準備迎接 BB 第 5 擊 - 煲薑醋

今日八珍送甜醋黎，狐 99 就開始幫狐媽媽煲薑醋！

狐 99 一早就買定啲薑，批好哂皮，炒過同壓扁哂，之後等啲醋送咗黎就同狐 62 一齊攞埋 2 個煲過黎開始煲薑醋！

狐 99 跟八珍教嘅方法去做，先放哂啲薑入煲到，然後放上爐頭，加入甜醋，跟住開火煲滾啲薑醋！

原本狐 99 攞咗佢平時用黎煲湯嘅煲過黎，但係個煲漏醋，狐 99 要臨時出街再買第 2 個煲返黎，就喺狐 99 出咗門口無耐，啲薑醋因為開得太大火而滾瀉咗，要麻煩狐 62 一齊抹番乾淨！

清潔番個廚房之後繼續開火煲，今次狐 99 就用咗細火黎煲，大約煲咗個幾 2 個鐘就熄火，下個禮拜再開火再煲，辛苦哂狐 99 喇！

 

20 斤甜醋

 

2 支黑糯米醋，呢個八珍教係加豬手豬腳嗰陣先加入去，暫時唔使用住

 

呢煲係大嘅薑醋

 

呢煲係細嘅

尋日見好天，繼續洗狐 BB 嘢，今次洗咗冷氣被同 1 張毛巾毯，另外仲洗埋啲手套，腳套同襪仔，仲有 2 個枕頭仔！

準備迎接 BB 第 4 擊 - 走佬袋

差唔多踏入 35W，係時候要執定走佬袋，再加上醫生擔心作早產，即刻拿拿聲執定先！

其實之前都喺 BK 搵咗威記個走佬袋 list，又睇咗 Vicky 執咗啲乜同埋直接問咗威記攞佢地個走佬袋 list；綜合哂 3 方面嘅資料，加上而家大部份順產都只係住 2 日 1 夜，而且屋企確實太近威記，有乜嘢漏都可以叫狐爸爸返上去攞，所以只係執咗好少嘢入走佬袋！

以下係走佬袋嘅物品：

~　1 盒 Tempo 紙巾（聽講話好好用）
~　1 卷廚房紙
~　2 包產婦衛生巾加 3 片散件
~　1 包床墊（入面有 4 張）
~　2 包網褲（夾埋有 10 條）加幾條散件
~　1 個沖洗器
~　2 個哺乳 bra
~　1 袋乳墊
~　1 盒 Nipple Wipes
~　1 包 NB 尿片
~　散件乾綿同濕紙巾
~　拖鞋
~　相機
~　電話同义電器
~　鎖
~　狐爸爸同狐媽媽嘅身份証，錢，八達通等等

 

走佬袋

另外又執定咗狐 BB 個出院袋

~　1 件和尚袍
~　1 件夾衣
~　1 對手套
~　1 對襪仔
~　1 張包被

 

狐 BB 出院袋

第 7 次私家產檢 @ 34W4D

原本早 2 日嘅產檢改咗今日去，時間仲要係夜晚嘅 9:10！

狐媽媽同狐爸爸原本諗住大把時間唔知去邊度磨，結果因為狐爸爸遲咗收工，由唔趕變成好趕，上到診所已經遲到！

估唔到今日咁多人睇，起碼有成 7 個媽媽喺度等緊睇醫生（後黎聽到啲姑娘講醫生將 2 日嘅 booking group 埋今日 1 次過，所以咁夜都仲有咁多媽媽等緊）！

因為實在太多媽媽，所以今日都只係檢小便，連量血壓同磅重都無！雖然 book 咗係 9:10，但係足足等咗至少個半鐘先見到醫生！

見到醫生當然第 1 句就被問有無唔舒服，狐媽媽早個幾 2 個禮拜開始肚底就成日痛，初時都以為係宮縮或者係俾狐 BB 壓住，但係佢有時又會痛 1 下停 1 下咁持續 2-3 次，而且仲會有時痛到行唔到要停喺度抖吓，如是者都痛咗個幾 2 個禮拜！

醫生聽完就叫狐媽媽瞓上床照一照狐 BB，狐 BB 一切正常，大得非常好，今次啲頭圍呀，肚圍同腿骨都同週數吻合！醫生調去 4D 俾狐爸爸同狐媽媽睇，大家都見到 1 個大鼻兼豬咀嘅小朋友，超搞笑！

