日式抹茶豆腐布丁（附食譜）

見今日有時間，又齊材料，所以即整呢個喺星島見到嘅甜品 － 日式抹茶豆腐布丁！

食譜：


豆腐　　　200 克
脫脂奶　　250 毫升
淡忌廉　　100 毫升
砂糖　　　1 1/2 湯匙
抹茶粉　　3 茶匙
魚膠粉　　2 茶匙
水　　　　2 湯匙

做法：

先將豆腐同抹茶粉放入大碗內攪成漿（我無攪拌器，只係用手攪，所以唔係好漿），水同魚膠粉隔熱水坐溶；脫脂奶，淡忌廉同糖以中火煮至冒煙，將以上液體慢慢加入抹茶豆腐中攪勻，最後加入魚膠水，再隔渣，之後放入雪櫃雪至少 3 個鐘即成！

製成品，個樣係麻麻地，味道 ok 呀，不過狐老公唔鍾意食呢啲布丁，應該都無乜機會再整！

823 海鮮大食會

幾經辛苦，約咗好耐終於約到大廚陳其準備 1 個海鮮大食會，今日好齊人呀，13 個大人加 1 個小朋友，超級熱鬧呀！

今日真係辛苦哂陳其喇，佢為大家由 4:00 開始準備食物，睇吓今日有乜嘢食喇！

先黎大蝦同凍蟹，好味

跟住有煙三文魚雜菜沙律

之後有羊架

今日嘅切羊架師傅

蟹子伴柚子沙律

超級好味嘅生蠔

豬手加魚加南瓜薯角

之後仲有刺身（無相），再黎蒜蓉蒸鮑魚仔

最後係雜椒炒聖子

真係好好味呀，多謝同辛苦哂陳其喇，唔知又要等到幾時先可以再食得咁豐富呢，真係好期待呀！

小甘妹真係好可愛，一見到鏡頭就會笑，不過佢都有扭計時候，一見到奶樽就喊，唔肯食，真係辛苦偉哥同甘妹要諗盡方法要佢食奶！

好可愛嘅小甘妹

同媽媽合照

意大利芝士凍餅 Tiramisu（附食譜）

星期五係＂藍小姐＂last day，所以為佢準備 1 個 farewell 蛋糕，之前見佢要求咗幾次想食 Tiramisu，所以今次就整 Tiramisu 俾佢！

食譜：

A - 手指餅蛋糕（6 吋圓形模）

 

蛋白　　　　2 隻
砂糖　　　　30 克
蛋黃　　　　2 隻
低筋麵粉　　25 克
粟粉　　　　25 克

B - 咖啡糖水

即溶咖啡　　 5 克
砂糖　　　　 8 克
熱水　　　　 40 克
咖啡酒　　　 30 克

C - 蛋黃啫喱

魚膠粉　　　7 克（原先係 5 克，但係我有少少擔心，所以加多咗）
砂糖　　　　10 克
鮮奶　　　　40 克（屋企無鮮奶，所以用咗同等份量忌廉代替）
蛋黃　　　　2 隻

D - 芝士餡

意大利芝士 Mascarpone　　　150 克
忌廉芝士　　　　    　　　  　100 克
砂糖　　　　　   　　　　 　　20 克
淡忌廉（打起）　　　　　　　120 克
君度橙酒　　　　　　　　　　10 克
檸檬汁　　　　　　　　　　　1 茶匙

E - 餅面裝飾

可可粉　　　　　　適量
朱古力碎　　　　　適量

 

 

做法：

 

首先做咗 A 部份先，將低粉同粟粉過籂，將蛋白打至濃稠，加入糖打起至 10 成，再加入蛋黃拌勻，最後慢慢加入過咗籂嘅粉拌勻，再倒入餅模，以 180 度焗 30 分鐘至金黃色再轉用 150 度慢慢烘乾，出爐放涼再切成 2 片備用；再做 B ，即溶咖啡，糖同熱水拌勻，放涼，之後加入咖啡酒再拌勻備用；跟住 C，將魚膠粉，糖，忌廉同蛋黃隔熱水座溶備用；最後 D ，先打起淡忌廉至 6 成，將意大利芝士，忌廉芝士同糖打滑，加入淡忌廉打至鬆發，再加入橙酒同檸檬汁，蛋黃啫喱拌勻即成；將模用錫紙包好，圍邊，放入咭紙做底，之後放入 1 片手指餅蛋糕，掃上 1/2 咖啡糖水，倒入 1/2 意大利芝士，再放另 1 片手指餅蛋糕，掃上餘下嘅咖啡糖水及倒入餘下嘅意大利芝士，放入雪櫃雪至凝固，再加入 E 裝飾即成！

製成品

狐太嘅第 1 個麵包：奶油麵包（附食譜）

今日放假，見有時間，所以決定嘗試整狐太第 1 個麵包，今次嘅主角係奶油麵包！

食譜：


高筋麵粉　　　　270 克
低筋麵粉　　        30 克
砂糖　　　  　　 45 克
全蛋　　　　　　30 克
鹽　　　　　　　4.5 克
奶粉　　　　　　3 克
牛油　　　　　　30 克
乾酵母　　　　　6 克
溫水　　　　　　165 克

