朱古力凍餅（附食譜）

真係好耐無整過蛋糕，原本打算整木槺布甸俾狐家姐食，但無買煉奶；見老細蘇珊生日，於是決定用現有材料整個蛋糕賀佢生日！

搵咗好耐，終於搵到呢個朱古力凍餅係可以喺有限材料之中做到！

 

食譜：

 

A - Oreo 餅底

Oreo 餅　　　　　　150 克
牛油（溶液）　　　  40 克

B - 朱古力饀

朱古力粒　　　　　 200 克
砂糖　　　　　　　 65 克

做法：

 

先做 A，牛油座溶，Oreo 餅壓碎，混入牛油溶液，餅模加入牛油紙，將餅碎倒入再壓成餅，放入冰格雪凍

意大利芝士凍餅 Tiramisu（附食譜）

星期五係＂藍小姐＂last day，所以為佢準備 1 個 farewell 蛋糕，之前見佢要求咗幾次想食 Tiramisu，所以今次就整 Tiramisu 俾佢！

食譜：

A - 手指餅蛋糕（6 吋圓形模）

 

蛋白　　　　2 隻
砂糖　　　　30 克
蛋黃　　　　2 隻
低筋麵粉　　25 克
粟粉　　　　25 克

B - 咖啡糖水

即溶咖啡　　 5 克
砂糖　　　　 8 克
熱水　　　　 40 克
咖啡酒　　　 30 克

C - 蛋黃啫喱

魚膠粉　　　7 克（原先係 5 克，但係我有少少擔心，所以加多咗）
砂糖　　　　10 克
鮮奶　　　　40 克（屋企無鮮奶，所以用咗同等份量忌廉代替）
蛋黃　　　　2 隻

D - 芝士餡

意大利芝士 Mascarpone　　　150 克
忌廉芝士　　　　    　　　  　100 克
砂糖　　　　　   　　　　 　　20 克
淡忌廉（打起）　　　　　　　120 克
君度橙酒　　　　　　　　　　10 克
檸檬汁　　　　　　　　　　　1 茶匙

E - 餅面裝飾

可可粉　　　　　　適量
朱古力碎　　　　　適量

 

 

做法：

 

首先做咗 A 部份先，將低粉同粟粉過籂，將蛋白打至濃稠，加入糖打起至 10 成，再加入蛋黃拌勻，最後慢慢加入過咗籂嘅粉拌勻，再倒入餅模，以 180 度焗 30 分鐘至金黃色再轉用 150 度慢慢烘乾，出爐放涼再切成 2 片備用；再做 B ，即溶咖啡，糖同熱水拌勻，放涼，之後加入咖啡酒再拌勻備用；跟住 C，將魚膠粉，糖，忌廉同蛋黃隔熱水座溶備用；最後 D ，先打起淡忌廉至 6 成，將意大利芝士，忌廉芝士同糖打滑，加入淡忌廉打至鬆發，再加入橙酒同檸檬汁，蛋黃啫喱拌勻即成；將模用錫紙包好，圍邊，放入咭紙做底，之後放入 1 片手指餅蛋糕，掃上 1/2 咖啡糖水，倒入 1/2 意大利芝士，再放另 1 片手指餅蛋糕，掃上餘下嘅咖啡糖水及倒入餘下嘅意大利芝士，放入雪櫃雪至凝固，再加入 E 裝飾即成！

製成品

芒果芝士蛋糕 Mango Cheesecake + 芒果慕絲蛋糕 Mango Mousse Cake（附食譜）

因為阿 Sa 要求，加上聽日係狐細佬生日，所以今日又整蛋糕喇，之前整黎整去都係朱古力，所以今次嘗試整第 2 樣嘢，今次嘅主角係芒果，狐太仲 1 次過整咗 2 個添，1 個係 cheesecake，另 1 個係 mousse cake！

先講個 cheesecake，基本上狐太係跟林 c9 個食譜做架，只係個餅底唔係用消化餅做，用咗海綿蛋糕，另外加咗啲芒果肉喺個芝士餡到，個面又加咗 1 層芒果鏡面，味道好 good，唔太甜，係啲芒果略為酸咗啲，打咗折扣，同埋個海綿蛋糕唔知點解雪完有啲＂鞋＂身！

