讓座

由未有 BB 到而家有咗差唔多 6，7 個月，其實都預咗坐公共交通工具嗰陣未必會有人讓座；好似 Don Don 咁，個肚大到成個籮咁，唔使講都知佢係大肚婆，坐地鐵嗰陣居然可以無人讓座俾佢，何況狐媽媽呢啲個肚唔係好明顯嘅大肚婆！所以狐媽媽多數都會揀巴士坐，至少有位坐嘅機會俾地鐵高好多！

今日放工如常行去坐巴士，可能今日撞啱繁忙放工時間，啱啱上到車就無哂位坐；原本打算企就算，因為都只係 30 分鐘車程，應該頂得順無問題，好好彩有個女人見到狐媽媽又大住個肚，又攞住 2 袋嘢，佢好好心讓位俾狐媽媽坐，真係好感謝佢令到狐媽媽可以舒舒服服咁返到屋企，而佢自己就變咗企咗 30 分鐘！

其實當時架車係有一班後生仔（大約係 F.5 或者係 F.7），佢地見到狐媽媽嗰陣成班唔出聲，到呢位好心女人讓座嗰陣，佢地就扮無事無嘢繼續傾佢地嘅計，好似狐媽媽無上過車一樣；唉，點解而家啲年青人會咁樣，呢啲少少嘅社會觀念都無，雖然佢地感受唔到大肚嘅辛苦，但係他朝有一日，佢地老婆都會大肚，啲人唔讓座俾佢地老婆，佢地會點呢？狐媽媽一定要好好教導狐 BB，至少要有讓座俾有需要人仕嘅觀念先得！