2015 年母親節禮物

又到咗一年一度既母親節，每年呢啲時候學校都會教小朋友整小手工黎送俾媽媽們，狐家姐學校都唔另外！

今日放工返到屋企，狐家姐就話有嘢送俾狐媽媽，原來係 1 張心心咭，狐家姐仲喺咭上面畫咗狐媽媽個樣（雖然係唔似樣），加上狐家姐既 1 句＂媽咪，母親節快樂＂同 1 個吻，甜哂！

除咗狐家姐，當然唔少得狐妹妹；狐妹妹雖然未係好知乜嘢係母親節，但佢居然識得同狐媽媽講＂I Love You Mummy"，忡要講咗 2 次添；狐媽媽真係好驚訝呢句會出自狐妹妹口中（可能成日睇電視學返黎）；狐媽媽好開心，多謝兩位狐小姐既＂禮物＂！

2014 年復活節假期回顧

一連 4 日嘅復活節假期話咁快就過咗，又黎回顧吓先！

4 月 17 日

復活節前夕，今日同狐太婆慶祝生日

4 月 18 日

今日一早同狐家姐去咗城門河跑步，之後約咗陳氏去佐敦谷野餐；夜晚上咗陳氏屋企食飯，大明仲送咗 1 盒木火車套裝俾狐家姐做兒童節禮物

4 月 19 日

休息日

4 月 20 日

一早又約咗陳氏食早餐，之後又上咗陳氏到玩咗一陣；夜晚約咗娜娜契媽食飯

4 月 21 日

狐爸爸同狐家姐去咗拜山，狐媽媽同狐妹妹留喺屋企，狐媽媽幫兩位小姐執衣櫃換季

唔知出年嘅復活假期可唔可以衝出香港呢？

搶購紅米 @ 2014 年米粉節

早排一直都想幫狐公公同狐婆婆換新電話，狐爸爸話紅米抵而且啱兩位老人家用，於是學人去官網搶購！

狐媽媽試咗 3 次搶購紅米都係失敗，好彩狐爸爸成功搶購到 1 部；狐公公試用咗紅米後大愛！

見狐公公用得咁開心，都想幫狐婆婆轉埋紅米；咁啱遇著米粉節，即管幫狐婆婆搶 1 部返黎！

經過咗一日 6 場大激戰，好開心可以幫狐婆婆同愛美麗搶到各 1 部紅米，仲買咗 3 個細尿袋（行動電源）同埋 1 個紅米套，目標達成！

綜合今日嘅賽果，最容易搶到應該係最早嗰兩場，下年米粉節要一早買多幾部先得！

韓風熱潮

近排又再吹起韓風熱，個個都追睇韓劇＂來自星星的你＂！

狐媽媽當然唔執輸，開始追睇星星，狐媽媽用咗 3 日時間睇到第 7 集！雖然慢咗啲，因為狐媽媽啱啱追完一套喺三色高清台播緊嘅韓劇＂野王＂！

另外，近排唔同網站都出咗好多韓國護膚品嘅團購優惠，狐媽媽又心郁郁想試吓呢啲韓國牌子，而且聽講 ok 好用架，等狐媽媽買少少黎試再報告！

2014 年農曆年假期回顧

今日係年十一，狐媽媽馬年第 1 日返工，開工大吉！

等狐媽媽黎個農曆年假期回顧先！

1 月 31 日

大年初一，因為兩位狐小姐病咗，狐爸爸又作病，狐媽媽只係跟狐嫲嫲去咗狐太婆屋企拜年食盤菜！