做法：

高粉同低粉先過籂，乾酵母浸泡溫水 10 分鐘等恢復活性，將所有材料（除牛油外）全部混合揉成糰，大約揉到一半到就加入牛油，揉至麵糰光滑出筋為止；之後用保鮮紙蓋住放喺溫暖處，等麵糰發酵至 2 倍大，之後分割成每份大約 35 克重嘅小麵糰，整成圓形，再蓋上保鮮紙，放喺溫暖處再發酵 45 分鐘；發酵完成之後喺麵糰面掃上第 1 層蛋汁，等第 1 層稍乾之後再掃上第 2 層；之後以 175 度焗 15 分鐘即成，再趁麵包熱嘅時候掃上溶牛油令到個面光身！

個麵包都算 70% 成功，味道幾好，問題只係出喺開得太大火（開成 220 度），同埋時間耐咗少少（焗咗 20 分鐘），所以個包包面同底都燶咗，下次要較番低啲同埋睇住個火先得！

狐太整嘅牛油麵包

裡面都鬆軟架

芒果芝士蛋糕 Mango Cheesecake + 芒果慕絲蛋糕 Mango Mousse Cake（附食譜）

因為阿 Sa 要求，加上聽日係狐細佬生日，所以今日又整蛋糕喇，之前整黎整去都係朱古力，所以今次嘗試整第 2 樣嘢，今次嘅主角係芒果，狐太仲 1 次過整咗 2 個添，1 個係 cheesecake，另 1 個係 mousse cake！

先講個 cheesecake，基本上狐太係跟林 c9 個食譜做架，只係個餅底唔係用消化餅做，用咗海綿蛋糕，另外加咗啲芒果肉喺個芝士餡到，個面又加咗 1 層芒果鏡面，味道好 good，唔太甜，係啲芒果略為酸咗啲，打咗折扣，同埋個海綿蛋糕唔知點解雪完有啲＂鞋＂身！

食譜：

A - 餅底

海綿蛋糕　　  　1 片

B - 芒果忌廉芝士

淡忌廉　　   　  180 毫升

忌廉芝士　　　  185 克

砂糖　　　　　 45 克

芒果果茸　　　 200 克

魚膠粉　　　　 10 克

熱水　　　　　 80 毫升

芒果（切粒）　 2 個

C - 芒果鏡面

芒果啫喱粉　　　36 克

水　　　　　　　80 克

魚膠粉　　　　　5 克

做法：

先製作 A ；之後到 B ，魚膠粉加入熱水再隔水座溶備用，忌廉芝士同糖打至滑身，之後加入芒果果茸打勻，分 2 次加入魚膠水拌勻成芝士漿；打起淡忌廉至 6 成，將芝士漿拌入淡忌廉輕手拌勻，加入芒果粒；再整埋 C ，魚膠粉加入熱水再隔水座溶備用，芒果啫喱粉加水開溶，再加入魚膠粉水；將模圍邊，放入 1 片海綿蛋糕，倒入芒果忌廉芝士加果肉，放入雪櫃雪至凝固；之後取出加入芒果鏡面，繼續雪至完全凝固，最後用芒果粒做裝飾即成！

製成品，芒果芝士蛋糕

至於個 Mango Mousse Cake，狐太就跟上次整 Chocolate Mousse Cake 嘅做法黎做，只係將朱古力轉咗做芒果茸，再加番鏡面同芒果裝飾就搞掂！

製成品，芒果慕絲蛋糕

同個芝士蛋糕一樣，個海綿蛋糕有啲＂鞋＂身，但係味道都幾唔錯，下次要修飾吓先得！

8 月之星生日飯之情侶 Tee 扒地

今個月之星係狐太，陳李姚氏為狐太搞咗個情侶 Tee 生日扒地，每 1 pair 都要著情侶 Tee 出席！

大約 4:00 點到達陳氏屋企，因為李氏負責去買今晚打邊邊嘅材料而未到，所以先同陳姚氏竹戰，等到李氏黎到之後，再 4 家決戰！

兔兔買咗個超香嘅榴槤，好味道，狐太一口氣食完 3 件之後，成晚個胃都頂住咗，搞到打邊邊嗰陣都無乜點食過嘢，兔兔仲專情買咗大量海鮮添！

打邊邊指定食物，大量丸加芝士腸加蟹柳

鮑魚同貴妃蚌（應該係）

打邊邊另一指定食物，肥牛

魚同蝦，睇吓大明放得幾靚

魚皮

豆卜，腐竹同埋放湯嘅馬蹄

魚皮餃

整到好似珊瑚咁嘅金菇

睇吓，幾豐富

食飽飽 ，又係竹戰嘅時候；之後就到切蛋糕時間，陳李姚氏今次為狐太咗準備咗芒果流心蛋糕，好味道，多謝哂大家！

呢個就係芒果流心蛋糕喇

蛋糕加中發白

同狐老公同蛋糕合照