給 BB 買禮物 (6)

狐 BB 又有好多新嘢喇，因為呢個禮拜有幾日都約咗大 Ka 媽媽一齊行街買嘢！

星期一早收工，身痕喺屋企附近商場行，見到啲襪仔咁得意，忍唔住買咗好多，呢度全部都係狐 BB 嘅，另外買咗啲俾大 Ka 媽媽個 BB ！

 

幾多襪仔

星期三同大 Ka 媽媽落咗花園街行街，大家都對件甲蟲衫好有興趣，但係佢係短袖，所以大 Ka 媽媽買咗細碼，狐媽媽就買大碼；至於件士多啤啤，一見好鍾意，可以襯埋之前買嘅士多啤啤襪！

 

件蜜蜂衫係咪好得意呢

星期四去咗一田行，見到佢有套 Pooh Pooh 床圍都只係 $399，即拉埋狐爸爸一齊去買，另外就買咗 2 包 Minimoto 綿花球同埋訂咗 1 箱 Minimoto 濕紙巾；亦都幫大 Ka 媽媽訂咗 1 箱 Minimoto 濕紙巾同埋買咗 Nuk 奶樽清潔液！

 

 

呢套就係 Pooh Pooh 床圍用品喇

 

另外仲有 2 包綿花球

 

1 箱 Minimoto 濕紙巾

星期五下晝返威記照完結構，夜晚又拉狐爸爸去一田，買咗 Arau 洗衣液，；另外見大 Ka 媽媽買咗 1 張 Minimoto 隔尿墊，於是又跟風買 1 張！

 

洗衣液同隔尿墊

星期六原本又約咗大 Ka 媽媽去買嘢，見天陰陰唔想無出街，大 Ka 媽媽就幫狐媽媽買咗幾包紗巾，唔該哂大 Ka 媽媽！

 

大 Ka 媽媽幫買嘅紗巾

狐 BB 今個禮拜收穫真係超豐富呀，不過狐媽媽啲錢就倒水咁倒喇，又要節制吓先得！

另外狐老公公司呢個禮拜開放日，有啲特別版產品推出，今期其中 1 樣就係波鞋喇！

呢款波鞋係由 BMW Mini Cooper 同 Tiger 牌聯手推出，款式有啲似 NB 嘅波鞋，顏色有 4 隻，有銀色，藍色，米黃加綠，同白加黃；狐老公見到個款幾靚，又有 Mini Cooper 個章，價錢都唔太貴，所以就買咗 2 對藍色，對鞋都 ok 舒服，多謝哂狐老公！

 
新波鞋

 
波鞋嘅牌子 - Tiger

 
鞋踭後面有 Mini Cooper 個章架

 
而鞋帶個頭都有 Mini 字樣

結構性超聲波 + 產前運動班 @ 21W4D

今日係返威院照結構嘅日子，時間約咗 2:30，一到 lunch 時間即走人！

去到威院已經係 2:35 ，狐 99 已經喺度等狐媽媽；之後上咗臨床大樓 10 樓照結構；等咗 15 分鐘到就可以入去照喇！

今次照結構都係由助產士負責，佢先講一次今日主要係做啲乜，之後就開始照超聲波喇！先睇狐 BB 嘅頭，之後睇眼仔，鼻仔，咀仔，助產士話狐 BB 個咀好靚，無問題；再睇心臟，4 格齊哂；胃，腎都無問題，背脊骨都好靚，無問題；手同腳都無問題，手指腳指齊，血管都無問題，一切正常，又過咗 1 關喇！

照完結構，跟住過隔離房俾醫生度埋子宮頸，無乜大問題，應該唔會早產！成個程用咗 45 分鐘，醫生同助產士都好 nice！

之後狐媽媽同狐 99 去咗物理治療組，因為今日要上第 1 堂產前運動班！去到先登記同俾錢，盛惠 $100 ，之後就坐低等物理治療師！今日個講座主要都係講解產前運動對孕婦嘅重要性，下堂先正式實踐！今日嘅講座 1 個鐘就完結喇！

