新屋購物 @ 旺角（配件篇）

今日又約咗林同學一齊出旺角血拼喇！今次嘅目標係電掣板同水龍頭，而林同學就係廁所鏡櫃同埋其他廁所架！

狐老公先去咗陳大明介紹嘅 1 間電業舖到睇睇啲 Clipsal 掣板，但係因為唔係太清楚邊度用啲乜嘢掣板，狐老公又無詳細睇邊啲換邊啲唔換，所以最終都只係問咗價錢無幫襯！

之後落咗旺角，狐老公同狐太先去買磚隔離嘅舖頭到問一問造窗簾價錢，呢間真係幾抵，因為之前問咗幾間都要接近 $3000，但係呢間唔使 $2000 就可以搞掂喇，good 爆！

睇完窗簾，狐老公同狐太就開始周圍睇潔具嗰啲舖頭，因為要買水龍頭；其實狐老公心目中係有心水，一係就買番 Grohe，一係就用 Kohler；如果買番 Grohe，想好似原裝咁係金銀色，但係問過啲 sales，原來金銀色係舊款，Grohe 已經無再出，係得銀色揀！

至於 Kohler，狐老公其實睇中咗 1 款，但係唔係間間都有得賣嗰隻款，行咗好耐，終於喺入中 1 間連鎖公司嘅分行仔搵到；問店員水龍頭價錢，佢想做生意即刻平俾狐太，見到價錢咁吸引，即係買咗 Grohe 1 套 3 件龍頭加 1 個 Kohler 嘅廚房龍頭，再加浴室層架 2 層，夾埋都唔使 $2500；至於林同學，因為搵唔到佢心水嘅全玻璃鏡櫃，佢就買咗 1 個後面唔係玻璃嘅鏡櫃，再加浴室層架，tissue 架等等，全部嘢夾埋唔使 $1000，又係好抵呀，今日又係大豐收呀 ！

水龍頭加浴室層架！

買完嘢上新屋放低啲戰利品，見到啲廚櫃板送咗黎，下個禮拜應該可以整喇！

廚櫃門板

裝修進度 @ 第 10 日

幾日無上過新屋到，今日問完師傅之後，就急不及待咁走咗上去望吓；一打開門，嘩，啲磚同腳線已經鋪好哂喇，望落啲磚真係幾 good，激似木地板 ，見到師傅們繼續喺度線灰，應該下個星期可以拆燈拆電掣油牆喇，希望下個禮拜開始唔好咁潮濕喇，太濕啲油會好難乾架，咁樣就有排都入唔到去住喇，祈求天青氣朗，爽爽爽！  

去片俾大家睇吓砌磚之後個樣喇

新屋購物 @ 淘大（燈飾篇）

之前買完傢俬，當然輪到燈喇，其實間屋本身係有燈架，總共有 5 盞燈，房嗰 2 盞同廚房都仲 ok ，只要拆咗落黎清洗吓應該無問題，但係廳有 1 盞生咗锈，狐太好想換過 1 盞新嘅，仲有走廊位，上手無裝到燈，只係得 2 個燈泡；狐老公原本想將飯廳嗰盞燈換過去走廊，但係狐太覺得太大同埋想要新嘅 ；經過幾次周旋之後，狐老公終於應承俾狐太買 2 盞新嘅走廊燈同埋換 2 個廳嘅燈，總共 4 盞 ！  

呢排都有留意吓啲燈舖，咁啱星期日過去淘大嗰邊食飯，喺商場入面嘅 1 間燈舖見到有 2 盞燈幾 good，其中 1 盞係有 3 個細圓鼓掉落黎嘅，另 1 盞就只係 1 個大圓鼓，但係佢側邊係由 1 塊塊圓片組成，2 盞都幾特別，狐老公好鍾意，而且佢做緊大減價，相對旺角嗰啲平，不過無買到；經過幾日考慮之後，最後都係決定去買呢 2 盞燈！

去到淘大直上燈舖，其實都已經鎖定咗目標，所以一入到只係再望吓，就同老闆講要呢 2 盞喇；之後再望吓其他燈，無意間俾狐老公發現咗有 2 盞細走廊燈，雖然佢係普通嘅花花邊燈，但係都 ok good ，價錢又唔太貴，所以都要埋呢 2 盞！

