給 BB 買禮物 (15)

尋日探完哈林仔，見到佢有個好正好得嘅睡眠籃，返到屋企即刻做資料搜集，睇吓邊度有得賣類近嘅籃！

大 Ka 媽媽個籃係喺大型親子中心到買嘅，都買咗一段時間，咁啱 search 到有另 1 個牌子都有類近款式嘅籃，價錢都可接受，於是心急媽媽決定今日拉狐爸爸出去買！

個籃真係好 good，方便移動又慳位；當行出行入可以帶埋 BB 同個籃一齊出入！如果地方淺窄無位放 BB 床，又可以暫時用呢個籃當床仔俾 BB 瞓，仲可以放喺任何位置添！

雖然個款式好類近，但係大 Ka 媽媽嗰個穩陣啲，因為佢個底係硬膠，而狐媽媽買呢個款式個底係軟身嘅，狐爸爸同狐媽媽都擔心佢承托力唔係幾好，不過既然都買咗，應該問題不大，希望狐 BB 啱用喇！

 

安全睡眠籃

 

未打開之前嘅樣，幾慳位

 

打開之後嘅樣

另外決定咗如狐 BB 要補奶粉，就食日本雪印，狐媽媽仲發現到旺角有間特約經銷商賣得幾平；如果狐 BB 啱食的話，就即刻大量入貨！

 

雪印奶粉

探訪哈林仔

上星期探完謙謙仔，今日輪到去探哈林仔喇！

大約 3:00 幾上到大 Ka 媽媽到，咁啱哈林仔食飽飽換完片片瞓緊覺覺豬，就同夏雨爸爸同大 Ka 媽媽吹水，期間哈林仔醒咗一陣，耍完一大輪拳之後又瞓過，真係好搞笑！

交換完一輪心得之後，5:00 到就走人出新城市行街，喺度再次祝哈林仔快高長大，聽教聽話！

《坐月錦囊》講座 @ 36W4D

之前見到雪印將會舉辦有關坐月嘅講座，見好少聽有關坐月嘅嘢，所以就報名參加咗！

今日舉行嘅地點喺科學館，時間喺 7:00，去到講座已經開始咗一段時間，好彩仲俾入場，同埋又有禮物收！

頭 1 部份係由護士主講，都係講生產後嘅護理，之後就由陪月員珍姐講有關坐月嘅嘢，其實珍姐主要都係分享番一啲產後嘅湯水！

根據珍姐所講，媽媽們可以喺產前 1 個月開始 1 星期飲用一啲糖水例如腐竹糖水，芝麻糊或者係白蓮鬚！珍姐仲教咗點煲白蓮鬚添！

白蓮鬚糖水

食譜：

白蓮鬚　　5 錢
雞蛋　　　1-2 隻
冰糖　　　適量

做法：

 

先烚蛋，之後將白蓮鬚用 3 碗水煲埋 1 碗水，加入冰糖，放入雞蛋即可飲用

珍姐仲介紹幾款唔同嘅湯水俾媽媽們，分別有生產前幫助上奶嘅湯水；過咗 12 朝後進補之前飲用嘅去濕湯水，1 款健脾湯水，1 款上奶湯水同埋夏天同冬天生產後嘅進補湯水！
珍姐真係有好多湯水介紹，可惜今日時間有限，睇黎真係要搵搵佢本書幫吓手先得！

今日撞到狐爸爸個同學詠，之後仲一齊喺尖東食飯，佢帶咗狐爸爸同狐媽媽去 1 間專食豚肉嘅舖頭，佢個薄燒豚肉飯真係幾好食，反而厚燒就無咁吸引，希望下次有機會再食過！

 

今日嘅禮物

第 8 次政府產檢 @ 36W1D

今日又返威記產檢，因為有得照超聲波，所以狐 99 陪狐媽媽一齊去！

今日照超聲波其實主要都係再睇吓搵唔搵到個子宮肌瘤，結果都係搵唔到！另外助產士亦都幫狐媽媽度埋胎位，胎水同狐 BB size；胎位無問題，胎水夠，size 幾好，應該係中碼 B！助產士為咗安全起見，再用陰超照多次確認搵唔到個肌瘤！

照完超聲波，之後就等見醫生，等咗 2 個鐘先有得見醫生；其實見醫生都係講番頭先照超聲波一切正常，講番因為照唔到個肌瘤，當佢無嘢唔會阻礙生產，順產應該無問題！

另外問番醫生關於近排肚底痛嘅問題，醫生答話係正常嘅肌肉或者係神經痛，醫生仲話反正過埋呢個禮拜都足月，基本上隨時生得，只係講如果一有痛就坐低休息，既然醫生咁講，唯有繼續忍痛直到狐 BB 出黎為止！

