自製豬肉乾（附食譜）

近來有好多朋友都玩自製豬肉乾，見佢地整得咁成功，搞到狐太都心郁郁想整埋一份，如果整得成功，狐太同狐老公年中都應該可以慳番唔少 ！  

之前見兔兔用免治豬肉整出黎嘅豬肉乾食落似潤腸，狐太嘗試再找尋其他食譜，見有網友教用枚頭瘦肉整，決定試一試！

今日早收工，即坐車去超市買魚露同蜜糖，之後再去街市買 200 克枚頭瘦肉攪碎，點知肉檔阿姐同狐太講話 200 克好少，佢咁講，唯有買 300 克喇，盛惠 $20，都叫 ok 喇！買好哂材料，當然即開工喇！

食譜：

枚頭瘦肉（攪碎）　　300 克
生抽　　　　　　　　1 1/2 湯匙
魚露　　　　　　　　2 1/2 茶匙
紹興酒　　　　　　　3 茶匙
砂糖　　　　　　　　60 克
蜜糖　　　　　　　　1 湯匙
鹽　　　　　　　　　1/8 茶匙

做法：

首先再用刀刴一刴，之後加入所有調味料同瘦肉一齊順同一個方向攪勻至起膠黏成 1 團，之後再肉碎放喺牛油紙上面，面頭舖 1 層保鮮紙，用木棍在保鮮紙上面來回壓勻啲肉餅，厚度大約 2 分厚；之後預熱焗爐 140 度，於肉餅放入，以上下火焗 15 分鐘，之後調高至 150 度再焗 15 分鐘；將肉餅攞出黎反轉，再以 150 度焗多 10 分鐘即成，放涼之後可以剪成一片片享用！

今次因為係第 1 次整，喺搞肉碎起膠嗰陣，唔係好知點樣先為之起膠，於是打去問兔兔，佢話只要攪到啲肉感覺好似好難攪得郁同埋好難分開，大約 10 分鐘到，咁就完成架喇！喺壓肉餅嗰陣，因為好求其咁放喺牛油紙到，加上張牛油紙唔夠大張，所以壓出黎奇形怪狀，足足分咗 4 次黎焗，下次唔好咁貪心，要壓得靚啲；另外因為唔記得買紹興酒，求其用咗廣東米酒代替，其實係咪都係同一樣嘢黎架呢？

呢個就係狐太整嘅豬肉乾喇，味道 ok ，不過狐太認為略為鹹，生抽可以減至 1 湯匙應該 ok；狐老公就話要咁樣先有味，不過狐老公都話有啲似臘腸喎，狐太又唔係好覺，只係知道幾好味，今次咁成功，以後可以唔使出去幫襯喇，又慳一筆 ！