林同學生日飯 @ La Bons Brasserie

尋日係林同學生日，今日約咗佢加一大班人一齊補祝！

今次食意大利菜，間餐廳叫 La Bons Brasserie，係迪迪仔介紹架，佢之前好似食過，覺得幾好味，所以今次介紹俾大家！

一行 8 人 7:30 到達餐廳，間餐廳裝修得幾 ok，接待處好闊落，之後經過一條走廊就入到食嘢位，每 1 張餐枱都放咗蠟燭，幾有氣氛！

大家坐低咗之後，就即刻攞住本 menu 研究，可能大家都肚餓喇！佢有幾個 set dinner，有餐前麵包，餐湯／沙律，main course，餐飲，價錢都 ok，唔太貴，加錢仲可以有甜品食添，有 cheese cake 或者係佢地出名嘅心太軟！

大家揀定自己想食嘅嘢就落 order，好快餐前麵包同餐湯／沙律就黎到喇，佢有兩款麵包，熱熱地又軟，幾好味，餐湯係甘荀忌廉湯，都唔錯架！

食完頭盤，另外再 order 1 碟煙肉芝士薯條，都 ok，如果佢再熱啲，啲芝士溶溶地，咁仲好味！

食完薯條，就輪到大家既 main course 喇，狐太同迪迪太就點咗香煎＂魚立＂魚配意大利飯；狐老公同朱仔太就點咗羊架；另外 4 位男仕就點咗牛扒！啲 main course 味道都幾唔錯，係個廚師控制火候差啲，但係都 ok！

食飽 main course，點完餐飲就點甜品；狐太當然係點咗好出名嘅心太軟；迪太同昌昌就點咗 cheese cake！齋睇個心太軟就覺得佢好味，一切開個心太軟，嘩，佢啲朱古力漿係咁流出黎，即刻食，好味道；至於個 cheese cake，昌昌話味道都幾好，啱哂佢！

大家食飽飽吹咗陣水就散喇，喺去坐車途中，經過馬會，咁啱開緊彩，結果 8 個人齊齊就入去馬會對號碼，個個每人手上都有 1 張六合彩，場面好搞笑，可惜 8 個都無人中到嗰 $3 千萬 ！

個接待處幾靚幾大

本 menu 幾靚

好味嘅麵包

沙律

甘荀忌廉湯

小食，煙肉芝士薯條

香煎＂魚立＂魚配意大利飯

狐老公同朱仔太 order 嘅羊架

4 位男仕 order 嘅牛扒

Cheese cake

出名嘅心太軟

睇吓，啲朱古力漿流緊出黎呀，係咪好想食呢

喺度補祝林同學及預祝朱仔生日快樂 ！