2 月 1 日

大年初二，去咗狐婆婆同狐嫲嫲屋企開年！

2 月 2 日

大年初三，狐爸爸今日開始要出 trip 去慕尼黑，20 號先返，黎緊 3 個星期狐媽媽夜晚要獨力照顧兩位狐小姐，希望頂得住！

2 月 3 日

年初四，今日只係去咗狐姑婆到拜年！

2 月 4 日

年初五，休息日！

2 月 5 日

年初六，今日帶咗狐家姐返公司拜年湊熱鬧，狐家姐收穫豐富！

2 月 6 日

年初七，人日，亦都係狐妹妹 11 個月大嘅日子；今日帶咗兩位狐小姐去哈林家拜年；無見好耐，哈林大咗好多，哈林妹都開始識行 lu！

2 月 7-8 日

年初八同九，又係休息日！

2 月 9 日

年初十，兩位狐小姐同狐嫲嫲一齊行新城市食飯！

2 月 10 日

年十一，狐媽媽開工大吉，狐家姐返學大吉！

咁就捱過咗個農曆年，仲有 10 日狐爸爸就回歸喇，快啲喇，狐媽媽就黎頂唔住喇！

蛇年最後 1 日

今日係蛇年最後 1 日，即係年三十，狐媽媽喺度同大家拜個早年，祝大家馬年龍馬精神，馬到功成！

狐媽媽呢個新年都會幾忙碌吓，忙碌於照顧兩位狐小姐；因為兩位狐小姐輪流發燒，早幾日狐家姐開始燒，今日終於叫退番少少（啱啱到臨界線），點知發覺輪到狐妹妹起燒，真係一波未平一波又起；再加上狐爸爸年初三開始要出 trip，20 號先返到黎，狐媽媽要自己 1 個湊兩個，希望搞得掂喇，兩位狐小姐快啲好番喇！

狐媽媽只想來年一家身體健康，開開心心！

SD card 瓜柴

張 SD card 係狐媽媽上年換 Note II 嗰陣狐爸爸買俾狐媽媽，一直用都相安無事，而狐媽媽只係間唔中先 backup card 入面嘅嘢！

尋日心血來潮諗住開啲相黎睇吓，點知一打開 photo 個 folder，好多都變咗灰色無嘢，再 click 入去，話 "file not found"；心知不妙，即刻 boot 機再開，點知佢居然彈咗 "SD card damaged" 嘅 icon 出黎，shit，再試 boot 機再開，如事者試咗 4，5 次，結果都係一樣 "SD card damaged"，咁啲相咪無哂？！狐媽媽至少影咗成 5 千幾張相架，即刻話俾狐爸爸知，佢叫狐媽媽攞番張 card 出黎，返屋企再用電腦試吓開唔開到！

今日試吓喺公司開，load load 吓彈咗 "file is corrupted or unreadable" ，啲相咪真係無哂？！狐爸爸話俾佢今晚喺屋企再試吓救唔救到，希望救到喇，呢個故事教訓狐媽媽下次真係要定期做 backup！

