新 Sofa 上場

狐家屋企張 sofa 大大話話都跟咗狐家 6 年有多，見到佢開始承受唔到狐爸爸同狐媽媽嘅重量，加上成日都俾兩位公主＂襲擊＂，為免佢再＂受苦＂，狐家決定俾佢提早＂退休＂，只係留低兩位＂小卒＂！

之前跟大 Ka 媽媽去買新屋傢俬，咁啱見到有張 sofa 好啱狐家，佢又係布質料，又係兩座位，仲要有得兩邊彈出黎，而且價錢仲好啱心水！基於呢啲原因，狐家決定＂聘請＂佢返黎＂坐鎮＂！

今日係呢張新 sofa 第 1 日上任，真係覺得好舒服，舒服到連狐媽媽之前啲腰骨痛都無埋，再加上有兩位＂小卒＂幫手，簡直係正爆！狐爸爸同狐媽媽為免佢一樣遭受兩位公主＂襲擊＂，決定為佢加件＂衫＂！件＂衫＂原本打算訂造，但係因為好難幫新 sofa ＂度身＂，而且佢亦都俾上任 sofa ＂肥大＂，所以買咗件 king size 嘅＂斗篷＂俾佢護身，希望佢可以＂安心＂喺狐家＂工作＂喇！

 

新 sofa

 

掀開咗＂斗篷＂之後嘅樣

 

彈咗其中一邊出黎之後嘅樣

新屋購物 ＋ 執屋

狐老公今日要返學做 project，狐太先攞咗啲棉被去清洗，之後狐老公去返學，狐太就 1 個人行街街！

狐太先去買鞋架，之後就去咗買新玩具俾兩位小公主；行完街就返屋企繼續執屋大行動，間屋好亂，睇黎黎緊嗰 3 日都有排執喇，要加油努力先得，如果唔係唔見得人呀！

今日買嘅鞋架

清潔行動第 3 回

今日放咗工，又再上新屋搞清潔喇，應該清潔埋呢次就可以入去住！

狐太先返屋企換好衫，再執好少少，先拉 1 個喼過去，嘩，原來條路都真係幾遠，唔知到聽日運箱會唔會好辛苦呢？

上到去，當然第一時間吸塵拖地同抹窗，之後用埋狐老公送俾狐太嘅史奴比標籤機 print label ，幫啲燈掣加名咁就搞掂喇！

小甘妹出世 ＋ 清潔行動第 2 回

恭喜偉哥同甘妹，囡囡喺尋日健健康康出咗世喇，真係好消息呀，喺度祝小甘妹快高長大，聽教聽話，大個咗好似媽媽咁靚女！

講番新屋，今日又再上去搞清潔；經過咗星期日嘅清洗，今日好好多，無星期日咁辛苦，今次主要都係要吸塵，拖地同抹窗，但係都搞咗成兩個鐘，廚房同廁所都只係係咁二洗吓咋，聽日可能會有櫃送黎，睇黎聽日又要再上去做清潔女工喇！

完工喇！

今日間屋嘅裝修工程終於完成喇 ！  

師傅們大約下晝上到黎跟番之前有問題嘅牆身，裝番買錯咗嘅電掣板，換大門鎖膽，裝防盜鏈，之後等狐太驗貨，總括黎講尚算滿意，係唯一門口舊雲石有兩道裂痕，應該要換過，而家只差傢俬送黎就可以住喇，好開心呀！

去片俾大家睇吓間屋而家個樣喇！

清潔行動第 1 回

見間屋都差唔多搞掂，所以決定今日先黎第 1 次清潔行動！

一早 10:00 食完早餐就上去開工，狐老公先換咗個抽氣扇，跟住換過大房盞燈同換啲新燈膽，而狐太就匿埋咗喺廚房做清潔女工，先將個雪櫃移咗出黎大清洗，之後就輪到廚櫃，”星”盆，牆身，抽氣扇，抽油煙機，洗衣機；至於狐老公就負責清洗 2 間房，加全屋玻璃窗；下晝狐老公仲搵埋威威一齊黎洗冷氣機，好彩上手都只係用過 1 部，另外 2 部完全無開過，非常之乾淨！