食譜：

A - 餅底

海綿蛋糕　　  　1 片

B - 芒果忌廉芝士

淡忌廉　　   　  180 毫升

忌廉芝士　　　  185 克

砂糖　　　　　 45 克

芒果果茸　　　 200 克

魚膠粉　　　　 10 克

熱水　　　　　 80 毫升

芒果（切粒）　 2 個

C - 芒果鏡面

芒果啫喱粉　　　36 克

水　　　　　　　80 克

魚膠粉　　　　　5 克

做法：

先製作 A ；之後到 B ，魚膠粉加入熱水再隔水座溶備用，忌廉芝士同糖打至滑身，之後加入芒果果茸打勻，分 2 次加入魚膠水拌勻成芝士漿；打起淡忌廉至 6 成，將芝士漿拌入淡忌廉輕手拌勻，加入芒果粒；再整埋 C ，魚膠粉加入熱水再隔水座溶備用，芒果啫喱粉加水開溶，再加入魚膠粉水；將模圍邊，放入 1 片海綿蛋糕，倒入芒果忌廉芝士加果肉，放入雪櫃雪至凝固；之後取出加入芒果鏡面，繼續雪至完全凝固，最後用芒果粒做裝飾即成！

製成品，芒果芝士蛋糕

至於個 Mango Mousse Cake，狐太就跟上次整 Chocolate Mousse Cake 嘅做法黎做，只係將朱古力轉咗做芒果茸，再加番鏡面同芒果裝飾就搞掂！

製成品，芒果慕絲蛋糕

同個芝士蛋糕一樣，個海綿蛋糕有啲＂鞋＂身，但係味道都幾唔錯，下次要修飾吓先得！

72% 維也納特濃朱古力蛋糕（附食譜）

前排買咗 1 本新蛋糕書，見佢啲蛋糕超吸引，再加上同事阿 Sa 要求，所以狐太今日跟書整蛋糕，今次整嘅係 72% 維也納特濃朱古力蛋糕！

之前整幾次海綿蛋糕都失敗，所以狐上上網搵教整海綿蛋糕嘅方法，結果俾狐太搵到 Vanlily 教整嘅海綿蛋糕，上次整 Chocolate Mousse 嘅時候都試過，真係好 good，所以今次再繼續用佢教嘅方法整！

食譜：

A - 朱古力海綿蛋糕（6 吋圓形模）

全蛋　　　　3 隻（合共 177 克）
砂糖　　　　60 克（呢個份量俾原食譜減少咗大約 10 克）
低筋麵粉　　55 克
可可粉　　　15 克
牛油　　　　35 克

B - 朱古力軟心

淡忌廉　　　     90 克
72% 朱古力　　175 克
牛油　　　　　 45 克
鮮奶　　　　　 60 克
君度橙酒　　　 10 克（今次我唔記得加）

C - 朱古力面

淋面朱古力　　　120 克

做法：

整咗 A 先，雞蛋先用 70 至 80 度嘅熱水座 15 分鐘，低粉同可可粉過籂 3 次，牛油座溶，將蛋同糖用高速打 1 分鐘，之後將個盆傾斜，繼續用高速打 3 分鐘打至蛋糊 9 成企身，之後放平番個盆，用中速繼續打，兼且一路打一路轉個盆，直至蛋糊 10 成企身（即係打到唔會流動為止），分 3 次加入已過籂嘅低粉同可可粉快手拌勻，然後再加入已溶化嘅牛油，倒入模，放入預熱咗嘅焗爐，以 170 度焗 25 分鐘，焗好之後趁熱將蛋糕倒扣放涼，之後再片成 3 至 4 片！

到 B ，牛油室溫放軟，朱古力隔熱水座溶，先將朱古力同牛油拌勻，之後分 2 次加入鮮奶同淡忌廉，再加入橙酒拌勻成軟心！

將模圍邊，放入 1 片海綿蛋糕，倒入 B 抹平，如此類推，放入雪櫃雪至凝固；之後取出倒 C，繼續雪至完全凝固即成！

今次個海綿蛋糕真係好 good，好鬆軟，不過唔知係咪狐太攪得唔勻，個蛋糕出黎 1 面升得好高，1 面少少升，變咗梯形，所以結局去咗頭尾 2 片，中間都只係分多 2 片；至於個朱古力軟心，其實都幾 ok ，不過唔知點解切蛋糕嗰陣，佢好似好脆咁，一切就斷開咗，唔知關唔關用嘅牛油事呢，如果轉第 2 隻軟身啲嘅牛油，又或者直情唔用牛油，唔知效果係點呢？等狐太下次試驗吓先；個淋面朱古力因為係現成，所以無乜問題，只係預少咗，所以份量唔係好夠！  

