 年暑期班報名

又到咗開始報暑期班既日子，今年社區中心改咗報名方法，會員先要指定日子交時間抽籤表格，之後社區中心會進行抽籤，抽到的話就要指定日子指定時段去社區中心報名交錢！

今年好彩又抽到，報名時間係 2:00 至 3:00；狐媽媽安頓咗狐爸爸同兩位狐小姐，就出發去報名！去到先攞籌，之後就等叫號碼去報名；報完再等叫號碼交錢，成個過程大約 30 分鐘完成！

狐媽媽今次幫狐家姐報咗 4 個暑期班，分別係小小魔術師，夏日甜品，輕黏土同埋小型網球班，希望狐家姐鍾意呢啲暑期班！

Day 6 @ 2015 年新加坡之旅

終於黎到旅程最後 1 日，因為坐 4 點幾機，所以只係得上晝時間可以自由活動！

喺酒店食完早餐辦好 check-out 手續，狐家就去咗 Chinatown 附近既 Market 同 Food Market 到行吓同埋買手信！

行到大約 1 點到就返酒店會合陳氏，跟住出發去機場準備返香港！成個旅程就係咁完滿結束！

今次旅程都尚算開心，多謝謙媽安排好哂啲行程，唯一美中不足就係狐家全部病哂，搞到好多地方都無去同埋無乜點食過地道美食！希望再有機會黎多次新加坡！

Day 5 @ 2015 年新加坡之旅

黎到旅程第 5 日，今日主要係去環球影城玩！

一早又係先喺酒店食早餐，然後辦好 check-out 手續，寄存好行李就坐 sentosa express 去環球影城！

可能今日係星期六，環球影城相對多人，但都可以接受；入到去先去＂馬達加斯加＂玩，因為只有呢個啱狐妹妹玩，其餘狐妹妹全部都唔玩得；玩完馬達加斯加，陳氏同狐家就四圍影相，壞蛋奬門人呀，荒失失奇兵呀，荒失失企鵝呀，芝麻街呀，變形金剛呀，功夫熊貓等等！

玩到大約 4 點幾，大夥就返酒店攞行李，然後坐 MRT 出發去牛車水 (Chinatown) 既 Carlton City Hotel！

去到酒店搞好哂 check-in 手續，上房放低行李休息一陣，就坐的士出發去 Singapore Flyer 欣賞夜景！坐完 Flyer ，大夥就再出發去食預訂咗加上成個旅程最豐富同好味既胡椒蟹！Day 5 完結！

Day 4 @ 2015 年新加坡之旅

今日係旅程第 4 日，大夥先喺酒店食早餐，之後就到自由活動時間！

陳氏去玩空中吊椅同斜坡滑行，而狐家就去坐 Sky Tower，之後再去埋睇 History of Singapore 同蠟像館，睇完就坐 cable car 欣賞聖淘沙風景；玩完哂就返酒店休息，下午會合返陳氏再一齊去 SEA Aquarium！

SEA Aquarium 好大，好多魚睇，小朋友們都睇得好開心！原本謙媽預約食 buffet，但由於狐爸爸發燒，所以去完 Aquarium 狐家就係附近食嘢再返酒店休息，而陳氏就出去 Vivo city 食晚飯！Day 4 完結！

Day 3 @ 2015 年新加坡之旅

黎到旅程既第 3 日，今日又係先喺酒店食自助早餐，之後又再入 Legoland theme park 到玩！

今日主要都係影相，玩機動遊戲同埋買手信！玩到大約中午，食咗少少嘢買埋手信就返酒店休息兼 check-out ，因為下午要出發返新加玻既聖淘沙！

經過咗大約 1 個鐘既車程，狐家同陳氏抵達咗聖淘沙既 Movenpick 酒店！酒店好有熱帶風情feel ，而且仲對住魚尾獅又類近 sentosa express 站，非常之方便！搞好哂 check-in 手續放低哂行李，狐家同陳氏就出發去坐臨時安排既鴨仔遊覽船！

坐完鴨仔船，狐家同陳氏就出發去 Gardens by the Bay 食晚飯！Day 3 完結！

Day 2 @ 2015 年新加坡之旅

今日係旅程既第 2 日，今日主要係去 Legoland theme park 到玩！

狐家同陳氏一早起身，之後就喺酒店食自助早餐，食完就出發入 theme park 玩！新加坡既樂園同香港既樂園真係天淵之別，香港既樂園任何時間都係塞滿哂人，排隊玩遊戲至少要排半個鐘至 1 個鐘先可以玩到；但新加坡完全唔係，入到 theme park ，居然係無乜人；就算玩遊戲，最耐都只係排咗 15 分鐘就有得玩！