就係咁洗吓抹吓，就足足搞咗 12 個鐘，朝 10:00 晚 10:00，連午餐都無食過；只係去食咗個宵夜，返到屋企都差唔多成 12:00 ，即上床覺覺豬，只要等埋師傅聽日上黎執埋啲手尾就大功告成喇！期待 ing！

裝修進度 @ 第 26 日，裝燈

今日約咗裝燈師傅黎裝燈呀，原本約咗 21 號架，但係問過裝修師傅話而家都可以裝，所以約早咗今日裝！

師傅大約 1:00 到黎到，一黎到先問想裝咗邊盞先就即開工，佢先裝咗客廳嗰盞”蓮花”燈先，之後到 2 邊走廊，最後就到飯廳，裝完 4 盞燈大約個幾 2 個鐘到，好快搞掂！

 

客廳嘅”蓮花”燈，老公超鍾意

 

飯廳嘅”鼓”燈

 

走廊”水紋”燈

 

走廊星星月亮燈

同埋加映番無換嘅房燈


細房燈


大房燈

裝完燈，狐老公先過狐 99 到幫佢整啲嘢，之後又出發去旺角，因為上次買錯咗 1 個掣板，要去換過，同埋要買燈膽同廚房光管仔；另外仲買咗 1 個唔使用手拉嘅抽氣扇，買埋啲清潔用具，聽日就開始實行清潔大行動！

裝修進度 @ 第 25 日

一聽到師傅話清場中，放工即衝返去新屋到睇！師傅真係好多嘢都清咗，只係淨番少量嘅嘢喺度，油已經完成哂！

大房

飯廳

客廳

走廊

啲掣板同門頂都裝好咗

部份掣板（啲油油得麻麻，要再麻煩師傅執）

大房門頂

細房門頂

浴室門頂

浴室架同掛架都整好咗

浴室架，掛架唔記得影

房 2 盞燈都裝好咗，師傅只要再執執啲油就 ok 喇；狐太仲發現到有 surprise 添呀，師傅幫狐太喺大房門後面裝咗塊鏡呀 ！

"surprise" 鏡

睇見間屋就黎完成，真係好開心呀，應該星期六日可以開始搞清潔喇，yeah ！

裝修進度 @ 第 24 日

因為師傅趕完工俾狐家，所以今日又再上新屋喇！

上到去見到師傅起哂啲電掣板，牆亦都油咗兩層，而且全屋水龍頭同個座廁都換好咗；見到個座廁覺得好搞笑，因為第一眼望埋去，覺得個廁所好細，細到好似小朋友座廁咁，但係望真其實係正常 size，唔知係咪因為個形狀問題呢，原裝嗰個比較闊大啲，而家呢個就 slim 啲，所以有個錯覺覺得個廁所細咗；師傅應該聽日會裝埋啲電掣，裝番兩盞房燈，執埋其他手尾，咁就大致完工，可以清埋場添呀，哈哈，好期待，好快可以做”清潔女工”喇 ！

油咗 2 層之後間屋個樣，廳用咗淺綠色；至於 2 間房，用咗淺紫色，效果幾 ok

廁所洗手盆龍頭

浴缸花灑

浴缸龍頭

廚房龍頭

”小朋友”座廁

 

同埋加映番大門門頂同埋廚房門頂

大門門頂

廚房門頂

裝修進度 @ 第 23 日

今日又上去新屋到巡喇，師傅終於拆咗啲電掣板落黎喇，但係拆漏咗 2 個 ，要叫師父聽日拆埋去；另外走廊嗰 2 盞燈師傅無拆到，所以狐太再提提求師傅幫拆咗去！  

至於幅有問題嘅牆，師傅已經跟進緊，而家應該等啲英泥乾，跟住就會線灰，線完再油油，睇黎就好似問題不大！

另外師傅清走咗窗上面啲貼紙，當堂覺得個窗又大又清又靚 ；另外師傅亦裝咗大門門頂同埋換咗廚房個門頂，唔錯，唔錯，亦都執咗啲細微地方，師傅仲話會黎緊星期五或六會裝埋個廁所同啲水龍頭，希望師傅再開行個 turbo，快啲搞掂間屋喇！