原本諗住叫老闆再平啲，但係老闆話已經折實咗，佢最多唔收裝工錢，免費裝燈，都 good ，即刻叫老闆開單俾錢，不過最大嗰盞要訂貨， 1 個禮拜後先有，所以約咗暫定 3 月頭送貨，又搞掂一樣喇，好期待啲燈呀！

新屋購物 @ 直銷中心（傢俬篇）

經過咗尋日度哂尺寸後，今朝一早，又約埋林同學一齊出發去直銷中心血拼，打咗 1 個圈之後，大家都決定拍板買 1 張大約 $1200（88 折之後嘅價錢）嘅油壓床，雖然可能啲木唔係太好，但係真係好抵，佢個床頭仲要有燈添！

油壓床

決定咗床之後，輪到睇衣櫃，原本有 3 個櫃都睇中咗，1 個係差唔多 5 尺幾嘅櫃，佢個顏色係”薰衣草”色，不過狐老公嫌佢唔夠多抽屜，而且狐老公想預留番少少位放吸塵機嗰啲，所以呢個 out 咗！之後再見到 1 個柚木色衣櫃，又係大約 5 尺到，呢個真係好 good，又夠大，啲木又好似好實淨，但係啲色同我地個地板好似，所以又 out 埋！仲有 1 個本身個櫃有啲鏡，狐太同狐老公都好鍾意，不過最終無揀到，因為怕狐 99 唔鍾意（風水話張床唔好俾啲鏡照住）；而林同學反而就揀咗呢隻款嘅 3 尺櫃，最後狐老公同狐太揀咗 1 個白色櫃身，胡桃木色邊嘅 4 尺半櫃，間隔都 ok ，佢有成 4 個抽屜，啱哂狐老公！

新衣櫃

原本只係打算買床同衣櫃，點知俾狐太無意間見到 1 個幾靚嘅鞋櫃，佢啲門係玻璃鏡門，上面仲有啲花紋，櫃面係 1 塊半透明膠板，見到佢，簡直係愛上 ，即係叫狐老公過黎睇，佢一睇都愛上，所以決定買埋佢，放棄上手業主留低嘅鞋櫃 ！

新鞋櫃，好鍾意佢上面啲花紋

訂埋鞋櫃之後，又俾狐太見到另 1 樣幾靚嘅嘢，就係 1 張餐枱加椅，一見到佢，就覺得佢同個鞋櫃好襯；佢係黑色玻璃面，對角有花紋，銀枱腳，再講啲椅，又係銀邊，椅背同座位都係灰底有黑色花紋，簡直又係 good 爆，好鍾意，狐老公都好鍾意，不過嫌佢略為大張，狐老公想要張細啲，四方形啲，所以最終無買到！

就係咁買咗 3 樣嘢，而林同學就買咗 4 樣嘢，雖然啲質料唔係話好靚，但係 2 張單夾埋都好似唔使 $10000，抵呀 ！

裝修進度 @ 第 2 日

經過咗師傅 2 日辛勞嘅工作，狐家新居已經”面目全非”，所有嘅牆已經剷哂，連地下都拆埋喇，聽日應該可以”線灰”，星期六啲磚送到黎，應該可以砌添喇！

俾大家睇吓而家間屋個樣喇！

大門位置

廚房

客廳

飯廳

細房


大房

大房夜景

新屋購物 @ 旺角（地磚及潔具篇）

尋日收咗樓，狐太今日專情請咗一日假搞新屋嘅嘢！

一朝早，狐太先約師傅上去睇吓邊啲地方需要執，之後過咗狐 99 到幫佢地度大門尺寸，再一齊出旺角買材料！

狐太先同狐 99 揀大門同鎖，之後就去咗師傅介紹嘅舖頭買磚；狐太睇中咗 1 隻木紋磚，望落同木地板好似無乜分別；狐太要求 1 開 4，然後”工”字咁鋪！

木紋地磚

買完磚，狐太去咗買廁所，原本打算買林同學揀嗰隻型號，但係俾狐太發現咗另一隻型號更好坐，所以揀咗嗰隻！

新廁所

磚同廁所都會喺星期六送黎，好期待！買完之後，因為師傅有事所以走先，而狐太同狐 99 繼續喺旺角閒逛，逛咗一陣，因為個鎖太重喇，狐 99 先行返屋企，而狐太就等狐老公放工再去望吓其他嘢；原本打算換水龍頭，但係睇唔啱，咁啱狐 99 又想換，所以最後幫狐 99 買咗個浴室花灑水龍頭！