2013 年回顧

今日係 2013 年最後 1 日，聽日就踏入新嘅 1 年，等狐媽媽黎個回顧先！

1 月

狐家姐返咗 N 班半年，終於都開開心心咁返學，而且仲開始坐校車添，狐家姐要加油！

2 月

仲有 1 個月狐妹妹就出世，而工人姐姐亦都到咗埗，希望有姐姐幫手可以減輕狐嫲嫲嘅工作！

3 月

狐妹妹喺狐爸爸同狐媽媽拍拖 9 週年嘅日子黎到屋企，希望兩位狐小姐可以相親相愛！

4 月

狐妹妹滿月喇，可惜狐家姐情緒唔係好穩定，見到唔對路，坐完月即陪狐家姐散心，希望狐家姐唔好覺得狐妹妹嘅黎到係同佢搶嘢！

5 月

放完產假又要返工喇，希望狐嫲嫲可以搞得掂兩位狐小姐！

6 月

狐妹妹出世百日，幫佢搞咗百日宴，多謝大家賞面出席！

7 月

狐家姐 N 班畢業喇，黎緊 9 月會去新學校讀 K1 ，希望佢鍾意新學校同讀得開開心心！

8 月

今年生日，買咗有史以黎最貴嘅禮物俾自己，要做慳妹喇！

9 月

狐家姐 K1 生活正式開始，希望佢喺新學校讀得開心；同時，狐妹妹 6 個月大喇，要健健康康呀！

10 月

狐家姐 3 歲喇，無乜大型慶祝活動，只係搵朋友整咗個狐家姐至愛嘅 Noddy 蛋糕，要乖乖唔好再扭計喇，要錫狐妹妹呀！另外狐媽媽轉咗新工作，希望一切順利！

11 月

同狐爸爸結婚 6 週年紀念，要繼續相愛好多好多個 6 年！

12 月

聖誕月兼生病月，狐媽媽同兩位狐小姐不停病，希望來年一家大細身體健康！

新嘅一年希望工作順順利利，加多啲人工，個個身體健康，兩位狐小姐讀書開心快樂，希望狐媽媽心目中好多願望都可以一一達成，Happy New Year！

2013 年聖誕假期回顧

話咁快又過咗個聖誕假期，今年都無乜去到任何地方，可能湊住兩個，加上狐妹妹仲細喇，可能出年會出動多啲！

12 月 24 日

平安夜呢日放半晝，返到屋企兩位狐小姐瞓緊晏覺，等佢地醒咗就出咗新城市同狐姨姨狐姨丈食飯，食完飯原本想睇燈飾，但太多人，只得狐姨姨同狐姨丈帶狐家姐睇燈飾，睇完就返屋企！

12 月 25 日

聖誕正日，約咗陳李姚氏開扒地，交換吓禮物（小朋友們），之後又出吓新城市行一陣就返屋企！

12 月 26 日

Boxing day 帶兩位狐小姐去參加媽媽會喺某大屋苑會所搞嘅聖誕扒地，可惜狐妹妹中途瞓咗覺，唯有提早走喺馬鞍山行咗陣又再出新城市！

12 月 27 日

狐媽媽同狐爸爸攞咗假陪兩位狐小姐，原本打算同佢地去睇恐龍，點知去到科學館狐家姐話驚唔肯入去，結果去咗隔離歷史博物館消磨時間，臨走時狐媽媽同狐嫲嫲同狐家姐影咗張懷舊相添！

今年嘅聖誕就咁好悠閒過咗，出年等狐妹妹會行會走，一定同佢地去多啲地方玩！

又搬家了！

因為 yahoo blog 要關閉，要周圍搵地方搬 blog，雖然 yahoo 有介紹兩個網站，但覺得唔好用，最後決定揀呢度搬，又當係新一年新開始（遲吓整理番舊嗰啲），希望可以 keep 住繼續寫，等兩位狐小姐大咗可以睇番！

王國會長

最近收到 BK 邀請擔任王國會長一職，擔粗粗提交資料應承咗！

過咗幾日收到佢地確認電郵，狐媽媽負責管理 2013 年 1-3 月媽媽會，主要都係管理吓啲發帖有無違規等等！好似好簡單，希望可以勝任，做好”呢份工”！

BK 為咗歡迎新任會長同答謝舊有會長，再加上農曆年就到，佢地送咗 BK 特製利是封 2 套；今日啱啱收到，有利是封係少少閃底，好靚；狐家姐一見到就搶住話要，既然狐家姐鍾意，就用黎封俾兩姊妹喇！

2012 年最後 1 日

今日係 2012 年最後 1 日，係最後呢日發生咗 1 件小事，就係狐媽媽同狐一齊喺樓梯跌低咗！

事綠狐家姐一早食完早奶，如常帶狐家姐過狐嫲嫲到；點知一落到樓下，狐家姐因為有痰咳到嘔奶，仲嘔到狐爸爸成身都係；結果狐爸爸要返上樓換衫，而狐媽媽就喺樓下幫狐家姐清潔！

清潔完之後，見狐爸爸仲未落黎，諗住同狐家姐先行去狐嫲嫲到；其實都係自己衰，有 lift 唔搭走去行樓梯；又一手抱狐家姐，一手抽幾袋嘢，結果行咗1 段樓梯，到第 2 段尾嗰時睇唔到最尾嗰級樓梯，就咁同狐家姐一齊跌咗喺地！好彩狐家姐當時用手同 pat pat 落地，無整損；而狐媽媽就左邊手踭落地，個肚無撞到；有 2 位好心住客經過，即刻扶狐媽媽同狐家姐起身，仲問有無事；真係不幸中之大幸，如果有乜事真係唔知點算！