裝修進度 @ 第 22 日

今日又上咗新屋到巡一巡，終於見到師父做咗少少嘢喇，就係啲牆油咗第 1 層，原本見到間屋油咗油好開心，點知一入到大房，嘩，一大”忽”灰，好似滲水咁，好醜樣 ！狐老公覺得有啲奇怪，間屋無理由會滲水／漏水，而且嗰幅牆嘅另一面係細房，又唔係廁所，無理由會咁架！  

狐老公見到幅牆咁，佢即刻不停咁”叩”幅牆，發覺有啲地方啲聲唔同，狐太即刻打俾師傅，師傅後黎覆番我，話幅牆本身唔係滲水／漏水，而係本身個底做得唔好，當油油師傅油牆嗰陣發覺有問題，所以佢幫我地剷牆再批泥再線再油油！

都唔知叫好彩定唔好彩，好彩在師傅而家發現到呢個問題，即刻處理番，唔使等到搬咗入去住落咗先發覺有問題，到時都唔知點搞好！唔好彩在而家幅牆咁，嗰個位又要由頭再做過，咁究竟師父可唔可以如期起到貨呢？如果起唔到貨，咁又要等到幾時呢，希望師傅快快脆脆搞掂就好喇！

新屋購物 @ 旺角（配件續篇）

今日又為咗新屋再戰旺角喇，今次嘅目標係 Clipsal 掣板加門頂！

其實上次已經搵到 1 間買 Clipsal 掣板好平嘅地方，所以今日一出車站就直衝過去，問清楚 E3000 凝白系列嘅價錢之後就落 order 喇；普遍大部份都平，唯獨個 32A 稍為貴少少，不過拉上補下都叫平，所以就照要埋個 32A！買完掣板，狐老公諗住配埋啲燈膽，所以又問埋價錢，配咗 11 個燈膽，講緊埋單都唔使 $2000，抵呀！

買完掣板，跟住去買門頂；其實都無乜特別心水，只係聽師傅講買磁石嗰啲，總共買咗 5 個，1 個大門門頂無磁石；1 個廚房加兩間房，磁石連門頂；同埋 1 個廁所門頂，埋單又有 9 折，哈哈，又好抵！另外我地兩買咗 2 條掛鈎，又有得平，哈哈，話咁快，今日嘅 target 就好輕易完成咗喇！


Clipsal 掣板

門頂

掛鈎

之後攞住啲戰利品上新屋，可能呢排天氣麻麻，進度好似無乜進展咁，仲停留喺”線灰”階段，希望下個禮拜可以上到油喇！

今日仲約咗整窗簾嘅師傅上黎度尺，唔使 15 分鐘已經度完喇，等佢再報埋價，最快 1 個禮拜就起到貨喇，good！

今日係陳氏結婚 1 週年，祝佢地日日都咁恩愛 1 週年快樂 ！

裝修進度 @ 第 15 日

今日又上咗新屋到，睇吓師傅去到乜嘢進度！

今日好似無乜特別嘢做到，啲牆繼續線緊灰，係上咗廚櫃門板，效果唔錯，玩”黑白配”！

白色廚櫃

黑色廚櫃

呢個透明門櫃無整到

新屋購物 @ 旺角（配件篇）

今日又約咗林同學一齊出旺角血拼喇！今次嘅目標係電掣板同水龍頭，而林同學就係廁所鏡櫃同埋其他廁所架！

狐老公先去咗陳大明介紹嘅 1 間電業舖到睇睇啲 Clipsal 掣板，但係因為唔係太清楚邊度用啲乜嘢掣板，狐老公又無詳細睇邊啲換邊啲唔換，所以最終都只係問咗價錢無幫襯！

之後落咗旺角，狐老公同狐太先去買磚隔離嘅舖頭到問一問造窗簾價錢，呢間真係幾抵，因為之前問咗幾間都要接近 $3000，但係呢間唔使 $2000 就可以搞掂喇，good 爆！

睇完窗簾，狐老公同狐太就開始周圍睇潔具嗰啲舖頭，因為要買水龍頭；其實狐老公心目中係有心水，一係就買番 Grohe，一係就用 Kohler；如果買番 Grohe，想好似原裝咁係金銀色，但係問過啲 sales，原來金銀色係舊款，Grohe 已經無再出，係得銀色揀！