狐家姐同謙謙先去玩駕車，由於狐妹妹太細，所以無得玩，但 theme park 都有到好，佢地喺每個遊戲既出面都放咗 1 枱 Lego ，所以就算狐妹妹無得坐車，佢都喺度砌 Lego 唔會悶！

駕完車，狐家就同陳氏一齊去坐船，今次狐妹妹可以玩，狐妹妹第 1 次坐船仔好開心！坐完船仔就輪到坐 Lego 火車；玩到大約中午，狐家同陳氏就返酒店休息一陣，下午就轉戰 Legoland water park！

Legoland 既 water park 都幾大，不過因為狐妹妹太細既關係，所以狐家都只係喺玩咗坐水泡遊河同埋比較矮既水上滑梯；雖然玩得好少嘢，但兩位狐小姐都玩得非常之開心；是日既晚餐係泰國菜！Day 2 完結！

Day 1 @ 2015 年新加坡之旅

期待已久既日子終於來臨喇，今日係狐家第 1 次 1 家 4 口同陳氏 1 家出發去旅行呀，兩位狐小姐非常之興奮！

準備好哂所有嘢，狐家就坐狐家姐想坐好耐既 A41 機場巴士去機場！可能兩位狐小姐係第 1 次去旅行同第 1 次坐飛機，坐巴士浴路都好緊張但又好興奮；當巴士扺達機場客運大樓，兩位小姐簡直興奮到極點！

陳氏因為一早到咗，佢地已先行去食早餐；狐家辦完 check-in 同寄行李手續，就會合陳氏食早餐然後登機！

上到飛機，狐妹妹繼續興奮，好彩機上有狐妹妹至愛既 Peppa Pig 睇，成程尚算 ok ，狐媽媽心諗估唔到狐妹妹唔驚坐飛機；正當狐媽媽諗住仲有半個鐘就可以安心落機，狐妹妹就開始黎料；先係大喊，繼而要扭抱，但係飛機已經進入降落階段，所有人都要扣上安全帶唔可以離開座位，狐媽媽唯有不停咁安慰狐妹妹，但都唔成功；結果狐妹妹喊足半個鐘，到飛機降落到跑道，空姐見狐妹妹喊得太利害，就叫狐媽媽抱起狐妹妹，狐妹妹當然即刻收聲，狐媽媽媽真係超級唔好意思！

狐家同陳氏終於扺達咗新加坡，過好哂關入境之後，謙媽就聯絡預約好既司機同埋 Jason（交收門票）；交收好哂門票之後，陳氏就去訂斑蘭蛋糕，呢個時候，預約好司機同狐爸爸講因為機場唔可以停太耐車，佢會轉頭返黎接我地；但狐媽媽同狐爸爸都聽唔清司機會喺邊度等我地；當陳氏訂完蛋糕返黎，大夥嘗試搵司機搵唔到，謙媽同狐爸爸既漫遊咭又用唔到，結果要搵 Jason 幫手先聯絡到司機先平安上到車出發去馬來西亞既 Legoland！

經過咗大約 1 個鐘既車程，狐家同陳氏安全抵達 Legoland 酒店！謙謙同兩位狐小姐見到咁多 lego 興奮到大叫！狐媽媽同謙媽辦好哂入住手續就一齊上房！

狐媽媽同謙媽喺預訂房既時候揀咗 pirate theme connecting room，即係兩間房係互相打通既，但狐媽媽同謙媽都無同小朋友提過呢樣嘢！當大家各自入咗房而小朋友因為見到成間房都係 lego 而興奮時，狐媽媽同謙爸就打開咗房同房中間既門，小朋友一見可以見到對方，簡直興奮到控制唔到，不停喺兩間房之間走黎走去！

安頓好哂之後，狐家同陳氏就出發去食第 1 餐晚餐，可能唔係太多人既關係，大部份舖頭都好早就閂門，結果第 1 餐晚餐就喺 KFC 解決咗；食完晚餐就返酒店既 playroom 到玩一陣就上房梳洗休息，準備第 2 日入 Legoland theme park 玩！Day 1 完結！

狐家姐 2015 年 3 月畫集

狐家姐 3 月既作品：

小丑

鹿

花連花樽

蜜蜂

狐家姐與朋友 - 悠悠