又過咗 1 個月時間，今日又係見狐 BB 嘅時候！
今日先黎驗小便，之後磅重同量血壓，之後就等叫名見醫生！
醫生幫狐 BB 照吓頭仔，腿骨，背脊骨，手仔，腳板仔，肚仔，聽吓心跳，仲見到狐 BB 正面添，不過狐媽媽真係睇唔明！所有嘢都好正常，醫生話符合週數！
因為無乜大問題，所以醫生約咗 5 星期之後再返去產檢，隔成個月有多先再見到狐 BB 喇，唔知到時狐 BB 去到幾大同埋有幾重呢？
狐 BB 週數：17W2D
狐 BB 重量：202g
頭
心跳
背脊骨
手仔，見到手指
腳板仔，今次比起上次大隻咗好多
腿骨，有 2.5cm 長呀，唔知會唔會係長腿 BB 呢？
肚仔，好圓好大呀
呢個就係狐 BB 正面喇，真係要好有想像力先得，同埋覺得佢似 ET
今日狐爸爸同狐媽媽又出動去為狐 BB 購物喇！因為早前成為咗 BB care VIP，佢地今日有個產前講座加 VIP 購物日！
今日嘅講座都幾有用，分別係教媽媽們點執走佬袋，BB 袋等；另外要預備啲乜嘢用品；之後又有 1 個換尿片實習班，狐媽媽學識咗點樣換片片！
聽完講座就去購物喇！今日 VIP 買思詩樂乾綿同濕紙巾平均只需要大約 $22 1 包／1 盒，每對夫婦只限買 4 包／ 4 盒，見咁抵當然即去搶購；另外見到佢隻日本尿片大約 $58 1 包，又係每對夫婦只可以買 2 包，反正都要用，所以又買埋；見到有 BB 專用清潔細棉花棒，又係需要用，所以又買咗 2 盒；另外仲買咗 1 盒乳墊同 1 包網褲，再攞埋 cordlife 同惠氏嘅禮品包，成個講座 3:30 完結，之後返屋企放低啲嘢，跟住即 join 陳李姚氏一齊 BBQ！
日本 Goon newborn 尿片
思詩樂乾綿 4 包
思詩樂濕紙巾 4 盒
BB 專用清潔細棉花棒
乳墊同網褲
惠氏禮品包 - 初生奶粉 1 罐
Cordlife 禮品包
今日所有物品嘅大合照
今日好開心呀，因為買咗好多嘢俾狐 BB 呀！
今日同狐老公約咗夏氏先去聽講座，講座由牛欄牌舉辦，而舉辦地點係喺逸東酒店，呢個講座主要都係講產前檢查同埋分娩過程嗰啲！個講座由 2:00 開始，大約 4:00 到完結！
講座送咗少少禮物，有毛巾仔，手套仔，原子筆，BB 洗頭水 sample！
講座完咗之後同夏氏去咗揀佢地新屋嘅牆紙！買完牆紙，夏雨同狐老公先返沙田攞車，狐太同大 Ka 就向花園街進發，為 BBs 購物！
狐媽媽今日為狐 BB 買咗超多嘢呀，買得真係好開心呀，而且好在有大 Ka 媽媽喺度，佢俾咗好多意見狐媽媽呀，話咗俾狐媽媽知大約需要買啲乜，大約要買幾多！
俾大家睇睇狐媽媽嘅戰利品先，首先有包被，根據大 Ka 媽媽嘅資料，佢話大約要買 2 張薄包被同 2 張厚包被，狐媽媽即買咗 1 厚 2 薄！
黃色鴨仔係厚包被，又厚又軟，一見傾心；兔仔同長頸鹿就係薄包被，長頸鹿又係一見傾心！
跟住買咗 2 個枕頭仔，黃色嗰個又係好可愛，又即買
之後買咗 9 件短嘅和尚袍，5 件有公仔嘅，4 件無公仔嘅
跟住又買咗 1 件有腳嘅和尚袍
另外又買咗薄嘅長袍 2 件
厚嘅長袍又係 2 件
跟住有薄身連腳衫 2 件
厚身連腳衫 3 件
1 件背心仔，1 包紗巾同埋 1 pack 襪仔
今日簡直可以用滿載而歸黎形容呀，期待下次再同大 Ka 媽媽一齊買嘢！
今日第 1 次返威記做產檢，時間約咗上晝 9:00，狐媽媽 8:45 就去到，今日超多祖國同胞呀！
先去登記處報到，之後就去度高磅重量血壓！度好哂之後到驗小便，做好哂就坐喺度等叫名見助產士！見助產士主要都係問番一啲基本問題同資料；見完助產士又等叫名再見醫生！
見醫生都主要係睇番之前嘅 record，之後又係聽一聽狐 BB 心跳；之後助產士再約下次覆診時間，佢地安排咗狐媽媽之後產檢都返威記，唔使返健康院；今日嘅檢查 10:30 就搞掂喇，好快呀！
狐 BB，雖然今日見你／妳唔到，不過下星期又可以見喇！
狐媽媽重量：53.3kg
狐 BB 週數：16W2D
