大年初四，忽發奇想

今日係大年初四，同狐老公講起未來阿囝阿囡個名，如果根據狐氏族譜，未來阿囝阿囡應該係＂章＂字輩！

如果真係用＂章＂字，狐太第 1 個閃過腦海個名就係章茹，取其諧音，即係章魚，狐太同狐老公即刻笑唔停 ；跟住狐太腦海又閃過另 1 個名，章郎，又取其諧音，蟑螂，真係笑到肚痛 ！狐太諗如果真係幫未來阿囝阿囡改呢個名，佢地一定諗＂媽媽係咪玩嘢，改個咁嘅名＂，之後一定會怨狐太一世，所以狐太打死都唔會跟族譜，而且未來阿囝阿囡放心，媽媽已經幫你／妳地諗咗個媽媽個人認為好聽嘅名，放心放心 ！  

大年初三，BBQ ＋ 牛年團拜 @ 陳家

今日係大年初三，亦都係赤口，赤口不宜拜年，基於呢個原因，順理成章約埋陳李姚氏再加兔兔細佬齊齊去 BBQ；雖然係新年，但係原來都好多人1 家大細出黎燒嘢食，要兜一陣先搵到位泊車之後開爐燒嘢食！

因為街市未開爐，只能夠喺超市到買食物；今次預嘅食物份量非常好，9 個人可以清哂但係又唔係食到爆哂肚，非常 good！大約燒到 6:00 到，就齊齊上陳家團拜，不過姚氏就要中途離隊一陣，之後先再 join 番！

上到陳氏到，第一時間開雀局，因為陳氏專情外借成套用具返黎（包括麻雀板，麻雀同籌碼），大家當然唔會浪費佢地一番心意，即刻開局”跑馬仔”！經過一輪大戰，首回合以兔兔細佬慘敗，而兔兔就係大羸家；之後姚氏黎到，再一輪大戰，結果兔兔依然係大羸家，而今次慘敗就係陳氏！

開完局大家就齊齊落樓下茶餐廳食飯，再商量初七去李氏屋企團拜嘅嘢！

大年初一，恭喜發財

今日係大年初一，恭喜發財 !  

狐太喺度同大家拜年：

祝各位 BB 同小朋友快高長大，聰明伶俐
祝各位青年朋友學業進步，心想事成
祝各位打工朋友來年升職加人工，升官發財
祝各位自僱朋友生意興隆，財源滾滾
祝各位未拍拖朋友桃花暢旺
祝各位已拍拖朋友甜甜蜜蜜，早日拉埋天窗
祝各位已婚朋友恩恩愛愛，早生貴子
祝各位年長朋友身壯力健

恭喜恭喜！

最後喺度祝啤男生日快樂，心想事成，財運亨通 ！

年廿七，包利是

今日係年廿七，係時候包利是喇！今年係狐家第 1 年派利是，感覺有啲複雜，第 1 年派，又緊張又開心，但係另一方面，見到啲錢派哂俾人，又好心傷！

今年經濟唔好，銀行連利是封都 cut 埋，好彩之前儲落有好多，今年可以大派用場喇！

呢啲就係之前儲落嘅利是封，今年無出架喇！

狐太由 10:30 開始做”庇護工場”女工，大約 1 個鐘到就搞掂哂喇！


完成品

幾大棟！

想逗利是嘅朋友，早啲黎狐家拜年喇！

玫瑰金水晶麻雀 ＋ 洗邋遢好幫手

因為申請按揭嘅關係，狐家喺”渣兜”銀行嗰度要開戶口；星期六嗰日去咗申請，喺填 form 期間，俾狐太見到有個 promo ，話如果選用佢地 2 種或以上特選服務，就可以得到 1 副玫瑰金水晶麻雀，或者係以抽奬形式得到，狐太仲同狐老公講，狐家都係用咗佢地 2 種服務，咁咪即係可以攞到嗰副麻雀囉，可以放喺屋企坐鎮！

於是狐太即係問個 customer service ，初時以為已經可以攞到副麻雀，點知原來唔係，點都係要抽奬先可以攞到，仲要係要申請埋佢地個尊貴服務先有機會參加抽奬；狐太再問佢個尊貴服務有啲乜嘢特別同埋有乜 criteria ，佢答狐太話個尊貴服務有最低金額，但係因為佢地會計埋 mortgage ，喺唔會被扣錢嘅大前題下，狐家當然即刻申請埋喇，睇吓係咪咁好彩可以抽中副麻雀，點知真係抽中咗，個”實蕉”哥哥仲話狐家係第 2 個抽中副麻雀嘅人添呀！

因為好心急見副麻雀嘅真身，所以尋日放工去咗換，大家細心欣賞喇！

副麻雀係用木盒裝住架，好似好 high class 咁

打開喇，個樣都唔錯，睇唔睇得出係玫瑰金水晶呀

黎個大特寫先

各方好友，玫瑰金水晶麻雀會喺 3 月尾 4 月到出黎見大家，如果想一睹佢嘅風采，記得話俾狐太知喇，不過呢狐家係無麻雀枱架！

另外仲有 2 日就到年廿八，又係洗邋遢嘅時候，每年呢個時候，狐媽咪都會買定啲碌柚葉俾狐太煲水沖涼，沖走哂 1 年嘅霉氣，而家嫁咗人，呢啲咁細微嘅就梗係自己做喇，不過而家住緊＂中轉屋＂，唔想搞咁多嘢！