照完之後，醫生就講番肚痛嘅問題，佢話狐媽媽呢啲係痛嘅假宮縮，但係咁痛法同咁早痛有啲唔正常，似有啲規律，再加上佢同政府都照唔到個子宮肌瘤，擔心狐媽媽有機會作早產，佢建議狐媽媽一痛就要即刻休息，仲寫定咗 1 個禮拜病假；另外仲開咗啲舒緩宮縮嘅藥有需要時食；如果情況無改善就建議即入院檢查！

聽完醫生咁講狐爸爸好擔心，仲勒令唔俾狐媽媽操勞同唔可以周圍去！狐 BB 要乖乖地留喺媽媽個肚入面，至少都留到足月先好出黎見大家呀，唔好搶閘呀！

狐 BB 週數：34W4D
狐 BB 重量：2452g（大約 5 磅 3 安士）

 

大腿骨

 

肚仔

 

頭

 

心跳

 

腳板仔，好似好大隻

 

背脊骨

 

手指仔

哈林仔出咗世喇！

繼謙謙仔之後，今日輪到哈林仔出世喇！哈林仔係 1 個重 7 磅嘅 BB 仔，祝哈林仔快高長大，狐姨姨遲啲黎探你！

準備迎接 BB 第 3 擊 - 訂甜醋

今日原本係覆診嘅日子，點知醫生臨時要去執仔，所以又要改期，既然係咁，狐媽媽決定落旺角去訂甜醋，因為都成 34W，係時候要開始整薑醋！

之前都問過狐媽咪同狐 99 想用邊隻醋，佢地覺得八珍出名啲，所以就決定去八珍旺角分店到訂！

去到舖頭，問咗啲職員如果大約有 10 至 15 斤薑要用幾多醋，佢地都答話最好買 20 斤，用剩咗就等遲啲用黎溝淡去；另外仲要 2 支黑糯米醋，話可以令到啲豬手同豬腳淋身啲！狐媽媽就幫狐媽咪同狐 99 每邊都訂咗 20 斤醋同 2 支黑糯米醋，咁就完成咗 1 個 task 喇！

今日收到美素佳兒送黎嘅 2 罐奶粉，另外仲收到早前買嘅薑皂添！

 

美素佳兒奶粉

 

薑皂，都有啲薑味，唔知好唔好用呢？呢個見 Vicky 買狐媽媽先買，坐月嗰陣用嘅！

謙謙仔出咗世喇！

大明同 Vicky 嘅結晶品謙謙仔終於出世喇，恭喜哂！

阿囝有成 6 磅 11 安士，喺度祝謙謙仔快高長大，聽教聽話，期待與謙謙仔見面！

給 BB 買禮物 (13)

呢幾日又為狐 BB 添置咗少少嘢，原來除咗狐媽媽係購物狂外，狐 BB 都有 1 個購物狂狐姨媽，狐姨媽買咗好多靚嘢俾狐 BB！

8 月 19 日


今日經開藥房，原本想問一問藥房有無 1 隻 BK 媽媽話好好用嘅薑味洗頭水，點知佢地無賣呢隻，之後見到有凡士林，順便買咗 1 樽大嘅，$20 都唔使！

 

大嘅凡士林

8 月 20 日

今日同咗 Don Don 同琦哥兩公婆入咗馬鞍山試新車順便食飯，王大小姐又大個咗喇，仲怕醜咗好多添，不過最後佢都有唱歌俾大家聽；食完飯行經特賣場，俾狐媽媽見到有 Elmo 布書賣，見佢比大書局平，即買，洗乾淨就俾狐 BB 玩！

 

Elmo 布書

8 月 21 日

今日又繼續幫狐 BB 洗嘢，今次係洗睡袋呀，床單，床圍呀，紗巾咁，而且，生日嗰時買俾狐 BB 嗰個櫃今日送黎，狐 BB 啲嘢有位放喇！

 

睡袋同床圍

 

紗巾同床單

 

