肌瘤跟進

尋日再去睇醫生，不過今次係睇婦科醫生，因為上次只係睇普通科，個醫生解釋得唔夠詳細，經毛毛介紹，去見佢睇開嘅婦科醫生！

準時 3:30 去到診所，等咗一陣就入去見醫生，先講咗 1 次有乜嘢問題，之後醫生就幫狐太照陰超！醫生先望完，之後佢就俾狐太睇肌瘤喺邊個位置；照完之後，佢再詳細解釋俾狐太聽而家嘅情況！

醫生話狐太個肌瘤同上次照喺數字有少少出入，但係都唔係太大問題，而佢身處喺子宮頂，如果佢唔大的話，應該對生育無乜影響，不過醫生都建議狐太農曆年前再去照多次，以確定個肌瘤真係唔會長大先好計劃生育！

另外醫生特別指明叫狐太千萬唔可以飲豆漿，而且亦都要謝絕所有補品以及中醫治療，以免個肌瘤有任何變化；至於＂打針雞＂同狐太至愛嘅豆腐，醫生亦都建議儘量唔好食太多，其他都可以照食！

今次費用連埋化驗總共 $1000 大元，價錢都合理，至少狐太得到專業意見，個心都定番啲，希望 3 個月後再去照嘅結果令人滿意，咁就真係安樂哂喇！