我們的新居 @ 收樓日

期盼已久嘅日子終於蒞臨喇，今日可以收樓喇，真係開心到爆炸呀 ！  

當所有手續搞掂之後，放工即去 agent 到攞 key！攞咗嗰一刻，真係好開心！  

先黎參觀吓新屋嘅外圍先

之後到屋內實況

大門走廊位


客廳同景觀

飯廳

細房


大房，衣櫃位同景觀


廁所連浴室

廚房

之後狐太就上咗去佢地管業處到搞手續！雖然確認核對資料要 1 個禮拜時間，但係”實Q ”們都已經知道狐老公同狐太係新業主 ，勁期待裝修後入住呀！

遲黎嘅牛年團拜 @ 夏家

上次 housewarming Sze 家嘅時候，大家約好咗初六上夏家團拜，點知初六唔齊人，所以改咗今日先團拜，但係都唔齊人，欠咗天使同香香！

大家分別喺 4:00 幾上到夏家，楊氏同鄭氏先黎竹戰，而狐家同夏氏梁氏就入咗”戲院”睇戲，大家竹戰完同睇完戲之後，就開餐喇；今次叫外賣，大 Ka 就負責煲飯同烚菜，大家傾吓食吓，又過咗個開心嘅晚上，期待下次 gathering！

2009 情人節 ＋ 驗樓日

今日係情人節，祝天下有情人甜甜蜜蜜，恩恩愛愛 ！

我地今年嘅情人節非常忙碌，今朝一早起身就過新城市，因為小虎妹生病喇，呢幾日佢不停咁嘔，但係又嘔唔出嘢，腸胃又好似有少少問題，所以要為佢買吐毛膏，睇吓佢會唔會係因為食得太多毛落肚所以搞到咁。

買完嘢，約咗林同學上佢新居睇吓裝修進度，之後約埋師傅一齊去驗樓喇！其實都好快驗完，主要都係睇吓有無乜嘢大問題，邊度需要師傅執一執；驗完樓，再同林同學出咗旺角買佢要嘅裝修材料！買完材料，就返咗狐媽咪度食飯，今個情人節就喺忙碌中度過咗喇！

2009 渣打馬拉松結果

其實馬拉松個結果尋日已經出咗，但係喺 website 上面 check 唔到，唔知係咪因為遲咗好多起跑而 disqualify 咗！

今日，狐細佬話佢 send 咗 email 去問，如果要 check 時間，就要 send email 去問或者打電話去馬拉松秘書處！於是狐太即打咗去問，狐太個人時間係 1:29:12；至於狐老公係 1:28:51，個時間唔係話好快，但係同 07 年相比，狐太快咗 8 分鐘，而狐老公就快咗 12 分鐘到，都算係咁喇！好，出年一定要努力，要準時起跑，要跑快啲，加油！

可惜成績 disqualify 咗，因為太遲起跑喇，連張証書都唔會有，唔緊要，自在參與 ！

2009 渣打馬拉松 ＋ 陳仔生日

事隔 1 年，狐老公同狐太再次報名參加渣打馬拉松，但係因為遲咗報名，所以只可以參加 10 公里 1 組，朝早 5:30 就要開跑喇 ；今次仲有林同學，昌昌，榮總同迪迪仔一齊參加！

其實今年理應跑得唔錯，天氣唔太熱唔太濕，間中仲有啲涼風吹埋黎，加上全程都係跑東廊，唔使入隧道，條路又算幾平，唔係太多斜位，但係因為之前病完無耐，氣管仲唔係好得，再加上狐太同狐老公都無乜點練跑，結果成程都 keep 住只係慢跑，終於喺大約 8:00 到跑完 10 公里！