後黎狐爸爸同狐嫲嫲知道咗，鬧到狐媽媽死死吓，下次真係唔敢喇！

是日放半晝，入咗荃灣接狐爸爸收工兼幫狐家姐換批新奶樽；另外買埋狐妹妹用嘅奶樽，走佬袋用品，托腹帶，仲代狐爺爺買咗聖誕禮物俾大小姐添！

2012 年聖誕假期回顧

話咁快又過咗個聖誕喇，呢個假期無乜活動，因為 1 家大細都唔舒服！

12 月 21 日

今日係冬至，原本約咗私家產檢見吓狐妹妹，點知姑娘打黎話改期到星期一平安夜，結果同狐爸爸偷懶去行咗陣街先返狐 99 到食飯；返到去見到狐家姐個樣好攰好眼瞓，原來狐家姐下晝已經叫唔舒服，食完飯即走；落街無耐狐家姐就開始嘔，返到屋企飲多幾啖水就狂嘔，飲完奶又狂嘔，結果要帶狐家姐去仁安睇急症！另外收到愛美麗送嘅聖誕禮物，多謝哂！

12 月 22 日

是日在家休息，狐家姐要限水先唔嘔，但就開始肚痾，流鼻水同咳！

12 月 23 日

今日一早狐家姐又肚痾，但精神返哂，飲水都無再嘔；夜晚返咗狐婆婆家做冬，有蛋糕食又收到姨媽送嘅聖誕禮物，多謝哂姨媽！

12 月 24 日

今日係平安夜，返咗半晝工又諗住去產檢，點知醫生去咗執仔，改期到星期五，偷雞去行街跟住返屋企湊傷風咳加少少肚痾嘅狐家姐！

12 月 25 日

今日係聖誕節，朝早同狐家姐去馬鞍山影 Miffy；夜晚去咗狐叔叔狐嬸嬸到打邊爐，收到狐叔叔狐嬸嬸送嘅聖誕禮物，多謝哂；狐家姐繼續肚痾，而狐媽媽就開始喉嚨痛加腰痛！

12 月 26 日

今日係 boxing day，約咗契媽佢地開扒地，但見狐家姐未好番而狐媽媽又周身骨痛，決定唔帶狐家姐去；今日收到契媽同甘妹送嘅聖誕禮物，多謝哂！

總括咁多日，都係與病魔一齊，希望病魔快啲走，2013 年 1 家要健健康康！

請咗工人姐姐 + 聖誕大出血

今日好忙碌呀，因為好多要搞！

第 1 站係先幫狐家姐去合一堂交留位費，辦完手續先知原來今日有講座聽，但趕住出去睇工人姐姐，所以無聽講座就走咗！

 

第 2 站去灣仔睇工人姐姐，去到 agent 到遲咗好多，大部份姐姐都賣哂，好彩最後都揀到兩個啱心水嘅！經過一輪掙扎，最終請咗個單身，樣貌都唔錯嘅工人姐姐，希望無揀錯喇！

第 3 站原本係工展會，點知狐婆婆見狐家姐無份出黎就取消咗，變咗去新城市放血！

今次真係大出血，狐媽媽買咗個新銀包，另加錢換購咗 2 個証件套；而狐爸爸就買咗返工鞋；今個聖誕要慳啲使！

今日嘅收穫

1303 沙田區媽媽 Gathering @ Onion Kitchen

今日係第 1 次參加 1303 沙田媽媽嘅 gathering，揀咗大圍嘅 Onion Kitchen！

今次有成 14 個媽媽出席，主要都係交流吓心得，一吹就吹咗 2 個幾鐘喇！好開心，期待下一次聚會！

Gathering 之後，狐媽媽就坐夏雨爸爸車落荃灣逛街買衫！

狐細佬雲妮過大禮

今日係狐細佬同雲妮過大禮嘅日子，3 年前過大禮係由叔仔幫手，今次輪到番狐老公幫狐叔仔喇！

一早坐狐 62 車入大埔，狐太同狐 99 先去搵位飲茶；狐 62，狐老公同狐細佬就送聘禮上雲妮屋企，完成之後 2 家人齊齊飲茶，咁就完成咗今日過大禮嘅儀式喇！完成過大禮就開始放炸彈喇，預祝狐細佬同雲妮一切順利！

