裝修進度 @ 第 22 日

今日又上咗新屋到巡一巡，終於見到師父做咗少少嘢喇，就係啲牆油咗第 1 層，原本見到間屋油咗油好開心，點知一入到大房，嘩，一大”忽”灰，好似滲水咁，好醜樣 ！狐老公覺得有啲奇怪，間屋無理由會滲水／漏水，而且嗰幅牆嘅另一面係細房，又唔係廁所，無理由會咁架！  

狐老公見到幅牆咁，佢即刻不停咁”叩”幅牆，發覺有啲地方啲聲唔同，狐太即刻打俾師傅，師傅後黎覆番我，話幅牆本身唔係滲水／漏水，而係本身個底做得唔好，當油油師傅油牆嗰陣發覺有問題，所以佢幫我地剷牆再批泥再線再油油！

都唔知叫好彩定唔好彩，好彩在師傅而家發現到呢個問題，即刻處理番，唔使等到搬咗入去住落咗先發覺有問題，到時都唔知點搞好！唔好彩在而家幅牆咁，嗰個位又要由頭再做過，咁究竟師父可唔可以如期起到貨呢？如果起唔到貨，咁又要等到幾時呢，希望師傅快快脆脆搞掂就好喇！