因為無乜特別大問題，醫生再約 2 個禮拜後覆診；另外亦都俾咗催生日期就走得！

狐 BB 希望妳等狐媽媽放假之後先好出黎，最理想就梗係中秋翌日喇，乖乖地等到到時先出黎呀！

狐媽媽重量：64.2kg
狐 BB 週數：36W1D
狐 BB 重量：5 磅 6 安士

給 BB 買禮物 (14)

狐 BB 星期六收完好多禮物之後，今日又有禮物收！

今次嘅禮物由陳爸爸同女皇送出，陳爸爸送咗啲沖涼玩具俾狐 BB；至於女皇就送咗 1 條粉紅色嘅裙仔，好 sharp 好靚，真係多謝哂大家送咁多嘢俾狐 BB，狐 BB 出到黎真係要逐一多謝咁多位哥哥姐姐，叔叔，姨姨！

 

陳爸爸送嘅沖涼玩具

女皇送嘅超 sharp 粉紅色裙仔

探訪謙謙仔

今日約埋李姚氏同車厘一齊去探謙謙仔！

上到去正值謙謙仔“食飯”時間，可能都只係啱啱過咗 12 朝，所以謙謙仔都係以瞓覺為主，一路食一路瞓；而且如果佢瞓著咗，就算好多人喺度傾計佢都可以唔醒，勁！

謙謙仔勁似大明，連手指腳指長長呢樣都似大明，喺度再次祝謙謙仔快高長大，聽教聽話！

Baby Shower Party

今日同事們為狐 BB 舉行咗 1 個 Baby Shower Party！初時佢地夾埋狐爸爸一齊瞞住狐媽媽，諗住俾個驚喜狐媽媽；但狐媽媽好叻，好快知道咗呢個 party ！

今日真係好多謝一班同事包括 Y Lam，花灑同佢 2 位外甥女，愛美麗，啤酒沈，雲迪，Sa 媽同佢囡囡蘇怡，Fra Fra，“藍小姐”同埋 S Wong 為狐媽媽同狐 BB 安排呢個 party！

 

Party 場地佈置咗好多狐媽媽至愛嘅史奴比

 

 

 

幾靚，幾多史奴比

 

 

連杯碟都係史奴比呀

除咗有豐富嘅食物之外，佢地仲特別為狐媽媽安排咗一啲遊戲同 BB 有關；例如叫同事估吓狐媽媽肚圍有幾多，估唔到啤酒沈同狐媽媽而家肚圍一樣呀，狐媽媽仲講笑話佢“預產期”應該同狐媽媽一樣！仲有估卡通人物，狐媽媽同狐爸爸有少部份真係唔知佢地係邊個，不過都估中咗 8 個！另外又鬥快用奶樽飲益多多，狐爸爸事後同狐媽媽講原來用奶樽飲嘢要用好多力，好辛苦架！仲有鬥快估尿片上面嗰啲係乜嘢朱古力，啲朱古力整到好似“便便”咁，不過大家都好落力去聞去估！仲有鬥快用尿布幫公仔包尿片，估唔到係咁難架，後黎雲迪記起包尿布嘅方法，佢示範咗 1 次俾大家睇，真係大開眼界！

 

豐富嘅食物，之前仲有啲 snacks 添

 

用奶樽飲益多多遊戲

 

 

雲迪示範緊包尿布方法

 

完成喇

 

估朱古力“便便”遊戲

食飽飽同玩完遊戲，佢地仲安排咗個史奴比蛋糕俾狐媽媽添，大家仲送咗好多禮物俾狐 BB，今日真係大豐收，到出黎之後真係要好好多謝咁多位姐姐，姨姨同叔叔呀！

 

史奴比蛋糕

 

大家送俾狐 BB 嘅禮物

 

S Wong 送嘅枕頭同包被

 

雲迪送嘅暖壺同飯壺

 

Fra Fra 送嘅鞋仔同公仔

 

啤酒沈送嘅玩具車仔

今日真係玩得好開心，多謝哂咁多位同事咁有心思嘅安排，亦都代狐 BB 多謝大家！

另外狐 62 同狐 99 上黎繼續煲薑醋，狐 99 仲帶多 3 斤薑上黎加落去添！另外敏姨婆亦都送咗啲衫仔，帽仔同襪仔上黎，狐 BB 又有好多衫著喇！

 

敏姨婆送嘅衫仔，帽仔同襪仔

另外狐媽媽買咗薑味洗頭水同沖涼液坐月時用！

 

薑味洗頭水同沖涼液