返到屋企狐老公又番煲啲醋同埋繼續整白蓮鬚，今次啲白蓮鬚落得少水得滯，一飲完個人就超唔舒服，勁想嘔，要即休息瞓吓先無事！另外又買咗 1 個長頸鹿溫度計同埋 1 個膠箱俾狐 BB，用黎放烚好嘅奶樽！

 

長頸鹿溫度計

 

用黎放奶樽嘅膠箱

2010 年父親節

今日係父親節，祝天下爸爸開開心心！今日嘅節目就係約埋 Miss Chan Chan 一家去探王二少喇！

大約 2:45 去到 Don Don 屋企，王二少啱啱食飽飽瞓緊覺，望咗王二少一陣就同大小姐同 Miss Chan Chan 囡囡玩；王二少似足爸爸，皮膚黑黑，而家大約係 3.3kg，都算 ok 喇！

因為今日係父親節，Miss Chan Chan 專情買咗個車車蛋糕上黎同幾位父親慶祝，狐老公暫時都只係半個爸爸，所以今次呢個蛋糕由琦哥同王大小姐，Miss Chan Chan 老公同囡囡一齊切，再大家一齊分享！

食完蛋糕，王二少啱啱醒咗，Miss Chan Chan 就即場示範俾狐媽媽呢個無知媽媽睇點幫 bb 沖涼，餵奶同掃風！真係多謝哂 Miss Chan Chan 嘅示範，狐媽媽真係學到唔少嘢，希望到時狐 BB 唔會俾狐媽媽整親或者嚇親喇！

之後 Miss Chan Chan 一家先走，再同 Don Don 吹咗陣水就返狐婆婆到同狐公公慶祝父親節！

2010 年復活節假期回顧

一連 5 日嘅復活節假話咁快就完結咗，等狐太回顧吓呢個假期做咗乜先！


4 月 1 日

狐老公就黎生日，所以林同學佢地約咗今日同狐老公慶祝，大家去咗 Shakey's Pizza 到食，呢間嘢啲嘢食都幾好味， 9 個大人加 1 個小朋友叫咗好多嘢食都係每人大約 $100，好味，有機會要再去食，多謝哂咁多位同狐老公慶祝同請食飯！

4 月 2 日


今日係狐太婆生日，日頭都係喺屋企休息吓，夜晚先過大埔同狐太婆慶祝食飯！喺度祝狐太婆生日快樂，身體健康！

4 月 3 日


今日為 3，4 月之星慶祝生日，下晝陳李姚氏上黎打牌打機，夜晚去咗第一城盈輝打邊邊，盈輝無以前咁好食喇；因為唔夠時間，如果唔係買餸黎打會正好多！喺度祝 3，4 月之星生日快樂！

4 月 4 日


今日係狐老公正日生日，生日快樂！今年因為有咗狐 BB，所以無特別安排節目，加上狐老公呢個假期病咗，所以日頭又係喺屋企休息，夜晚出吓街行咗一陣，食咗個普通飯就返歸休息！

4 月 5 日

今日休息日

4 月 6 日

今日係假期最後 1 日，之前喺 BK 到見到話將軍澳有間舖頭賣嘅 BB 嘢好平，今日同狐老公去咗睇吓！呢間舖頭果然比出面稍平；經過一輪商議之後，今日拍板買咗 BB 車，high chair 同埋沖涼盆，另外加個奶樽刷，所有嘢會喺 5 月頭送黎，老闆娘仲好好人送咗多咗乳墊俾狐媽媽添！