至於 Kohler，狐老公其實睇中咗 1 款，但係唔係間間都有得賣嗰隻款，行咗好耐，終於喺入中 1 間連鎖公司嘅分行仔搵到；問店員水龍頭價錢，佢想做生意即刻平俾狐太，見到價錢咁吸引，即係買咗 Grohe 1 套 3 件龍頭加 1 個 Kohler 嘅廚房龍頭，再加浴室層架 2 層，夾埋都唔使 $2500；至於林同學，因為搵唔到佢心水嘅全玻璃鏡櫃，佢就買咗 1 個後面唔係玻璃嘅鏡櫃，再加浴室層架，tissue 架等等，全部嘢夾埋唔使 $1000，又係好抵呀，今日又係大豐收呀 ！

水龍頭加浴室層架！

買完嘢上新屋放低啲戰利品，見到啲廚櫃板送咗黎，下個禮拜應該可以整喇！

廚櫃門板

裝修進度 @ 第 10 日

幾日無上過新屋到，今日問完師傅之後，就急不及待咁走咗上去望吓；一打開門，嘩，啲磚同腳線已經鋪好哂喇，望落啲磚真係幾 good，激似木地板 ，見到師傅們繼續喺度線灰，應該下個星期可以拆燈拆電掣油牆喇，希望下個禮拜開始唔好咁潮濕喇，太濕啲油會好難乾架，咁樣就有排都入唔到去住喇，祈求天青氣朗，爽爽爽！  

去片俾大家睇吓砌磚之後個樣喇

新屋購物 @ 淘大（燈飾篇）

之前買完傢俬，當然輪到燈喇，其實間屋本身係有燈架，總共有 5 盞燈，房嗰 2 盞同廚房都仲 ok ，只要拆咗落黎清洗吓應該無問題，但係廳有 1 盞生咗锈，狐太好想換過 1 盞新嘅，仲有走廊位，上手無裝到燈，只係得 2 個燈泡；狐老公原本想將飯廳嗰盞燈換過去走廊，但係狐太覺得太大同埋想要新嘅 ；經過幾次周旋之後，狐老公終於應承俾狐太買 2 盞新嘅走廊燈同埋換 2 個廳嘅燈，總共 4 盞 ！  

呢排都有留意吓啲燈舖，咁啱星期日過去淘大嗰邊食飯，喺商場入面嘅 1 間燈舖見到有 2 盞燈幾 good，其中 1 盞係有 3 個細圓鼓掉落黎嘅，另 1 盞就只係 1 個大圓鼓，但係佢側邊係由 1 塊塊圓片組成，2 盞都幾特別，狐老公好鍾意，而且佢做緊大減價，相對旺角嗰啲平，不過無買到；經過幾日考慮之後，最後都係決定去買呢 2 盞燈！

去到淘大直上燈舖，其實都已經鎖定咗目標，所以一入到只係再望吓，就同老闆講要呢 2 盞喇；之後再望吓其他燈，無意間俾狐老公發現咗有 2 盞細走廊燈，雖然佢係普通嘅花花邊燈，但係都 ok good ，價錢又唔太貴，所以都要埋呢 2 盞！

原本諗住叫老闆再平啲，但係老闆話已經折實咗，佢最多唔收裝工錢，免費裝燈，都 good ，即刻叫老闆開單俾錢，不過最大嗰盞要訂貨， 1 個禮拜後先有，所以約咗暫定 3 月頭送貨，又搞掂一樣喇，好期待啲燈呀！

新屋購物 @ 直銷中心（傢俬篇）

經過咗尋日度哂尺寸後，今朝一早，又約埋林同學一齊出發去直銷中心血拼，打咗 1 個圈之後，大家都決定拍板買 1 張大約 $1200（88 折之後嘅價錢）嘅油壓床，雖然可能啲木唔係太好，但係真係好抵，佢個床頭仲要有燈添！