之前買嘅 5 桶櫃

8 月 22 日

今日返咗狐婆婆到幫手執嘢搬屋，狐姨媽又為狐 BB 送上禮物喇，今次嘅禮物係 Hallmark gift set，仲要 2 大盒添；仲有 1 對手套仔；另外仲有 1 隻玉手鈪仔同 1 條有玉佩嘅腳鍊，多謝哂狐姨媽！

另外喺執屋嗰陣居然搵到 1 盒“寶物”，呢盒“寶物”係 1 套全新未開封嘅 BB 衫，有衫，有帽仔同口水肩，佢嘅年齡有成 3x 年，係有位親戚買黎送俾當時仲係 BB 嘅狐姨媽！原本見佢係全新真係想俾埋狐 BB 著，但係發覺有陣味，所以最終都係放棄咗！

 

狐姨媽買俾大小姐嘅禮物

 

呢盒係包被

 

手套仔

 

手鈪仔同玉佩腳鍊

 

呢套就係“寶物”喇，有成 3x 年歷史

第 7 次政府產檢 @ 33W2D

話咁快又過咗 2 個禮拜，今日又係返威記做產檢嘅日子！

準時 9:15 去到登記，又係例行磅重量血壓驗小便之後等叫名！今日人唔太多，唔使 10 分鐘就叫名見助產士！

入到去，問咗基本資料，之後就上床度肚，因為上次狐 BB 未轉頭，所以助產士幫我再摸，佢話狐 BB 已經轉咗頭喇，不過就斜咗少少，佢仲好好人咁用部舊式超聲波機照狐 BB 個頭添！

今日一切正常，血壓同重量都好好，因為之前約咗 7 號會再照超聲波同見醫生，所以助產士無俾覆診期；另外佢都俾咗幾張小冊子狐媽媽，都係講生產時減痛嘅方法，走佬袋 list，佢仲好好咁逐樣物品講俾狐媽媽知，佢建議一定要帶水泡，好有用！

臨走前狐媽媽又再提番唔知係咪坐骨神經痛嘅問題，因為前幾日又瞓到半夜痛醒，仲要今次加埋肚痛添，助產士聽狐媽媽形容都話係坐骨神經痛，現階段無乜嘢做到，都係做多少少運動，游多啲水，坐得好少少，唔好企太耐，唔好坐硬椅，生完之後做物理治療應該無乜問題；肚痛嗰度，都係話如果唔係 keep 住痛都無乜問題！

今日超快，1 個鐘搞掂哂走人，見有時間，專情走咗去 7F 到“參觀”吓添！狐 BB，繼續 keep 住乖乖，下星期私家見喇！

狐媽媽重量：64.1kg
狐 BB 週數：33W2D

仁安產前講座第 6 堂《初生嬰兒護理及奶瓶餵飼》 @ 33W1D

今日又去仁安上堂喇，今堂係最後 1 堂，主要係示範俾媽媽們睇點幫 BB 沖涼洗頭同掃風，另外亦都講吓初生嬰兒護理！

每位媽媽都有 1 個假 BB，當姑娘示範點幫 BB 沖涼洗頭同掃風，媽媽們就可以攞住個假 BB 跟住一齊做，都 ok 好玩兼有趣，唔怪得今堂差唔多滿座咁滯！

初生嬰兒護理係由兒科醫生主講，有啲資料都好用，今堂確實幾唔錯，仲有禮物收添！今次有 1 set Johnson Baby gift set ，另外仲有美贊臣口水肩同奶粉袋！

今日最後 1 堂嘅禮物

準備迎接 BB 第 2 擊 - 白蓮鬚糖水

而家已經 32W5D，即係大約 8 個幾月，見有啲媽媽開始食涼嘢呀，清吓胎毒咁；涼嘢狐媽媽一早食咗，所以就開始清胎毒！

BK 啲媽媽或者係小歌，車厘，Vicky 都係整白蓮鬚，於是去咗藥房買 2 包試吓，藥房職員話而家呢個時間應該 2 星期飲 1 次，下個月就 1 星期 1 次！

買咗白蓮鬚當然要搵吓整嘅方法，以下資料係黎自車厘！

白蓮鬚糖水（助產及有助清胎毒）
飲用時間： 
臨盆前 1 個月至 15 天前飲用。白蓮鬚屬平性的食物，無論涼、熱底的人都適合食用。1 星期可飲用 1 至 2 次。如要清胎毒則在懷孕後 6 個月飲用此糖水才具清胎毒之效，將近臨盆時飲用效果不大。
功效：1)　固澀 ~ 白蓮鬚乃蓮花的花蕊，性平味甘，有固澀（即止血）、補腎、消熱毒之效，而雞蛋則有蛋白質，此糖水確有助防止生產時大量流血的作用。