呢個就係 72% 特濃朱古力蛋糕，個樣都唔差呀，味道都 ok

朱古力慕絲蛋糕 Chocolate Mousse Cake（附食譜）

同事 GD 黎緊星期六生日，所以今日早啲收工返屋企整蛋糕賀佢生日，今次再整 Chocolate Mousse Cake（之前整過幾次都失敗，狐太要再挑戰）！

食譜：

A - 朱古力海綿蛋糕（7 吋圓形模）

全蛋　　　　 大約 78 克（1 大 1 細蛋）

砂糖　　　　33 克

低筋麵粉　　18 克

可可粉　　　16 克

牛油　　　　11 克

雲呢拿油　　1 毫升

B -  朱古力慕絲

淡忌廉　　　136 克

朱古力　　　136 克

淡忌廉 　　   218 克

砂糖　　　    14 克

魚膠片　　　14 克

熱水　　　　54 毫升

C - 朱古力鏡面

水　　　　   54 克

淡忌廉　　   41 克

砂糖　　　   95 克

可可粉　　   34 克

魚膠粉　　   5 克

做法：

先整 A 部份，將低粉同可可粉過籂 3 次，牛油座溶，將蛋同糖打起至 cream 狀，再分幾次混入已過籂嘅低粉同可可粉，然後再加入已溶化嘅牛油，加入雲呢拿油，倒入模，放入預熱咗嘅焗爐，以 170 度焗 20 分鐘（頭 5 分鐘以上下火焗，之後 10 分鐘調至下火焗，最後 5 分鐘以上火焗面至金黃色），焗好之後趁熱將蛋糕倒扣放涼！

跟住整 B ，魚膠片先用水浸軟，再加入熱水開勻，再隔熱水座溶，將 136 克嘅淡忌廉同朱古力煮滾離火，攪溶放涼，糖同 218 克忌廉打起至 8 成，加入朱古力漿，再混入魚膠水！

到 C 部份，將魚膠粉同糖拌勻，再加入水，加熱煮至沸點，加入淡忌廉同可可粉拌勻，熄火，跟住將材料過籂，放涼！

將模圍邊，放入海綿蛋糕，倒入朱古力慕絲，放入雪櫃雪至凝固；待凝固之後，可以倒入朱古力鏡面，繼續雪至完全凝固即成！

個海綿蛋糕可能因為份量少，所以又係薄薄 1 片，如果想做埋慕絲入面都有蛋糕，應該要將蛋糕材料加至 double 份量，狐太見佢咁薄，所以無飛底面，搞到個蛋糕有少少硬，下次少少都要飛底面先得！

至於個朱古力慕絲，狐太唔記得加糖，不過好彩啲朱古力甜甜地，所以就算無加到糖都 ok，但係狐太覺得啲魚膠粉好似多咗啲，下次可以減少番 1-2 克；個朱古力鏡面，狐太就減咗 10 克糖，即係用 85 克糖，唔使咁甜嘛！

總括黎講啲同事話個蛋糕好好食，唔太甜但係又好香朱古力味，GD 見到個蛋糕仲開心到喊添呀，都算成功呀，係個圍邊整得唔係太靚，搞到個蛋糕唔係圓形，要研究吓點樣先整到佢圓形先得！

呢個就係製成品喇！

朱古力瑞士卷（附食譜）

見到陳太整咗瑞士卷，狐太都想試吓，即搵食譜開工整！

食譜：

A - 朱古力海綿蛋糕

雞蛋　　　　3 隻
砂糖　　　　60 克（呢個份量已經俾原先少咗 10 克）
低筋麵粉　　30 克
可可粉　　　20 克
粟粉　　　　10 克

B - 朱古力忌廉

朱古力　　　80 克
忌廉　　　　80 毫升

做法：

先製作 A，將蛋放回室溫，低粉，可可粉同粟粉過籂 3 次，將蛋打散，分 2-3 次加入砂糖攪拌，之後隔水加熱並繼續攪拌，等到蛋糊加熱到 30-40 度（即係放手指入去係熱熱地嘅）就停止加熱，繼續打起蛋糊使其冷卻及打至 8 成企身！

分 3-4 次倒入籂過嘅粉類，每加入 1 次就轉動碗 1 次直至拌勻為止，之後將麵糊倒入加咗牛油紙嘅焗盤到，並以刮刀刮平麵糊；刮平之後，攞起焗盤再放回枱面，來回 2-3 次去除氣泡，之後放入已經預熱 170 度嘅焗爐入面焗 15 分鐘至面變成金黃色，完成之後取出放喺架到放涼，之後反轉並撕去牛油紙！

製作完 A，之後就製作 B，先座溶朱古力，再將忌廉倒入大碗之中，一邊隔水加熱，一邊加入座溶咗嘅朱古力攪勻；攪勻之後，將大碗放入冰水之中，再用打蛋器打發朱古力忌廉至 8 成企身！

