1024 長洲遊

狐媽媽早排同同事傾開計，話無帶過兩位狐小姐去過離島；有見及此，今日即刻安排先去長洲行一轉，狐爺爺同狐嫲嫲都一齊參與！

兩位狐小姐學完畫畫就即刻坐巴士去中環 5 號碼頭，咁啱有班高速船就開，即買飛上船；坐咗大約 45 分鐘就到達長洲！

落咗船先喺碼頭附近 1 間海鮮檔醫肚，狐家一行 6 人叫咗個 2 人餐（包括煎三文魚扒，炒時菜，炸蝦同爆龍蝦）外加 1 碗蟹肉湯麵，盛惠 5 百幾蚊；食飽咗就向張保仔洞出發！

 

醫肚中

沿路都係吹吓海風，欣賞吓風景；

 

小型碼頭

 

 

張保仔洞標誌

 

之後行咗一段小山路就去到海邊既張保仔洞；可能呢期電視做緊張保仔，今日超多人去探張保仔洞，因為太多人加上山洞入口好細好窄，所以狐家無入去洞入面探險，只係到此一遊就算！

落番山之後就先休息一陣，嘆一嘆冰凍既能得利雪條就向東灘出發！沿路試食咗長洲出名既大魚蛋，什果同檸檬沙冰；食埋大大粒芒果糯米滋同榴槤糯米滋就到達東灘！

 

冰凍能得利雪條

 

長洲出名大大粒魚蛋

 

 

大大粒芒果糯米滋

兩位狐小姐喺沙灘玩得好開心；玩咗一陣狐家就坐船返中環打道回府！

兩位狐小姐今日玩得好開心，下次可以安排吓帶佢地去摸蜆！