夜晚返咗狐婆婆到食飯，狐姨媽喺台灣買咗 2 對小襪仔俾你／妳添呀，好可愛架，睇吓狐姨媽幾錫你／妳；其實狐姨媽仲想買好多嘢俾你／妳架，不過未知你／妳係男定女，所以唔敢買嘢住，如果狐姨媽知道你／妳係男定女之後，一定會買大量嘢俾你／妳呀！

今個假期都算過得充實！

 

奶樽刷同埋乳墊

 

小襪仔

2009 年工展會

今日諗住同狐老公去工展會行吓！

唔知係咪因為早餐食咗個 M 仔記，狐太食完無耐就開始覺得啲腸胃唔係好舒服，去到銅鑼灣，已經開始覺得想嘔，狐老公見狐太唔係好舒服，即刻搵個地方坐低休息吓；一坐低無耐，狐太就忍唔住要走入廁所嘔，結果嘔咗 3 次，成個 M 仔記嘔番哂出黎！

其實嘔完最後 1 次個人已經好少少，而且又坐咗咁耐車，一場出到黎銅鑼灣，無理由就咁返屋企，所以都買飛入去工展會；可惜狐太一入到又開始唔舒服，結果得狐老公自己 1 個行，狐太就入咗廁所等嘔第 4 次！

狐太實在太唔舒服，所以狐老公都只係行咗半個鐘到就走番出黎同狐太返屋企休息，真係可惜；狐老公都買到少少嘢，分別係 1 袋嘉頓福袋，另 1 袋就有一啲電筒仔同埋 1 個 Meyer 暖壼！

嘉頓福袋 - 有成 10 包餅，$4x，都 ok ，最緊要係個袋，狐太想要咗幾年喇！

呢個就係 Meyer 暖壼，$100 有找，都 ok 好用

返到屋企狐太即刻大昏迷，夜晚仲發燒添，等好番再同狐老公去多次工展會！

另外今日係夏雨生日，喺度祝佢生日快樂，同大 Ka 開開心心 ！

無聊睇樓日

近期馬鞍山有個新盤開售，狐太同狐老公見今日無乜嘢做，於是學人走去睇示範單位！

當去到尖東站沿路行上去地面嘅時候，已經遇到有人＂攔途截劫＂；上到地面嗰陣，不停有人走埋黎問係咪睇樓，但係都仲可以避過佢地！當行到擺示範單位嘅商場附近，啲人開始失控，佢地一見到有人走埋商場附近就即刻全部蜂擁而上，係咁不停圍攻狐老公同狐太，狐太仲俾啲人迫到坐咗落地下幾次添！結果狐老公同狐太抵唔住佢地嘅＂熱情＂，即刻調頭走，但都俾佢地追收嘢追咗幾條街！

原本打算打道回府，但係既然一場出到黎，於是打俾相熟嘅 agent，咁啱佢都約咗客出黎睇示範單位，所以決定等個 agent 到黎帶狐老公同狐太入去參觀！

Agent 好快到咗，佢即刻先將 1 份樓盤資料俾狐老公攞住（用意係話俾行家知呢個客已經有 agent 架喇），之後就入去睇示範單位，沿路經過返頭先俾人＂圍＂嘅地方都仲有啲驚；入到去，都仲算人山人海，啲示範單位都幾 ok ，可惜價錢 out budget 咗好多，所以睇完示範單位，聽完個 agent 講解之後，攞咗啲單張就走人，足足都搞咗成 2 個幾鐘！ 

今次嘅＂戰利品＂

經過今次魯莽睇樓之後，狐老公話下次如果再有睇新樓嘅機會，唔理三七二十一，先攞咗其中 1 個 agent 嘅咭片先，咁樣就唔怕再俾人＂圍＂！

今日買咗隻 Winning Eleven 2009 送俾狐老公，原本諗住當驚喜，點知狐老公好快估到，而且仲俾佢發覺到狐太買嘅係水貨，唔係行貨，仲要 check 到買貴咗成百蚊添，驚喜不足，唔開心有餘！

貴嘢水貨 - Winning Eleven 2009