2)　補腎 ~ 由於孕婦需要養胎，腎氣一定有損耗，具補腎作用的白蓮鬚能使孕婦生產時有氣力，生產過程會較順利。

3)　解胎毒 ~ 所謂胎毒，是指因常吃油炸食物而產生的「血熱」，令嬰兒出生後易生瘡、奶癬等。孕婦在懷孕後 6 個月飲用此糖水才具清胎毒之效，將近臨盆時飲用效果不大。

食譜：
白蓮鬚　　　　5 元
雞蛋　　　　　1 隻
冰糖　　　　　適量
水　　　　　　6 至 7 碗（3碗煲成 1 碗，約 40 分鐘）
做法：凍水放入白蓮鬚及雞蛋（連蛋殼），煲滾後以慢火煲 45 分鐘，以冰糖調味即成。

今次煲完發覺水太多，下次可以減番到大約 4 至 5 碗水應該 ok！味道 ok，可能狐爸爸放得多冰糖，係入口有少少澀，但係可以接受！不過飲完半湯碗即肚痛，聽講話肚痛係因為個人濕熱，但都係留番 2 星期後先再飲第 2 次喇！

 

味道唔太差嘅白蓮鬚

 

繼續幫狐 BB 洗嘢，今次係紗巾加包被

 

呢啲係手洗嘅，口水肩同尿墊

給 BB 買禮物 (12)

狐 BB 啲嘢好多都準備得 7788，剩番都只係啲濕星嘢或者係再補倉，呢 2 日就買咗 1 樽威潔洗衣液同埋換購咗探熱針！

支洗衣液超抵，$49 已經買到 2L，而且又送思詩樂綿，聽 BK 啲媽媽講話好好用，等狐媽媽星期六試吓佢，睇吓係咪真係咁好用先！

 

超抵嘅 2L 洗衣液

 

又有思詩樂綿送

至於個探熱針，係狐爸爸用信用咭換，都幾抵，仲要係百靈牌添！

 

百靈牌探熱針

仁安產前講座第 5 堂《產後護理、情緒轉變及母乳哺飼》@ 32W1D

今日又去仁安上第 5 堂產前講座，又遲大到，上到去得番 30 分鐘嘅上堂時間！

入場前先收到 Philips 奶樽加 2 包即棄乳墊；聽完講座填埋問卷，又收到 Cryolife 嘅尿墊加女性清潔液試用裝同埋 $10 coupon，又滿載而歸喇，而且今堂嘅內容都好啱用；下個禮拜就係最後 1 堂喇，6 堂嘅產前講座話咁快就完結喇！

 

今堂嘅禮物

2010 年 BB 展

原本無諗過會去 BB 展，因為一定會超多人，而且而家好快就覺得攰，所以一直都無打算去！

最近收到宣傳知道 BB 展有 1 set 尿片加思詩樂綿 gift set 賣，只係 $138，超抵，為咗呢 set 嘢狐媽媽決定去 BB 展逛一逛！

為避人流，狐爸爸同狐媽媽好遲先出發去會展，去到都差唔多成 6:00，先買飛同 1 本 coupon 跟住就入場喇！可能開始晏，人流唔算太多，攞贈品都唔使點排隊；當然亦都因為晏，好多贈品都派哂，只係攞到好少嘢！

 

呢啲就係攞到嘅贈品，主要都係尿片多

之後行到 Nuk 個攤位，見到佢啲嘢好平好抵，於是同狐爸爸兵分兩路，狐媽媽排住隊等俾錢，狐爸爸就去搶購物品；今次買咗 2 盒乳墊，4 盒 nipple 清潔綿，2 盒 BB 口腔清潔綿，2 盒細綿花棒同 1 個海綿頭奶樽擦！另外仲用咗好平嘅價錢換購咗 1 盒儲物袋，1 樽細嘅洗奶樽液同埋 1 張多用途墊，全部夾埋都唔使 $300，仲有 1 條口水肩送！

 