喺未有 BB 之前，狐媽媽成日都覺得當有咗嗰陣，狐媽媽一定會買好多好多參考書睇；到而家真係有咗，竟然 1 本都無買過黎睇；聽日又係一年一度嘅秘書節，今日提前收到 Y Lam 送俾狐媽媽嘅禮物，就係 1 本媽媽書，多謝 Y Lam 呢份禮物！
Y Lam 送嘅禮物 - 媽媽書
一連 5 日嘅復活節假話咁快就完結咗，等狐太回顧吓呢個假期做咗乜先！
4 月 1 日
狐老公就黎生日，所以林同學佢地約咗今日同狐老公慶祝，大家去咗 Shakey's Pizza 到食，呢間嘢啲嘢食都幾好味， 9 個大人加 1 個小朋友叫咗好多嘢食都係每人大約 $100，好味，有機會要再去食，多謝哂咁多位同狐老公慶祝同請食飯！
4 月 2 日
今日係狐太婆生日，日頭都係喺屋企休息吓，夜晚先過大埔同狐太婆慶祝食飯！喺度祝狐太婆生日快樂，身體健康！
4 月 3 日
今日為 3，4 月之星慶祝生日，下晝陳李姚氏上黎打牌打機，夜晚去咗第一城盈輝打邊邊，盈輝無以前咁好食喇；因為唔夠時間，如果唔係買餸黎打會正好多！喺度祝 3，4 月之星生日快樂！
4 月 4 日
今日係狐老公正日生日，生日快樂！今年因為有咗狐 BB，所以無特別安排節目，加上狐老公呢個假期病咗，所以日頭又係喺屋企休息，夜晚出吓街行咗一陣，食咗個普通飯就返歸休息！
4 月 5 日
今日休息日
4 月 6 日
今日係假期最後 1 日，之前喺 BK 到見到話將軍澳有間舖頭賣嘅 BB 嘢好平，今日同狐老公去咗睇吓！呢間舖頭果然比出面稍平；經過一輪商議之後，今日拍板買咗 BB 車，high chair 同埋沖涼盆，另外加個奶樽刷，所有嘢會喺 5 月頭送黎，老闆娘仲好好人送咗多咗乳墊俾狐媽媽添！
夜晚返咗狐婆婆到食飯，狐姨媽喺台灣買咗 2 對小襪仔俾你／妳添呀，好可愛架，睇吓狐姨媽幾錫你／妳；其實狐姨媽仲想買好多嘢俾你／妳架，不過未知你／妳係男定女，所以唔敢買嘢住，如果狐姨媽知道你／妳係男定女之後，一定會買大量嘢俾你／妳呀！
今個假期都算過得充實！
奶樽刷同埋乳墊
小襪仔
今日又係產檢嘅時候喇，又可以見到狐 BB 喇，不過今朝狐媽媽見頭暈呀，所以留喺屋企休息！
休息咗一個上晝終於好少少喇，下晝去見醫生，今日主要係照吓超聲波，睇吓狐 BB 而家個生長情況！
狐 BB 今日身長有 6.48cm ，醫生仲周圍照吓，又照吓佢個頭仔，狐 BB 又擰轉咗個頭；跟住又舉起隻手仔，醫生仲照埋佢隻腳板仔添，好可愛；狐 BB 今日一切正常！
狐媽媽要 21 號政府產檢先可以再見到狐 BB 喇，加油呀，繼續快高長大呀！
狐 BB 週數：13W2D
狐 BB 身長：6.48cm
頭仔
腳板仔
2 隻手
心跳
今日先同狐老公去咗聽 BK 舉辦嘅講座，今次舉行講座嘅地點係喺會展，由 1 位營養師同 1 位婦科醫生主持！
講座舉行咗 2 個半鐘，主要都係講孕婦要注意嘅飲食，要吸收嘅營養等等，之後就講吓懷孕初，中，後期同生產嗰時要注意嘅嘢等等；聽完都多咗認識又有禮品攞，真 good！
今日收到嘅禮品，有尿片，紗巾，媽媽奶粉，兒童牙膏，護髮素同牙刷
聽完講座，夜晚狐老公過咗紅磡去聽狐太一直都好期待好想去嘅＂醫神＂演唱會！原本 2 年幾前已經有機會聽架喇，不過因為嗰時太接近婚期，所以嗰次就無緣去欣賞喇！
今次有得去聽真係好開心，但係之前有報導話＂醫神＂患咗感冒，把聲都沙哂，表現有啲失準，希望無影響到今日既表演喇！
準時 8:00 幾去到，演唱會喺 9:00 正式開始，全場都好興奮，＂醫神＂換咗 4，5 套衫，唱自己嘅歌又有唱其他歌手嘅歌，仲自彈結他添呀；雖然佢把聲都仲未係最好，有走音同埋有啲高音位去唔到，但係狐太覺得呢個演唱會真係好好睇；而且今日仲係 at17 嘅 Ellen 生日，二汶仲扮工作人員為 Ellen 送上生日蛋糕添，之後＂醫神＂仲帶領全場萬幾位觀眾一齊為 Ellen 唱生日歌添，場面真係好壯觀呀！
至於狐 BB 成晚都好靜靜咁聽＂醫神＂嘅歌，唔通佢覺得係催眠曲，所以狐媽媽可以好舒服咁睇成晚演唱會，睇黎狐 BB 對音樂無乜興趣！