將金黃色嗰面既蛋糕朝上放喺牛油紙上面，喺終點嗰邊斜切，再用刀背喺蛋糕面劃痕，由捲起嗰邊開始劃，漸漸拉開刀痕距離！將朱古力忌廉均勻塗喺蛋糕面，稍微攞起捲頭，用食指緊緊壓住海綿蛋糕並開始捲；捲好之後，將終點朝下，放入雪櫃發酵 15 分鐘，之後撕走牛油紙，將刀整濕就可以切蛋糕！

其實今次個瑞士卷都唔太完美，第 1 係太甜，狐太已經俾原先再減咗 10 克糖，但係都仲係好甜，下次再減至少 10-15 克！第 2 係狐太用刀劃蛋糕面嗰陣，明明係痕與痕之間應該越黎越闊，但係狐太劃到均等，所以唔係幾捲到！第 3 係應該要緊緊咁壓住個蛋糕黎捲，但係狐太無做到，所以結果出黎個瑞士卷好鬆散！第 4 就係切蛋糕嗰陣，狐太無整濕把刀黎切，所以個蛋糕好難切，又切得唔靚，下次要做好啲做靚啲！

鬆散朱古力瑞士卷，個樣好似日式飯團

歌劇院蛋糕 Opera Cake（附食譜）

今日係經理嘅生日，所以狐太專情整咗個歌劇院蛋糕賀佢生日！ 

食譜：

A - 朱古力海綿蛋糕（6 吋方形模）

全蛋　　　　 4 隻
砂糖　　　　88 克
低筋麵粉　　87 克
可可粉　　　15 克
牛油　　　　50 克
乳化劑　　　 8 克

B - 咖啡牛油忌廉

牛油　　　150 克
糖霜　　　 50 克
咖啡粉　　 12 克
水　　　　  8 克

C - 軟心朱古力

黑朱古力　 130 克
淡忌廉　　 130 克

做法：


先整 A 部份，將低粉同可可粉過過籂 3 次，將蛋同糖打起至 cream 狀，加入乳化劑，再分幾次混入已過籂嘅低粉同可可粉，然後再加入已溶化嘅牛油，倒入模，放入預熱咗嘅焗爐，以 170 度焗 20 分鐘（頭 5 分鐘以上下火焗，之後 10 分鐘調至下火焗，最後 5 分鐘以上火焗面至金黃色），焗好之後趁熱將蛋糕倒扣放涼，橫切成 7 片（去頭去底）！

再整 B，咖啡粉以水開溶，牛油同糖霜打至軟身，加入咖啡水拌勻！

最後整埋 C，黑朱古加隔熱水座溶，將淡忌廉拌入攪勻！

整好咗 A 至 C 後，就開始合併埋一齊，先放第 1 塊海綿蛋糕於正方形模入面，塗上 1 層軟心朱古力，再放第 2 塊海綿蛋糕，塗上 1 層咖啡牛油忌廉，重複以上動作，最後放最後 1 層海綿蛋糕，塗上 1 層咖啡牛油忌廉抹平，再淋上 1 層朱古加醬，放入雪櫃凝固即成，之後可以隨自己喜好加入裝飾！

其實呢個蛋糕好簡單，但係狐太都整咗 3 次先成功；第 1 次失敗嘅原因係因為狐太貪方便，用咗中筋麵粉整個海綿蛋糕，再加上無完全打起哂啲蛋，個爐本身個溫度又高得滯，狐太又開咗上下火，加上時間又稍為耐咗少少，結果出黎係底、面同邊都硬到成塊石頭咁！

第 2 次失敗嘅原因又係無打起啲蛋，今次啲蛋直情好似無打過咁，泡還泡，水還水；但係今次個蛋糕軟身啲，因為今次加咗少少自發粉，但係個底、面同邊都係硬哂！

經過咗 2 次教訓，再參考其他整海綿蛋糕嘅食譜，第 3 次狐太先跟以上方法去做，今次個蛋糕算好成功，係個面未熟哂，應該最尾嗰 5 分鐘開上火焗一焗，咁就應該好 perfect 喇，不過都唔緊要，反正個面都起咗唔要！

今次只係切咗 5 片，去咗頭，得番 4 片，結果要將所有咖啡牛油忌廉一次過塗哂同一片到，搞到個蛋糕超級難食，但係大家都話個蛋糕好好味，真係俾面！

另外＂藍小姐＂都預備咗另 1 個朱古力 cake 俾經理，仲訂咗 1 個超大嘅花籃送俾經理添，喺度祝經理生日快樂，身體健康，環遊全世界 ！

經理，兩個蛋糕同大花籃