呢啲係買嘅

呢啲係用好抵嘅價錢換購

買完 Nuk 嘢，就轉去思詩樂同 Goon 嘅攤位，見到思詩樂乾綿 $100／4 包再送多 40 片旅行裝，於是又買咗，但狐媽媽一心想買嗰 set gift set 就賣哂，真係可惜！

 

之後行咗去 Fisher-Price 嘅攤位，佢啲玩具全部做緊 75 折，其實都 ok 抵，但係都空手而回，乜都無買到！

就係咁行吓買吓睇攞吓贈品，玩到 8:00 先走，真係超攰呀！之後落咗銅鑼灣，因為狐爸爸想買個好啲嘅袋返工用，今日狐家一家 3 口都有收穫，滿載而歸！

 

 

狐爸爸同狐媽媽嘅新返工袋

今朝見有少少陽光，又幫狐 BB 洗嘢，今次係洗紗巾同沖涼毛巾！

 

紗巾同沖涼毛巾，啲紗巾變咗紅色，因為件浴袍甩色

以為今日唔會有雨落，點知行完 BB 展坐車返到沙田，個天開始落雨，仲要落到倒水咁，結果同狐爸爸被迫滯留咗喺隧道入面，等咗差唔多至少 30 分鐘先可以起行返屋企；睇黎狐 BB係貴人，一出門就招風雨，哈哈！

8 月之星生日飯 @ 金滿庭

話咁快又就到狐太生日，今日陳李氏約咗狐家去馬鞍山金滿庭食飯慶祝！

今日叫咗 7 個餸，有砂鍋雲吞雞，清炒菜心，賽磅蟹，肉鬆配蝦餅，雞，千層豆腐同埋炒飯；好豐富而且好好味，大家一路食一路傾，食到 10:00 就各自返屋企！

今日見陳太個肚已經落到好低，下次見面應該係謙謙仔出世喇，預祝陳太生產順利！

仁安產前講座第 4 堂《產前及產後運動》@ 31W3D

今日去仁安上第 4 堂產前講座，因為落大雨關係遲大到，上到去都已經過咗 7:30，媽媽們已經開始咗做熱身運動！

安定好哂，即刻跟住物理治療師做運動，其實啲運動同上次喺威記上嗰啲差唔多，只係多咗啲時間練習，主要都係拉吓，鬆吓啲筋，跟住做一啲舒緩腰痛嘅運動！狐爸爸覺得今堂運動堂好有趣又有用，仲問有無多幾堂上添！做完運動，雖然啲肌肉係好痛，但係感覺好似鬆咗，真係要返屋企做多啲先得！

做完產前運動，當然都有講少量產後運動，仲有 CD 送添！

 

今堂嘅 notes 同 CD

第 6 次政府產檢 @ 31W2D

話咁快又過咗 2 個禮拜，今日又返威院做檢查喇！

今日檢查時間係 9:30，一如以往，9:15 到去到交低覆診紙，磅重量血壓驗小便之後等叫名！今日又係等咗差唔多 1 個鐘先叫名見助產士；入到房問咗名，問狐 BB 有無郁，之後就上床度肚聽心跳！

助產士話肚長度啱週數，之後聽埋心跳問有無特別嘢，因為啱啱尋日右邊肚有少少扯住痛咗成日，助產士聽到即話狐媽媽點解唔入院睇吓乜嘢事，佢話如果下次再有痛就要即入院檢查，唔好當無事！

之後問一問助產士有關威記呢期食乜奶粉同埋走佬袋個 list，助產士話佢地會每 3 個月轉 1 次奶粉，所以未知到 10 月嗰陣會食邊隻牌子嘅奶粉！至於走佬袋個 list，佢話之前應該有俾過，佢再俾多次狐媽媽，不過望咗一眼佢個 list 好少嘢，唔知夠唔夠用！

助產士原本叫狐媽媽跟返 7 號個期覆診，點知又話呢個週數應該 2 個禮拜覆診 1 次，於是就俾咗 18 號再返黎覆診！

狐媽媽重量：62.2kg
狐 BB 週數：31W2D

今日又繼續幫狐 BB 洗衫，原來狐 BB 真係有好多衫！

 

狐 BB 第 3 批衫，呢邊好多都係獅子牌

 

另外呢邊係厚身衫！