狐 BB 週數：21W4D

狐媽媽今日真係超搞笑，睇住張覆診紙以為要驗小便，所以食完早餐之後唔敢再食其他嘢，擔心驗尿唔合格；點知原來係自己睇錯咗，今日唔係要驗小便，而係照結構前要先去洗手間，就係因為狐媽媽睇錯嘢，搞到狐 BB 餓咗幾個鐘，真係對唔住喇，狐媽媽下次會睇清楚架喇！

王二少出世喇！

今朝早皇帝問狐太點解咁晏都未見 Don Don 返工，平時都好早就返到公司；經佢一問，狐太即打電話俾 Don Don，原來佢身在醫院呀！

佢由尋晚開始見紅呀，所以要即入院，因為見紅就即係代表 BB 有機會喺未來 1 至 2 日內出世！

知道 BB 將會出世，狐太都不便再同 Don Don 傾咁耐；點知食完 lunch 之後，Miss Chan Chan 已經話 Don Don 生咗喇！真係估唔到咁快呀，果然生第 2 胎係快啲！

因為阿囝俾預產期早咗差唔多 3 個禮拜出黎（原先預產期係 16 號），所以出世時磅數只係差唔多 6 磅，都叫 ok 喇，可以之後慢慢追返，身體健康就可以喇！

喺度再次恭喜 Don Don 同琦哥，祝阿囝健健康康，肥肥白白！

第 2 次政府產檢 @ 20W2D

今日又返威記做產檢，產檢時間係 9:45！

同以往一樣，先去 4 號窗交低覆診紙，然後就磅重，量血壓同驗小便！

唔知係咪產檢時間晏咗，今日真係超級多人呀，等咗差唔多 30 分鐘先叫名！

入到房先知今日見助產士，原來狐媽媽上次產檢嘅時候真係入咗助產士小組，打後每次產檢都係見番今日呢位助產士！呢位助產士超級 nice 呀，佢仲當狐媽媽乜都唔知，所有嘢由頭講解 1 次；之後就上床俾佢按一按個肚，佢話狐 BB 同週數符合，跟住就聽一聽心跳！

之後助產士問有無乜嘢特別問題，咁啱尋日有少少流鼻血，同埋唔知乜嘢原因呢期啲皮膚超級痕；助產士先解釋點解會流鼻血，佢話可能天氣有少少變，又或者係因為整損咗，助產士教狐媽媽可以沖涼後吸多啲蒸氣又或者可以用生理鹽水清洗個鼻，咁樣就應該唔會再流鼻血喇！至於皮膚痕，助產士話因為天氣加上 BB 影響，所以會痕，佢叫我只需要用 BB 用嘅 cream／lotion 搽身咁就無問題架喇；

問完問題，助產士問狐媽媽有無興趣參加由婦產科同物理治療組一齊合辦嘅產前運動班，費用係 $100，當然有興趣喇，所以助產士就寫咗封轉介信俾狐媽媽，只要攞住封信去物理治療組嗰度做登記咁就可以上堂喇！

見完助產士，約埋下次覆診日期，狐媽媽就攞住封轉介信去物理治療組到登記上產前運動班！呢個產前運動班得 2 堂，最快可以下星期五就有得上，咁啱下星期五又約咗返威記照結構，所以就 book 埋照完結構去上堂，good！至於第 2 堂就要再過多 1 個禮拜，即係 4 號上，費用就到時上堂先交！

今日成 11:30 先走得，之後就坐車返工喇！狐 BB 下星期五照結構見喇！

狐媽媽重量：55kg
狐 BB 週數：20W2D

夜晚又約咗大 Ka 媽媽去旺角行街，旺中有 1 間賣 BB 嘢嘅舖頭，狐媽媽買咗口水肩，手套仔，腳套仔，帽仔同埋衫仔！今日收穫都幾豐富，又期待下次喇！

 

 

今日嘅戰利品

《母乳餵哺及保護 BB 疫苗》講座 @ 20W

今日又去聽講座，今次講座地點係喺童軍中心，喺聽講座前狐媽媽喺附近商場行咗一陣！

見到佢有 1 間 BB 用品店做緊減價，見到佢有啲襪仔同口水肩同埋毛巾仔都幾抵幾 ok，所以忍唔住手買咗俾狐 BB！

今日嘅戰利品

買完嘢，join 埋狐老公就去聽講座；個講座主要係講 BB 疫苗注射，1 個鐘就完結；食完嘢 join 埋大 Ka 媽媽一齊去永安行吓，因為知道永安就黎有大減價，大 Ka 媽媽想睇定啲車仔同 high chair 嘅型號然後等減價即入貨！

