新屋購物 @ 直銷中心（傢俬篇）

經過咗尋日度哂尺寸後，今朝一早，又約埋林同學一齊出發去直銷中心血拼，打咗 1 個圈之後，大家都決定拍板買 1 張大約 $1200（88 折之後嘅價錢）嘅油壓床，雖然可能啲木唔係太好，但係真係好抵，佢個床頭仲要有燈添！

油壓床

決定咗床之後，輪到睇衣櫃，原本有 3 個櫃都睇中咗，1 個係差唔多 5 尺幾嘅櫃，佢個顏色係”薰衣草”色，不過狐老公嫌佢唔夠多抽屜，而且狐老公想預留番少少位放吸塵機嗰啲，所以呢個 out 咗！之後再見到 1 個柚木色衣櫃，又係大約 5 尺到，呢個真係好 good，又夠大，啲木又好似好實淨，但係啲色同我地個地板好似，所以又 out 埋！仲有 1 個本身個櫃有啲鏡，狐太同狐老公都好鍾意，不過最終無揀到，因為怕狐 99 唔鍾意（風水話張床唔好俾啲鏡照住）；而林同學反而就揀咗呢隻款嘅 3 尺櫃，最後狐老公同狐太揀咗 1 個白色櫃身，胡桃木色邊嘅 4 尺半櫃，間隔都 ok ，佢有成 4 個抽屜，啱哂狐老公！

新衣櫃

原本只係打算買床同衣櫃，點知俾狐太無意間見到 1 個幾靚嘅鞋櫃，佢啲門係玻璃鏡門，上面仲有啲花紋，櫃面係 1 塊半透明膠板，見到佢，簡直係愛上 ，即係叫狐老公過黎睇，佢一睇都愛上，所以決定買埋佢，放棄上手業主留低嘅鞋櫃 ！

新鞋櫃，好鍾意佢上面啲花紋

訂埋鞋櫃之後，又俾狐太見到另 1 樣幾靚嘅嘢，就係 1 張餐枱加椅，一見到佢，就覺得佢同個鞋櫃好襯；佢係黑色玻璃面，對角有花紋，銀枱腳，再講啲椅，又係銀邊，椅背同座位都係灰底有黑色花紋，簡直又係 good 爆，好鍾意，狐老公都好鍾意，不過嫌佢略為大張，狐老公想要張細啲，四方形啲，所以最終無買到！

就係咁買咗 3 樣嘢，而林同學就買咗 4 樣嘢，雖然啲質料唔係話好靚，但係 2 張單夾埋都好似唔使 $10000，抵呀 ！