總括黎講今年都算 ok ，出年要再跑！另外，今日係陳仔生日，祝陳仔生日快樂，佢同 bb 都身體健康 ！

狐老公嘅 pre-生日禮物

狐老公近黎成日話副眼鏡有問題，懷疑散光加深咗，睇啲光好似散開哂，今日終於頂唔住，話要去配 1 副新眼鏡！

放咗工之後，狐太就同狐老工去眼鏡舖，狐老公適合配戴一啲方形鏡框眼鏡，試咗差唔多有 10 副嘅情況下，狐老公揀咗 1 副框邊係紅色嘅方形眼鏡！揀完框，跟住入去房仔到驗眼！

驗完眼，視光師話眼鏡嘅度數無問題，問題出喺散光度數同埋聚焦到，視光師話狐老公其實散光唔深，但係而家戴緊副眼鏡竟然每邊加深至少 65 度，唔怪得狐老公話副鏡有問題喇；另外 1 個問題就係聚焦，視光師話而家個鏡聚焦係兩邊，所以將啲景物拉開咗同埋無咁清晰；如果將個聚焦放番中間，狐老公睇嘢就會好清楚，但係外觀上就無咁好睇，因為個鏡片會變咗中間薄但係兩邊會好厚，呢個當然無問題喇，最緊要睇嘢清楚！

解釋哂所有問題之後而鏡框又選定咗，最後一步當然係揀鏡片喇，個視光師 suggest 用 1.6 （唔知乜嘢意思）以上嘅鏡片，原因係因為狐老公近視比較深， 1.6 嘅鏡片較合適；成副鏡最後盛惠 $2300 大元！

狐老公覺得副鏡好貴，有少少肉赤，狐太都覺得係貴咗少少，但係只要戴得個人舒服，貴少少都無問題，所以狐太決定當呢副鏡係狐老公嘅 pre-生日禮物，希望狐老公鍾意 ！  

視光師仲教咗狐老公同狐太點樣為之正確嘅除 con 方法，因為狐老公做運動嗰陣會戴 con，每次做完運動除 con 都除到發忟憎，因為隻 con ”啜”得好實好難除；視光師叫狐老公試範一次點除 con，個視光師話狐老公個方法唔啱，會好容易傷到眼角膜，正確方法應該係將手指放喺眼球下面嘅位置，當要除 con 嗰陣，眼球向上望，咁樣隻 con 就會好容易除到出黎架喇！

大年初七團拜 @ 李家

今日係人日，即係人人生日嘅意思，喺度祝人人生日快樂 ！  

今日狐家約好咗去李家拜年兼做運動；大家先醫飽個肚，然後兔兔同陳氏去買餸，其餘就同李奧姚氏先返上去睇電視！等兔兔佢地買完餸返黎，就齊齊換衫落去 club house 到做運動！

大家先黎打兵乓波，全部 7 個人（兔兔中途離場返咗上樓準備晚餐）輪流作賽，結果勝出者係姚生；打咗 1 個鐘到，我地就轉場地再戰！今次係打羽毛球，結果都係由姚生勝出！原本打算打道回府，點知見到有康樂棋，老公們想緬懷一番，第 1 局由狐老公對姚生，太太們就喺側邊觀戰，睇住佢地打康樂棋，真係好 old school feel，結果狐老公以一棋之差輸咗俾姚生；第 2 局由陳大明對姚生，結果由陳大明勝出，太太們就返咗上樓”跑馬仔” ！大羸家就係姚氏同李氏，姚太好勁，佢喺最尾嗰幾舖出盡全力，連食幾舖自摸呀！  

打完牌就開餐喇，今餐好豐富呀，除咗有紅蘿蔔粟米湯之外，仲有炆牛腩，瑤柱冬菇豆苗，魚，蝦同雞添呀，足足有 9 碟餸呀，簡直係超級豐富呀！

食完飯之後，賭局繼續開，今次係玩魚蝦蟹喇，每 pair 搖 5 局，每次陳氏做莊，幾乎次次都通殺；狐家今次非常好彩，可以做番”收支平衡”！今日真係玩得好開心，真係多謝哂兔兔煮飯俾大家食，仲要多謝陳大明做咗”柴可夫司機”！