咁啱呢幾日喺車厘個 blog 到見到有樣好幫手，專為狐家呢啲現代懶人而設，佢就係碌柚葉沐浴露喇！

哈哈，呢支沐浴露真係好搞笑，佢真係寫住由天然碌柚葉精華造架！

 
下面仲寫明話”每天除霉氣行好運”，真係好好笑

 
佢仲要認真到後面有埋年廿八洗邋遢嘅典故添呀！

 
突然間發覺現代人真係好勁好聰明，咁嘅一樣物件都俾佢諗到，真係抵佢發達，而且對懶人黎講真係一大恩物，仲可以洗足 1 年 365 日，希望佢可以幫狐家除哂牛年嘅所有霉氣！

呢支沐浴露喺萬記到買架，佢除咗做緊特價之外，仲額外有 1 張 $5 coupon，即係折上折喇，都叫抵；真係多謝車厘介紹！

峰迴路轉，提早交吉

今日收到經紀電話，佢話俾狐太知新屋嗰度可以提早到 2 月中交吉；

聽到真係有啲愕然，但係好開心呀，即刻打電話通知番銀行同埋同事，話佢地知可以提早成交，真係好期待，好想快啲到 2 月中收樓呀 ！

海上假期 @ 麗星郵輪寶瓶星號

今個 weekend，狐家喺海上度過，因為公司搞咗個活動上麗星郵輪到玩！

6 點放工大家即收工去碼頭，搞完一輪手續之後終於可以上船喇！上到船，大家放低啲袋就走咗去四圍參觀，因為未開船關係，大家先喺船尾同維港夜景影相，天氣非常之好，個景 good  到爆呀！

中環夜景

 

 影完相

之後就入咗餐廳食 buffet 晚餐，啲餸菜略為鹹咗少少，狐太同狐老公以極速食完晚餐之後，就繼續探索呢架郵輪！可惜船上無乜特別嘢玩，行咗一圈就返入房覺覺豬！

今朝 8:00 幾起身食早餐，之後辦手續攞番証件就落船喇！總括黎講都算 ok ，只係略為悶咗啲，不過話哂第 1 次上郵輪，叫做見識吓啲郵輪！

交吉

今日係舊屋交吉嘅日子，意思即係話間屋從此唔再屬於狐家！呢一刻開始，狐家係無樓階級，要過 3 個月”中轉屋”生活，先可以再次進身做有樓人仕！    

舊屋客廳，正在執嘢中，所以好混亂

客廳另一邊

呢間係睡房其中一邊

呢度係洗手間

呢度係房向外望嘅景，望到馬鞍山架

廳個景同房一樣，都係可以遠望馬鞍山

雖然狐太只係喺度住咗 1 年時間到，唔係話好耐，但係都有啲唔捨得，而家搭 lift 都成日㩒番嗰層樓，睇黎要過多一排先適應到喇！

齊齊做業主

踏入 2009 年，身邊都陸續有唔同嘅喜慶事發生，最開心當然係狐太榮升做業主喇，咁大個女第 1 次做業主呀，勁期待！

繼狐家做咗業主之後，林同學亦都搖身一變成為業主，真係可喜可賀，佢仲喺 2 號嗰日收齊所有鎖匙，可以開始為佢自己嘅新天地扮靚靚喇！

今日，亦都知道另 1 位朋友將會加入業主之列，佢就係毛毛喇，佢仲要買咗狐太嘅目標添呀，而家只係差簽名咋，大筆一揮之後，要熱烈歡迎毛毛成為業主，恭喜恭喜 ，希望今年會陸陸續續收到其他好消息喇！

Housewarming @ Sze 家

早喺舊年，大家已經約好今日去 BBQ ，但係由於種種原因，加上鄭氏回歸沙田，所以決定改去鄭氏新居 housewarming！

今日陣容都算鼎盛，獨欠陳氏同康氏，主場當然一早喺屋企靜候大家光臨喇，梁氏同楊氏亦都喺下晝去到鄭氏屋企大戰四方城，而狐家同夏氏就黃昏時間到達，之後 10 個人齊齊圍住枱邊講邊笑邊食邊打邊邊，食飽飽仲有三嫂嘅桂花糕同 Sze 嘅芒果布甸做飯後甜點，非常之滿足！

食飽飽，大家就分成 2 組玩 pictionary ，結果由狐家，啤男，三嫂同夏雨呢組勝出 ，今日玩得非常之開心，亦都多謝鄭氏嘅熱情招待，期待農曆年嘅團拜！

搬家了！

2008 年過去喇，今日係 2009 年第 1 日，一切都有新開始，包括狐家 ！  

喺 2008 年，狐家一口氣做哂賣樓，買樓，租屋，今日仲搬咗去暫租間屋到住！

今次搬屋，真係要鳴謝各方好友相助，包括有狐老公老友仔熊仔，陳氏，李氏同姚氏，仲有願意借出去街袋俾 2 位小公主嘅林同學同娜娜添，亦都要多謝原本打算黎幫手嘅1 班好兄弟，無各位相助，真係唔知點算，可能搬足 1 個禮拜都搞唔掂，真係萬分感激 ！  

新嘅 1 年新開始，喺度祝各位新年快樂，心想事成 ！