油壓床

決定咗床之後，輪到睇衣櫃，原本有 3 個櫃都睇中咗，1 個係差唔多 5 尺幾嘅櫃，佢個顏色係”薰衣草”色，不過狐老公嫌佢唔夠多抽屜，而且狐老公想預留番少少位放吸塵機嗰啲，所以呢個 out 咗！之後再見到 1 個柚木色衣櫃，又係大約 5 尺到，呢個真係好 good，又夠大，啲木又好似好實淨，但係啲色同我地個地板好似，所以又 out 埋！仲有 1 個本身個櫃有啲鏡，狐太同狐老公都好鍾意，不過最終無揀到，因為怕狐 99 唔鍾意（風水話張床唔好俾啲鏡照住）；而林同學反而就揀咗呢隻款嘅 3 尺櫃，最後狐老公同狐太揀咗 1 個白色櫃身，胡桃木色邊嘅 4 尺半櫃，間隔都 ok ，佢有成 4 個抽屜，啱哂狐老公！

新衣櫃

原本只係打算買床同衣櫃，點知俾狐太無意間見到 1 個幾靚嘅鞋櫃，佢啲門係玻璃鏡門，上面仲有啲花紋，櫃面係 1 塊半透明膠板，見到佢，簡直係愛上 ，即係叫狐老公過黎睇，佢一睇都愛上，所以決定買埋佢，放棄上手業主留低嘅鞋櫃 ！

新鞋櫃，好鍾意佢上面啲花紋

訂埋鞋櫃之後，又俾狐太見到另 1 樣幾靚嘅嘢，就係 1 張餐枱加椅，一見到佢，就覺得佢同個鞋櫃好襯；佢係黑色玻璃面，對角有花紋，銀枱腳，再講啲椅，又係銀邊，椅背同座位都係灰底有黑色花紋，簡直又係 good 爆，好鍾意，狐老公都好鍾意，不過嫌佢略為大張，狐老公想要張細啲，四方形啲，所以最終無買到！

就係咁買咗 3 樣嘢，而林同學就買咗 4 樣嘢，雖然啲質料唔係話好靚，但係 2 張單夾埋都好似唔使 $10000，抵呀 ！

裝修進度 @ 第 2 日

經過咗師傅 2 日辛勞嘅工作，狐家新居已經”面目全非”，所有嘅牆已經剷哂，連地下都拆埋喇，聽日應該可以”線灰”，星期六啲磚送到黎，應該可以砌添喇！

俾大家睇吓而家間屋個樣喇！

大門位置

廚房

客廳

飯廳

細房


大房

大房夜景

新屋購物 @ 旺角（地磚及潔具篇）

尋日收咗樓，狐太今日專情請咗一日假搞新屋嘅嘢！

一朝早，狐太先約師傅上去睇吓邊啲地方需要執，之後過咗狐 99 到幫佢地度大門尺寸，再一齊出旺角買材料！

狐太先同狐 99 揀大門同鎖，之後就去咗師傅介紹嘅舖頭買磚；狐太睇中咗 1 隻木紋磚，望落同木地板好似無乜分別；狐太要求 1 開 4，然後”工”字咁鋪！

木紋地磚

買完磚，狐太去咗買廁所，原本打算買林同學揀嗰隻型號，但係俾狐太發現咗另一隻型號更好坐，所以揀咗嗰隻！

新廁所

磚同廁所都會喺星期六送黎，好期待！買完之後，因為師傅有事所以走先，而狐太同狐 99 繼續喺旺角閒逛，逛咗一陣，因為個鎖太重喇，狐 99 先行返屋企，而狐太就等狐老公放工再去望吓其他嘢；原本打算換水龍頭，但係睇唔啱，咁啱狐 99 又想換，所以最後幫狐 99 買咗個浴室花灑水龍頭！

我們的新居 @ 收樓日

期盼已久嘅日子終於蒞臨喇，今日可以收樓喇，真係開心到爆炸呀 ！  

當所有手續搞掂之後，放工即去 agent 到攞 key！攞咗嗰一刻，真係好開心！  

先黎參觀吓新屋嘅外圍先

之後到屋內實況

大門走廊位


客廳同景觀

飯廳

細房


大房，衣櫃位同景觀


廁所連浴室

廚房

之後狐太就上咗去佢地管業處到搞手續！雖然確認核對資料要 1 個禮拜時間，但係”實Q ”們都已經知道狐老公同狐太係新業主 ，勁期待裝修後入住呀！