給 BB 買禮物 (5)

今日約埋大 Ka 媽媽一齊去荃灣行街買嘢！

去到千色店無意間俾見到佢有 1 個 counter ，所有 counter 上嘅貨品全部都只係 $20！見佢咁抵，當然去睇吓有無乜嘢寶物喇；結果狐媽媽買咗 1 條中型浴巾， 2 件和尚袍同埋 1 套衫連褲仔，夾埋都只係 $80 咋，抵呀；而大 Ka 媽媽都買咗 1 條浴巾加幾件和尚袍同埋尿布褲仔！

買完嘢，join 埋夏雨爸爸一齊去食飯，大 Ka 媽媽話俾狐媽媽聽荃灣有 1 間專賣 BB 嘢舖頭啲嘢都幾抵；所以食完嘢又去咗嗰間舖頭到望吓，俾狐媽媽見到佢有 Nuk 肥仔大玻璃樽賣！原本想買架喇，但係因為佢要買滿 $500 先有 8 折，狐媽媽一時間又買唔到咁多嘢，而大 Ka 媽媽又想等搬咗屋先開始入貨，所以乜都無買到！

之後狐媽媽就同大 Ka 媽媽分道揚鑣，大 Ka 媽媽去覆診，狐媽媽再喺荃灣行一陣，再 join 番大 Ka 媽媽一齊落旺角同食晚飯！

 

今日嘅收穫

 

呢 2 條口水肩係大 Ka 媽媽送架，多謝哂

狐 BB 物品進駐狐家

之前喺將軍澳買嘅 BB 用品今日終於送黎喇！

下晝送貨，收工返到屋企已經見到 2 大箱嘢加 1 個浴盆喺度！原本好心急想拆黎睇吓同埋砌出黎，但係最終都無砌到，唯有搵日等狐爸爸有時間先拆出黎睇吓！

狐 BB 嘅嘢開始進駐屋企喇！

 

大合照

 

浴盆，呢個係大 Ka 媽媽嘅，暫時寄居住喺到

 

Combi TJC-300 BB 車

 

Combi High Chair

胎動 @ 18W2D

其實由 16W3D 開始，狐媽媽已經隱約感覺到狐 BB 郁動，不過好輕微，同埋一定要喺好靜好靜嘅時候，再放隻手喺個肚個陣先感覺到”度度”下！

尋晚瞓覺嘅時候，狐爸爸放隻手喺狐媽媽個肚度同狐 BB 傾計，突然間感覺到成個肚震哂，仲見到狐爸爸隻手跳咗一下；狐爸爸再試叫狐 BB 多幾次，狐 BB 都即刻俾反應狐爸爸，狐爸爸隻手不停咁跳！

見到咁嘅情況，狐媽媽又要試吓；當狐媽媽放隻手喺個肚度，再叫狐爸爸同狐 BB 傾計 ，居然無反應；唔通真係因為狐爸爸把聲夠低沉存到入去所以有反應？

見到狐 BB 無反應，狐媽媽決定瞓覺，點知狐 BB 先喺呢個時候踢咗狐媽媽一下！狐 BB嘅郁動令到狐爸爸同狐媽媽好興奮呀！

今日係三嫂生日，喺度祝三嫂生日快樂，心想事成！

給 BB 買禮物 (4)

今日又約埋大 Ka 媽媽一齊入將軍澳買嘢，今次主要係大 Ka 媽媽買！

大 Ka 媽媽睇啱咗款車仔同埋 high chair，但係因為佢地要搬屋，而且都未有貨，所以大 Ka 媽媽最終都只係買咗 1 個腰枕；至於狐媽媽就買咗 1 個大嘅奶樽拑！

另外大 Ka 媽媽之前幫狐媽媽喺淘寶到淘咗少少嘢返黎，有 2 包毛巾仔，1 條口水肩同埋幾條紗巾！

雖然唔係好多嘢，但係都好開心，再期待下次再同大 Ka 媽媽一齊買嘢！

大 Ka 媽媽幫狐媽媽喺淘寶買返黎嘅嘢

 

大奶樽拑，個樣穩陣過細嗰個