打 1 歲針兼做評估

每個 BB 過咗 1 歲都要打四合一加肺炎加強劑，狐妹妹都唔例外！

今日一早就帶狐妹妹去健康院打針，雖然狐妹妹有咳，但無發燒都可以照打！

去到交低針咭同紀錄簿，等叫名磅重！狐妹妹有 8.92 公斤！

磅完重等見姑娘，今次 1 歲檢查主要都係睇下進食問題，講嘢方面，手指靈活等等！

狐媽媽因為少咗幫狐妹妹練習手指，狐妹妹喺測試中未能用手指公同食指攞起星星餅，要見醫生同 14 個月要返黎健康院做多次測試！到見醫生時，醫生再俾萬字夾狐妹妹，狐妹妹今次又能夠用兩隻手指攞起萬字夾，醫生話應該只係少練習，問題不大，不過都建議 14 個月返黎多次！

見完醫生就等打針，狐妹妹原本無喊，但因為被狐媽媽按住郁唔到，同埋拮咗兩邊大脾仔，大喊咗一陣自動收聲，黎緊只要留意住有無發燒就無問題，狐媽媽又要特訓吓狐妹妹啲手指仔先得！